ለአዲስ አበባ ሀገረ ስብከት የሥራ ሐላፊዎች ደማቅ አቀባበል ተደረገላቸው

የአ/አ/ ሀ/ ስ/የፓ/ረዳት ሊቀ ጳጳስ ብጹእ አቡነ መልከጼዴቅ እና ዋና ሥራ አስኪያጅነት መ/ር አባ ሞገስ ኃይለ ማርያም

ለአዲስ አበባ ሀገረ ስብከት የፓትርያሪኩ ረዳት ሊቀ ጳጳስ ሆነው የተመደቡት ብጹእ አቡነ መልከጼዴቅ እና በዋና ሥራ አስኪያጅነት የተመደቡት መ/ር አባ ሞገስ ኃይለ ማርያም በሀገረ ስብከቱ የዋና ክፍል ሐላፊዎችና የሥራ ባልደረቦች እንዲሁም የክፍላተ ከተሞች ሥራ አስኪያጆችና ሠራተኞች በተገኙበት በሀገረ ስብከቱ የስብሰባ አዳራሽ ዛሬ የካቲት 2011ዓ/ም ከጠዋቱ 4 ሰዓት ደማቅ አቀባበል ተደርጎላቸዋል፡፡

በሀገረ ስብከቱ ምክትል ሥራ አስኪያጅ መጋቤ ጥበባት ምናሴ ወልደሐና የተመራው የአቀባበል መርሐ ግብር ከሌሎች ጊዜያት የአቀባበል ሥርዓት መረጋጋት  የታየበት ሲሆን በብጹእነታቸው ጸሎት ተጀምሮ የዋና ሥራ አስኪያጁን መልእክት ያስከተለ ሲሆን የሀገረ ስብከቱ ዋና ሥራ አሰኪያጅ  መምህር አባ ሞገስ ኀይለ ማርያምም ሕግ ይወጽእ እምጽዮን በሚል  የመነሻ ሐሳብ ነገሥታት ሕዝባቸውን የሚመሩበትን ሕግ አውጥታ፤ የሰጠች ቤተክርስቲያናችን ለራሷ የሚሆንና ራሷን የምታስተዳድርበት ሕግም አላት፤ ለመሪዎች ስኬታማነት የተመሪዎች ሚና ቁልፍ ጉዳይ ነው ይህም ከተተገበረ ተመሪዎች ወደ መሪነት የማያድጉበት ምንም ምክንያት የለም፤ የየመምሪያውና የዋና ክፍል ሐላፊዎች ለተመደባችሁበት ቦታና ለተቀበላችሁት ሐላፊነት ሥራ አስኪያጆች ናችሁ  ስለዚህ ሕግን በማክበር ከዘር፥ ከአካባቢና ከቋንቋ አድሎኝነት በጸዳ መልኩ አብረን በጋራ እንሠራለን፤ ጎጃም፥ ጎንደር፥ ትግራይ.፤ ጅማ፤ አሩሲ መልክዓ ምድራዊ አቀማመጥና ቦታ እንጅ እንደዚህ ዓይነት ሕዝብ የለንም ይህም የልዩነታችን ምክንያት ሊሆን አይገባም በማለት  የሀገርና የቤተክርስቲያን ወቅታዊ ተግዳሮት ስለሆነው ዘረኝነትና ጎጠኝነት ጠንካራ መልእክታቸውን አስተላልፈዋል ።

ከዚህም ጋር ተያይዞ ብጹእነታቸው እንግዲህ የእግዚአብሔርን ሥራ እንድንሠራ ምን እናድርግ (ዮሐ 6፤28) በጥብርያዶስ ባህር አጠገብ በተፈጸመው ታምራዊ ክስተት የእጁን በረከት የለመዱ ጥቅመኞች ሁልጊዜ ዳቦ ብቻ ፍለጋ ስለተከተሉት “እውነት እውነት እላችኋለሁ፤የምትፈልጉኝ እንጀራን ስለበላችሁና ስለጠገባችሁ ነው እንጅ ምልክቶችን ስላያችሁ አይደለም” ለሚጠፋ መብል አትሥሩ ነገር ግን ለዘላለም ሕይወት ለሚኖር መብል የሰው ልጅ ለሚሰጣችሁ ሥሩ፡፡ ብሎ ሲወቅሳቸው እንግዲህ የእግዚአብሔርን ሥራ እንድንሠራ ምን እናድርግ (ዮሐ 6፤28) የሚል ወሳኝ ጥያቄ ማንሳታቸውን አስታውሰው የአገልጋይ የመጨረሻው ተስፋ እንጀራ ወይም መብል ሳይሆን የሕይወት አክሊል ነው፡ የእግዚአብሔርን መለኮታዊ ፈቃድ የማይቃወም አካሄድና ሥራ ሊኖረን ያስፈልጋል፤ ዛሬም በእኛ ዘመን ጥያቄው ቀጥሎ የእግዚአብሔርን ሥራ እንድንሠራ ምን እናድርግ ልንል ደግሞም ለተጠራንበትና ለተመረጥንበት መሠረታዊ ጥሪ ልንኖር ይገባል ለዚህ ደግሞ ትህትና ፤እውቀት፤ የዋህነትና መንፈሳዊ ሕይወት ያስፈልጋል፡፡

የጥሪውን መልስ ለመስጠት ደግሞ የቃላት ቅመማ ወይም ብልጣብልጥነትና  የቲዎሪ ብዛትም አያስፈልግም ይልቁንም እነዚህ ዘመን ያለፈበት አሮጌ ሕይወት መሆኑን ተረድተን በዕለት ከዕለት ተግባራችን ጥሪውን እንመልስ ባለን ቆይታ በግልፅ እንነጋገር እናውራ እንመካከር የፈሪሳውያንን ጠባያትም እናስወግድ፤ የውሸት መወድስና ቅኔም አናብዛ ፤የእኛ ተልእኮ ዓለምን ማግባበት ወደ አንድነትም ማምጣት እንጅ የትርምስ የመሸነጋገልና የመለያየት መሆን የለበትም፤ ዛሬ በቤተ-ክርስቲያናችን እየታዩ ያሉት ሰላማዊ ሰልፎችና የተቃውሞ መፈክሮች በአገልጋዩ ጥሪውን አለማክበርና በአስተዳደራዊ ክፍተቶች ቢሆንም ለቤተክርስቲያናችን ግን ጉዳት እንጅ ጥቅም አይደለም ስለሆነም የሥራ ክፍፍል ማድረግና ነጥሮ የወጣውን የቃለ ዓዋዲውን ሕግ ማስፈጸም ያስፈልጋል በማለት ንግግራቸውንና አባታዊ መልእክታቸው አጠቃልለዋል፡፡

በመጨረሻም ለእድምተኞች በተሰጠው የመናገር ዕድል የሀገረ ስብከቱ ትምህርትና ሥልጠና ዋና ክፍል ሐላፊ የሆኑት መጋቤ ሐዲስ ኃይለእግዚእ በተሰጠህ ሐላፊነት ላይ ብዙ ጊዜ አትቆይምና ቶሎ ቶሎ ዝረፍ የምንባልበት ጊዜ ላይ ነው ያለነው፤ ከአንድ ግለሰብ ጉቦ ተቀብሎ መብላት የግለሰቡን ደም እንደመጠጣት ይቆጠራል እንደዚህ ሊሆን አይገባም ከመስረቅና ጉቦ ከመቀበል ደመወዛችን እንዲጨመር መጠየቅ ነው ሲሉ፤ የነፋስ ስልክ ላፍቶ ክፍለ ከተማ ቤ/ክህነት ጽ/ቤት ሥራ አስኪያጅ የሆኑት መልአከ ጽዮን ቆሞስ አባ ኅሩይ ደግሞ በርካታ አቀባበሎችን አድርገናል ነገር ግን ልብን በሚሰብር የእግዚአብሔር ቃል መልእክት የተላለፈበት ልዩ ቀን ግን ዛሬ ነው፡ በአዲስ አበባ ሀገረ ስብከት ላይ ከፍተኛ ጣልቃ ገብነት አለ እነዚህ እየተከላከላችሁ የምትሰሩ ከሆነ ከአጠገባችሁ አለን በማለት ቃላቸውን ሰጥተዋል፡፡

ሌሎች ታዳሚዎችንም ባናገርንበት ወቅት በዕለቱ የተላለፉት አባታዊ መልእክትና መመሪያዎች የወደፊት የሀገረ ስብከቱን ትንሣኤ በተስፋ የሚያፈጥኑ፤በሰራተኛው ላይ እየደረሰ ያለውን የሥነ ልቦና ጉዳት የሚፈቱ ቢመስሉም ከሰኞ እስከ ዓርብ ያለውን የሥራ ሰዓትና ሰፊውን ጊዜ ለባለጉዳዮች ከመስጠት ይልቅ የክ/ከተማና የሀገረ ስብከቱን ሠራተኞች ወደ ማወያየቱ ካልመጣና የየዋና ክፍሎቹን ሥራዎች በሚመለከታቸውና የትምህርት ዝግጅት ባላቸው ወጣት የሰው ኃይል ካልተደራጀ አሁንም ቢሆን የለውጡ ጉዳይ አጠራጣሪ መሆኑን ተናግረዋል፡፡

የሀገረ ስብከቱ የሥራ ሐላፊዎች እነዚህንና ሌሎችም መሰል የሰሉ ሐሳቦችን ለማግኘትና ችግሩን ለማቃለል ተከታታይ የሆኑ ውይይቶችን ከሠራተኞች ጋር ማድረግና የሥራ ክፍፍል ማድረግ ጊዜ የማይሰጠው ጉዳይ ነው እንላለን፡፡
የሀገረ ስብከቱ ሚዲያ ክፍል መልካም የሥራ ዘመን ይሆንላችሁ ዘንድ ምኞታችን ነው፡፡

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *