ጾም በክርስትና ሕይወት

ከላዕከ ወንጌል በእደማርያም ይትባረክ (ቀሲስ) የአዲስ አበባ ሀገረ ስብከት ትምህርት ስርጭት ኃላፊ

በዚህ ትምህርታዊ ጹሑፍ ስለ ጾም አራት ነጥቦችን እናያለን

  1. የጾም ትርጉም
  2. ጾም ያስፈለገበት ምክንያት
  3. የጾም ጥቅሞች
  4. በምን ዓይነት መንገድ መጾም እንዳለብን፡፡

ከላይ ከ1-4 ተራ ቍጥር የተገለጹትን እንደሚከተለው በዝርዝር እናያለን፡፡

1ኛ የጾም ትርጉም

ጾም፡- ማለት ክርስቲያን የሆነ ሰው ሁሉ ለተወሰነ ጊዜና ሰዓት ከእህል ከውኃ ተከልክሎ መቆየት ማለት ሲሆን ከሥጋ፣ከቅቤና፣ከእንቁላል ደግሞ እንድንጾምባቸው የተወሰኑ የአጽዋማት ሳምንታት እስኪጠናቀቁ የምንከለከልበት ማለት ነው፡፡ /ፍትሕ መንፈሳዊ አንቀጽ 15/

ከዚህም ጋር ጾም ማለት፡- ዓይን ክፉ ከማየት ጆሮ ክፉ ከመስማት፣ አንደበት ክፉ ከመናገር፣ እጅ ክፉ ከመሥራት በአጠቃላይ ሰውነት የኃጢአት ሥራ ከመሥራት የሚገታበት፣ የሚከለከልበት ማለት ነው፡፡ /ቅዱስ ያሬድ/

ጾም፡- ሁለት ዓይነት ነው ይኸውም

ሀ.የአዋጅ ጾም ነው፡- ይህም በስውር ሳይሆን ሁሉ አውቆት ክርስቲያን የሆነ ሁሉ የሚጾመው ጾም ነው፡፡ ይህም መጽሐፍ ቅዱሳዊ መሠረት አለው፡፡ “በጽዮን መለከትን ንፉ ጾምንም ቀድሱ ጉባኤውንም አውጁ” /ኢዩ 2፡15/

ሰባቱ አጽዋማት የአዋጅ ጾሞች ናቸው፡፡ እነዚህም እንደሚከተለው ተዘርዝረዋል

  1. የነቢያት ጾም
  2. የገሀድ ጾም
  3. የነነዌ ጾም
  4. ዐቢይ ጾም
  5. የሐዋርያት ጾም
  6. ጾመ ድኅነት (ረቡዕና ዓርብ)
  7. ጾመ ፍልሰታ

 ለ. የግል ጾም ነው፡- የግል ጾም ስንል አንድ ሰው በሠራው ኃጢአት ምክንያት ለንስሓ አባቱ ተናግሮ የሚሰጠው የንስሓ ጾም ሲሆን እንዲሁም አንድ ሰው ስለደረሰበትና በእርሱ ላይ ስለሆነ ነገር ስለሚፈልገው ጉዳይ እግዚአብሔር ተገቢውን መልስ እንዲሰጠው የሚጾመው ጾም ነው፡፡ ለምሳሌ ነቢዩ ዳዊት የልጁን መታመም በሰማ ጊዜ ጾሟል፡፡ /2ኛ.ሳሙ.12፡16/

ነገር ግን በግል ጾም ጊዜ ጾሙ ይፋ ስላልሆነ ራስን መሰወር እንደሚያስፈልግ ታዟል፡፡

ይህንንም አምላካችን ኢየሱስ ክርስቶስ እንዲህ ሲል ተናግሯል፡፡ “ስትጾሙም እንደ ግብዞች አትጠውልጉ ለሰዎች ሊታዩ እንደ ጾመኛ ፊታቸውን ያጠወልጋሉና አንተ ግን ስትጾም ለሰዎች እንዳትታይ ራስህን ተቀባ በስውር የሚያይህ አባትህ በግልጥ ይከፍልሃል” /ማቴ.6፡16-18/ ይህ ቅዱስ ቃል ስለግል ጾም የተነገረ ነው፡፡ በዚህ መሠረት የግል ጾምን ከጿሚው ሰው እና ከእግዚአብሔር ውጭ ማንም ማወቅ የለበትም፡፡

2ኛ. ጾም ያስፈለገበት ምክንያት

ጾም፡- ያስፈለገበት ምክንያት ልጓመ ሥጋ ስለሆነ ነው፡፡ ሰው ሁልጊዜ የጣመ የላመ ምግብ የማይለየውና እንደ ልቡ እየበላ እየጠጣ ሳይጾም የሚኖር ከሆነ ለኃጢአት ይጋለጣል፡፡ ይህም በፍትሐ ነገሥት ተጽፏል፡፡ “ከመ ያድክም ኃይለ ፍትወት” (ኃይለ ፍትወትን፣ ሥጋዊ ፍትወትን ያደክም ዘንድ ጾም ታዘዘ) /ፍትሐ ነገሥት አንቀጽ 15/ እንዲሁም በምንጾምበት ጊዜ ረሀብን ችግርን እናውቃለን፡፡ “ከመ ያእምር ጸዋሚ ሕማመ ረኀብ ወይምሐሮሙ ለርኁባን” (ጿሚ ሰው የረኀብን ችግር ያውቅ ዘንድና ለተራቡ ይራራ ዘንድ ጾም ታዘዘ) /ፍትሐ ነገሥት አንቀጽ 15/ እንዲሁም ችግርን የቀመሰ ችግርን ያውቃል” እንዲሉ አባቶቻችን፡፡

3ኛ. የጾም ጥቅሞች

የጾም ጥቅሞች እንደሚከተለው ተዘርዝረዋል

  1. በጾም መንግሥተ ሰማያትን እንወርሳለን፡፡

ይህንንም የሰላም አምላክ ኢየሱስ ክርስቶስ “ስለጽድቅ ብለው የሚራቡና የሚጠሙ ንዑዳን ክቡራን ናቸው እነርሱ ይጠግባሉና” /ማቴ 5፡6/ ሲል ተናግሯል፡፡

  1. በጾም በአገር ላይ የታዘዘው መቅሠፍት ይርቃል፡- የነነዌ ሰዎች የዮናስን ትምህርት መሠረት በማድረግ ሦስት ቀን ጾሙ፡፡ ለእነርሱ የታዘዘው እሳት የዛፉን ጫፍ ጫፍ አቃጥሎ ተመልሷል፡፡ /ትን ዮናስ ም.3 በሙሉ/
  2. በጾም ሰይጣን ድል ይሆናል፡፡

“እንዲህ ዓይነት አብሮ አደግ ጋኔን ያለ ጾምና ጸሎት አይወጣም” /ማቴ.17፤21/ ሲል ጌታችን በቅዱስ ወንጌል የተናገረው ቃል ሰይጣን በጾም ድል እንደሚሆን የሚገልጽ ነው፡፡

4ኛ. ጾም ከፈተና፣ ከመከራ ያድናል

ነቢዩ ዳንኤል በጾም ከአፈ አናብስት (ከአንበሶች አፍ) ድኗል፡፡ /ትን.ዳን. ም.6 በሙሉ/ ሶስና በጾም ከሐሰት ምስክሮች ድናለች፡፡ /መጽ ሶስና ም.1 በሙሉ/ ሌሎችም ቅዱሳን በጾም ከፈተና፣ ከመከራ ድነዋል፡፡

  1. ጾም ዕድሜን ያረዝማል፡፡

ጾም የመልካም ሥራ ሁሉ መሠረት ስለሆነ ድሜን ያረዝማል፡፡

ታላቁ ጻድቅ አቡነ ገብረ መንፈስ ቅዱስ በገድላቸው እንደተጻፈው ድሜ ልካቸውን በጾም ነው የኖሩት የእናታቸውን ጡት እንኳን አልጠቡም፡፡ በዚህ ዓለም የኖሩት አምስት መቶ ስልሳ ሁለት ዓመት ነው፡፡ ሌሎችም ቅዱሳን በጾም የድሜ ባለጸጎች ሆነዋል፡፡

  1. በጾም ምስጢር ይገለጻል፡፡

አይሁድ አርባ ስድስቱን መጻሕፍተ ብሉያት ቆነጻጽለው ባጠፏቸው ጊዜ ዕዝራ ሱቱኤል አዝኖ አርባ ቀን ጾመ ከዚሀ በኋላ ታላቁ መልአክ ቅዱስ ዑራኤል ሰማያዊ መጠጥ በብርሃን ጽዋዓ (ጽዋዓ እሳት) ለዕዝራ አጠጣው ዕዝራም ምስጢር ተገልጾለት አርባ ስድስቱን መጻሕፍተብሉያት ጽፏል፡፡ /መጽ ዕዝ.ሱቱ 13፤36-41/ ሌሎችም ደጋግ ሰዎች በጾም ምስጢር ተገልጾላቸዋል፡፡

  1. በጾም ኃጢአት ይሠረያል፡፡

የነነዌ ሰዎች የዮናስን ትምህርት መሠረት በማድረግ ሦስት ቀን ጾመው ኃጢአታቸው ተሠርዮላቸዋል፡፡ /ትን. ዮናስ ም.3 በሙሉ/ ሌሎችም ሰዎች በጾም ኃጢአታቸው ተሠርዮላቸዋል፡፡ ይህንንም ታላቁ ሊቅ መሠረተ ቤተክርስቲያን ቅዱስ ያሬድ በዜማ ድርሰቱ እንዲህ ሲል ተናግሯል፡፡ “በጾም ወበጸሎት ይሠረይ ኃጢአት” (በጾምና በጸሎት ኃጢአት ይሠረያል)

  1. በጾም ከእግዚአብሔር ጋር መነጋገር ይቻላል፡፡

ሊቀ ነቢያት ሙሴ አርባ ቀንና አርባ ሌሊት ጾሞ ከእግዚአብሔር ጋር ተነጋግሯል፡፡

/ዘዳግም 9፤9-15/

ነቢዩ ኤልያስም በጾም ከእግዝአብሔር ጋር ተነጋግሯል፡፡ /1ኛ.መጽ.ነገ.17፤2/

  1. በጾም ልመናችን ይፈጸማል፡፡

እስራኤል በጾም የለመኑትን አግኝተዋል፡፡ /1ኛ ሳሙ.7፡6-14/ ሌሎችም ቅዱሳን በጾም ልመናቸው ተፈጽሞላቸዋል፡፡

የጾም ጥቅሞች ከላይ ከ1-9 ተራ ቍጥር የተገለጹ ሲሆን ከላይ  እነደተገለጸው ጾም የመልካም ሥራ ሁሉ መሠረት ሲሆን በአንጻሩ አለመጾም ደግሞ የኃጢአት ሁሉ መሠረት ነው፡፡ ምክንያቱም ሰው ካልጾመ ለብዙ ኃጢአት ይጋለጣል፡፡

ለመጀመሪያ ጊዜ ለሰዎች የተሰጠው የጾም ትእዛዝ ነው፡፡ አምላካችን ልዑል እግዚአብሔር አዳምና ሔዋንን፡- ይህን ዕፀ በለስ አትብሉ ሲል ከዕፀ በለሱ ተከልከሉ ጹሙ ማለቱ ነው፡፡ እነርሱ ግን አትብሉ የተባሉትን በሉ ከገነት ወጡ ተጎዱ አለመጾም ያስጎዳል፡፡ በዚህ መሠረት ኃጢአት በመብል ምክንያት ወደዓለም ገባ፡፡

  1. በምን ዓይነት መንገድ መጾም እንዳለብን እንደሚከተለው ተገልጿል፡፡

ጾም፡- ከትርጉሙ እንደተረዳነው ከእህል ከውኃ ከመከልከሉ ጋር ከክፉ ነገር ከኃጢአት መራቅ ስለሆነ ጾማችን ከክፉ ነገር በመራቅ፣ በቅን ልቡና፣ በንጹሕ ልብ መሆን አለበት፡፡ እንዲሁም ነቢዩ ኢሳይያስ “በምትጾምበት ጊዜ እንጀራህን ለተራበ ብትቆርስ ብርሃንህ እንደንጋት ይበራል የዚያን ጊዜ ትጠራለህ እግዚአብሔርም ይሰማሃል ትጮሀለህ እርሱም እነሆ ይላል”/ኢሳ.58፡6-9/ ባለው መሠረት በጾም ጊዜ የጧት ቁርሳችን ለድሆች ከተሰጠ ሰማያዊ ዋጋ እናገኛለን፡፡

ስለዚህ ጾማችን ከምጽዋት ጋር መሆን አለበት፣ ጾም፣ ጸሎት፣ ምጽዋት አይለያዩምና እነዚህን ገንዘብ እናድርግ፡፡

በረከተ ሥጋ፣ በረከተ ነፍስ እንድናገኝ ጾማችን በቅንነትና በንጹሕ ልብ ይሁን ጾማችን ከምጽዋት ጋር ይሁን፡፡

ለዚህም እመቤታችን ቅድስት ድንግል ማርያምእንዲሁም ቅዱሳን በአማላጅነታቸው ይርዱን፡፡

ወስብሐት ለእግዚአብሔር

የብፁዕ አቡነ መቃርዮስ ሐዋርያዊ ጉዞና የሱማሌ ጅግጅጋ አብያተ ክርስቲያናት ፈተናዎች

                      በመምህር ሣህሉ አድማሱ
የኢትዮጵያ ሱማሌ ክልል ሀገረ ስብከት ሊቀ ጳጳስ ሆነው በቅዱስ ሲኖዶስ የተሾሙት ብፁዕ አቡነ መቃርዮስ ህዳር 7 ቀን 2011 ዓ.ም ከጅግጅጋ ከተማ 170 ኪ.ሜ ርቀት ላይ በሚገኘው በደጋ ሀቡር ቅዱስ ጊዮርጊስ ቤተክርስቲያን ደማቅ አቀባበል ተደርጎላቸዋል፡፡
ብፁዕነታቸው በአጽራረ ቤተክርስቲያን የእሳት ቃጠሎ የደረሰበትን የደጋ ሀቡር ቅዱስ ጊዮርጊስን ፅላት በተዘጋጀው መቃረቢያ ባርከው ያስገቡ ስለሆነ በማግሥቱ ህዳር 8 ቀን 2011 ዓ.ም የቅዳሴ ቤቱ በዓል በላቀ ድምቀት ተከብሯል፡፡
በዚሁ ደብር የቅዱስ ሚካኤል ፅላት በተደራቢነት ገብቶ ህዳር 12 ቀን 2011 ዓ.ም በዓሉ ተከብሯል፡፡
በጅግጅጋ መልእልተ አድባራት ደብረ መዊዕ ቅዱስ ሚካኤል ደብር ከሥርዓተ ቅዳሴው በኋላ በርካታ ምዕማንንና ካህናት በተገኙበት ለብፁዕነታቸው እጅግ የደመቀ አቀባበል ተደርጎላቸዋል፡፡
በማግሥቱ ሰኞ ህዳር 10 ቀን 2011 ዓ.ም ከጅግጅጋ ከተማ በ70 ኪ.ሜትር ርቀት ላይ የሚገኘውን የውጫሌ ቅድስት ሥላሴ ቤተክርስቲያን ጎብኝተዋል፡፡
ማክሰኞ ህዳር 11 ቀን 2011 ዓ.ም በጅግጅጋ ከተማ ዙሪያ የሚገኙትንና በአጽራረ ቤተክርስቲያን የእሳት ቃጠሎ የደረሰባቸውን የአቡነ ተክለሃይማኖትን፣ የቅድስት አርሴማን፣ የቅዱስ ጊዮርጊስንና የቅድስት ኪዳነ ምሕረትን አብያተ ክርስቲያናት ብፁዕነታቸው እየተዘዋወሩ ጎብኝተዋል፡፡
የእሳት ቃጠሎ የደረሰባቸው አብያተ ክርስቲያናት መልሰው በቅርብ ጊዜ እንደሚታነፁም ሊቀ ጳጳሱ አቡነ ማቃርዮስ በዓለም ዙሪያ ለሚገኙ ምዕመናን የዕርዳታ ጥሪያቸውን አስተላልፈዋል፡፡
ብፁዕ አቡነ ማቃርዮስ ህዳር 12 ቀን 2011 ዓ.ም በጅግጅጋ መልእልተ አድባራት ደብረ መዊዕ ቅዱስ ሚካኤል ቤተክርስቲያናት ለተሰበሰበው በርካታ ምእመናን አባታዊ የማጽናኛ ትምህርት ሰጥተዋል፡፡
በዚሁ ደብር በብፁዕነታቸው አስተባባሪነት ከብር 500,000 ሺህ ያላነሰ ገንዘብ ገቢ ተመዝግቧል፡፡
በአጽራረ ቤተክርስቲያን ካህን ባለቤቷ ለተገደለበት ለወ/ሮ አልማዝ (የሁለት ህፃናት እናት) ብር 30,000፣ የመደፈር ጥቃት ለደረሰባት አንዲት ታዳጊ ወጣት ብር 14,000 ብፁዕነታቸው አስተባብረው ከምዕመናን ዕርዳታ ተደርጎላቸዋል፡፡
በጅግጅጋ መልእልተ አድባራት ደብረ መዊዕ ቅዱስ ሚካኤል ቤተክርስቲያን ግቢ ውስጥ በብፁዕነታቸው፣ በተለያዩ የወንጌል መምህራንና በሰባክያን አማካኝነት ከህዳር 7 እስከ ህዳር 12 ቀን 2011 ዓ.ም ድረስ የቆየ የስብከተ ወንጌልና የዝማሬ አገልግሎት ከተሰጠ በኋላ የብፁዕነታቸው ሐዋርያዊ አገልግሎት ተጠናቋል፡፡
ደከመኝን ሰለቸኝን የማያውቁት ታታሪው ሊቀጳጳስ ብፁዕ አቡነ መቃርዮስ በሱማሌ ጅግጅጋ ሀገረ ስብከት የአንድ ሳምንት የሐዋሪያዊ ጉዞ ቆይታቸው ጉዳት የደረሰባቸው ምዕመናን በጸሎት ያሰቧቸው ሲሆን በአማጽያኑ ቤታቸው ለፈረሰ እና ንብረታቸው ለተዘረፈ ምዕመናን ከክልሉ መንግሥት ባለስልጣናት ጋር በመነጋገር የካሳ ክፍያ እንደሚፈጸምላቸው ተናግረዋል፡፡
በዐዲስ አበባ ከተማ የሚሰበሰበው የእርዳታ ገንዘብም ጅግጅጋ ከተማ በሚከፈተው የዐቢይ ኮሚቴ አካውንት እንደሚገባ ብፁዕነታቸው በአፅንዖት ገልጸዋል፡፡
በተመሳሳይ ዜና የአዲስ አበባ ሀገረ ስብከት በየገዳማቱና አድባራቱ ከሚሰበሰበው እርዳታ ውጭ ከአካውንቱ 4,000,000 ብር እርዳታ አድርጓል፡፡

በአዲስ አበባ ሀገረ ስብከት ሥር የሚገኙ ሰባቱ ክፍለ ከተሞች ሪፖርት አቀረቡ

                                         በሚድያ ክፍሉ

የአዲስ አበባ ሀገረ ስብከት ዋና ሥራ አስኪያጅ መ/ር ይቅርባይ እንዳለ፤ ምክትል ሥራ አስኪያጅ መጋቤ ጥበብ ምናሴ ወ/ሐና እና የሀገረ ስብከቱ ዋና ክፍል ኃላፊዎች በተገኙበት በክፍለ ከተማ ሠራተኞች በአዲስ ቅጥር፣ ሽግሽግ፣ ዙሪያ የተደረገው ጥናት ሪፖርት ቀርቧል፡፡ የ7ቱ ክፍለ ከተማ ሠራተኞች በእነርሱ ሥር ያሉትን ገዳማትና አድባራት ላይ ባደረጉት ፍተሻ የተወሰኑት አዲስ ቅጥርን ፣ ሽግሽግን እንደፈፀሙ ገልፀዋል፡፡ እነዚህም አብዛኛው በኢ-ሕጋዊ መልክ እንደተፈፀመ ነው የተረጋገጠው፡፡ በተለይ ደግሞ በአዳዲስ አብያተ ክርስቲያናት በሚደረግ ቅጥር በጣም ውስብስብና ሥርዓት አልባ እየሆነ የሚሄደበት ሂደት ስላለ በደንብ ታይቶ  ጠንከር ያለ አሠራር እንደሚያስፈልገው ገልፀዋል፡፡ በአንዳንድ አብያተ  ክርስቲያናት ያሉት ሠራተኞች ብንናገራቸውም የሚሰጡን መልስ አግባብነት የሌለው ነው ሲሉ ተናግረዋል፡፡ በአንዳንድ አጥቢያ ላይ በተመሣሣይ ሥራ ላይ ሁለትና ከሁለት በላ የሆኑ ሰዎች መቀመጣቸው ሌላ ችግር መሆኑም ተደምጧል፡፡

በሌላ መልኩ ከእነዚህ ከላይ ለቀረቡት ተግዳሮቶች ምን ብናደርግ ነው መፍትሔ የምናመጣው የሚለው ሐሳብ ቀርቦ የመፍትሔ አቅጣጫዎች ተጠቁመዋል፡፡ አዲስ ቤተ ክርስቲያን ሲተከል በሚመደቡት አገልጋዮች ላይ ትልቅ ጥንቃቄ ቢደረግ፣ የራሱ የሆነ ወጥ ሥርዓት ቢቀመጥ፣ እኩልነትና ፍትሓዊነት ያለው አሠራር ቢኖር ከክፍለ ከተማ ጀምሮ እስከ አድባራትና ገዳማት የሠራተኞች ዝውውር ቢደረግ፣ መምህራን ከቢሮ ሠራተኞች እኩል ክፍያ ቢከፈላቸው፤ ሀገረ ስብከቱ ከክፍለ ከተማ አድባራትና ገዳማት በጋራ እየተናበቡ በቅንጀት ቢሠሩ የሚሉትና የመሳሰሉትን የመፍትሔ ሐሳቦች ቀርበዋል፡፡

በመጨረሻም የአዲስ አበባ ሀገረ ስብከት ዋና ሥራ አስኪያጅ መ/ር ይቅርባይ እንዳለ መመሪያዎችን ሰጥተዋል፡፡ ከመመሪያዎቹ መካከል ክፍለ ከተሞች ለአድባራትና ገዳማት ስለ ሽግሽግ፣ አዲስ ቅጥርን በተመለከተ ጥብቅ የሆነ መመሪያ በደብዳቤ እንዲሰጡ መልእክት አስተላልፈዋል፡፡

የኮልፌ ቀራንዮ ክ/ከተማ ስብከተ ወንጌልን እንቅስቃሴን አስመልክቶ ውይይት አደረገ

                                                                                    በሚድያ ክፍሉ

በአዲስ አበባ ሀገረ ስብከት ሥር የሚገኘው የኮልፌ ቀራንዮ ክ/ከተማ በቀን 29/02/2011 ዓ.ም በአዲስ አበባ ሀገረ ስብከት አዳራሽ ውይይት አካሄደ፡፡

በውይይቱ ላይ የሀገረ ስብከቱና፣ የክፍለ ከተማው ሠራተኞች፣ የአድባራትና ገዳማት አስተዳዳሪዎች፣ የስብከተ ወንጌል ኃላፊዎች ተገኝተዋል፡፡ የውይይቱ አጀንዳዎች ሁለት ሲሆኑ የመጀመሪያው ጥናታዊ ጽሑፍ ሲሆን ሁለተኛው ደግሞ ስብከተ ወንጌልን በመተለከተ ነው፡፡ በመጀመሪያው ክፍል በክፍለ ከተማው አዘጋጅነት መጋቤ ሐዲስ ሮዳስን በመጋበዝ የኢ/ኦ/ተ/ቤ/ን የብራና መጻሕፍት ይዞታቸውና ያካተታቸው ምሥጢራትና በባሕር ማዶ ስለሚገኙት መጻሕፍት በሚል ርዕስ ጥናታዊ ጽሑፍ አቅርበዋል፡፡ ጥናታዊው ጽሑፉ በውስጡ ብዙ ነገሮችን ያካተተ ሲሆን ከእነዚህም መካከል የግዕዝ ትምህርት  በባህር ማዶ ዩኒቨርሲቲ እየተሰጠ መሆኑ፣ በብራና ተከትበው ስለሚገኙ የብሉይ ኪዳን መጻሕፍት፣ የጸዋትወ ዜማ መጻሕፍ፣ የጸሎትና የምስጋና መጻሕፍት፣ መጻሕፈተ ሊቃውንትት መጻሕፍተ መነኮሳት ፣ የትርጓሜ መጻሕፍት፣ የታሪክ መጻሕፍት፣ ገድለ ቅዱሳን፣ ድርሳናት፣ የፍልስፍና መጻሕፍት፣ የሒሳብ መጻሕፍት ፣ የራዕይ መጻሕፍት፣ የሚሉት ይገኙበታል፡፡ በተጨማሪም በጥናቱ ውስጥ አብዛኛው የኢትዮጵያ ኦርቶዶክስ ተዋሕዶ ቤተክርስቲያን የጥንት የብራና መጻሕፍት በተለያዩ ጊዜያትና በተለያዩ የውጭ ሰዎች ከአገር ውስጥ  ወደ ውጪ ተዘርፈዋል፡፡ ከዚህም የተነሳ የተወሰኑትን ለመጥቀስ ያህል በኢንግላንድ ሀገር 850፣ በጣሊያን 1100፣ በፈረንሣይ 1034፣  በጀርመን 737፣ በኔዘርላንድ 180፣ በስዊድን 88 የብራና መጻሕፍ እንደሚገኙ ጥናቱ ያሣያል፡፡ በጥናቱ መጨረሻም የጥናቱ አቅራቢ የመፍትሔ አቅጣጫዎችን ጠቆም አድርገዋል፡፡ የተዘረፉት የብራና መጻሕፍት እንዲመለሱ ቢደረግ፣ ለቀሩት ደግሞ ከፍተኛ እንክብካቤና ጥንቃቄ ቢደረግላቸው ቤተክርስቲያኒቷ የጥናትና ምርምር ማዕከሎችን ብትከፍት፣ ሁሉም የቤተክርስቲያን አገልጋይ የራሱን ኃላፊነት ቢወጣ የሚሉት ይገኙበታል፡፡ ጥናታዊ ጽሑፍን ያደመጡት ታዳሚዎችም በጥናቱ መደሰታቸውንና እነሱም የበኩላቸውን ኃላፊነታቸውን በአግባቡ እንደሚወጡ አስተያየታቸውንና የመፍትሔ አቅጣጫዎችን አስቀምጠዋል፡፡

ሁለተኛው የውይይት አጀንዳ ስብከተ ወንጌልን በተመለከተ ሲሆን በአሁን ሰዓት በክፍለ ከተማው ያለውን የስብከተ ወንጌል እንቅስቃሴን አስመልክቶ ሰፋ ያለ ውይይት ተደርጓል፡፡ በመጀመሪያ ተግዳሮቶቹ የተጠቀሱ ሲሆን የመፍትሔ አቅጣጫዎችም ተቀምጠዋል፡፡ ስብከተ ወንጌል የቤተክርስቲያኒቷ ሕይወት እንደ መሆኑ መጠን ክፍለ ከተማው ይህንን በማሰብ መልካም የሆነ እንቅስቃሴ እያደረገ ነው፡፡ ነገር ግን በዚያው መጠን ብዙ ተግዳሮቶች ተጠቅሰዋል፡፡ ወጥና ተከታታይ የሆነ ትምህርት አለመሰጠት፣ የሰባኪያን ጥራትና ችግር ማለትም በቂ የትምህርት ዝግጅት የሌላቸው ሰባኪያን መኖር፣ ችሎታ የሌላቸው ስብከተ ወንጌል ላይ መመደብ እና የመሳሰሉት ተጠቅሰዋል፡፡

የክፍለ ከተማው ዋና ሥራ አስኪያጅ መጋቤ ትፍስህት ግርማ ሰፋ ያለ ማብራሪያ ሰጥተዋል፡፡ ንግግራቸውንም ስብከተ ወንጌል ከሌለ ሕይወት የለንም በማለት ጀምረው ለወንጌል ትልቅ ትኩረት መስጠት እንዳለብን አሳስበዋል፡፡ የቤተክርስቲያኒቷ ሕይወት ወንጌል ነው፣ ሁላችንም ስብከተ ወንጌል ላይ መረባረብ አለብን በማለት ሁሉንም የሚያነቃቃ  ንግግር ተናግረዋል፡፡ ሰባኪ የሚሰብከው በመድረክ ብቻ ሳይሆን በሕይወቱም ጭምር ስለሆነ ሰባኪያንን ምግባራቸው ላይ ትልቅ ትኩረት መሰጠት እንዳለባቸውም አሳስበዋል፡፡ በሌላ መልኩ በውይይቱ ላይ የተገኙት ባህታዊ ሊ/ት ገ/መስቀል የመፍትሔ አቅጣጫዎችን አስቀምጠዋል፡፡

ከላይ እስከ ታች ጥሩ መዋቅርና ቅንጅት ቢኖር፣ ሥራና ሠራተኞች ቢገናኙ፣ እሁድ እሁድ ዘወትር ከቅዳሴ በኋላ ሰፊ ጉባኤ በሁሉም ገዳማትና አድባራት ቢሰጥ፣ በንግሥ ወቀት ለዝማሬና ለገቢ ማሰባሰብ ብቻ ጊዜ ከሚሰጥ ይልቅ ለወንጌልም በቂ ጊዜ ቢሰጥ፣ በክፍለ ሀገር ለሚገኙ የገጠር አብያ ክርስቲያናት ሰባኪያነ ወንጌል በቂ የደሞዝ ጭማሪና አበል ቢደረግ የሚሉትን ሃሳቦች ጠቁመዋል፡፡

የክፍለ ከተማው የስብከተ ወንጌል ሐላፊ መ/ር ዘላለም የክፍለ ከተማውን የስብከተ ወንጌል እንቅስቃሴ አስመልክቶ ሰፋ ያለ ማብራሪያ ሰጥተዋል፡፡ በመጨረሻም ሊቀ ኅሩያን ሰርጸ አበበ የሀገረ ስብከቱ የስብከተ ወንጌል መምሪያ ዋና ኃላፊ የሆኑት ለተግዳሮቶቹ መፍትሔ በጋራ መስጠት አለብን በማለት ለታዳሚው ተናግረዋል፡፡ ሁላችንም ሓላፊነት ተስምቶን የደከመውን የስብከተ ወንጌል አገልግሎት በእጅጉ ማጠናከር አለብን ብለዋል፡፡ መዋቅራችንንም ከሀገረ ስብከቱ ጀምሮ እስከ ገዳማትና አድባራት ድረስ ግንኙነታችንን አጠናክረን በመናበብ የተሰጠንን መለኮታዊ አደራ መወጣት አለብን በማለት ውይይቱ በዚሁ ተጠናቋል፡፡

መ/ር ይቅርባይ እንዳለ የአዲስ አበባ ሀገረ ስብከት ዋና ስራ አስከያጅ በ37ኛው አጠቃላይ የሰበካ ጉባኤ ላይ ያቀረቡት ዓመታዊ የሥራ ሪፖርት

ቅዱስ ሲኖዶስ በዴርሱልጣን ገዳም በተፈፀመው ሕገ-ወጥ ድርጊት መግለጫ ሰጠ

በስመአብወወልድወመንፈስቅዱስአሐዱአምላክአሜን!

የኢትዮጵያውያን ይዞታ በሆነው በዴርሱልጣን ገዳም የቅዱስ ሚካኤል ቤተመቅደስ እድሳት ላይ የግብጽ ኮፕቲክ ኦርቶዶክስ ቤተክርስቲያን አባላት ያሳዩትን ሕገወጥ ተቃውሞ አስመልክቶ ከኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ የተሰጠ መግለጫ፤

ሁላችሁም እንደምታውቁት የኢትዮጵያ ኦርቶዶክስ ተዋሕዶ ቤተክርስቲያን በኢየሩሳሌም ካሏት ጥንታውያንና ታሪካውያን ቅዱሳት መካናት ውስጥ አንዱና ዋናው በዴርሱልጣን የሚገኘው የመድኀኔዓለም፣ የአርባዕቱ እንስሳ እና የቅዱስ ሚካኤል ገዳማት ናቸው፡፡

ከታሪክ እንደምንረዳው ኢትዮጵያውያን በምድረ እስራኤል የነበራቸው ርስት ከሦስት ሽህ ዓመት በላይ ያስቆጠረ ነው፡፡ በብሉይ ኪዳን የአሁኗ ኢትዮጵያ መልክዓ ምድራዊ መገኛዋን ከዓባይ ምንጭ ጋር በማያያዝ ያለምንም ማሳሳት ከአርባ ጊዜ በላይ የተመዘገበች፤ በታሪክ፣ በእምነትና በማኅበራዊ ትሥሥር ከእስራኤል ጋር የጸና ግንኙነት ያላት ሀገር ናት፡፡

ከንግሥተ ሳባ የኢየሩሳሌም ጉብኝት ጀምሮ ኢትዮጵያውያን ወደ ቅድስት ሀገር ያለማቋረጥ በየዓመቱ በዓለ ፋሲካን ለማክበር፣  ዓመታዊ አምልኮተ እግዚአብሔርን ለመፈጸም፣ በርስት የተሰጣቸውን ይዞታ ለማስከበርና በንግድ ሥራዎች ይጓዙ እንደነበር በታሪክም በቅዱሳት መጻሕፍትም የተረጋገጠ እውነት ነው፡፡

ለዚህም በሐዲስ ኪዳን ክርስትና ወደ ኢትዮጵያ ለመግባቱ ምክንያት የሆነውና በሐዋርያት ሥራ ምዕራፍ 8 ከቁጥር 26 እስከ 40 የተጻፈው የኢትዮጵያዊው ጃንደረባ ታሪክ አንዱ ማሳያ ነው፡፡

