አዲሶቹ የአዲስ አበባ ሀ/ስብከት የሥራ ሐላፊዎች ከገዳማቱና አድባራቱ ሐላፊዎች ጋር ትውውቅ አደረጉ

Photo by Kidu

በአዲስ መልኩ የተመደቡት የጽሕፈት ቤቱ የሥራ ሐላፊዎች ከአንድ ሳምንት በፊት በሀገረ ስብከቱ የዋና ክፍል ሐላፊዎችና የሥራ ባልደረቦች እንዲሁም በክፍላተ ከተሞች ሠራተኞች አቀባበል የተደረገላቸው ቢሆንም በቀን 11/2011 ዓ/ም ደግሞ ቅዱስ ፓትርያሪኩና ሌሎችም በርካታ ሊቃነ ጳጳሳት በተገኙበት ከአድባራቱና ገዳማቱ አስተዳደሪዎችና ጸሐፊዎች ጋር በሀገረ ስብከቱ የስብሰባ አዳራሽ የትውውቅ መርሐ ግብር ተደርጓል፡፡

በዚሁ የትውውቅ መርሐ ግብር ላይ መልእክታቸውን ያስተላለፉት የቅዱስ ፓትርያሪኩ ረዳት ሊቀ ጳጳስ ብጹእ አቡነ መልከጼዴቅ ²ቤተ-ክርስቲያን መሠረታዊ የሆኑ ፍላጎቶችን ለአገልጋዮቿና ሠራተኞቿ በሚገባ መልኩ የማሟላትና የማስተካከል ግዴታ አለባት ነገር ግን በአሁኑ ወቅት እንደሚታየው ለአምሮትና ለቅንጦት በሚል የስሜት መነሣሣት የቤተክርስቲያንን ሀብትና ንብረት መዝረፍ ግን ከነውርነቱም አልፎ ወንጀል ነው ብለዋል²፡፡

ከዚህም በተጨማሪ የሥራ አፈጻጸም ክንውናችን መዋቅሩን የጠበቀና ማዕከላዊነቱን ያገናዘበ አሠራር መሆን ይኖርበታል ይህም ተግባራዊ ከሆነ ሁሉም ሠራተኛ ሐላፊነቱን ስለሚገነዘብ አንዱ የሌላውን የሥራ ድርሻ ሊቀማ አይችልም ሲሉ የሀገረ ስብከቱ ዋና ሥራ አስኪያጅ የሆኑት ቆሞስ መ/ር አባ ሞገስ ኃ/ማርያም ደግሞ ²የተቀበልነው ሐላፊነትና የተሰጠን አደራ ከባድ ቢሆንም የተጠራንበት ዓላማ ግን ለመንፈሳዊ አገልግሎት ስለሆነ ከእናንተ ከአባቶቻችንና ወንድሞቻችን ጋር በመተባበርና እጅ ለእጅ በመያያዝ እየተናበብን ራሳችንን ከዘረኝነትና ጎሰኝነት በማጽዳት የተቻለንን ሁሉ እንሠራለን በማለት ተስፋ አዘል ንግግራቸውን አስደምጠዋል²፡፡

Photo by Kidu

በመጨረሻም ብጹእ ወቅዱስ አቡነ ማትያስ በልዩ ሀገረ ስብከታቸው ውስጥ እየተከሰተ ስላለው መሠረታዊ ችግርና ስለ አዲሶቹ ሹማምንት አስመልክተው ²ከጥቂት ደቂቃዎች በፊት ሁለቱም ሹማምንት ያስተላለፉት መልእክት ተስፋ አዘልና ብስለት የሚታይባቸው በመሆኑ እንድትቀበሉልኝ እፈልጋለሁ ፤የሀገረ ስብከታችን ችግር በአንድ ቀን ተነጋግረነው የሚፈታ ጊዜያዊ ችግር ሳይሆን ተቀምጦ ሰፊ ውይይትን የሚጠይቅ ዘርፈ ብዙ ተግዳሮት አለበት፤ስለሆነም በየጊዜው እየተገናኘን መምከርና መወያየት ይኖርብናል፡፡ የተስፋ ጉዟችንንና የቤተ-ክርስቲያናችንን ሁለንተናዊ ልማት የሚያደናቅፉ በርካታ ናቸው እነዚህ መደናቀፎች ደግሞ ለቤተ-ክርስቲያናችን ከፍተኛ ጠንቆች ስለሆኑ በጸሎትና በጾም ልንዋጋቸው ያስፈልጋል፡፡

በቤተ-ክርስቲያናችን ሥርዓተ ሕግ መሠረት የዓቢይ ጾምን ወይም ጾመ-ኢየሱስን ለመቀበል በዝግጅት ላይ እንገኛለን፡፡ በዚሁ ታላቅ የቤተ ክርስቲያናችን ጾም ራሳችንን በእግዚአብሔር ፊት በማስገዛት ስለ ቤተክርስያናችን ብሎም ስለ ሀገራችን  አብዝተን ልንጸልይና ልንማጸን ይገባናል፤ ያለንበት የእኛ ዘመን ተኝቶ የሚያሳድር ሳይሆን  መጾምና መጸለይን እንዲሁም መተባበርን አብዝቶ የሚጠይቅ ክፉ ዘመን ነው፤በርከታ ምዕመናን እየተዘረፉብን ነው ያለነው ይህንን ዝርፊያ አሜን ብለን በጸጋ ልንቀበለው ፈጽሞ አይገባም በሁሉም ነገር ጠንክረንና ነቅተን መንጋችንን ልንጠብቅ ይገባናል በማለት ንግግራቸውን ቋጭተዋል፡፡     

   በመሆኑም የሀገረ ስብከታችንን ዘርፈ ብዙ ችግሮች ለመቀነስ ብሎም ዘለቄታዊ መፍትሔ ለመስጠት  ቅዱስ ፓትርየሪኩ ያቀረቡት የእንወያይ ሐሳብ በእጅጉ መልካም ከመሆኑም በላይ በሠራተኞችና የሥራ ሐላፊዎች  መካከል ያለውን መራራቅ የሚያቀራርብ ወደ አንድነትም የሚያመጣ፤ለዘረኝነትና ጎጠኝነት እንዲሁም ለሙስናና ሙሰኝነት መስፋፈት ምክንያት የሚሆኑ አንዳንድ ክፍተቶችና አሠራሮች ላይ ግልጽ ውይይት በማድረግ መፍታት የሚቻልበት መሆኑን ከሌሎች መንግሥታዊም ሆነ መንግሥታዊ ካልሆኑ ተቋማት መማርና ተሞክሮ መካፈል ይቻላል፡፡

ከዚህ በመነሣት የጽ/ቤቱ የሥራ ሐላፊዎች  ከላይ እስከ ታች  ያለውን መዋቅራዊ አሠራር በመፈተሽ አፋጣኝ መልስ ለሚያስፈልጋቸውም ጥያቄዎች ተገቢውን መልስ ለመስጠት ተቀራርቦ መሥራቱና መወያየቱ አማራጭ የሌለው መንገድ መሆኑን ተረድተው በሥራ ላይ ቢያውሉት መልካም ነው እንላለን፡፡

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *