የኮልፌ ቀራንዮ ክፍለ ከተማ ቤተክህነት ጽ/ቤት ስብከተ ወንጌልን አስመልክቶ በሥሩ ከሚገኙት ከገዳማትና አድባራት ስብከተ ወንጌል ሐላፊዎች ጋር ሰፊ ውይይት አደረገ

በአዲስ አበባ ሀገረ ስብከት ሥር የሚገኘው የኮልፌ ቀራንዮ ክፍለ ከተማ ስብከተ ወንጌልን አስመልክቶ  በስሩ ከሚገኙት የገዳማትና አድባራት የስብከተ ወንጌል ሐላፊዎች ጋር ሰፊ የሆነ ውይይት ያደረገ ሲሆን በስብሰባው ላይ የአንድነት ጉባኤ፣ የስብከተወንጌል ኮሚቴ  የሚጠበቅበትን ሥራ ለምን አልሠራም፣ ሥልጠናን እንዴት እንስጥ የሚሉት ታላላቅና ወቅታዊ የሆኑ አጀንዳዎች ተነስተዋል፡፡ አጀንዳዎቹ ለታዳሚዎቹ በክፍለ ከተማው የስብከተ ወንጌል ሐላፊ በመጋቤ ሐዲስ ዘለዓለም ቀርበዋል፡፡ መጋቤ ሐዲስ ዘለዓለም ጉባኤው እንዲካሄድ በተሰጣቸው ሐላፊነት መሠረት የራሳቸውን ትልቅ ጥረት አድርገዋል፡፡ በስብሰባው ላይ የክፍለ ከተማው ሥራ  አስኪያጅ መጋቤ ትፍሥሕት ግርማም ተገኝተዋል፡፡ የአንድነት ጉባኤውን  አስመልክቶ ችግሮችና የመፍትሔ አቅጣጫዎች ከሰባኪያኑ አንደበት ተደምጧል፤ ሰባኪያኑ በአንዳንድ አጥቢዎች ላይ መልካም የሆነ የአንድነት ጉባኤ እየተዘጋጀ የሚገኝ ሲሆን በአንዳንድ አጥቢያዎች ደግሞ እየተሠራበት እንዳልሆነ ተናግረዋል፡ በሌላ መልኩ ይህ የአንድነት ጉባኤው በጾም ወቅት ብቻ ሳይሆን  ዘወትር ሊካሄድ ይገባዋል የሚል ሐሳብም ከታዳሚዎቹ ተነስቷል፡፡ የአንድነት ጉባኤው  ከተጠናከረ ብዙ ምዕመናን የእግዚአብሔርን ቃል ይማራሉ፣ የተሰጠንንም አደራ በአግባቡ እንወጣለን፣ ኢ-አማንያንም ወደ እግዚአብሔር መንግሥት ማምጣት እንችላለን የሚሉ ድምጾች ተሰምተዋል፡፡

ለአንድነት ጉባኤው በአንዳንድ አጥቢያዎች በጀት አለመመደብ፣ የሰበካ ጉባኤ ሕንጻ ቤ/ክርስቲያን ላይ ብቻ ትኩረት ማድረግ፣ ለወንጌል አገልግሎት ትኩረት አለመስጠትና የመሳሰሉት እንደ ችግር ተነስተዋል፡፡ ለእነዚህ ችግሮችም የመፍትሔ አቅጣጫዎች ተሰንዝረዋል፡፡

ከመፍትሔዎቹ መካከልም የወንጌል አገልግሎት ትልቅ ትኩረት ቢሰጥበት፣ ወጥ የሆነ የስብከተ ወንጌል መዋቅር ቢኖር፣ለስብከተ ወንጌል ቋሚ የሆነ በጀት ቢበጀት፣ የመድረክ ስብከት ላይ ብቻ ትኩረት ባይደረግ፣ ምዕመናንን በተለያየ መንገድ ብናስተምር የሚሉት የመፍትሔ አቅጣጫዎች ተጠቁመዋል፡፡

ይህን አስመልክቶ የክ/ከተማው የስብከተ  ወንጌል ሐላፊ   መጋቤ ሐዲስ ዘለዓለም  የተነሱትን ችግሮችና የመፍትሔ አቅጣጫዎች ላይ ተመርኩዘው ገንቢ ሓሳቦችን አስተላልፈዋል፡፡ ንግግራቸውን የመፍትሔ አቅጣጫዎች ላይ ትኩረት  ልናደርግ ይገባል በሚለው ጀምረው የስብከት ወንጌል ክፍል በጀት እንዲመደብለት ሰባኪያነ ወንጌሉ እቅድ አቅደው ለሰበካ ጉባኤ እንዲያቀርቡ መልክእክታቸውን አስተላልፈዋል፡፡   ክፍለ ከተማውም ሰበካ ጉባኤው እንዲፈጽመው ጥብቅ ክትትል ያደርጋል ሲሉ ቃል ገብተዋል፡፡  እንዲሁም የክፍለ ከተማው ሥራ አስኪያጅ መጋቤ ትፍሥሕት  ግርማ  ስብከተወንጌል  የቤተክርስያኒቷ ሕልውና ነው በሚል ጀምረው እጅግ ጠቃሚና አስደሳች የሆነ ንግግር አድርገዋል፡፡ ስብከተ ወንጌል ከሰበካ ጉባኤ በጀት  ጠያቂ መሆን አልነበረበትም፣ የራሱ የሆነ በጀት ከቤተክርስቲያኒቱ ታስቦ  ሊመደብለት ይገባል፣ ስብከተ ወንጌልን የበጀት ባለቤት ካደረግን ሁሉም ሰባኪያነ ወንጌል እንስብክ እናሰብክ ይላሉ፣ የነፍስ ጉዳይ ስለሆነ ልንቀልድ አያስፈልግም፡ ከአዲሱ የሀገረስብከቱ የፓትርያርኩ ረዳት ሊቀጳጳስና ከአዲሱ ሥራ አስኪያጅ ጋር በመሆን አብረን አመርቂ የሆነ ሥራ መሥራት

ይገባናል፣ ስብከታችን ከካህናትና ከቢሮ ሠራተኞች መጀመር አለብን፣ በሰበካ ጉባኤ ምርጫም ሰባኪያነ ወንጌል ሊካተቱ ይገባል ሲሉ ተደምጠዋል፡፡

በሌላ በኩልም ሁለተኛው የዕለቱ አጀንዳ የስብከተ ወንጌል ኮሚቴ የተፈለገውን ያህል ሥራ ለምን  አልሠራም የሚለው ተነስቷል፡፡ ይህንንም አጀንዳ አስመልክቶ ከታዳሚዎቹ ችግሮችና የመፍትሔ አቅጣጫዎች ተሰጥተዋል፡፡ ኮሚቴው ከእኛ ውጭ አትሥሩ፣ጉባኤ ሲዘጋጅ የኮሚቴው አለመገኘት፣ ሰበካ ጉባኤው በስብከተ ወንጌል ኮሚቴው ላይ ጫና ማድረግ፣ በሰበካ ጉባኤው ጽ/ቤት የስብከተ ወንጌል ኮሚቴ እንደገቢ ማሰባሰቢያ መቆጠር፣ ስብከተ  ወንጌል የሰበሰበውን ገቢ በጽ/ቤቱ አካውንት  አስገቡ በማለት ጫና ማሳደር፣ የአመራር ችግር መኖር፣ ለአንዳንድ አጥቢያዎች  መመሪያና ደንብ የተሰጠ ሲሆን ለሌሎች ደግሞ አለመሰጠት እንደ ችግር ተነስቷል፡፡ ለችግሮቹም የመፍትሔ አቅጣጫዎች ተሰጥተዋል፡፡ የስብከተ ወንጌል በእያንዳንዱ አጥቢያ በደንብ ቢሠራበት፣ ለሁሉም አጥቢያ የስብከተ ወንጌል ኮሚቴ  መመሪያና ደንብ ቢሰጥ፣ የቤተክርስቲያን ሕልውና ለሆነው ለወንጌል አገልግሎት ትልቅ ትኩረት ቢሰጥበት የሚሉት ሐሳቦች ተሰጥተዋል፡፡

በመጨረሻም ጉባኤው 7 አባላት ያሉት ኮሚቴ መርጦ የዕለቱን ስብሰባ በጸሎት ዘግቷል፡፡በቤተክርስቲያናችን እንዲህ አይነት የውውይት መድረክ በጣም ጠቃሚዎች ስለሆኑ ሁሌም ቢለመዱና በሌሎች ክፍላተ ከተማም በተከታታይ መልኩ ቢሠራባቸው መልካም ነው፡፡በተለይም ስብሰባ አድርገናል የውውይት መድረክ አዘጋጅተናል ከማለት በዘለለ በተሰብሳቢዎቹ የሚሰነዘሩትን የመፍትሔ አቅጣጫዎች ትኩረት ተሰጥቶባቸው ወደ ተግባር ቢሸጋገሩና ለውጥ ለማምጣት በደንብ ቢሠራባቸው መልካም ነው እንላለን፡፡

ከሚዲያ ክፍል

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *