በዓለ ጰራቅሊጦስ

“ወላጆች እንደሌላቸው ልጆች አልተዋችሁም” /ዮሐ.14÷18/

የኢትዮጵያ ኦርቶዶክስ ተዋሕዶ ቤተክርስቲያን ከምታከብራቸው ዘጠኙ ዐበይት (ታላላቅ) በዓላት መካከል አንዱ የጰራቅሊጦስ በዓል ነው፡፡

ጰራቅሊጦስ፡- ቃሉ ግሪክ ነው፡፡ ጰራቅሊጦስ ማለት መጽንዒ በእምነት የሚያጸና፣ መንጽሒ ከኃጢአት የሚያነጻ፣ ናዛዚ ያዘኑትን የሚያረጋጋ፣ መስተፍሥሒ፣ ያዘኑትን የሚያስደስት፣ ከሣቲ ምስጢርን የሚገልጽ ማለት ነው፡፡

ጰራቅሊጦስ፡- መንፈስ ቅዱስ ነው፡፡ የጰራቅሊጦስ በዓል ታሪክ እንደሚከተለው ተገልጿል፡፡

ጌታችን አምላካችን መድኃኒታችን ኢየሱስ ክርስቶስ በዚህ ዓለም የሚሠራውን ሥራ ከጨረሰ በኋላ ቅዱሳን ሐዋርያትን ወደ አባቴ እሄዳለሁ (አርጋለሁ) ሲላቸው ደነገጡ አምላካችን ኢየሱስ ክርስቶስም መደንገጣቸውን አይቶ “ኢይደንግጽክሙ ልብክሙ እመኑ በአግዚአብሔር ወእመኑ ብየ እስመ ውስተ ቤተ አቡየ ብዙኅ ማኅደር ወምዕራፍ ቦቱ” (ልባችሁ አይደንግጥባችሁ በእግዚአብሔር እመኑ በእኔም እመኑ በአባቴ ቤት ብዙ መኖሪያ አለ ማለት በአባቴ ቤት በመንግሥተ ሰማያት ብዙ ማዕርገ ሀብታት አለ) (ዮሐ.14÷1) እንዲሁም /በዚሁ በዮሐንስ ወንጌል ምዕራፍ 14÷18/ “ኢየኀድገክሙ ዕጓለ ማውታ ትኩኑ” (ወላጆች እንደሌላቸው ልጆች አልተዋችሁም) ሲል መድኃኒታችን ኢየሱሰ ክርስቶስ ቅዱሳን ሐዋርያትን አጽናንቷቸዋል፡፡

/በሉቃስ ወንጌል ምዕራፍ 24 ቁጥር 49/ ላይም እንደተጻፈው የሰላም አምላክ ኢየሱስ ክርስቶስ ሊያርግ ሲል ቅዱሳን ሐዋርያትን “አንትሙሰ ንበሩ ሀገረ ኢየሩሳሌም እስከ ትለብሱ ኃይለ እምአርያም” (እናንተ ግን ከላይ ኃይልን እስክትለብሱ ድረስ በኢየሩሳሌም ተቀመጡ) አላቸውና ዐረገ በሐዋ.ሥራ ምዕራፍ 2- ከቁጥር አንድ ጀምሮ እንደተጻፈው እነርሱም ይህን አምላካዊ ቃል መሠረት በማድረግ በኢየሩሳሌም በጽርሐ ጽዮን በማርቆስ እናት በማርያም ቤት ሁሉም በአንድ ልብ ሆነው ተሰብስበው ሳሉ ጌታችን አምላካችን መድኃኒታችን ኢየሱስ ክርስቶስ በዐረገ በአሥረኛው ቀን በተነሣ በሃምሳኛው ቀን ጧት በሦስት ሰዓት ለቅዱሳን ሐዋርያት መንፈስ ቅዱስ በእሳት አምሳል ወረደላቸው፡፡ ከዚህ በኋላ ፍርሃት ከውስጣቸው ወጣ መንፈሳዊ ድፍረት አገኙ፡፡ አንድ የዕብራይስጥ ቋንቋ ብቻ ነበር የሚያውቁት ሰባ አንድ ዓይነት ቋንቋ (የአገሩ ሁሉ ቋንቋ) ተገለጸላቸው፡፡ ከእነርሱ ቋንቋ ጋር በሰባ ሁለት ዓይነት ቋንቋ ተናገሩ፡፡ የአገሩ ሁሉ ቋንቋ የተገለጸላቸውም ሁሉንም በአገሩ ቋንቋ እንዲያስተምሩ ነው፡፡ ከተለያየ ክፍለ ዓለም የመጡ ሰዎች ነበሩና እነዚህ የገሊላ ሰዎች አይደሉምን? እንዴት የእኛን አገር ቋንቋ ሊናገሩ ቻሉ? በማለት ተገረሙና አመንትተው እርስ በርሳቸው እንጃ ይህ ምን ይሆን? አሉ፡፡ ሌሎች ግን ጉሽ የወይን ጠጅ ጠጥተው ሰክረው ነው አሉ፡፡ ነገር ግን ቅዱስ ጴጥሮስ ከአሥራ አንዱ ጋር ቆመ ድምፁንም ከፍ አድርጎ እንዲህ ብሎ ተናገራቸው፡-የይሁዳ ሰዎች በኢየሩሳሌምም የምትኖሩ ሁላችሁ፡- ይህ በእናንተ ዘንድ የታወቀ ይሁን ቃሎቼንም አድምጡ፡፡ ለእናንተ እንደመሰላችሁ እነዚህ የሰከሩ አይደሉም ከቀኑ ገና ሦስተኛ ሰዓት ነውና፡፡ ነገር ግን ይህ በነቢዩ ኢዩኤል የተነገረው ይፈጸም ዘንድ ነው፡- ይህም “እግዚአብሔር ይላል በኋለኛይቱ ቀን እንዲህ ይሆናል ሥጋ በለበሰ ሁሉ ላይ ከመንፈሴ አፈሳለሁ ወንዶችና ሴቶች ልጆቻችሁም ትንቢት ይናገራሉ፣ ጎበዞቻችሁም ራእይ ያያሉ፣ ሽማግሌዎቻችሁም ሕልም ያልማሉ፡፡ ደግሞም በዚያች ወራት በወንዶችና በሴቶች አገልጋዮች ላይ ከመንፈሴ አፈሳለሁ ትንቢትም ይናገራሉ፡፡ ድንቆችንም በላይ በሰማይ ተአምራትን በታች በምድርም ምልክቶችን ደምን እሳትንና ጢስንም እሰጣለሁ የምትገለጠው ታላቅዋ የእግዚአብሔር ቀን ሳትመጣ ፀሐይ ወደ ጨለማ ጨረቃም ወደ ደም ይለወጣል፡፡ የእግዚአብሔርን ስም የሚጠራ ሁሉ ይድናል” /ኢዩ.2÷28-32/ ይህን መሠረት በማድረግ ሊቀ ሐዋርያት ቅዱስ ጴጥሮስ ልብን የሚነካ ትምህርት ሰጠ፡፡ ሕዝቡም ቅዱስ ጴጥሮስ በሰጠው ትምህርት ልባቸው ተከፈተ ቅዱስ ጴጥሮስንና ሌሎቹንም ሐዋርያት ወንድሞች ሆይ ምን እናድርግ? አሉአቸው፡፡ “ቅዱስ ጴጥሮስም ንስሓ ግቡ ኃጢአታችሁም ይሠረይ ዘንድ በኢየሱስ ክርስቶስ ስም ተጠመቁ ኃጢአታችሁም  ይሰረይላችኋል የመንፈስ ቅዱስንም ስጦታ ትቀበላላችሁ፡፡ የተስፋው  ቃል ለእናንተና ለልጆቻችሁ አምላካችንም ወደ እርሱ ለሚጠራቸው በሩቅ ላሉ ሁሉ ነው፡፡ ስለዚህ ራሳችሁን ከዚህ ክፉ ዓለም አድኑ” ብሎ መከራቸው፡፡ በዚችም ዕለት ሦስት ሺህ ሰዎች አምነው ተጠመቁ፡፡ ቅዱሳን ሐዋርያት መንፈስ ቅዱስን ተቀብለው የሞቱና የትንሣኤው ምስክሮች ሆኑ፡፡ የመንፈስ ቅዱስ ጸጋ በነሱ ላይ ሲያድር ለቤተክርስቲያን ጉዞ አዲስ ምዕራፍ ተከፈተ፡፡ ይህ የጰራቅሊጦስ በዓል በግሪኮች ቋንቋ ጰንጠቆስጤ ይባላል፡፡ ጰንጠቆስጤ ማለት ሃምሳኛ ማለት ነው፡፡ ጌታችን ከተነሣ በኋላ ሃምሳኛው ቀን ነው፡፡ ይህም ዕለት በዓለ ሃምሳ፣ በዓለ ጰራቅሊጦስ ነው፡፡

እንዲሁም ታላቁ ሊቅ ቅ/ዮሐንስ አፈወርቅ ይህን በዓል በሚገባ አነጋገር “የቤተክርስቲያን የልደት ቀን” ብሎታል፡፡ ይህ በዓል በብሉይ ኪዳን የእሸት በዓል (በዓለ ሰዊት) ይባላል፡፡ እስራኤል የነጻነት በዓላቸውን ከሚያከብሩበት ከበዓለ ፋሲካ ጀምረው ሃምሳውን ቀን በዓል አድርገው ይሰነብታሉ፡፡ በሃምሳኛው ቀን በዓለ ሰዊትን (የእሸት በዓላቸውን) ያከብራሉ፡፡ በሀገራቸው ከመጋቢት እስከ ግንቦት ያለው ወቅት በሀገራችን ከመስከረም እስከ ኅዳር እንዳለው የእሸት ወራት (የጸደይ ወራት) ነውና የእሸት በዓላቸውን የሚያከብሩት በኦሪት ዘሌዋውያን /ምዕራፍ 23÷10-17/ በታዘዘው መሠረት ማንኛውም እስራኤላዊ ገበሬ ከዘራው ሁሉ በየአይነቱ እሸቱን ቆርጦ ተሸክሞ ወደ ምኵራቡ ይመጣል፡፡ በቤተ መቅደስ የሚያገለግለው ካህን ተቀብሎ ባርኮ ጸልዮ የሚጠበሰው እየተጠበሰ የሚታሸው እየታሸ በማኅበር አንድነት ይበላል፡፡ ይህም “ቀዳምያት” ይባላል፡፡ የመጀመሪያው ማለት ነው፡፡ ከማንኛውም በረከት የመጀመሪያው በእግዚአብሔር ፊት መቅረብ፣ ለእግዚአብሔር መሰጠት እንዳለበት ታዟልና፡፡

በዚህ መሠረት ከበዓለ ጰራቅሊጦስ የምንማረው፡- ጌታችን አምላካችን መድኃኒታችን ኢየሱስ ክርስቶስ ቅዱሳን ሐዋርያትን “እናንተ ግን ከላይ ኃይልን እስክትለብሱ ድረስ በኢየሩሳሌም ተቀመጡ” ባላቸው መሠረት በኢየሩሳሌም ተቀምጠው ተስፋውን ሲጠባበቁ መንፈስ ቅዱስ ወርዶላቸዋል፡፡ ዛሬ መንፈስ ቅዱስ የሚወርድባት ኢየሩሳሌም ቤተክርስቲያን ናት “ሚ መጠን ግርምት ዛቲ ዕለት ወዕፅብት ዛቲ ሰዓት እንት ባቲ ይወርድ መንፈስ ቅዱስ እመልዕልተ ሰማያት  (ይህች ቀን ምን ያህል የምታስፈራ ናት? ይህች ሰዓት ምን ያህል የምታስጨንቅ ናት? መንፈስ ቅዱስ ከሰማየ ሰማያት የሚወርድባት) /ሥርዓተ ቅዳሴ/ ለቅዱሳን ሐዋርያት መንፈስ ቅዱስ እንደ ወረደላቸው ለእኛም ሁል ጊዜ ይወርድልናል እንዲወርድልንም ሁል ጊዜ ወደ ቤተክርስቲያን መሄድ ይገባል፡፡ ከቤተክርስቲያን ተለይቶ ጽድቅ የለም፡፡”

ቤተ ክርስቲያን፡- የመንግሥተ ሰማያት በር ናት “ዛቲ ይእቲ ኆኅታ ለሰማይ (ይህች የሰማይ ደጅ ናት) /ዘፍ 28÷17/”

በዚህ መሠረት ለእኛም በ40 ቀንና በ80 ቀን የተሰጠን ጸጋመንፈስ ቅዱስ እንዳይለየን ሕጉን ትእዛዙን መጠበቅና ጧት ማታ ወደ ቤተ ክርስቲየን መገስገስ ይገባል፡፡

ለዚህም እመቤታችን ቅድስት ድንግል ማርያም እንዲሁም ቅዱሳን በአማላጅነታቸው ይርዱን፡፡

ወስብሐት ለእግዚአብሔር

ከላዕከ ወንጌል በእደ ማርያም ይትባረክ /ቀሲስ/የአዲስ አበባ ሀገረ ስብከት ትምህርትሥርጭት ኃላፊ

የኢትዮጵያ ኦርቶዶክስ ተዋሕዶ ቤተ ክርስቲያን የቅዱስ ሲኖዶስ ምልዓተ ጉባኤ መጠናቀቁን አስመልክቶ ባለ 15 ነጥብ ጋዜጣዊ መግለጫ ሰጠ

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ሕገ ቤተ ክርስቲያንንና ኦርቶዶክሳዊ ቀኖናውን መሠረት ባደረገ መልኩ በዓመት ሁለት ጊዜ ማለትም በጥቅምትና በግንቦት ወር የሚካሄድና በቅዱስ ፓትርያሪኩ የሚመራ የቅዱስ ሲኖዶስ ምልዓተ ጉባኤ ወይም ስብሰባ ታደርጋለች፡፡

   የርክበ ካህናት መምጣትን ተከትሎ በግንቦት ወር የሚደረገው ሁለተኛው የብፁዓን አባቶች የሲኖዶስ ምልዓት ጉባኤ  ወይም ስብሰባ ግንቦት 13 ቀን /2011 ዓ/ም  በጸሎት ተጀምሮ እስከ ሰኔ 3 ቀን 2011 ዓ/ም የቆየውና ለአሥራ ስምንት ቀናት ያክል ሲካሄድ የሰነበተው ይኸው ጉባኤ የቤተ ክርስቲያንን ክብርና ጥቅም የሚያስጠብቁ የተለያዩ መንፈሳዊና ማኅበራዊ እንዲሁም ወቅታዊ ጉዳዮችን በመዳሰስ ውሳኔዎችን አሳልፎና ለአፈጻጸሙም ያመች ዘንድም በብፁዓን አባቶች የሚመራ የተለያዩ የክትትል ኮሚቴዎችን ሰይሞ ከጨረሰ በኋላ በርካታ የሚዲያ አካላት በተገኙበት ባለ አሥራ አምሥት ነጥብ ጋዜጣዊ መግለጫ በመስጠት በዛሬው ዕለት በይፋ ተጠናቋል፡፡

 በዚህ ወር የተደረገው ሁለተኛው የአባቶች ሲኖዶሳዊ ጉባኤ ከጥቅምት ወር ከተደረገው ምልዓተ ጉባኤ ልዩ የሚያደርጉትን ጉዳዮች አሳልፏል፡፡ እነዚህም ጉዳዮች ወይም ውሳኔዎች

  • ለሚቀጥሉት ሦስት ዓመታት የሚመሩ ሁለት ብጹዓን አባቶችን ማለትም ብጹእ አቡነ ያሬድን የመንበረ ፓትርያሪክ ጠቅላይ ቤተ ክህነት ዋና ሥራ አስኪያጅ አድርጎ ሲሾም ብጹእ አቡነ ዮሴፍን ደግሞ የቅዱስ ሲኖዶስ ዋና ጸሐፊ አድርጎ መሾሙ፡፡
  • በወቅታዊና ሀገራዊ ጉዳዮች ዙሪያ የቀረቡለትን ጥናታዊ የመነሻ ሐሳቦች መሠረት በማድረግ ጠንከር ያለ ውሳኔ ማሳለፉ፡፡
  • በብጹእ ወቅዱስ አቡነ ቴዎፍሎስ ተሠርተው በደርግ ዘመን መንግሥት የተወረሱባትንና ለ24 ዓመታት ያክል ሲደከምበት ቆይቶ በክቡር ጠቅላይ ሚኒስትር ዶ/ር ዐብይ አህመድ ዘመነ መንግሥት  የተመለሱላትን ሁለቱን መንትያ ሕንጻዎች ከፌደራል ቤቶች ኮርፖሬሽን ሐላፊ በቅዱስ ፓትርያሪኩ አማካኝነት የባለቤትነት ሰነዱን በምልዓተ ጉባኤው ፊት መረከቧና የመሳሰሉት ናቸው፡፡

 በአጀንዳ መልክ ተይዘው የቀረቡትን የቤተ ክርስቲያንና ሀገራዊ ጉዳዮች ምልዓተ ጉባኤው ተወያይቶ ከተማመነባቸው በኋላ ዉሳኔ የተላለፈባቸው መንፈሳዊና ማኅበራዊ እንዲሁም ወቅታዊ ጉዳዮችን በተላለፈው ውሳኔ መሠረት በሥራ ላይ ውለው እናይ ዘንድ ጠንካራና ወጥነት ያለው ክትትል ያሰፈልጋቸዋልና የአፈጻጸሙም ነገር ይታሰብበት እያልን ሙሉውን የቅዱስ ሲኖዶስ ጋዜጣዊ መግለጫ ከታች ባለው ክፍል ስለተያያዘ ታነቡት ዘንድ ጋብዘናል፡፡

የሀገረ ስብከቱ ሚዲያ ክፍል

በስመ አብ ወወልድ ለመንፈስ ቅዱስ አሐዱ አምላክ አሜን፡፡

በፍትሕ መንፈሳዊ አንቀጽ 5 ቁጥር 164 ድንጋጌ መሠረት ከግንቦት 14-ሰኔ 3 ቀን 2011 ዓ.ም. ድረስ የተካሄደውን የቅዱስ ሲኖዶስ ምልዓተ ጉባኤ አስመልከቶ ከቅዱስ ሲኖዶስ የተሰጠ መግለጫ፤

 ግንቦት 13 ቀን 2011ዓ.ም. በመንበረ ፓትርያርክ ቅድስተ ቅዱሳን ማርያም ገዳም በጸሎት የተጀመረው የቅዱስ ሲኖዶስ ምልዓተ ጉባኤ በቤተ ክርስቲያናችን መንፈሳዊና ማህበራዊ ጉዳዩች ላይ ለ18 ቀናት ሲመክር ቆይቶ በርካታ ማህበራዊና መንፈሳዊ ለቤተ ክርስቲያናችንና ለሀገራችን የሚበጁ ጠቃሚ ውሳኔዎችን አሳልፏል፡፡

በዚህም መሠረት፡-

  1. ለጉባኤው መክፈቻ የቀረበው ንግግር ቤተ ክርስቲያናችን ለምታከናውነው መንፈሳዊ ተግባራት በእጅጉ ጠቃሚ ሆኖ ስላገኘው በቀጣይ ለሚደረገው የሥራ ስምሪት መመሪያ በማድረግ ጉባኤው አጽድቋል፡፡
  • ከግንቦት 2010 – ግንቦት 2011 ዓ.ም. በቋሚ ሲኖዶስና በቅዱስ ሲኖዶስ ምልዓተ ጉባኤ ተወስነው የተላለፉ ጉዳዮች አፈጻጸማቸው በእጅጉ ውጤታማ መሆናቸውን ጉባኤው ተቀብሎ አጽድቋል፡፡
  • የቋሚ ሲኖዶስ ሥልጣንና የሥራ አፈጻጸም አስመልክቶ ተከሰቱ በተባሉ የሥራ አፈጻጸሞችና ታዩ በተባሉ ግድፈቶች ጉባኤው በሰፊው ተነጋግሮ በቀጣይ ማንኛውም መንፈሳዊም ሆነ ማሕበራዊ ጉዳዮች ሕገ ቤተ ክርስቲያኑን መሠረት አድርጐ እንዲሠራ መመሪያ ሰጥቷል፡፡
  • በአዲስ አበባ ሀገረ ስብከትና በሌሎችም መላው አኅጉረ ስብከት እየታዩ ባሉ ችግሮች ላይ በመነጋገር፣ ለቀጣዩ የቤተ ክርስቲያናችን መልካም አስተዳደር ጠቃሚ ግብአቶችን ማግኘት እንዲቻል ችግሮቹን አጥንተውና ለይተው የሚያቀርቡ ብፁዓን አባቶችና ባለሙያዎች እንዲሰየሙ ተደርጓል፡፡
  • ከአገር ውጭና በአገር ውስጥ ባሉ አጥቢያ አብያተ ክርስቲያናት ተከስተው የነበሩ ችግሮች በአጥኚ ልዑካን ተጣርቶ በቀረበ አጀንዳ ላይ በመነጋገር ለአብያተ ክርስቲያናቱ መፍትሔ ይሆናል የተባለ ውሳኔ ተሰጥቷል፡፡
  • የቤተ ክርስቲያኒቱ ቤቶችና ሕንጻዎች ሆነው ሳለ ያለአግባብ ተወርሰው የነበሩ በመንበረ ፓትርያርኩ ኩታ ገጠም የሚገኙ ሕንጻዎች በክቡር የአገራችን ጠቅላይ ሚኒስትር ቁርጠኛ አመራር በመመለሳቸው፣ ቅዱስ ሲኖዶስ፣ መንግሥት ለቤተ ክርስቲያናችን መብት መጠበቅ የሰጠውን ትኩረት በማድነቅ ለክቡር ጠቅላይ ሚኒስትር ዶ/ር ዐቢይ አህመድ ከፍተኛ ምስጋና አቅርቧል፡፡
  • በውጭ አገር የሚገኙ አህጉረ ስብከትን በማጠናከር መንፈሳዊና ማህበራዊ አገልግሎታቸውን ማስፋፋት እንዲቻል ከቃለ ዓዋዲው ጋር እና ከየአገሮቹ መንግሥታት ሕግ ጋር የተጣጣመ ደንብ እንዲዘጋጅና ለጥቅምቱ 2012 ዓ.ም. የቅዱስ ሲኖዶስ ምልዓተ ጉባኤ እንዲቀርብ ተወስኗል፡፡
  • ለተዘጉ አብያተ ክርስቲያናት፣ ለአብነት ት/ቤቶች፣ ሰው ሠራሽ አደጋ ለደረሰባቸው አብያተ ክርስቲያናት፣ ለተፈናቀሉ ወገኖች፣ ለጥንታውያን አብያተ ክርስቲያናት ሕንጻ ማደሻ የሚሆን የገንዘብ ድጋፍ ተደርጓል፡፡
  • መንግሥት ዜጐች እንዲቆጠሩ በያዘው መርሐ-ግብር መሠረት የቤተ ክርስቲያኒቱ ተከታዮች በትክክል እንዲቆጠሩ፣ ቆጠራውም በሰላም እንዲከናወንና አገራዊው ተልዕኮውም እንዲሳካ በየአህጉረ ስብከቱ ትምህርት እንዲሰጥ አስፈላጊውም ክትትል እንዲደረግ የኮሚቴ አባላት እንዲሰየሙ ተደርጓል፡፡
  1. በጉባኤው፡- “ግጭቶችና አፈታታቸው በዓለም አቀፍና በአገር አቀፍ እይታ” በሚል ስለ ወቅታዊ የሀገራችን ሰላምና ሊደረግ ስለሚገባው ሐዋርያዊ ተልዕኮ ጥናታዊ ጽሑፍ ቀርቦ በስፋት በመነጋገር በአገራችን ኢትዮጵያ ዲሞክራሲያዊ ሥርዓት እንዲያድግ፣ መልካም አስተዳደር እንዲሰፍን፣ ልማት እንዲጐለብትና ድኀነት እንዲወገድ በሁሉም አቅጣጫ መሥራት እንደሚያስፈልግ ለሚመለከታቸውን ሁሉ ቅዱስ ሲኖዶስ አሳስቧል፡፡
  1. የኢትዮጵያ ኦርቶዶክስ ተዋሕዶ ቤተ ክርስቲያን እምነት ተከታዮች ሆነው በከፍተኛ ትምህርት ቤቶች በሚቆዩባቸው ዓመታት ሕገ-መንግሥታዊ መብታቸው ተከብሮ፣ የእምነት ነጻነታቸው ተረጋግጦ፣ እንደ እምነታቸው ሥርዓት በዓመት ውስጥ ባሉ ሰባት አጽዋማት የመጾም መብታቸው ተጠብቆ፣ አስፈላጊው አቅርቦት እንዲደረግላቸው፣ ሃይማኖታዊ በዓላትንም በሚያከብሩበት ጊዜያት የኖረና የቆየውን ትውፊታዊ አልባሳትን የመልበስ መብታቸው እንዲጠበቅ ለየኮሌጆቹና ዩንቨርሲቲዎች የቅዱስ ሲኖዶሱ ማሳሰቢያ እንዲደርሳቸው ወስኗል፡፡
  1. የአገራችንን የቱሪስት መስህብነት ምክንያት በማድረግ ዜጐች በቅድስናና በፈሪሃ እግዚአብሔር ተከብረው የሚታወቁባት የአገራችንን ታሪክ የሚቀይር የዜጐችን መልካም ሥነ-ምግባር የሚለውጥ ሕገ ተፈጥሮንና የተቀደሰውን ሥርዓተ ጋብቻን የሚያበላሽ፣ በቅዱሳት መጻሕፍት ሁሉ የተወገዘ ግብረ-ሰዶምን በአገራችን ለማስፋፋት፣ በዚህም የቅድስት ኦርቶዶክሳዊት ተዋሕዶ ቤተ ክርስቲያንን ቅድስና የሚጐዳ ሕገ-ወጥ ተግባር ለመፈጸም፤ መቀመጫውን በአሜሪካን ሀገር ያደረገው የግብረ-ሰዶማውያን አስጐብኚ ድርጅት በመቃወም ወደ ቅድስት አገራችን ኢትዮጵያ እንዳይገባ፣ ቅዱሳት መካናትንም እንዳይጐበኝ የቅዱስ ሲኖዶስ ምልዓተ ጉባኤ አውግዟል፡፡

የሀገራችን ዜጐች ኦርቶዶክሳውያን ምእመናንም ከእንዲህ ዓይነት የአገራችንን መልካም ገጽታና መልካም ሥነ-ምግባርን ከሚያበላሽ፣ በሃይማኖት ትምህርት ተጠብቆ የቆየው ባህላችንን ከሚያጠፋ፣ የሀገርና የቤተ ክርስቲያን ጠላት ከሆኑ ወራሪዎች ራሳቸውን እንዲጠብቁ፣ በአገራችንም ይህንን ሕገ-ወጥ ተግባር በመደገፍ እየተባበሩ ያሉት ግለሰቦችና ድርጅቶች ሁሉ ከዚህ ድርጊታቸው እንዲታቀቡ ቅዱስ ሲኖዶስ አበክሮ ያሳስባል፡፡

  1. ወቅታዊውን የቤተ ክርስቲያን ችግር አስመልክቶ በስፋት ሲነጋገር የሰነበተው ጉባኤ፣ በአሁኑ ጊዜ በኢትዮጵያ ኦርቶዶክስ ተዋሕዶ ቤተ ክርስቲያናችንና በምእመናን ተከታዮቿ ላይ እየደረሰ ያለው ፡-
  • የአብያተ ክርስቲያናት መቃጠል፣
  • የክርስቲያኖችን መገደል እና ከቄያቸው መፈናቀል፣
  • በሃይማኖታቸውና በሃይማኖታዊ ሥርዓታቸው ላይ ተጽእኖ ማድረግ፣
  • የአብያተ ክርስቲያናት ነባር የይዞታ ቦታዎችን በሕገ-ወጥ መንገድ መቀማት፣
  • ለቤተ ክርስቲያኒቱ ማህበራዊና ልማታዊ ተግባር በጐ-ፈቃድ አለማሳየትና የመሳሰሉት ሪፖርቶች ከየአህጉረ ስብከቱ ቀርበው ጉባኤው በሐዘን ተመልክቶታል፡፡

በዚሁ ላይ ሰፊ ውይይት በማድረግ አገሪቱንና ሕዝቡን ይመራሉ ተብለው አደራ ለተቀበሉ የዞንና የወረዳ አስተዳዳሪዎች ሁሉ ማዕከላዊው መንግሥት አስፈላጊውን መመሪያ እንዲሰጣቸው ቅዱስ ሲኖዶስ ጠይቋል፡፡

  1. በየሦስት ዓመቱ በቅዱስ ሲኖደስ ምልዓተ ጉባኤ የሚመረጡ የቅዱስ ሲኖዶስ ዋና ጸሐፊና የጠቅላይ ቤተ ክህነት ዋና ሥራ አስኪያጅ ምርጫ አስመልክቶ በሰፊው በመወያየትና አስፈላጊውን ጥናት በማድረግ፡-
  2. ብፁዕ አባ ዮሴፍ የምሥራቅ ጐጃም ሀገረ ስብከት ሊቀጳጳስ የቅዱስ ሲኖዶስ ዋና ጸሐፊ፣
  3. ብፁዕ አባ ያሬድ የሰበካ ጉባኤ ማደራጃ መምሪያና የአርሲ ሀገረ ስብከት ሊቀጳጳስ  የጠቅላይ ቤተ ክህነት ዋና ሥራ አስኪያጅ በማድረግ ለቀጣይ ሦስት ዓመታት እንዲሠሩ የቅዱስ ሲኖዶስ ምልዓተ ጉባኤ ሰይሟል፡፡

ከዚህም ጋር አዲስ የሀገረ ስብከት ደረጃ የተሰጣቸው ዞኖችና መምሪያዎች ላይ ብፁዓን አባቶችን መድቧል፡፡

15. ሀገራችን ኢትዮጵያ ከጥንት ከመሠረት ጀምሮ “የጥበብ መጀመሪያ እግዚአብሔርን መፍራት ነው” የሚለውን መርህ ተከትላ፣ ሰላሟን፣ ፍቅርዋንና አንድነትዋን ጠብቃ፣ ከውጭ የሚመጡባትን ባእዳን ወራሪዎች በመመከት ክብርዋንና ልዕልናዋን ለረጅም ዘመናት ጠብቃና አስጠብቃ የኖረች፣ ወደፊትም በዚሁ ጸንታ የምትኖር ታላቅ ሀገር መሆኗ ይታወቃል፡፡

ሕዝቦችዋም በአሁኑ ዘመን የሚታዩትን ያልተለመዱ ባሕርያት በሰከነ መንፈስ ቆም ብለው በመምከርና በመወያየት ወደ ጥንተ ሰላምዋ እንድትመለስ የማድረግ ኃላፊነት አለባቸው፡፡  

ቅድስት ቤተ ክርስቲያናችንም ከምትሰጠው መንፈሳዊ አገልግሎት በተጨማሪ በማሕበራዊው ዘርፍም ለሀገር ዕድገትና ለሕዝቦች ኑሮ መሻሻል፣ በተለይም ለሀገራዊ ሰላምና አንድነት በመቆም ድርሻዋን እንድትወጣ ቅዱስ ሲኖዶስ ወስኗል፡፡

ቅዱስ ሲኖዶስ ከዚህ በላይ በተጠቀሱትና በሌሎችም ዓበይት ጉዳዮች ላይ ለ18 ቀናት ያህል በአገር አቀፍ ጉዳዮች በስፋትና በጥልቀት ሲወያይ ሰንብቶ ስብሰባውን በጸሎት አጠናቋል፡፡

              ወስብሐት ለእግዚአብሔር አሜን!

አባ ማትያስ ቀዳማዊፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖ

ሰኔ 3 ቀን 2011 ዓ.ም

አዲስ አበባ – ኢትዮጵያ

“ይኩንኪ በከመ ተአመንኪ” /እንዳመንሽ ይሁንልሽ/ /ማቴ. 15፡28/

ይህ ቃል ጌታችን አምላካችን መድኃኒታችን ኢየሱስ ክርስቶስ ለከነናዊት ሴት የተናገረው ቃል ነው፡፡ ታሪኩም /በማቴዎስ ወንጌል ም.15፡21-28/ ላይ ይገኛል፡፡ ታሪኩም እንደሚከተለው ተገልጻ_ል፡፡

        “ጌታችን አምላካችን መድኃኒታችን ኢየሱስ ክርስቶስ ወደ ጢሮስና ወደ ሲዶና አገር ሄደ፡፡ በዚያም ከነናዊት ሴት ጌታ ሆይ! የዳዊት ልጅ ማረኝ ልጄን ጋኔን ክፉኝ ይዟታል ብላ ጮኸች፡፡ እርሱ ግን አንዳች አልመለሰላትም፡፡ ደቀመዛሙርቱም ወደ እርሱ ቀርበው በኋላችን ትጮኻለችና አሰናብታት እያሉ ለመኑት፡፡ እርሱም መልሶ ከእስራኤል ቤት ለጠፉት በጎች በቀር አልተላክሁም አለ፡፡ ይህም ማለትትምህርት፣ መምህር አጥተው የተጎዱ እስራኤልን ላስተምር ሰው ሆኛለሁ ማለቱ ነው፡፡ እርሷ ግን ጌታ ሆይ፡- እርዳኝ እያለች ሰገደችለት፡፡ እርሱ ግን መልሶ የልጆችን እንጀራ ለውሾች መስጠት አይገባም አለ፡፡ እርስዋም አዎን ጌታ ሆይ፡- ውሾችም እኮ ከጌቶቻቸው ማዕድ የወደቀውን ፍርፋሪ ይባላሉ አለች” የልጆችን እንጀራ ለውሾች መስጠት አይገባም ሲል የምስጢር ባለቤት መድኃኒታችን ኢየሱስ ክርስቶስ የተናገረውን ቃል አባቶቻችን ሊቃውንት ሲያመሰጥሩት ለእስራኤል የማደርገውን ተአምራት ለአሕዛብ አላደርገውም ማለት ነው፡፡ ይህች ከነናዊት ሴት ከአሕዛብ ወገን ናትና፡፡ እርሷም የሰጠችው መልስ ውሾችም እኮ ከጌቶቻቸው ማዕድ የወደቀውን ፍርፋሪ ይበላሉ፡፡ የዚህም ምስጢር ለእስራኤል ደጋጉን ተአምራት ብታደርግላቸው ለኔ ደግሞ ጥቃቅኑን ተአምራት አታደርግልኝም? ማለት ነው፡፡

        በዚህን ጊዜ የምሕረት ባለቤት አምላካችን ኢየሱስ ክርስቶስ መልሶ አንቺ ሴት እምነትሽ ታላቅነው፡፡ “ይኩንኪ በከመ ተአመንኪ” /እንዳመንሽ ይሁንልሽ አላት/ ከዚያች ሰዓት ጀምሮ ልጇ ዳነች፡፡

        ሊቃውንት እንደሚያመሰጥሩት ይህች ከነናዊት ሴት ሦስት ነገሮችን ይዛ ስለተገኘች ልጇ ድናላታለች፡፡ እነዚህም ሦስት ነገሮች ሃይማኖት፣ ትሕትና፣ ጥበብ ናቸው፡፡ ሃይማኖት፡- ልጄን ያድንልኛል ብላ ሳትጠራጠር በፍጹም እምነት መቅረቧ ነው፡፡ ትሕትና፡- “የልጆችን እንጀራ ለውሾች መስጠት አይገባም” ሲላት ውሾችም እኮ ከጌቶቻቸው ማዕድ የወደቀውን ፍርፋሪ ይበላሉ” በማለት መልስ መስጠቱ ነው፡፡

ጥበብ፡- “ጥበብ የልጆችን እንጀራ ለውሾች መስጠት አይገባም” ብሎ በምሳሌ ሲነግራት ውሾችም እኮ ከጌቶቻቸው ማዕድ የወደቀውን ፍርፋሪ ይበላሉ” በማለት በምሳሌ መመለስ መቻሏ ነው፡፡

        መጀመሪያ ከሃይማኖት ስንጀምር ይሆንልኛል ይደረግልኛል ብሎ በክርስቶስ አዳኝነት አምኖ መምጣት ትልቅ እምነት ነው፡፡ ለመንፈሳዊ ሕይወት መሠረቱ እምነት ነው፡፡ እየተጠራጠርን የምናቀርበው ልመና ከደመና በታች ነው የሚቀረው ለዚህም ቅዱስ ያዕቆብ የተናገረው ቃል ትልቅ ማስረጃ ነው፡፡ ይህም “ጥበብን ያጣት ሰው ቢኖር ሳይነቅፍ እና ሳይነግፍ ለሁሉ በልግስና የሚሰጥ እግዚአብሔርን ይለምን፡፡ ለእርሱም ይሰጠዋል፡፡ ነገር ግን አምኖ ይለምን አይጠራጠርም የሚጠራጠር ሰው በነፋስ የተገፋና የተነቃነቀ የባሕርን ማዕበል ይመስላልና ለዚያ ሰው ከእግዚአብሔር ምንም የሚያገኝ አይምሰለው ሁለት ልብ የሆነ ሰው በመንገዱ ሁሉ ይታወካልና” /ያዕ. 1፡5-8/ በዚህ መሠረት እንደዚች ከነናዊ ሴት እምነተ ጠንካራ መሆን ያስፈልጋል፡፡

        ሁለተኛ ይህች ከነናዊት ሴት ይዛ የተገኘችው ትሕትናን ነው፡፡ ትሕትና ራስን ዝቅ አድርጎ ሌላውን ከፍ ማድረግ ነው፡፡ “ራሱን ከፍ  የሚያደርግ ሁሉ ዝቅ ይላልና ራሱንም ዝቅ የሚያደርግ ከፍ ይላልና” /ሉቃ. 14፡11/

ትሕትናን መጀመሪያ ያስተማረን የትሕትና ባለቤት ጌታችን አምላካችን መድኃኒታችን ኢየሱስ ክርስቶስ ነው፡፡ ከዚህም ጋር ጌታችን አምላካችን መድኃኒታችን ኢየሱስ ክርስቶስ ከሰማየ ሰማያት ወርዶ ከእመቤታችን ከቅድስት ድንግል ማርያም ከሥጋዋ ሥጋን ከነፍሳ ነፍስን ነስቶ በኅቱም ድንግልና ተፀንሶ በኅቱም ድንግልና መወለዱ ፍጹም ትሕትና ነው፡፡ “አትሒቶ ርእሶ ነሥአ አርአያ ገብር ወተመሰለ ከመ ብእሲ” ራሱን ዝቅ አድርጐ የሰውን ሥጋ (የተገዢን)  ሥጋ ተዋሐደ እንደ ሰውም ሆነ እንዲል /ፊልጵ.2÷7/ እንዲሁም የጸሎተ ሐሙስ ዕለት “እንግዲህ እኔ መምህራችሁና ጌታችሁ ስሆን እግራችሁን ካጠብኋችሁ እናንተም እንዲሁ የባልንጀሮቻችሁን እግር ልታጥቡ ይገባችኋል፡፡ እኔ እንደ አደረግሁላችሁ እናንተም ልታደርጉ ምሳሌ ሰጥቻችኋለሁና” /ዮሐ. 13፡ 14-15/ ሲል ለደቀ መዛሙርቱ ስለትሕትና አስምሯቸዋል፡፡ ስለዚህ እኛም ይህን አምላካዊ ቃል መሠረት በማድረግ የትሕትና ሰው መሆን ያስፈልጋል፡፡ ይህ ከሆነ አምላካችን ልዑል እግዚአብሔር ከፍ ያደርገናል በአንጻሩ ትዕቢትን ገንዘብ ካደረግን ደግሞ ዝቅ እንላለን፡፡ ይህንንም ቅዱስ ያዕቆብ እንዲህ ሲል ተናግሯል፡፡ “እግዚአብሔር ትዕቢተኞችን ይቃወማል ለትሑታን ግን ጸጋን ይሰጣል” /ያዕ. 4፡6/ በዚህ መሠረት ከላይ ታሪኳ እንደተገለጸው ከነናዊት ሴት ፈጣሪያችን ኢየሱስ ክርስቶስ ከፍ እንዲያደርገን ትሕትናን ገንዘብ እናድርግ፡፡

ሦስተኛ ይህች ከነናዊት ሴት ይዛ የተገኘችው ጥበብን ነው፡፡ ጥበብን መያዝ እንደሚገባ ታላቁ ንጉሥ ሰሎሞን እንደሚከተለው ተናግሯል፡፡ “በላ ለጥበብ እኅተ ዚአየ” /ጥበብን “አንቺ እኅቴ ነሽ” በላት/ /ምሳ. 7፡4/

“የጥበብ መጀመሪያ እግዚአብሔርን መፍራት ነው” /መዝ. 110፡10 /ምሳ. 9፡10/ የጥበብ (የእውቀት) መጀመሪያ እግዚአብሔርን መፍራት ነው፡፡ እግዚአብሔርን መፍራት ማለት ደግሞ ኃጢአት ብሠራ እግዚአብሔር በነፍስም በሥጋም ይፈርድብኛል ብሎ ከኃጢአት ርቆ የጽድቅ ሥራ መሥራት ነው፡፡ ስለዚህ በነፍስም በሥጋም እንዳይፈረድብን እግዚአብሔርን በመፍራት መኖር ያስፈልጋል፡፡

በረከተ ሥጋ በረከተ ነፍስ እንድናገኝ እንደዚች ከነናዊት ሴት ሃይማኖትን፣ ትሕትናን፣ ጥበብን ይዘን እንገኝ፡፡

ለዚህም እመቤታችን ቅድስት ድንግል ማርያም እንዲሁም ቅዱሳን በአማላጅነታቸው ይርዱን ፡፡ወስብሐት ለእግዚአብሔር

(ከላዕከ ወንጌል በእደ ማርያም ይትባረክ /ቀሲስ/የአዲስ አበባ ሀገረ ስብከት የትምህርት ስርጭት ኃላፊ)

ብፁዕ ወቅዱስ አቡነ ማትያስ ቀዳማዊ ፓትርያርክ የ2011 ዓ.ም የትንሣኤ በዓልን አስመልክተው መልእክት አስተላለፉ

ሙሉ የቅዱስነታቸው መልእክት እንደሚከተለው ይቀርባል

ቃለ በረከት

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት ዘተናገረ በበዐለ ትንሣኤሁ ለእግዚእነ ወአምላክነ ወመድኃኒነ ኢየሱስ ክርስቶስ በዕሥራ ምእት ዐሠርቱ ወአሐዱ ዓመተ ምሕረት

በስመ አብ ወወልድ ወመንፈስ ቅዱስ አሐዱ አምላክ አሜን

  • በሀገራችን በኢትዮጵያ በገጠርና በከተማ የምትኖሩ፤
  • ከሀገር ውጭ በተለያዩ አህጉር የምትገኙ፤
  • የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፤
  • በሕመም ምክንያት በየፀበሉና በየሆስፒታሉ ያላችሁ፤
  • እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

በጌታችን በኢየሱስ ክርስቶስ ቤዛነት ዲያብሎስን ኃጢአትንና ሞትን ድል እንድንነሣ ያደረገን እግዚአብሔር አምላካችን እንኳን ለብርሃነ ትንሣኤው በሰላም አደረሰን አደረሳችሁ!!

“ወለእግዚአብሔር አኰቴት ዘወሀበነ ንማዕ በእግዚእነ ኢየሱስ ክርስቶስ፤ በጌታችን በኢየሱስ ክርስቶስ በኩል ድል መንሣትን ለሰጠን ለእግዚአብሔር ምስጋና ይሁን” (1ቆሮ. 15፡57)፡፡

በሁሉም ዘንድ እንደሚታወቀው የእግዚአብሔር ዓላማ በፍጡር ሤራ ሊቀለበስ አይችልም፤ እግዚአብሔር በባሕርዩ ፍጹም መልካም ስለሆነ በእርሱ የተፈጠሩ ፍጡራንም እንደዚሁ መልካም ናቸው፤ ዛሬ ርኩሳን መናፍስት ብለን የምንጠራቸው ፍጡራንም ቢሆኑ፣ ፈጣሪ የሰጣቸውን ነጻ አእምሮ በተሳሳተ መንገድ ተጠቅመው ከመውደቃቸው የተነሣ ከመልካምነት ወደርኩስነት ተቀየሩ እንጂ ጥንት ሲፈጠሩ እንደሌላው ሁሉ መልካም ነበሩ፤

እግዚአብሔር ፍጥረታትን በአጠቃላይ መልካም አድርጎ ሲፈጥር፣ ሰውን ግን በተለየ ሁኔታ በመልኩና በአምሳሉ ፈጥሮ፣ በአፉ እስትንፋስ አክብሮና የማይሞት ሕያው አድርጎ፣ ከፍጡራን በላይ ከፈጣሪ በታች የሚገኝ ማእከላዊ ፍጡር አድርጎ ፈጥሮታል፡፡

የርኩሳን መናፍስት አለቃ የሆነው ዲያብሎስ በሰው ላይ በቅንዐት የተነሣበት ዋና ምክንያትም፣ ሰው ከፍጡራን ሁሉ በላይ ክቡር ሆኖ በመፈጠሩ ነው፤ በመሆኑም ዲያብሎስ በዚህ ቀንቶና ተመቅኝቶ ሰውን በማሳሳት፣ እግዚአብሔርን ከመምሰል ጸጋው ፈንግሎ ጣለው፤ ዲያብሎስ ሰውን አሸንፎ በመጣሉ፣ ለጊዜውም ቢሆን የማይቀለበሰውን የእግዚአብሔርን ዓላማ ያሰነካከለ መስሎ ታይቶአል፡፡

ከነገሩ ሁኔታ በግልጽ እንደሚታየው፣ ይህ ፍልሚያ በዲያብሎስና በሰው ልጅ መካከል የተካሄደ ነው፤ የውጊያው መሣሪያም ቁሳዊ ነገር ሳይሆን፣ በመንፈሳዊ ሞራል የማሸነፍና የመሸነፍ ጉዳይ ነው፤ ከዚህ አኳያ “መልካሙንና ክፉን ከሚያስታውቀው ዛፍእንዳትበሉ ከበላችሁ ትሞታላችሁ”  የሚል ከእግዚአብሔር ለሰው የተሰጠ ትእዛዝ በአንድ ወገን፣ የለም “ሞትንስ አትሞቱም፤ ነገር ግን ከእሱ በበላችሁ ቀን ዓይኖቻችሁ ይከፈታሉ፤ እንደ እግዚአብሔርም መልካምንና ክፉን ታውቃላችሁ” የሚል የዲያብሎስ አታላይ ምክር በሌላ ወገን፣ ለሰው ልጅ ቀርቦለታል፡፡

እነዚህ ሁለቱ እርስ በእርስ የሚቃረኑ ነገሮች፣ በሰው አእምሮ ውስጥ መፋለማቸውን ቀጥለው፣ በመጨረሻ “ብትበሉ አትሞቱም” የሚለው የዲያብሎስ ሐሳብ በሰው ዘንድ ተቀባይነትን ስላገኘ፣ መብላት አሸነፈ፤ አለመብላት ተሸነፈ፤ በውጤቱም የሽንፈቱ ኃሣር በሰው ላይ ወደቀና፣ የሰው ልጅ ክብሩን ሁሉ አጥቶ፣ በፈጸመው ጥፋት በሞት ተቀጣ፤ ይህ ሤራ በፍጡሩ በዲያብሎስ ጥበብ ተደረገ፤ ነገር ግን ከፍጡር ጥበብ ይልቅ የፈጣሪ ጥበብ ይበልጣልና፣ ለወደፊቱ ሰው ዲያብሎስን የሚያሸንፍበት ሁኔታ እንደሚመጣ፣ እግዚአብሔር ወዲያውኑ የተስፋ ፍንጭ ሰጠ፤ ተስፋው የተነገረው በራሱ በእግዚአብሔር ሲሆን፣ ጊዜውም በሰው ላይ የሞት ፍርድን ባስተላለፈበት ቅፅበት ነው፤ የተስፋው ይዘትም እንዲህ የሚል ነበር፡-

 “የሴቲቱ ዘር የእባቡን ራስ ይቀጠቅጣል “ የሚል ነበር፤ ይህ ተስፋ በየጊዜው እየተደጋገመ ለሰው ልጅ ይገለፅ ነበር፤ ለምሳሌ “ዘርህ የጠላትን ደጅ ይወርሳል” ተብሎ ለአብርሃም፣ “አንተ የዘንዶውን ራስ ቀጠቀጥህ፤ ለኢትዮጵያ ሰዎችም ምግባቸውን ሰጠኻቸው” ተብሎ ለኢትዮጵያውያን ተነግሮአል፤ ይህ ዓይነት የድልና የአሸናፊነት ተስፋ በተለያየ አገላለጽና አነጋገር፣ ለአምስት ሺሕ አምስት መቶ ዘመናት ያህል ለሰው ልጅ ሲነገር ቆየ፤ ከዚህ በኋላ ጊዜው ሲደርስ፣ እንደተስፋው ቃል ሲጠበቅ የቆየው፣ የእባብ ዲያብሎስን ራስ የሚቀጠቅጠው ዘር ከሴት ተወለደ፤ ይህ ዘር እንደመጀመሪያው አዳም ተራ ሰው አልነበረምና በተለመደው የዲያብሎስ ተንኮል ተሳስቶ የሚወድቅ አልሆነም፤ ምክንያቱም ከሴት የተወለደው ዘር (ዳግማዊ አዳም) ሰው ብቻ ሳይሆን፣ ሰውም አምላክም ነውና፣ ድሉ የዲያብሎስ ሳይሆን የሰው እንደሚሆን ሁኔታው ራሱ በግልጽ አመላከተ፡፡ በሰውነቱ የሴቲቱ ዘር፣ የአብርሃም ዘር፣ የዳዊት ዘር እየተባለ፣ በአምላክነቱ ደግሞ ወልደ እግዚአብሔር እየተባለ በትንቢተ ነቢያትና በአፈ መላእክት የተነገረለት ጌታችን አምላካችንና መድኃኒታችን ኢየሱስ ክርስቶስ፣ ድል አድራጊነቱን ያረጋገጠው ዐርባ ቀንና ዐርባ ሌሊት በጾመበት በረሀ ላይ ነበረ፡፡

 ዲያብሎስ በተለመደው ተንኮሉ በመብል፣ በፍቅረ ንዋይና፣ በትዕቢት አስጐምጅቶ ለመጣል ባደረገው ፍልሚያ፣ ዳግማዊው አዳም ኢየሱስ ክርስቶስ በመንፈሳዊ ኃይል ድባቅ እየመታ መሣሪያዎቹን ሁሉ ዶግ አመድ ስላደረገበት፣ ሽንፈትን ተከናንቦ እንደተመለሰ ቅዱስ መጽሐፍ ይነግረናል፤

ጌታችን በመዋዕለ ስብከቱም በተመሳሳይ መንገድ የዲያብሎስ ተላላኪ የሆኑ ርኩሳን መናፍስትን ድል አድራጊ በሆነው ቃሉ፣ “ አንተ ርኩስ መንፈስ እልሃለሁ ከእርሱ ውጣ” ሲላቸው፣ እነርሱም በበኩላቸው “አንተ ቅዱሱ የእግዚአብሔር ልጅ እንደሆንክ እናውቃለን፤ ያለጊዜው ልታጠፋን መጣህን?” እያሉ ሲመልሱ እናያለን፤ በዚህ አባባላቸው ርኩሳን መናፍስቱ የመጥፊያ ጊዜያቸው መቃረቡን ከማወቃቸውም በላይ፣ እሱ የሚያሸንፋቸውና የሚያጠፋቸው እንጂ፣ የሚመክቱትና የሚችሉት አለመሆኑን በአንደበታቸው ሲያረጋግጡ እናያቸዋለን፤ ይህም ይታወቅ ዘንድ ጌታችን ርኩሳን መናፍስቱን ካደሩባቸው የእርያ መንጋዎች ጋር፣ አንድ ላይ በጌርጌሴኖን ባህር አሰጥሞአቸዋል፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት

ከዚህ በላይ እንደተገነዘብነው የዲያብሎስ የውጊያ መሣሪዎች ሕግ፣ ኃጢአትና ሞት ናቸው፤ ዲያብሎስ በመጀመሪያ አትብላ የሚል ሕግ መነገሩን ሲያውቅ፣ ሰው ሕግን እንዲጥስ አደረገ፤ እግዚአብሔርም በበኩሉ ሕግ አውጪ፣ ሕግ ተርጓሚና ሕግ ፈጻሚ ነውና፣ ሕግ መጣሱን አረጋግጦ በሰው ላይ ፈረደ፤ ኃጢአት ማለት አንድን ነገር ማጣት ማለት ነውና፣ ሰው ሕግን በመጣሱ ምክንያት ታላቁ አባትና ጌታ እግዚአብሔርን አጣ፤ ማለትም ከእግዚአብሔር ተለየ፣ ቀጥሎም በሞተ ሥጋ ላይ ሞተ ነፍስ፣ በርደተ መቃብር ላይ ርደተ ገሃነም ተፈረደበት፤ ዲያብሎስ ሰውን ሲወጋና ሲጥል የሚኖር በዚህ ስልት ነው፤ ማለትም በመጀመሪያ ሰው ሕግን እንዲጥስ፣ ቀጥሎም በሕግ ጥሰት እንዲፈረድበት ያደርጋል ማለት ነው፤ ዲያብሎስ ይህንን ተንኮሉ የሚያከናውነው በሰው ጭንቅላት ገብቶ የሆነ ነገርን በማስጐምጀት፣ በማነሣሣትና በመገፋፋት እንደሆነ ሁላችንም መገንዘብ ይኖርብናል፡፡

ታድያ ጌታችን ኢየሱስ ክርስቶስ የዲያብሎስን ራስ ቀጠቀጠ ሲባል፣ የቀጠቀጠው አካሉን ሳይሆን፣ የሰውን ጭንቅላት እየመረዘ ሰውን የሚጥልባቸውና የጭንቅላቱ ውጤት የሆኑት መሣሪያዎቹን ነው፤ እነሱም ሕግ ጥሰት፣ ግብረ ኃጢአትና ፍዳ ሞት  ሲሆኑ፣ እነዚህ የሚያመጡትን ከባድ ቅጣት በመስቀሉ ላይ በፈጸመው ቤዛነት አስወገደ ማለት ነው፡፡ ቅዱስ ጳውሎስ ይህንን ሲያብራራልን እንዲህ ይላል “ሞት ሆይ መውጊያህ የት አለ?  የሞት መውጊያ ኃጢአት ነው፤ የኃጢአትም ኃይል ሕግ ነው ይላል፤ ቅዱስ ጳውሎስ ይህንን ያለበት ምክንያት ሕግ ካልተጠበቀ፣ ለኃጢአት ኃይል እንደሚሆን፣ ኃጢአትም ሰውን ወግቶ ለሞት የሚዳርግ ጦር እንደሚሆን ለማስረዳት ነው፤ ይሁንና እነዚህ ሁሉ በጌታችን መስቀል ከአበጋዛቸው ከዲያብሎስ ጋር ድል መሆናቸውን ሲያበስር፣ ሞት ሆይ መውጊያህ የት አለ? ብሎ ሲጠይቅ እናያለን፤ ምክንያቱም ጌታችን በመስቀል ላይ ሆኖ፣ ሕግ የሚጠይቀውን የቅጣት ዋጋ ሁሉ፣ እሱ በፈጸመው የቤዛነት መሥዋዕት ሙሉ  በሙሉ የተነሣ መሆኑን ሲያስገነዝብ፣ “ሁሉም ተፈጸመ” ብሎ ራሱ ነግሮናልና ነው፡፡

በዘመነ ስብከቱም “ኃጢአትህ ተሠርዮልሃል፤ ኃጢአትሽ ይቅር ተብሎልሻል “ እያለ ከማስተማሩም ሌላ፣ በመስቀል ላይ ሆኖ የኃጢአተኛው ወንበዴ ኃጢአትን በመሠረዝ፣ “ዛሬውኑ ከእኔ ጋር በገነት ትኖራለህ “ ብሎ በምሕረት ተቀብሎታል፤ በዚህም በእሱ መሰቀል የኃጢአት ዕዳና ቅጣት ተሠርዞ፣ ከእሱ ጋር በገነት መኖር እንደተጀመረ አብስሮናል፡፡ ጌታችን በመዋዕለ ስብከቱ ዐራት ሙታንን፣  በስቅለቱ ዕለት አምስት መቶ ሙታንን ከመቃብር በማስነሣት፣ የሞት ድል መሆንን በተግባር ከማሳየቱም ሌላ፣ “ አባት ሆይ ነፍሴን በእጅህ አደራ እሰጣለሁ” በማለት የነፍሳችን መንገድ ወደ እግዚአብሔር እንጂ፣ እንደድሮው ወደ ዲያብሎስ አለመሆኑን አሳይቶናል፤ ምክንያቱም ሞተ ነፍስ ማለት ከእግዚአብሔር መለየት፣ ድኅነተ ነፍስ ማለት ደግሞ ከእግዚአብሔር ጋር መሆን ማለት ነውና፡፡

ታድያ ይህ ሁሉ ሲሆን አሸናፊው ማን ነው? ተሸናፊውስ ማን ነው? የሚለውን በሚገባ ማወቁ ከእኛ አይጠበቅምን? ከተፈጸመው ድርጊት አኳያስ የመጨረሻው አሸናፊ የሴቲቱ ዘር የተባለውና የእባቡን ራስ የቀጠቀጠው ኢየሱስ ክርስቶስ አይደለምን? የመጨረሻው ተሸናፊስ ዓለሙን ሁሉ የሚያስተው ዲያብሎስና ሰይጣን የሚባለው ታላቁ ዘንዶ፣ እርሱም የቀደመው እባብ አይደለምን? ይህንን ድል ያቀዳጀንስ ያለመለያየትና ያለመቀላቀል፣ ያለመለዋወጥና ያለመጠፋፋት፣ ያለቡዓዴና ያለ ድማሬ፣ በአንድ አካልና በአንድ ባሕርይ ተዋሕዶ፣ የሰው ልጅ፣ የእግዚአብሔርም ልጅ የሆነው አንድያ ልጁ ኢየሱስ ክርስቶስ አይደለምን? እንኪያስ በጌታችን በኢየሱስ ክርስቶስ የመስቀል ቤዛነት ይህንን ድል ላጐናጸፈን ለእግዚአብሔር ከፍ ያለ ምስጋና፣ ክብርና አምልኮ ልናቀርብለት ይገባል፡፡

ይህ በአምላካዊ ጥበብ የተከናወነው ድል፣ በሰው ልጅ ታሪክ ታላቁና ዋነኛው፣ ተወዳዳሪም የማይገኝለት፣ ከድል ሁሉ የበለጠ ድል ስለሆነ፣ በሃይማኖት መሣሪያነት የድሉ ባለቤትና ተጠቃሚዎች መሆን ከኛ ይጠበቃል፡፡

ዲያብሎስ በተንኮሉ የሸረበው ሤራ፣ በጌታችን የቤዛነት ኃይል ተበጣጥሶ፣ ሰው በእግዚአብሔር መልክና አምሳል የመኖር ጸጋው እንደገና እጅ አድርጎአል፤ የእግዚአብሔር ዓላማም በዲያብሎስ ተንኮል ሳይደናቀፍ፣ ሰው እንደገና ታድሶ በተቀመጠለት እግዚአብሔርን የመምሰል አቅጣጫ ቀጥሎአል፤ እግዚአብሔር ለሰው ያለው ብቸኛ ዓላማ ይህ ነው፤ ይህ ዓላማ በጌታችን ዳግም ምጽአት ለሁሉም ምእመናን በይፋ እውን ይሆናል፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት

የጌታችን በዓለ ስቅለትና በዓለ ትንሣኤ የሚያስተምረን ዓቢይ ትምህርት፣ በመንፈሳዊ ኃይል ማለትም በመንፈሳዊ ሕግ ሁሉንም ድል ማድረግ እንደሚቻል ነው፤ የሰው መደበኛ ጠላት ሕግን መጣስ ነው፤ ሕግ ከተጣሰ ኃጢአት ይመጣል፤ ኃጢአት ከመጣ ደግሞ ከእግዚአብሔር መለየት ይመጣል፤ ትልቁና አደገኛው ሞት ይህ ነው፤ ትልቁ ሽንፈትም ይህ ነው፤ ታድያ እኛ የምንሸነፈው መቼ ነው? ያልን እንደሆነ መንፈሳዊ ሞራላችንና ኅሊናችን በክፉ መንፈስ ተሸንፎ ሕግን ስንጥስ ነው፤ ሰው ሕግን ካልጣሰ ኃጢአተኛ አይሆንም፤ ኃጢአተኛ ካልሆነም ከእግዚአብሔር አይለይም፤ ከእግዚአብሔር ካልተለየ ደግሞ በሥጋ ቢሞትም በነፍስ አይቀጣም፤ በዚህ ኩነት ስንገኝ ማለትም ሕግን ካልጣስን አሸናፊዎች መሆናችን እርግጠኞች እንሁን፡፡

በአሁኑ ጊዜ ዓለማችን በአጠቃላይ፣ እንደዚሁም ሀገራችን፣ በልዩ ልዩ ፈተና ሲደነባበሩ የሚታዩት፣ ከመንፈሳዊው ሕግ አፈንግጠው በሥጋዊ ፍልስፍና ብቻ ለመጓዝ በሚያደርጉት ከንቱ ሙከራ እንደሆነ፣ ከቶ ልንስተው አይገባም፤ እንደዚህ ዓይነቱ ርእዮት ለጊዜው ይመስል እንደሆነ እንጂ፣ በተጨባጭ እንደታየው የሚያዛልቅ ሆኖ አይገኝም፤ ለወደፊቱም ቢሆን ከማተረማመስ በቀር ሊሆን አይችልም፤ ቅዱስ መጽሐፍም፣ ተጨባጩ የዓለም ታሪክም ይህንን አያሳዩም፣ የሚያዋጣው ብቸኛው ርእዮት ፈሪሀ እግዚአብሔርን ማእከል ያደረገ ጥበብ ነው፣ ኢትዮጵያውያን የሆንን ሁሉ፣ ከዚህ ውጭ የሆነው አማራጭ እንደማያዋጣ እናስተውል ፡፡

ስለሆነም ከበዓለ ስቅለትና ከበዓለ ትንሣኤ ትልቅ ትምህርት ወስደን፣ ሰብአዊና መንፈሳዊ ሞራላችንን በሕግ፣ በፍቅር፣ በአንድነት፣ በሰላምና በእምነት እየገነባን፣ በአእምሮ እየታደስን፣ ትንሣኤ አእምሮን፣ ትንሣኤ ኅሊናን፣ ትንሣኤ ልቡናን ለመነሣት መፍጠን አለብን፤ ይህ ለሁሉም ኢትዮጵያውያን እውነተኛና ዘላቂ ድል ነውና፡፡ ቀድሞም ሆነ ዛሬ የሁሉም መሣሪያ ጭንቅላት ነው፤ ጭንቅላታችን ሁሉንም ነገር በመልካም አስተሳሰብ ለማሸነፍ ቊርጠኝነት ካጠረው፣ ምንጊዜም ተሸናፊ መሆናችን አይቀርም፤ በአንጻሩ ደግሞ ጭንቅላታችን ሁሉን ነገር በቅንነትና በበጎ ሐሳብ ብቻ ለማሸነፍ ከተነሣ የጊዜ ጉዳይ ካልሆነ በቀር፣ የኋላ ኋላ አሸናፊነታችን የማይቀር ነው፤ ነገር ግን ሁሉም ነገር በፈሪሀ እግዚአብሔር ሲታጀብ ነው፡፡ ዛሬ የሀገራችን ወቅታዊና አንገብጋቢ ነገሮች ሆነው የሚታዩት፣ የሰላም፣ የአንድነትና ከድህነት የመላቀቅ ጥያቄዎችን በአስተማማኝ ሁኔታ ልንመልሳቸው የምንችለው፣ በጭንቅላታችን ውስጥ መሽገው የተቀመጡትን፣ ጭፍን ጥላቻን፣ ራስ ወዳድነትን፣ ለኔ ብቻ ይድላኝ ባይነትን፣ በጥርጥር ዓይን መተያየትን፣ አለመተማመንን፣ መጨካከንን መለያየትን አንዱ ለሌላው ሥጋት መሆንን፣ ሙሉ በሙሉ ከጭንቅላታችን ማስወጣት ስንችል ብቻ ነው፡፡

 ምክንያቱም እነዚህ ሁሉ፣ ሽንፈትን ከሚያከናንቡን በቀር፣ ምንም ዓይነት ዕርባና ሊሰጡን አይችሉምና ነው፣ ነገር ግን ንጹሑን ጭንቅላታችን ተጠቅመን፣ በፍቅር፣ በወንድማማችነት፣ በኅብረት፣ በስምምነት፣ በአንድነት፣ በመከባበር፣ በመተማመን፣ በይቅር ባይነት፣ በመደጋገፍና በመተዛዘን መንፈስ ሁላችንም አጥብቀን ከሠራን፣ በሁሉም ዘርፍ በእርግጠኝነት አሸናፊዎች እንሆናለን፡፡

በ መ ጨ ረ ሻ ም

ለመላው ኢትዮጵያውያን ልጆቻችን በሙሉ የምናስተላልፈው መልእክት፣ በየዓመቱ የምናከብረው በዓለ ትንሣኤ፣ የጌታችን የኢየሱስ ክርስቶስን ትንሣኤ ለማክበር ብቻ ሳይሆን፣ የኛንም ትንሣኤ በተግባር ለማረጋገጥና የኅሊና ዝግጅት ለማድረግም ጭምር መሆኑን አውቀን፣ በድህነትና በሰላም እጦት፣ እየተፈተነች የምትገኝ ሀገራችን ኢትዮጵያን፣ ለመታደግ በትንሣኤ አእምሮ፣ በትንሣኤ ኅሊና እና በትንሣኤ ልቡና ታድሰን፣ ፍጹም በሆነ የይቅርታ መንፈስ፣ ለሀገር አንድነት፣ ለዜጎች ክብርና ደኅንነት፣ ለዘላቂ ልማትና ዕድገት፣ ለፍጹም ወንድማዊ ፍቅርና ስምምነት፣ ለእኩልነትና ለፍትሕ፣ በጥንቃቄና በማስተዋል፣ ባለመሰልቸት አጥብቀን እንድንሠራ፤ ከዚህ በተጨማሪ ለክርስቲያኖች ሁሉ በጥብቅ ልናሳስብ የምንፈልገው በጌታችን በመድኃኒታችን በኢየሱስ ክርስቶስ በዐለ ትንሣኤ ልናደርገው የሚገባን መንፈሳዊና ሰብአዊ ግዴታችንን እንዳንዘነጋ ነው፤ ይኸውም የተራቡና የተጠሙ ወገኖቻችንን ካለን በማካፈል አብረውን እንዲገድፉና በልተው ጠጥተው ተደስተው እንዲውሉ እንድናደርግ በእግዚአብሔር ስም አባታዊ መልእክታችንን እናስተላልፋለን፡፡

መልካም በዐለ ትንሣኤ ያድርግልን

እግዚአብሔር ሀገራችን ኢትዮጵያን ይባርክ ይቀድስ

ወስብሐት ለእግዚአብሔር አሜን

አባ ማትያስ ቀዳማዊ ፓትርያርክርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት

ሚያዝያ ፳ ቀን ፳፻፲፩ ዓ.ም.

አዲስ አበባ ኢትዮጵያ

006

“ሕያዉን ከሙታን ጋር ለምን ትፈልጉታላችሁ? በዚህ የለም ተነሥቷል” /ሉቃ. ፳፬፡፭/

ጌታችን አምላካችን መድኃኒታችን ኢየሱስ ክርስቶስ ከሙታን እንደሚነሣ ቅዱሳን ነቢያት አስቀድመው ትንቢት ተናግረዋል፡፡ ከትንቢቶቹም አንዱ “ወተንሥአ እግዚአብሔር ከመ ዘንቃሕ እምንዋም፡፡ ወከመ ኃያል ወኅዳገ ወይን፡፡ ወቀተለ ጸሮ በድኅሬሁ” /የተኛ ሰው ከእንቅልፍ እንደሚነቃ እግዚአብሔር ከሙታን ተነሣ የወይን ስካር እንደተወው እንደ ኃያልም ሰው፤ በኋላው በተተከለ መስቀል ጠላቱን ድል አደረገ/ /መዝ. 77፡65/

      ስለ ጌታችን ትንሣኤ አራቱም ወንጌላውያን ጽፈዋል፡፡ ይህም /ማቴ. 28፡1-15/ ማር. 16፡1-18/ /ሉቃ. 24፡ 1-12/ ዮሐ. 20፡ 1-18/ ይህን መሠረት በማድረግ የትንሣኤው ታሪክ እንደሚከተለው ተገልጻ_ል፡፡

ትንሣኤ፡- ቃሉ ግእዝ ሲሆን ትርጉሙ መነሣት ማለት ነው፡፡ የሰላም አምላክ ኢየሱስ ክርስቶስ መጀመሪያ ትንሣኤውን የገለጠው ለማርያም መግደላዊትና ለያዕቆብ እናት ማርያም፤ ለሰሎሜ እንዲሁም ለሌሎች ቅዱሳት አንስት ነው፡፡

      ማርያም መግደላዊት አገሯ መግደሎን ስለሆነ በአገሯ መግደላዊት ተብላለች ሰባት አጋንንት አድረውባት ሰባት ዓይነት ኃጢአት ያሠሯት ነበር፡፡ መድኃኒታችን ኢየሱስ ክርስቶስ ሰባቱንም አጋንንት አወጣላት፡፡ ይህን ከባድ ውለታ በማሰብ ከሳምንቱ በመጀመሪያው ቀን እጅግ ማልዳ ከላይ ከተጠቀሱት ቅዱሳት አንስት ጋር ሽቶ ይዛ ወደ መቃብሩ ሄደች ይህም በአገራቸው በእስራኤል ልማድ ነው፡፡ በእስራኤል ሰው በተቀበረ በሦስተኛው ቀን በመቃብሩ ላይ ሽቶ ያርከፈክፉበታል፡፡ ወደ መቃብሩ በደረሱ ጊዜ መቃብሩ ተከፍቶ ሁለት መላእክት ነጭ ልብስ ለብሰው አንዱ መልአክ በመቃብሩ በራስጌ ሌላው በግርጌ ሆነው ታዩአቸው፡፡ እነርሱም እጅግ ፈሩ፣ መፍራታቸውን አይተው ሁለቱ መላእክት “አትፍሩ አይዟችሁ ሕያውን ከሙታን መካከል ስለምን ትፈልጋላችሁ? እርሱ ተነሥቷል በዚህ የለም በኃጢአተኞች እጅ አልፎ እንደሚሰጥና እንደሚሰቀል፣ በሦስተኛውም ቀን እንደሚነሣ አስቀድሞ በገሊላ ሳለ ለእናንተ እንደተናገረ አስቡ፡፡ መነሣቱንም ሄዳችሁ ለደቀ መዛሙርቱ ፈጥናችሁ ንገሯቸው” በማለት ሁለቱ መላእክት አጽናንተዋቸዋል፡፡ እነርሱም ሄደው መነሣቱን ለደቀ መዛሙርቱ ነግረዋል፡፡ በዮሐንስ ወንጌል ምዕራ 20፡ ቁ. 19-31 እንደተጻፈው በትንሣኤ ዕለት ማታ ደቀ መዛሙርቱ አይሁድን ስለፈሩ በዝግ ቤት ተሰብስበው ሳሉ የሰላም ንጉሥ ኢየሱስ ክርስቶስ መጣ፡፡ ተሰብስበው በነበሩበት ቤት ገባ፡፡ በመካከላቸው ቆሞ ሰላም ለእናንተ ይሁን አላቸው ይህንንም ብሎ እጆቹንም ጎኑንም አሳያቸው፡፡ እነርሱም በጣም ደስ አላቸው፡፡ እርሱም ዳግመኛ ሰላም ለእናንተ ይሁን አብ እንደላከኝ እኔ ደግሞ እልካችኋለሁ አላቸው፡፡ ይህንም ብሎ እፍ አለባቸውና መንፈስ ቅዱስን ተቀበሉ፡፡ ኃጢአታቸውን ይቅር ያላችኋቸው ሁሉ ይቀርላቸዋል የያዛችሁባቸው ግን ይያዝባቸዋል አላቸው፡፡ ነገር ግን ከአሥራ ሁለቱ ሐዋርያት አንዱ ዲዲሞስ የሚሉት ቶማስ በዚሁ ቀን አልነበረም ሌሎች ደቀ መዛሙርት ጌታን አይተነዋል አሉት፡፡ እርሱ ግን የችንካሩን ምልክት በእጆቹ ካላየሁ ጣቴንም በችንካሩ ምልክት ካላገባሁ እጄንም በጎኑ ካላኖርሁ አላምንም አላቸው፡፡

      ከስምንት ቀን በኋላም ደቀ መዛሙርቱ ደግመው በውስጥ ነበሩ ቶማስም ከእነርሱ ጋር ነበር፡፡ ደጆችም ተዘግተው ሳሉ የሰላም አምላክ ኢየሱስ ክርስቶስ መጣ፤ በመካከላቸውም ቆሞ ሰላም ለእናንተ ይሁን አላቸው፡፡ ከዚያም በኋላ ቶማስን ጣትህን ወደዚህ አምጣና እጆቼን እይ እጅህንም አምጣና በጎኔ አግባው እመን እንጂ ተጠራጣሪ አትሁን አለው፡፡ ቶማስም ጌታዬ፤ አምላኬም ብሎ መለሰለት መድኃኒታችን ኢየሱስ ክርስቶስም ቶማስን ስለአየኸኝ አምነሃል ሳያዩ የሚያምኑ ብፁዓን ናቸው አለው፡፡ ይህ ቀን ጌታችን ለሁለተኛ ጊዜ ቶማስ ባለበት ለደቀ መዛሙርቱ የተገለጠበት ቀን ስለሆነ ዳግም ትንሣኤ ተብሏል፡፡

የጌታችን ትንሣኤ ለክርስትናው ትምህርት መሠረት ነው፡፡ የጌታችን ትንሣኤ የእኛም ትንሣኤ ነው፡፡ ለምን፡- በእርሱ ትንሣኤ የእኛ ትንሣኤ ተረጋግጧልና እኛ ሞተን ፈርሰን በስብሰን አንቀርም በትንሣኤ ዘጉባኤ እንነሣለን፡፡ ሐዋርያው ቅዱስ ጳውሎስ የእኛን ትንሣኤ በዘርዕ ምሳሌ ተናግሯል፡፡ ይህም “አንተ ሰነፍ አንተ የምትዘራው እንኳን ካልፈረሰ አይበቅልም” /1ኛ. ቆሮ. 15፡36/ ይህም ማለት አንድ ገበሬ ዘርዕ ይዘራል፤ ያ ዘርዕ ከአፈር ጋር ይቀላቀላል፤ ይፈርሳል ከዚያም ይበቅላል እኛም ሞተን ፈርሰን በስብሰን አንቀርም እንነሳለን፡፡ መቃብራችን ላይ መስቀል መደረጉ የትንሣኤያችን ምልክት ነው፡፡

ስለዚህ ለእኛ ትንሣኤ መሠረቱ የጌታችን የአምላካችን የመድኃኒታችን የኢየሱስ ክርስቶስ ትንሣኤ ነው፡፡ ከላይ እንደተገለጸው ሁላችንም በትንሣኤ ዘጉባኤ እንነሣለን፡፡ ከዚያም በሕይወተ ሥጋ ሳሉ መልካም የሠሩ ተመስግነው ወደ ዘለዓለማዊ ሕይወት ወደ መንግሥተ ሰማያት ይገባሉ፡፡ በሕይወተ ሥጋ ሳሉ ክፉ የሠሩ ደግሞ ተወቅሰው ዘለዓለማዊ ፍዳ ወዳለበት ወደ ገሃነመ እሳት ይገባሉ፡፡ ይህንንም ጌታችን በቅዱስ ወንጌል እንዲህ ሲል ተናግሯል፡፡ “ስለዚህ ነገር አታድንቁ በመቃብር ያሉት ሙታን ሁሉ ቃሉን የሚሰሙባት ሰዓት ትመጣለች ሕጉን የፈጸሙ በሕይወት ለመኖር ይነሣሉ፡፡ ክፉ ሥራ የሠሩ ግን በፍዳና በጨለማ ለመኖር ይነሣሉ፡፡” /ዮሐ. 5፡29/

በዚህ መሠረት ሀገረ ሕይወት መንግሥተ ሰማያትን እንድንወርስ ትንሣኤ ልቡና ያስፈልገናል፤ ትንሣኤ ልቡና ማለትም የልብ መነሣት ማለት ነው፤ ልባችን መልካም ሥራ ለመሥራት መነሣት አለበት፡፡ ይህንንም ሐዋርያው ቅዱስ ጳውሎስ እንዲህ ሲል ተናግሯል፡፡ “አንተ የምትተኛ ንቃ ከሙታንም ተነሣ ክርስቶስም ያበራልሃል” /ኤፌ. 5፡14/

መሠረተ ቤተ ክርስቲያን ቅዱስ ያሬድ “ትንሣኤከ ለእለ አመነ ብርሃነከ ፈኑ ዲቤነ” (ትንሣኤህን ላመንን ለእኛ ብርሃነ ረድኤትህን ላክ) ብሎ በተናገረው መሠረት ፈጣሪያችን ብርሃነ ረድኤቱን እንዲልክልን ትንሣኤውን ማመን ያስፈልጋል፡፡ ለመንፈሳዊ ጉዞ መሠረቱ እምነት ነውና፡፡ እምነተ ጠንካሮች መሆን እንደሚገባን መድኃኒታችን ኢየሱስ ክርስቶስ እንዲህ ሲል ተናግሯል፡፡ “የሰናፍጭ ቅንጣት ያህል እምነት ቢኖራችሁ ይህን ተራራ ከዚህ ተነሥተህ ወደዚያ እለፍ ብትሉት ያልፋል” /ማቴ. 17፡20/ ይህንን ሊቃውንት ሲያመሰጥሩት በሰናፍጭ ፍሬ ላይ ትንሽ እንኳን የመሰንጠቅ ምልክት አይታይም በእምነታችሁ ትንሽ እንኳን ጥርጥር እንዳይኖር፣ ጥርጥርን አስወግዳችሁ ፍጹም እምነትን ገንዘብ ካደረጋችሁ ተራራ ታፈልሳላችሁ፡፡ እንዲሁም በተራራ የተመሰለው ሰይጣንን ታወጣላችሁ ማለት ነው፡፡

እምነታችንን ደግሞ በሥራ መግለጽ ያስፈልጋል ሰው በእምነት ብቻ አይድንም ከእምነት ጋር ግድ ሥራ መኖር አለበት፡፡ “እምነት አለኝ የሚል ሥራ ግን የሌለው ሰው ቢኖር ምን ይጠቅመዋል እምነቱስ ሊያድነው ይችላልን?” /ያዕ. 2፡14/ እምነትማ ብቻ ከሆነ አጋንንትም ያምናሉ ይንቀጠቀጡማል፡፡ /ያዕ. 2፡19/

ቅዱስ ያዕቆብ በዚሁ ምዕራፍ ቁጥር 26 ላይ በእምነት ብቻ መዳን እንደማይቻል እጅግ በሚያስደንቅ ምሳሌ ተናግሯል፡፡ ይህም፡- “ከነፍስ የተለየ ሥጋ የሞተ እንደሆነ እንዲሁ ደግሞ ከሥራ የተለየ እምነት የሞተ ነው፡፡”

በዚህ መሠረት ከመከራ ሥጋ ከመከራ ነፍስ እንድንድን፤ በረከተ ሥጋ በረከተ ነፍስ እንድናገኝ እምነታችንን በሥራ መግለጽ ያስፈልጋል፡፡

ለዚህም እመቤታችን ቅድስት ድንግል ማርያም እንዲሁም ቅዱሳን በአማላጅነታቸው ይርዱን፡፡ለብርሃነ ትንሣኤው ያደረሰን አምላክ ለብርሃነ ዕርገቱ በሰላም ያድርሰን!!

ወስብሐት ለእግዚአብሔር

በላዕከ ወንጌል በእደ ማርያም ይትባረክ /ቀሲስ/ የአዲስ አበባ ሀገረ ስብከት የትምህርት ስርጭት ኃላፊ

002

በዓለ ሆሣዕና

የኢትዮጵያ ኦርቶዶክስ ተዋሕዶ ቤተክርስቲያን ከምታከብራቸው ዘጠኙ ዐበይት በዓላት መካከል አንዱ የሆሣዕና በዓል ነው፡፡ ስለዚህ በዓል አስቀድሞ ትንቢት ተነግሯል፤ ከትንቢቶቹም አንዱ እንደሚከተለው ተጠቅሷል፡፡ “አንቺ የጽዮን ልጅ ሆይ እጅግ ደስ ይበልሽ አንቺ የኢየሩሳሌም ልጅ ሆይ እልል በይ እነሆ ንጉሥሽ ትሑት ሆኖ በአህያና በአህያይቱ ውርንጫ ላይ ተቀምጦ ወደ አንቺ ይመጣል” /ትን. ዘካ. 9፡9/

002

ከዚህም ጋር ስለበዓለ ሆሣዕና አራቱም ወንጌላውያን ጽፈዋል፡፡ ይህም፡- ማቴ. 21፡1-11፣ ማር. 11፡1-10፣ ሉቃ. 19፡28-40፣ ዮሐ. 12፡12-15 አራቱም ወንጌላውያን የጻፉት የበዓሉ ታሪክ እንደሚከተለው ተገልጻ_ል፡፡

ጌታችን አምላካችን መድኃኒታችን ኢየሱስ ክርስቶስ ወደ ኢየሩሳሌም ቀርቦ ደብረ ዘይትም በሚባል ተራራ አጠገብ ወዳሉት ወደቤተ ፋጌና ወደ ቢታንያ በቀረበ ጊዜ ከደቀ መዛሙርቱ ሁለቱን ላከና በፊታችሁ ወዳለችው መንደር ሂዱ፡፡ ወደ እርስዋም ገብታችሁ ከሰው ገና ማንም ያልተቀመጠባት አህያ ከውርንጫይቱ ጋር ታሥረው ታገኛላችሁ ፈትታችሁ አምጡልኝ ማንም ስለምን እንዲህ ታደርጋላችሁ? ቢላችሁ ለጌታ ያስፈልጉታል በሉ አላቸው፡፡ የተላኩትም ሄደው እንዳላቸው አገኙ፡፡ እነርሱም አህያዋንና ውርንጫዋን ሲፈቱ የአህያው ባለቤት አህዮቹን ስለምን ትፈቷቸዋላችሁ? አላቸው እነርሱም ለጌታ ያስፈልጉታል አሉ ፈቀደላቸው ወዲያው አመጡለት፡፡ የታሠሩትን ፈትታችሁ አምጡልኝ ማለቱ ሰው ሁሉ ከኃጢአት ማሠሪያ የሚፈታበት ጊዜ እንደደረሰ ለማጠየቅ ነው፤ ደቀ መዛሙርቱም ልብሳቸውን በአህያዋና በውርንጫዋ ላይ ጎዘጎዙ የዚህም ምስጢር ኮርቻ ይቆረቁራል ልብስ አይቆረቁርም የማትቆረቁር ሕግ ሠራህልን ሲሉ፤ አንድም ልብስ በአካል ያለውን ነውር ይሸፍናል አንተም ከባቴ አበሳ /በደልን የምትሸፍን/ ነህ ሲሉ ነው፡፡

ጌታችን አምላካችን መድኃኒታችን ኢየሱስ ክርስቶስም በአህያዋና በውርንጭላዋ ላይ በጥበብ በአንድ ጊዜ ተቀምጦባቸዋል ለእርሱ የሚሳነው ነገር የለምና፡፡ በአህያ የተቀመጠበት ምክንያት ደግሞ ቀድሞ ነቢያት ዘመነ ጸብዕ የሆነ እንደሆነ በፈረስ ተቀምጠው ይታያሉ፡፡ ዘመነ ሰላም የሆነ እንደሆነ በአህያ ተቀምጠው መነሳንስ ይዘው ይታያሉና ዘመነ ሰላም ደረሰ ሲል ትንቢቱን ባወቀ አናግሯል ምስጢሩም በአህያ የተቀመጠ ሸሽቶ አያመልጥም አሳዶም አይዝም እሱም ካልፈለጉኝ አልገኝም ከፈለጉኝ አልታጣም ሲል ነው፡፡ ሲሄዱም ሕዝቡ ልብሳቸውን በመንገድ አነጠፉ፡፡ እንኳንስ አንተ የተቀመጥክባት አህያ መሬት መርገጥ አይገባትም ሲሉ ነው፡፡ እንዲሁም ሕዝቡ፣ ሕፃናቱ ሳይቀሩ ዘንባባ ይዘው የሚቀድሙትም የሚከተሉትም “ሆሣዕና ለወልደ ዳዊት ቡሩክ ዘይመጽእ በስመ እግዚአብሔር” /ለዳዊት ልጅ መድኃኒትን መባል ይገባዋል፤ በእግዚአብሔር ስም የሚመጣ የተባረከ ነው/ ሆሣዕና በአርያም እያሉ ያመሰግኑ ነበር፡፡ ሆሣዕና ማለት መድኃኒት ማለት ነው፡፡ የዘንባባው ምስጢርም፡- አብርሃም ይስሐቅን ይስሐቅ ያዕቆብን በወለዱ ጊዜ፤ እስራኤል ከግብፅ በወጡ ጊዜ ዮዲት ሆሎፎርኒስን በገደለች ጊዜ ዘንባባ ይዘው እግዚአብሔርን አመስግነዋልና በዚህ መሠረት ሕዝቡ፡- የሰላም አምላክ ኢየሱስ ክርስቶስ በአህያ ላይ ተቀምጦ ሲሄድ ዘንባባ ይዘው አመስግነውታል፡፡ ደቀ መዛሙርቱ ሲያመሰግኑ ከሕዝቡ መካከል ከፈሪሳውያን አንዳንዱ መምህር ሆይ፡- ደቀ መዛሙርትህን ገሥጻቸው አሉት፡፡ መልሶም እላችኋለሁ እነዚህ ዝም ቢሉ ድንጋዮች ያመሰግናሉ አላቸው፤ ድንጋዮች ሳይቀሩ አመስግነውታል፡፡ (ሉቃ. 19፥40)

በዚህ መሠረት ይህ በዓል የምስጋና በዓል ነው፡፡ እኛም ፈጣሪያችንን ሁልጊዜ ማመስገን አለብን የተፈጠርነውም ስሙን ለመቀደስ ክብሩን ለመውረስ ነው፡፡ ስሙን ለመቀደስ ማለት ስሙን ለማመስገን ማለት ነው፤ ክብሩን ለመውረስ ማለት ደግሞ መንግሥተ ሰማያትን ለመውረስ ማለት ነው፡፡ የተፈጠርነው ለዚህ የተቀደሰ ዓላማ ስለሆነ ሁልጊዜ እግዚአብሔርን ማመስገን ይገባል፡፡ ምስጋናውም በፍጽም እምነት፣ በቅንነትና በንጹሕ ልብ መሆን አለበት፡፡ “እባርኮ ለእግዚአብሔር በኵሎ ጊዜ ወዘልፈ ስብሐቲሁ ውስተ አፉየ” /እግዚአብሔርን ሁልጊዜ አመሰግነዋለሁ ምስጋነውም ዘወትር በአፌ ነው/ /መዝ. 33፡1/

አምላካችን ልዑል እግዚአብሔርን ሁልጊዜ አመስግነን መንግሥቱን ለመውረስ እንድንችል የእመቤታችን ቅድስት ድንግል ማርያም እንዲሁም የቅዱሳን አማላጅነታቸው አይለየን፡፡

ለበዓለ ሆሣዕና ያደረሰን አምላክ ለብርሃነ ትንሣኤውም በሰላም ያድርሰን፡፡

ወስብሐት ለእግዚአብሔር

ከላዕከ ወንጌል በእደ ማርያም ይትባረክ /ቀሲስ/ የአዲስ አበባ ሀገረ ስብከት የትምህርት ሥርጭት ኃላፊ

‹‹ጥንተ ስቅለት››

የዓለም መድኅን ኢየሱስ ክርስቶስ ከቅድስተ ቅዱሳን ድንግል ማርያም በነሣው ሥጋ በቀራንዮ መስቀል ላይ ተሰቅሎ ሕይወቱን ለዓለም ቤዛ፣ አድርጎ የሰጠው መጋቢት ፳፯ ቀን ፴፫ ዓ.ም እንደሆነ ይታወቃል፡፡
ይህ ቀን ስለክርስቶስ ሕማም፣ ስለመከራ መስቀሉና ስለሞቱ የተነገሩት ትንቢቶችና ምሳሌዎች ሁሉ የተፈጸሙበት፤ ሰማያዊ አምላክ ስለሰው ልጆች ፍቅር ሲል ልዩ ልዩ ጸዋትወ መከራዎችን የተቀበለበትና በሞቱ ሞትን ሽሮ የአዳምን ዘር ሁሉ ከሞት ሞት ያዳነበት፣ ለዓለሙ ሁሉ ፍቅሩን የገለጠበት፣ በመስቀል ላይ ባፈሰሰው ደሙም ዓለምን ነፃ ያወጣበት፣ በአጠቃላይ ዐሥራ ሦስቱን ሕማማተ መስቀል በትዕግሥት ተቀብሎ ቅድስት ነፍሱን ከቅዱስ ሥጋው በገዛ ፈቃዱ የለየበት የስቅለቱና የሞቱ መታሰቢያ የሚከበርበት ቀን በመሆኑ ጥንተ ስቅለት ተብሎ ይጠራል፡፡
በዓሉም በዓለ መድኃኔዓለም እየተባለ በየዓመቱ በመድኃኔዓለም ስም በታነጹ አብያተ ክርስቲያናት ሁሉ ታቦተ ሕጉ እየወጣና ዑደትም እየተደረገ በታላቅ ክብር ሲከበር የኖረ ታላቅ መንፈሳዊ በዓል ነው፡፡
መድኃኔዓለም ማለት ምን ማለት ነው? ክርስቶስ፣ ማለት መሲህ፤ ኢየሱስ ማለት መድኃኒት፣ አማኑኤል ማለትም እግዚአብሔር ከእኛ ጋር ነው ተብሎ እንደሚተረጎም ሁሉ መድኃኔዓለም ማለትም ዓለምን ሁሉ የሚያድን የዓለም መድኃኒት ማለት እንደሆነ ከቅዱሳት መጻሕፍት እንማራለን፡፡
ዓለም የዳነውም ከላይ እንደተገለጠው በመስቀሉ ላይ በአፈሰሰው ደሙና በሞቱ አማካይነት በተገኘው ጸጋ ነውና የጥንተ ስቅለቱና የመስቀሉም ምሥጢር ዓለምን የማዳን ምስጢር ስለሆነ የጥንተ ስቅለቱ የመታሰቢያ በዓል በሚከበርበት በመጋቢት ፳፯ ቀን ምእመናን ሁሉ በቤተክርስቲያን በመገኘት በእሱ ደም ዓለም የዳነ መሆኑን በሚገልጠው መድኃኔዓለም በተሰኘው ስሙ እየተማጸኑና ዓለምን ለማዳን የተቀበለውን መከራ መስቀል እያስታወሱ በዓሉን በድምቀት ያከብሩታል፡፡
መድኃኔዓለም የሚለው የጌታችን ስም ቃሉ ራሱ የድኅነት ወይም የመዳን ቃል እንደሆነ በምሥጢር የሚያስረዱት ቅዱሳት መጻሕፍት ብዙዎች ናቸው ከእነዚህም መካከል፡ –
፩ኛ. ‹‹እግዚአብሔርሰ ንጉሥ ውእቱ እምቅድመ ዓለም ወገብረ መድኃኒተ በማዕከለ ምድር›› ‹‹እግዚአብሔር ዓለም ከመፈጠሩና ከተፈጠረም በኋላ ዘለዓለማዊ ንጉሥ ነው፡፡ የምድር ማዕከል በሆነች ቀራንዮም መድኃኒትን አደረገ›› የሚለው የነቢዩ ዳዊት ትንቢት አንደኛው ማስረጃ ነው (መዝ. ፸፫ ፥ ፲፬)፡፡
፪ኛ. ቅዱስ ሊቃስ እንደ ጻፈው ክርስቶስ በተወለደበት ሌሊት የጌታችን ክብር በዙሪያቸው ሲያበራ ያዩ እረኞች ታላቅ ፍርሃትን ከመፍራታቸው የተነሣ፤ ሰማያዊ መልአክ ‹‹ኢትፍርሁ እስመ ናሁ እዜንወክሙ ዐቢየ ዜና ዘይከውን ፍስሐ ለክሙ ወለኵሉ ሕዝብ እስመናሁ ተወልደ ለክሙ መድኅን ዘውእቱ ክርስቶስ›› ‹‹እነሆ ለሕዝቡ ሁሉ የሚሆን ታላቅ ደስታ የምሥራች እነግራችኋለሁና አትፍሩ፡፡ ዛሬ በዳዊት ከተማ መድኃኒት እርሱም ክርስቶስ ጌታ ተወልዶላችኋልና፤›› በማለት የነገራቸው ቃል ትልቅ ማስረጃ ነው ለማለት ይቻላል (ሉቃ. ፪ ÷ ፲ – ፲፩)፡፡
መጋቢት ፳፯ ቀን የሚከበረውን የመድኃኔዓለምን በዓል ጥንተ ስቅለቱ ነው ብለን ስንናገርና የስቅለቱን መታሰቢያ በዓል ስናከብር በዚሁ ቀን በጌታችን ኢየሱስ ክርስቶስ ላይ የተፈፀሙትን ጸዋትወ መከራዎችና እሱ በመስቀል ላይ እያለ በሰማይና በምድር የተፈጸሙትን ተአምራት አብረን ልናስባቸውና ልብም ልንላቸው ይገባል፡፡
በእሱ ላይ ከደረሱት ልዩ ልዩ ጸዋትወ መከራዎች ጥቂቶቹን ለማስታወስ ያህል፡ – የአይሁድ መማክርት የመከሩበት ከንቱ ምክርና በዕለተ ረቡዕም እንደዚሁ በአይሁድ ሸንጎ የተወሰነበት ጠማማና የተዛባ ፍርድ የመጀመሪያዎቹ ሲሆኑ ቀጥሎም መጋቢት ፳፮ ቀን የጸሎተ ሐሙስ ዕለት ማታ ለ፳፯ አጥቢያ ለደቀ መዛሙርቱ የመጨረሻውን እራት መግቦ፣ ምሥጢረ ቊርባንን ከመሠረተ በኋላ ሌሊቱን በሙሉ በአይሁድ ጭፍሮችና በሊቃነ ካህናት ሎሌዎች የደረሰበት ስቃይና መንገላታት እጅግ የሚያሰቅቅ ነው፡፡
ጭፍሮቹ በይሁዳ መሪነት እሱን ይዘው በቁጥጥራቸው ሥር ከአደረጉ በኋላ እንደታሰረ በመጀመሪያ ወደ ሐና ዘንድ ከዚያም ወደ ሊቀ ካህናቱ ወደ ቀያፋ፣ ቀጥሎም ወደ ጲላጦስ ከጲላጦስ ደግሞ ወደ ሔሮድስ ከዚያም እንደገና ወደ ጲላጦስ እያመላለሱ እንዲንገላታና እንዲሰቃይ አድርገውታል፡፡ በዚያውም ላይ እየሰደቡትና እየዛቱበት ፊቱን በጥፊ ራሱን ደግሞ በዱላ ይመቱት እንደነበረ ቅዱሳት መጻሕፍት በሰፊው ያስረዳሉ (ማቴ. 27÷27-31)፡፡
መጋቢት ፳፯ ቀን በዕለተ ዓርብ ከሦስት እስከ ዘጠኝ ሰዓት የተቀበላቸው መከራዎችም እጅግ በጣም ብዙዎች ናቸው፡፡ ጥቂቶቹን ለማስታወስ ያህል፣ በሚያሰቅቅና በሚዘገንን ሁኔታ በጅራፍ ተገርፎአል፤ መስቀሉን ተሸክሞ በቀራንዮ ተራራ እየወደቀ እየተነሣ፣ የገዢው የጲላጦስ ወታደሮችም እያዳፉት፣ ርኩስ ምራቃቸውንም እየተፉበትና እያፌዙበት ወደ ተራራው እንዲወጣ ተደርጎአል፡፡
ስለእሱ የተጻፈው የነቢያት ትንቢት ይፈጸም ዘንድ ልብሱን ገፈው ከለሜዳ አልበሰውታል፡፡ በልብሱም ላይ ዕጣ ተጣጥለው ተካፍለውታል፤ የእሾህ አክሊል ጕንጕን በራሱ ላይ በማድረግ የሰማይና የምድር ንጉሥ እንዳልሆነ ሁሉ ‹‹ንጉሥ ሆይ! ሰላም ለአንተ ይሁን››! እያሉ ተሳልቀውበታል፡፡
በመጨረሻም ጐኑን በጦር ወግተውታል፡፡ እጆቹን እና እግሮቹን በ፭ ችንካሮች (ቅንዋት) ቸንክረው በመስቀል ላይ ሰቅለውታል፡፡
በመስቀል ላይ እያለም ሰባት ዐረፍተ ነገሮችን ተናግሮአል፤ ከእነዚህም በጣም የሚያስደንቀው ጠላቶቹ እያሰቃዩት፣ እያንገላቱትና እየገደሉትም ሳሉ ‹‹አባት ሆይ የሚያደርጉትን አያውቁትምና ይቅር በላቸው›› ሲል የተናገረው ቃል ሲሆን የመጨረሻውም ‹‹እነሆ ሁሉም ነገር ተፈጸመ›› በማለት ከተናገረ በኋላ ወዲያውኑ ቅድስት ነፍሱን ከቅዱስ ሥጋው በራሱ ፈቃድ ለይቶ ሞት የማይገባው አምላክ ለሰው ልጆች ሕይወት ሲል ራሱን ለሞት አሳልፎ መስጠቱ ነው፡፡
የአይሁድ ሊቃነ ካህናትና ጸሐፍት ፈሪሳውያን በክርስቶስ ላይ ያቀረቡት መሠረተ ቢስ ክስና ውንጀላ በታሪክ ሂደት በጣም ሲያስገርም የሚኖር ነው ይኸውም፡ –
፩ኛ. ለቄሳር ግብር መክፈል አይገባም በማለት አስተምሮል፤
፪ኛ. ዕለተ ሰንበትን ሽሮአል፤ ራሱንም ከእግዚአብሔር ጋር አስተካክሏል ወዘተ አያሉ በሐሰት የሚመሰክሩ ምስክሮችነ በገንዘብ አባብለውና አደራጅተው በሐሰት በማስመስከር ምንም ዓይነት ወንጀል ያልፈጸመው ንጹሐ ባሕርይ ኢየሱስ ክርስቶስ በወንጀለኞች መካከል በመስቀል ላይ ተሰቅሎ እንዲሞት፤ በርባን የተባለው ወንጀለኛ ግን ከእስር እንዲፈታላቸው ለጴንጤናዊው ጲላጦስ ያቀረቡት ልመናና ገዥው ጲላጦስም ኢየሱስ ክርስቶስ ወንጀል እንዳልፈጸመ ራሱ እየመሰከረና እያረጋገጠ፣ ሚስቱም በሕልም ተረድታ እጁን በዚህ ጻድቅና ንጹሕ ሰው ደም እንዳያስገባ እያስጠነቀቀችው ‹‹ኢየሱስን ስቀለው በርባንን ፍታው›› የሚለውን ጩኸታቸውን በመስማትና እነሱን በመፍራት ብቻ ‹‹እኔ ከዚህ ሰው ደም ንጹሕ ነኝ›› በማለት እጁን ከታጠበ በኋላ ራሱ በጅራፍ ገርፎ እናንተ እንደ ሕጋችሁ ወስዳችሁ ስቀሉት ብሎ ለጠላቶቹ አሳልፎ በመስጠት የፈጸመው ስሕተትና በፍርድ ወንበር ላይ ተቀምጦ የሰጠው የተዛባ ፍርድ እጅግ የሚያሳዝን በመሆኑ ከጥንተ ስቅለቱ ጋር በትዝብት አብሮ ሲታወስ ይኖራል፡፡
ክርስቶስ የተሰቀለው መጋቢት ፳፯ ቀን ከሆነ እንደገና በሌላ ጊዜ በዓለ ስቅለትን ማክበር ለምን አስፈለገ? የሚል ጥያቄ በአእምሮአችን ሊጉላላ ይችል ይሆናል፡፡ በእርግጥ ጥንተ ስቅለቱን ማክበር በበቃ ነበር፡፡ ሆኖም ክርስቶስ የተሰቀለው በዕለተ ዓርብ ሲሆን ከመቃብር የተነሣውም በዕለተ እሑድ በመሆኑ ስቅለት ከዕለተ ዓርብ፣ ትንሣኤም ከዕለተ እሑድ፣ ዕርገት ደግሞ ከዕለተ ሐሙስ እንዳይወጡ፤ ሌሎቹም በዓላትና አጽዋማት በተወሰነላቸው ቀን እንዲውሉ ማድረግ ይቻል ዘንድ የቀድሞ አባቶችና ሊቃውንተ ቤተክርስቲያን ሰባት አዕዋዳት አዘጋጅተው እና ቀምረው ሁሉም ሥርዓቱን ጠብቆ ድርጊቱ በተፈጸመበት ቀን እንዲከበር የወሰኑ በመሆኑ ነው፡፡ በዚህም መሠረት ጥንተ ስቅለቱ መጋቢት ፳፯ ቀን በየዓመቱ እየታሰበ በዓለ ስቅለቱ ደግሞ ከሰሙነ ሕማማቱ ጋር በዓመት አንድ ጊዜ በዕለተ ዓርብ በጾምና በጸሎት እንዲሁም በአክፍሎትና በስግደት እንዲከበር በማድረግ ሕግና ሥርዓት ስለሠሩ በዚሁ መሠረት ሲፈጸም ኖሯል፡፡ ወደፊትም ይቀጥላል፡፡
ከዘጠኙ ዓበይት በዓላት አንዱ የሆነው የጌታችን የጽንሰቱ በዓል በታላቅ ድምቀት የሚከበርበት ቀን ከመሆኑ የተነሣ በዓሉን በዓል ተጭኖት ነው እንጂ ፫ኛው ቀን መጋቢት ፳፱ኝም ክርስቶስ ከሙታን ተለይቶ የተነሣበት ጥንተ ትንሣኤ በመሆኑ እንደጥንተ ስቅለቱ ሁሉ ጥንተ ትንሣኤውም ከበዓለ ጽንሰቱ ጋር አብሮ የሚታሰብ መሆኑን ልንዘነጋው አይገባንም፡፡“ወስብሐት ለእግዚአብሔር”

ሊቀ ብርሃናት ኢሳይያስ ወንድማገኘሁ

መልካም ባልንጀራ

ምስጢር የሚያወያዩትን አብሮ የሚሠሩትንና ጧት ማታ የሚገናኙትን እንዲሁም አብሮ አደግየሆነውን ሰው ባልንጀራዬ ነው ብሎ መናገር የተለመደ ነው፡፡ ዛሬ ለኔ ነገ ላንተ እየተባባሉ አብረው ከሚውሉት፣ ከሚያመሹት ጓደኞቻቸው ሌላ ባልንጀራ ያለ የማይመስላቸውም ብዙዎች ናቸው፡፡ በመሠረቱ አብሮ መብላትና መጠጣት ወይም በአንድ ላይ ተምሮ ማደግና አብሮ መኖር ይልቁንም ትንሽ ትልቁን ክፉና ደጉን ምስጢር መካፈል ባልንጀራ ሊያሰኝ ቢችልም ይህ ብቻ ራሱ የፍቅር መመዘኛና መለኪያ ይሆናል ማለት ዘበት ነው፡፡ ምክንያቱም በዚህ ሁኔታ የተመሠረተው ፍቅር አብዛኛውን ጊዜ በጥቅም ላይ የተመሠረተ ስለሚሆን ሰብአዊ ርኅራኄና ከልብ የመነጨ መንፈሳዊ ስሜት የተዋሐደው ሊሆን አይችልምና ነው፡፡

አንዳንድ ሰዎች “ባልንጀራህን እንደራስህ ውደድ፤ በባልንጀራህ ላይ በሐሰት አትመስክር፣ የባልንጀራህን ሚስት ቤትና ንብረት በአጠቃላይ የባልጀራህን ገንዘብ ሁሉ ማንኛውንም አትመኝ” የሚለውን ሕግ ከመጽሐፍ ቅዱስ ሲያነቡላቸውና በባልንጀራቸው ላይ ክፉ ሥራ እንዳይሠሩ ትምህርት ሲሰጧቸው ባልንጀራዬን እንዴት እክዳለሁ? እንዴትስ ተንኮል እፈጽመበታለሁ? በማለት ራሳቸውን ለባልንጀራቸው ታማኝ በማድረግ ሊናገሩና ሊከራከሩ ይችላሉ፡፡ በሌላ በኩል ግን የተፈጥሮ ጓደኛቸው የሆነውን ሰብአዊ ፍጡር ሲያሳዝኑትና ሲያስቀይሙት ይታያሉ፡፡ እንዲህ ያለውን ክፉ ተግባር በሰዎች ላይ መፈጸም “ባልንጀራህን እንደራስህ ውደድ” የሚለውን መጣስ ነውና ይህ ኃጢአት ነው ሲሏቸው ደግሞ ባልንጀራዬ ማን ነው? የማላውቀው ሰውስ እንዴት ባልንጀራዬ ይሆናል በማለት ድርቅ ብለው ይከራከራሉ፤ የሚበላና የሚጠጣ የጽዋ ጓደኛ ከዚህም ሌላ በሀብትና በእውቀት ተመጣጣኝ ሆኖ ውለታ የሚውልና ብድር የሚመልስ ወይም በሥጋ ተዛምዶ የሚቀርብና የሀገር የወንዝ ልጅ የሆነ አፈር ፈጭቶ ውኃ ተጎንጭቶ አብሮ ያደገ ወይም በአንድ ትምህርት ቤት አብሮ የተማረ በሥራና በጉርብትና ምክንያት ወቅታዊ ፍቅር የመሠረተና ምስጢር የተጫወተ … ወዘተ ብቻ ነው ብለው ስለሚያስቡ ነው፡፡

እግዚአብሔር አምላክ ግን “ባልንጀራህን እንደራስህ ውደድ” ሲል የተናገረው ማንኛውም ሰው በተፈጥሮ የሚመሳሰለው ሰብአዊ ፍጡር ሁሉ ባልንጀራው መሆኑን አውቆ አንዱ የሌላውን መብት በመጠበቅ እርስ በርሱ ተከባብሮና ተፈቃቅሮ በሰላምና በደስታ እንዲኖር ነው፡፡ ከዚህም ሌላ ከሰዎች መካከል እኔን አይመለከተኝም ሳይል አንዱ ሌላውን እንዲረዳው ነው፡፡ ይህም አባባል ባልንጀራ በወገን፣ በጾታ፣ በጎሳ፣ በዘርና በመሳሰለው ጠባብ አስተሳሰብ ሳይወሰን እያንዳንዱ ሰው ለሌላው ሰው ወገኑና ባልንጀራው እንዲሁም ከአንድ ፈጣሪና ከአንድ አባት የተገኘ የተፈጥሮ ወንድሙ መሆኑን የሚያስገነዝብ ነው፡፡

በሉቃስ ወንጌል ምዕራፍ 10 ላይ እንደተጻፈው ጌታችን አምላካችን መድኃኒታችን ኢየሱስ ክርስቶስ በማስተማር ላይ ሳለ አንድ ሕግ አዋቂ ሊፈትነው አስቦ፡- መምህር ሆይ የዘለዓለም ሕይወትን እወርስ ዘንድ ምን ላድርግ? በማለት በጠየቀው ጊዜ ጌታችን መድኃኒታችን ኢየሱስ ክርስቶስ በሕግ የተጻፈው ምንድን ነው? አለው፡፡ ሕግ አዋቂውም መልሶ፡- ጌታ አምላክህን በፍጹም ልብህ በፍጹም ነፍስህ በፍጹም ኃይልህ በፍጹም ሀሳብህ ውደድ ባልንጀራህንም እንደራስህ ውደድ ሲል መለሰ፡፡ አምላካችን ኢየሱስ ክርስቶስም እውነት መልሰሀል ይህንን ብታደርግ በሕይወት ትኖራለህ ሲል ነገረው፡፡ ነገር ግን ሕግ አዋቂው ራሱን ከፍ አድርጎ በመመልከት ባልንጀራዬ ማን ነው? ሲል እንደገና ጠይቋል በዚህ ጊዜ መድኃኒታችን ኢየሱስ ክርስቶስ ያደጉና ሳምራዊ ታሪክ ከተረከ በኋላ “አንተም እንደዚሁ አድርግ” በማለት ለሰዎች ሁሉ መልካም መሥራትና እርስ በእርስ መዋደድ እንደሚገባ አስረድቶታል፡፡

እንግዲህ ባልንጀራ የሚባለው ባገኙ ጊዜ ብቻ አብሮ በልቶ ጠጥቶ በችግር ጊዜ ወደኋላ የሚሸሽ ሰው ሳይሆን “ባልንጀራህን እንደራስህ ወደድ” በሚለው አምላካዊ ትእዛዝ መሠረት የችግረኞችንና ጉዳተኞችን ችግር እንደራሱ ችግር በመቁጠር ውለታና ብድር ሳይሻ ሁሉንም በእኩልነት ተመልክቶ በጤናም ሆነ በሀብት ወይም በእርጅና ምክንያት የተቸገሩትን ሁሉ በአቅሙ መጠን የሚቻለውን የሚረዳ ነው፡፡ ከዚህም ሳምራዊ ሰው የምንማረው ይህንኑ ነው፡፡

እኛም እንደደጉ ሳምራዊ ሰው በዘመናችን ሁሉ ለሰዎች መልካም አድርገን በእመቤታችን በቅድስት ድንግል ማርያም አማላጅነት እንዲሁም በቅዱሳን አማላጅነት መንግሥተ ሰማያትን እንድንወርስ ልዑል እግዚአብሔር ወሰን በሌለው ቸርነቱ ይርዳን፡፡

ወስብሐት ለእግዚአብሔር

ላዕከ ወንጌል በእደ ማርያም ይትባረክ (ቀሲስ) የአዲስ አበባ ሀገረ ስብከት የትምህርት ሥርጭት ኃላፊ

የብፁዕ ወቅዱስ አቡነ ማትያስ ቀዳማዊ ፓትርያርክ ፮ኛ ዓመት በዓለ ሢመት በደማቅ ሁኔታ ተከበረ

ቅዱሱሳን ፓትርያርኮቻችን በበዓሉ ላይ ተገኝተው በዓሉን ሲያከብሩ

ብፁዕ ወቅዱስ አቡነ መርቆሬዎስ ፬ኛ ፓትርያርክ፣ ብፁዕ አቡነ ዲዮስቆሮስ የመንበረ ፓትርያርክ ጠቅላይ ጽ/ቤት ዋና ሥራ አስኪያጅ፣ ብፁዕ አቡነ ሳዊሮስ የቅዱስ ሲኖዶስ ዋና ጸሐፊ፣ ከ34 በላይ ብፁዓን ሊቃነ ጳጳሳት፣ የእስልምና ዋና ሐላፊ ሸክ አህመድ፣ የቤተክህነት ሠራቶኞች፣ ሊቃውንተ ቤተ ክርስቲያን፣ በርከት ያሉ ምእመናንና እንግዶች በተገኙበት በመንበረ ጸባዖት ቅድስት ሥላሴ ካቴድራል የብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነጳጳሳት ዘኢትዮጵያ ሊቀጳጳስ ዘአክሱም፣ ወዕጨጌ ዘመንበረ ተክለ ሃይማኖት በደማቅ መልኩ የ፮ኛ ዓመት በዓለ ሢመት በዓል ተከብሯል። በዕለቱ  የመርካቶ ቅዱስ ራጉኤል ሊቃውንት “ብፅዕት ከርስ እንተፆረተከ፣ ወብፁዓት አጥባት እንተኃጸናከ፣ ወበእንተዝ ቅዱስ ማትያስ ፓትርያርክ አብያተ ክርስቲያናት አፍቀራከ…እያሉ ያሬዳዊ ዝማሬ ሲያቀርቡ፣ የሰንበት ት/ት ቤት መዘምራንም  “ ብፁዕ ወቅዱስ ማትያስ ፓትርያርክ ርእሰ ሊቃነ ጳጳሳት ዘኢትዮጵያ፣ ሊቀጳጳስ ዘአክሱም፣ ወዕጨጌ ዘመንበረ ተክለ ሃይማኖት ጸሎትከ ትኩነነ… የሚል መዝሙር አቅርበዋል።

በመቀጠልም የመንበረ ፓትርያርክ ጠቅላይ ጽ/ቤት ዋና ሥራ አስኪያጅ፣በክልል ትግራይ ደቡባዊ ዞን ማይጨውና ደቡባዊ ምሥራቅ ትግራይ አህጉረ ስብከት ሊቀጳጳስ ብፁዕ አቡነ ዲዮስቆሮስ በዓሉን አስመክተው ንግግር አድርገዋል። ለብፁዕ ወቅዱስ ፓትርያርክ እንኳን ለዚህች ፮ኛ ዓመት በዓለ ሢመትዎ በሰላም አደረሶት በማለት፣ ከሁሉም ቀድማ የነበረች ቤተክርስቲያናችን፣ የራስዋ ጳጳስና ፓትርያርክ ባልነበረባት ጊዜ በትግል ቆይታ እነሆ በእግዚአብሔር ፈቃድ በራሷ ጳጳሳት መተዳደር ከጀመረች ከአምሳ ዓመታት በላይ አስቆጥራለች። በቅርቡ የተደረገው የእርቅና የአንድነት ጉባኤም  ደስ የሚያሰኝ ነው፤  አሁንም አጠናክረን በመቀጠል ቤተክርስቲያናችን በአንድነትና በፍቅር መያዝ አለብን ብለዋል።

ብፁአን ሊቃነ ጳጳሳት በዓሉን በበዓሉ ላይ ተገኝተው በዓሉን ሲያከብሩ

በመጨረሻም፡ ብፁዕ ወቅዱስ አቡነ ማትያስ፣ በዋና ሥራ አስኪያጅ ብፁዕ አቡነ ዲዮስቆሮስ ጋብዥነት፣ የካህናት አለቃ የምእመናን ወዳጅ ጌታችን መድኃኒታችን ኢየሱስ ክርስቶስ ለዚህ በዓል ያደረሰን ከሁሉ በፊት እርሱ ይክበር ይመስገን ብለው እናንተም እዚህ የተገኛችሁ እግዚአብሔር ይባርካችሁ ብለዋል። በዛም ሰፋ ያለ አጥንትን ሰርስሮ የሚገባ ት/ት ሰጥተዋል፤ በተለይም የቤተክርስቲያን የወደፊት ዓላማ ምን መሆንና ምን መምሰል እንዳለባት፤ ወደኋላ መለስ ብለን አይተን፣ አሁን የት እንዳለን ተገንዝበን ለወደፊት ምን መሥራት እንዳለብን ራእይን የሚያሰንቅ  መልእክት አስተላልፈዋል።  ፍልሰተ ምእመናን አንገብጋቢ ጉዳይ መሆኑ ላይ ያተኮረው ንግግራቸው፣ ክስተቱን ለመቀልበስ ቅዱስ ሲኖዶስ መሠረታዊ የሆነ የአስተዳደር፣ የሐዋርያዊ ተልኮ መርሐ ግብር፣ የፋይናንስና የንብረት አያያዝ ሲስተም ዘርግቶ፣ የሰው ኃይል አስተዳደር አዘምኖ፣ሙሉ የምእመናን ጥያቄ የሚመልስ መሠረታዊ  የመልካም አስተዳደር ለውጥ ለማምጣት በቆራጥነት መሥራት አለበት። ይህንም የመሰለ ለውጥ እውን ለማድረግም የቤተክርድቲያኒቱን ምሁራን በሚገባ ማሳተፍና መጠቀም አለበት። የሃይማኖታቸው ፍቅር እንደ እሳት እያቃጠላቸው ስሕተቶች እንዲታረሙ ሐሳብና አስተያየት ለሚያቀርቡ፣ ቤተክርስቲያንን እንርዳ እናግዝ፣ እናገልግል የሚሉት ምሁራንና ሊቃውንትም ገንቢ ሐሳባቸውንና ዕውቀታቸውን ተቀብለን እናስተናግዳቸው ካሉ በኋላ በዚህ መንፈስ መግባባት ከተፈጠረ እየበዙ የመጡ ጩኸቶች ወደ ዝማሬ የማንለውጥበት ምክንያት አይኖርም በማለት አባታዊ ምክራቸውናን ለየት ያለ የወደፊቱ ራእያቸውን የሚያንጸባርቅ መልእክታቸውን አስተላልፈዋል።

ወደኋላ መለስ ብለህ ጉድለትህን ማየት ብልህነትና አስተዋይነት ነው፣ ችግሩ ለይተህ ማወቅም ግማሽ የችግሩ መፍትሔ እንደማግኘት ነው። ከላይ እንዳየነው ቤተክርስቲያናችን ራሷን እየቃኘች መሆኑን የሚያገናዝብ ነው። የተጠቀሱት ቁምነገሮች በተግባር ከዋሉ ጥሩ የሚባል ለውጥ እንደሚገኝም አያጠራጥምና እኛም በጉጉት እየጠበቅን የበኩላችን እንወጣለን ቶሎም ወደ  ትግበራ እንዲሸጋገር ያስፈልጋል !

የቤተ ክርስቲያናችን የበላይ አካል የሆነው ቅዱስ ሲኖዶስ በታችኛው መዋቅር የሚገኙትን የአድባራትና ገዳማት እንዲሁም የወረዳ ሠራኞች የሚሠሩትን ሥራ ለእነርሱ በመተው የቅዱስ ሲኖዶስ የሥራ ድርሻ በሆነው ነገር ላይ ብቻ ማተኮር ይኖርበታል፡፡ይኸውም ትልቁንና የወደፊት የቤተክርስቲያናችንን ሕልውና የሚያረጋግጠውን ዘመኑን የዋጀ ሕገ-ደንብ፣ የአሥራር ፖሊሲዎችንና ስትራቴጂዎችን በመቅረጽ እንዲሁም ጥናትና ምርምሮችን በማድረግና በማስደረግ ቤተ ክርስቲያኒቱን ከውድቀት ሊታደጋት ይገባል።

ከዚህም በተጨማሪ መዋቅራዊ አደረጃጀቱን መሠረት በማድረግ ጣልቃ ገብነቱ ተወግዱ ሁሉን ልሥራው ማለቱም ተገቢ አለመሆኑን ተገንዝቦ ሕግ አውጪው አካል ሕግ የማርቀቅና የማውጣት፤ሕግ ተርጓሚው አካል ደግሞ የመተርጎምና የመተንተን፤እንዲሁም ሕግ አስፈፃሚው አካል የወጣውንና የተተርጎመውን ሕግ የማስፈፀምና አፈፃፀሙንም የመከታተል ሥራውን በተግባር ላይ ሊያውል ይገባል እንላለን፡፡

እንኳን ለ6ኛ ዓመት በዓለ ሢመትዎ በሠላም አደረስዎ

የሀገረ ስብከቱ ሚዲያ ክፍል፡፡

ብጹእ ወቅዱስ አቡነ ማትያስ የዓብይ ጾም መግባትን አስመልክቶ ጋዜጣዊ መግለጫ ሰጡ

በቤተክርስቲያንችን ቀኖናዊ ሥርዓተ እምነት መሠረት በጾምና በጸሎት ከምንዘክራቸውና ፈቃደ ሥጋችንን ለፈቃደ ነፍሳችን ከምናስገዛበቸው አጽዋማት መካከል ጌታችንና መድኃኒታችን ኢየሱስ ክርስቶስ ጾሞ በአርዓያነት ያሳየን ጾመ ኢየሱስ ወይም ዓብይ ጾም አንዱ ነው፡፡

በዚሁ የገዳመ ቆሮንቶስ ጾም ወቅት የሰውን ልብ በእጅጉ የሚገዳደሩና ለውድቀትም የሚዳርጉ የኃጢአትና የበደል ምክንያቶች ሁሉ በክርስቶስ ባሕሪያዊ ገንዘብ በሆነው በኃይሉ ችሎት ከመንገዳቸው ወጥተዋል የሰይጣንም ሽንፈት ተረጋግጧል፡፡

ብጹእ ወቅዱስ አቡነ ማትያስም ይህንን አስመልክተው በዛሬው ዕለት በርካታ ሊቃነ ጳጳሳትና የተለያዩ የሚዲያ አካላት በተገኙበት በኢትዮጵያ ኦርቶዶክስ ተዋሕዶ ቤተክርስቲያን ትልቅ ሥፍራ ተስጥቶት በሰፊ አገልግሎትና ጸሎት የሚዘከረውን  ዓብይ ጾም አገልጋዮችና ምእመናን እንዴት አድርገው መጾምና ማገልገል እንዳለባቸው ሰፊና ጥልቅ መግለጫ  ከመስጠትም ባሻገር ዘመኑ የጭካኔና የመለያየት እየሆነ ስለመጣ ክፉውን ለማስታገስ፤ ተቋማዊም ሆነ ሀገራዊ ችግሮቻችን ለመፍታትና ወደ አንድነታችን ለመመለስ ብቸኛው መፍትሔ ጾምና ጸሎት በመሆኑ አብዝተን እንድንጸልና እንድንጾም እንዲሁም እጆቻችንን ለምጽዋት እንድንዘረጋ አባታዊ ጥሪያቸውን አስተላለፉ፡፡

የሀገረ ስብከቱ የሕትመትና ሚዲያ ክፍልም እየተቀበልነው ያለው ጾም ራሳችንን የምንገዛበት፤ለጥያቄዎቻችን ሁሉ መልስ የምናገኝበትና ከአምላካችንም ሆነ ከወገኖቻችን ጋር ያለንን መስተጋብራዊ ግንኙነት የምናጠናክርበት እንዲሆን እየተመኘን ቅዱስነታቸው  የተሰጡትን ጋዜጣዊ መግለጫ ጊዜ ሰጥታችሁ ሙሉውን ታነቡት ዘንድ ከታች ባለው ክፍል አስቀምጠናል፡፡

የምሕረት ጌታ የብርሃን አባት የሆነው እግዚአብሔር አምላካችን እንኳን ለጌታችን ለኢየሱስ ክርስቶስ መዋዕለ ጾም በሰላም አደረሳችሁ፡፡

“ እስመ ኅሊናሁ ለነፍስትነ ፀሩ ለእግዚአብሔር ውእቱ፤

      የሥጋችን አስተሳሰብ የእግዚአብሔር ጠላት ነው ”(ሮሜ ፰፡፯)

እኛ ሰዎች ከሁለት ነገሮች የተገኘን ውሕድ ፍጥረቶች መሆናችን ከእግዚአብሔር ቃል በተጨማሪ በየዕለቱ የምናሳየው እርስ በርሱ የተቃረነ ድርጊት ተጨባጭ ማስረጃ ነው፤

ከዚህ አኳያ ሰው ሁሉ ከአንድ ምንጭ የተገኘ በመሆኑ ከመንፈስና ከሥጋ የተገነባ ድንቅ ፍጡር ነው፤ ሥጋና መንፈስ በሰው ዘንድ በተዋሕዶ ይኑሩ እንጂ ፍጹም ስምምነት ያላቸው ነገሮች ግን አይደሉም፤ ይልቁንም በመካከላቸው ከባድ ተቃርኖ እንዳለ “እስመ መንፈስኒ ይፈቱ ዘኢይፈቱ ሥጋ ወሥጋኒ ይፈቱ ዘኢይፈቱ መንፈስ; መንፈስ ሥጋ የማይወደውን፣ ሥጋም መንፈስ የማይወደውን ይወዳል” በማለት ቅዱስ መጽሐፍ ያስተምረናል፡፡

የሁለቱ ነገሮች ተቃርኖ በዚህ ብቻ የሚያበቃም አይደለም፤ ሁለቱም የየራሳቸው የሆነ አበጋዝና የሚያስገኙት ውርስም አላቸው፤ የሥጋዊ ምኞት ምንጭ ዲያብሎስ ሲሆን በባሕርዩ ለእግዚአብሔር የማይገዛ ስለሆነ የእግዚአብሔር ጠላት ነው፤ ለተከታዮቹም ሞትን ያወርሳል፤ የመንፈሳዊ ምኞት ምንጭ ግን የእግዚአብሔር መንፈስ ነውና በባሕርዩ ለእግዚአብሔር ታዛዥ; ተገዥና የዘላለም ሕይወትን የሚያወርስ ነው፤

ከዚህ አንጻር ሰው ለሥጋዊ ምኞቱ ተገዢና በሥጋዊ ፈቃድ ተሸናፊ በሆነ ጊዜ ለሥጋውና ለነፍሱ የሚተርፍ ጉዳትን እንደሚያከማች፣ በአንጻሩ ደግሞ ለመንፈሳዊ ምኞቱ ተገዢና ተባባሪ በሆነ ጊዜ ለሥጋውና ለነፍሱ የሚተርፍ ሀብተ ሕይወትን እንደሚያፈራ ዛሬም ግልፅ ሆኖ ይታወቃል፤ ለዚህም የቀዳማዊ አዳም ሥጋዊ ዝንባሌና መንበርከክ፣ የዳግማዊ አዳም (ክርስቶስ) መንፈሳዊ ምከታና ድል ማድረግ ተጨባጭ ማረጋገጫዎቻችን ናቸው፡፡

ቀዳማይ አዳም የዲያብሎስን ምክር ሰምቶ፤ ጣዕመ መብልዕን ሽቶ፣ ለፈቃደ ሥጋው አድልቶ፤ በራሱና በልጆቹ ነፍስና ሥጋ ላይ የሞት ውርስን አውርሶአል፤ ዳግማይ አዳም የተባለ ጌታችን አምላካችንና መድኃኒታችን ኢየሱስ ክርስቶስ ደግሞ በተቃራኒው ጣዕመ መብልዕን ትቶ፣ በኃይለ መንፈስ ተዋግቶ ፣ የዲያብሎስን ፈተና በእግዚአብሔር ቃል መክቶ የአሸናፊነትና የዘላለማዊ ሕይወት ርስትን ለእኛ ለልጆቹ አውርሶአል፡፡

ቅዱስ መጽሐፍ የዚህ ዓለም ወዳጅ የእግዚአብሔር ጠላት ነው ሲል ሜዳው ሸንተረሩ፣ ሣሩ ደንጊያው ወይም ከተማው ገጠሩ ማለቱ እንዳልሆነ ግልጽ ነው፤ በመሆኑም በዚህ ዐውደ ሐሳብ ዓለም ተብሎ የተገለፀው ፍሬ ሐሳብ እግዚአብሔርን የሚቃወም ማንኛውም ፈቃደ ሥጋ ነው፤ ይህ ዓይነቱ ፈቃደ ሥጋ ለእግዚአብሔር የማይገዛ ብቻ ሳይሆን ጠላትም ነው፤ በሰው ላይም ሞትን የሚያመጣ ነውና “እንደ ሥጋ ፈቃድ ብትኖሩ ትሞታላችሁ” ተብሎ ተጻፈ

የተወደዳችሁ የመንፈስ ቅዱስ ልጆቻችን ምእመናንና ምእመናት

        በነገው ዕለት የምንጀምረው የጾም ሱባዔ ሁለት ዓላማ ያለው ነው፤ ይኸውም አንደኛው ጌታችን በመዋዕለ ጾሙ ፈቃደ ሥጋንና የእርሱ አበጋዝ የሆነው ዲያብሎስን በፈቃደ መንፈስ ድል ማድረጉን ለማሰብ ሲሆን፣ ሁለተኛው ደግሞ በሥራው ሁሉ እንድንመስለው ባስተማረን መሠረት እኛም  በኃይለ ጾም መሣሪያነት እየታገዝን እንደሱ ፈቃደ ሥጋንና ዲያብሎስን በመዋጋት የፈቃደ ነፍስ ልዕልናን ለማረጋገጥ ነው፤ ይህንም ውጊያ በድል ለማጠናቀቅ የሥጋ መሣሪዎችን ጠንቅቆ ማወቅ አስፈላጊ ነው፤ ሥጋ ነፍስን የሚወጋባቸው የታወቁ መሣሪያዎች አሉት፤ ቅዱስ መጽሐፍ እነሱን እንደሚከተለው በዝርዝር አስቀምጦአቸዋል፣

        ይኸውም­፡-

  • ዝሙት                    – ቊጣ      
  • ርኵሰት                    – አድመኛነት
  • መዳራት                    – መለያየት
  • ጣዖትን ማምለክ             – መናፍቅነት
  • ምዋርት                    – ምቀኝነት              
  • ጥል                       – መግደል
  • ክርክር                     – ስካር
  • ቅንዐት                     – ዘፋኝነትና ይህንን የሚመስል ሁሉ ይላል፤

በማያያዝም እንደነዚህ ያሉትን የሚያደርጉ ሁሉ የእግዚአብሔርን መንግሥት አይወርሱም ብሎ ይደመድማል፡፡

      ዲያብሎስ እነዚህ የጥፋት መሣሪያዎቹን ተጠቅሞ አዳምንና ሔዋንን ባሳተበት ስልት ሥጋችንን በማስጐምጀትና ጠቃሚ ነገሮች እንደሆኑ አስመስሎ እነሱን በኅሊናችን ውስጥ በማቀጣጠል ወደ መሥገርተ ሞት ወጥመዱ ይከተናል፤ እኛ ኦርቶዶክሳውያን ክርስቲያኖች በየጊዜው የምንጾመው እነዚህ የሥጋና የዲያብሎስ የሆኑ መሣሪያዎችን የመንፈስ መሣሪያዎች በሆኑ፡-

  • በፍቅር፣                        – በቸርነት፣
  • በመንፈሳዊ ደስታ፣               – በእምነት፣
  • በሰላም፣                        – በበጎነት፣
  • በትዕግሥት፣
  • በየዋህነትና ራስን በመግዛት ለመሰባበርና ከጥቅም ውጭ ለማድረግ ነው፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት

 ከላይ እንደ ተመለከትነው የመንፈስ ቅዱስና የዲያብሎስ መሣሪያዎች ምን ምን እንደሆኑ ተገንዝበናል፤ በአሁኑ ጊዜ በአጠቃላይ በመላው ዓለም በተለይም ደግሞ በሀገራችን ያለውን የሁለቱ አሰላለፍ ምን እንደሚመስል ማስተዋሉ የሚከብድ አይሆንም፤ ሰው ሁሉ መንፈሳዊ ዕውቀቱን ተጠቅሞ፣ የዲያብሎስ መሣሪያ የሆኑትን ጥሎ፣ የመንፈስ ፍሬዎች ወይም መሣሪዎች የሆኑትን አንግቦ፣ ፈቃደ ሥጋንና ዲያብሎስን ቢመክት ኖሮ አሁን እየሆነ ያለው ሁሉ አይከሠትም ነበር፤

ነገር ግን “ሰብእሰ እንዘ ክቡር ውእቱ ኢያእመረ፤ ሰው በተፈጥሮ አዋቂና ክቡር ሆኖ ሳለ በተሰጠው ዕድል መጠቀም አላወቀበትም” ተብሎ በእግዚአብሔር ቃል እንደተገለፀው ያለመታደል ጉዳይ ሆኖ ሊሆን አልቻለም፤ ይሁንና ተወደደም ተጠላ በመጨረሻው ቀን ማለትም በጌታ ቀን ዲያብሎስና መሣሪያዎቹ በኃይለ መንፈስ መሸነፋቸው ብቻ ሳይሆን ከገጸ ምድር ሙሉ በሙሉ መጥፋታቸው አይቀሬ መሆኑ ቅዱስ መጽሐፍ ስለሚነግረን እስከዚያውም ቢሆን በሚጠፋ ነገር ከምንጠፋፋ የማይጠፉትን የመንፈስ መሣሪያዎችን ጨብጠን በሕይወት መኖርን ምርጫችን ብናደርግ ከጥበበኞች ሁሉ የምንበልጥ ጥበበኞች እንሆናለን ፡፡

ለመጪው ሕይወት ብቻ ሳይሆን አሁን ላለንበት ጊዜያዊ ሕይወትም ቢሆን፡-

  • ከመለያየት ይልቅ አንድነትን፣
  • ከጥል ይልቅ ፍቅርን፣
  • ከቊጣ ይልቅ ትዕግሥትን፣
  • ከመናፍቅነት ይልቅ እምነትን፣
  • ከርኵሰት ይልቅ ቅድስናን፣
  • ከመግደል ይልቅ ማዳንን፣
  • ከአድመኝት ይልቅ ሰላምን፣
  • ከስካር ይልቅ ራስ መግዛትን፣
  • ከዘፋኝነት ይልቅ ዘምሮን እጅግ እንደሚበልጥ ሁላችንም እንስማማበታለን፤ ነገሩ እውነትና ዘላቂ ሐቅ ስለመሆኑ ከስምምነታችን የበለጠ ማስረጃ ሊገኝ አይችልም፤ ስለሆነም በዚህ የጾም ወቅት እነዚህን ለመተግበር ክርስቲያኖች በቀንም፣ በሌሊትም ሊተጉ ይገባል፡፡

በመጨረሻም

መዋዕለ ጾም ማለት ፈቃደ ሥጋን ጆሮ ዳባ ልበስ ብለን ለፈቃደ ነፍሳችን ብቻ የምንታዘዝበት፣ የእግዚአብሔርን ድምፅ ብቻ እየሰማን ለእርሱ  የምንገዛበት ጊዜ ነው፤ የእግዚአብሔር ድምፅም ፍቅር፣ ሰላምና አንድነት መሆኑን ተገንዝበን ከሁሉ በላይ ለሰላም ቅድሚያ በመስጠት ነዳያን ወንድሞቻችንን  በመመገብና በማልበስ ሁሌ ከጎናቸው ሳንለይ ወርኃ ጾሙን እንድናሳልፍ አባታዊ መልእክታችንን እናስተላልፋለን፡፡

እግዚአብሔር አምላካችን ወርኃ ጾሙን አስፈጽሞ ለብርሃነ ትንሣኤው

በሰላም ያድርሰን

እግዚአብሔር ሀገራችን ኢትዮጵያንና ሕዝቦቿን ይባርክ ይቀድስ

ወስብሐት ለእግዚአብሔር

አሜን

አባ ማትያስ ቀዳማዊ ፓትርያርክ

ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም

 ወዕጨጌ ዘመንበረ ተክለ ሃይማኖት

የካቲት ፳5 ቀን ፳፻፲ወ፩ ዓ.ም.

አዲስ አበባ ኢትዮጵያ