ኢትዮጵያውያን ወደ ኢየሩሳሌም በሚያደርጉት ጉዞ፣ መንፈሳዊና ማኅበራዊ ትሥሥርን ከማጠናከር ባሻገር በዴርሱልጣን እና በብዙ መካናት ቋሚ ይዞታን በማቋቋም በርካታ ገዳማትንና አድባራትን መሥርተዋል፣ መንበረ ጵጵስናም አቋቁመዋል፡፡ ይህም ድርጊት ኢትዮጵያ በኢየሩሳሌም የሕዝቦቿ ምልክትና መመኪያ እድትሆን አድርጓታል፡፡

ይሁን እንጅ ነባሩን ታሪካዊ እውነት ለመሻርና በማይገባ ሁኔታ ግብፃውያን በሌላቸው መብትና ሕጋዊ ባልሆነ የፈጠራ መረጃ ኢትዮጵያን ከኢየሩሳሌም የዴርሱልጣን ገዳም ባለቤትነቷን ለማሳጣት ብዙ ጥረቶች ሲደረጉ ቢቆዩም ኢትዮጵያውያን ሕይወታቸውን ሳይቀር መስዋዕት በማድረግ ሃይማኖታቸውንና ጥንታዊ ገዳማቸውን ጠብቀው እስከ አሁን ቆይተዋል፡፡

የኢትዮጵያውያን የኢየሩሳሌም ይዞታ ከቅዱሳት መጻሕፍት ማስረጃነት በተጨማሪ ኢየሩሳሌምን ይገዙ በነበሩ መሪዎች የግብርና የመንግሥት አዋጅ መዛግብት፣ ኢየሩሳሌም ድረስ ተጉዘው ታሪክ በጻፉ ምሁራን፣ በኢየሩሳሌም ተሳላሚዎች የግል ማስታወሻ እና በዓለም አቀፍ መዛግብት ሳይቀር የተመዘገበ ሐቅ ነው፡፡

ለምሳሌ ያህልም እንደነ አባ ጀሮም ያሉ የላቲን ታሪክ ጸሐፊዎች፣ እንደነ ከሊፋ ዑመርና ሳላሐዲን ባሉ ገዥዎች፣ በኢየሩሳሌም ተመሳሳይ ይዞታ ባላቸው በአርመንና በሶርያ ኦሬንታል ኦርቶዶክስ አብያተ ክርስቲያናት፣ በግሪክና በራሽያ የምሥራቅ ኦርቶዶክስ አብያተ ክርስቲያናት እንዲሁም በካቶሊክ ቤተክርስቲያን ልዩ ልዩ ገዳማት መዛግብት የተመሰከረ ነው፡፡

ይሁን እንጅ ግብፃውያን በሚፈጥሩት ግፍና ኢሰብዓዊ ድርጊት በይዞታችን ያለውን ገዳም ከጉዳት ለመጠበቅና ለማደስ አንኳ ሳንችል በመቅረታችን እየፈራረሰ ይገኛል፡፡

በመሆኑም ቤተክርስቲያኒቱ ስታሰማ በነበረው ተደጋጋሚ አቤቱታና የኢትዮጵያ መንግሥት ባቀረበው ሕጋዊ የመብት ጥያቄ መሠረት የእስራኤል መንግሥት ገዳሙን ለማደስ ቃል በመግባቱ እና በዚሁ መሠረት መንግሥት ቃሉን በመጠበቅ በቅርቡ ጉዳት ከደረሰበት ከቅዱስ ሚካኤል ቤተመቅደስ እድሳቱ በመጀመሩ የተሰማንን ከፍተኛ ደስታ በቅድስት ቤተክርስቲያን እና በመላው ኢትዮጵያውያን ስም በመግለጽ ልባዊ ምስጋናችንን እናቀርባለን፡፡

የተጀመረው እድሳት በዴርሱልጣን የሚገኙ እና እጅግ በአስከፊ ጉዳት ላይ ያሉ ሁሉንም የኢትዮጵያ ይዞታዎች በማዳረስ ገዳሙ ጥንታዊ ይዞታውን ጠብቆ ለትውልድ እንዲተላለፍ እንደሚደረግልን እናምናለን፡፡

አሁን እየተደረገ ያለውን ጥገና አስመልክቶ የኢትዮጵያ መንግሥትም ሆነ በመላው ዓለም የሚገኙ ኢትዮጵያውያን ለእስራኤል መንግሥት ምስጋናችሁን እንድታቀርቡልን የግብጽ ቤተክርስቲያንን መሠረት የለሽ ክስና ሁከት በመቃወም ገዳማችሁን በመጠበቅ የበኩላችሁን እንድትወጡ፣ ወደ ፊትም ከግብጽ ያልተመለሱ ይዞታዎቻችንን ለማስመለስ ሁለንተናዊ እንቅስቃሴ እንድታደርጉ ጥሪ እናደርጋለን፡፡

በዚሁ አጋጣሚየ ግብጽ ኮፕቲክ ኦርቶዶክስ ቤተ ክርስቲያን አባላት በይዞታችን ላይ አግባብነት የሌለው ሥራን የማደናቀፍና በታሪክም ሆነ በማንኛውም የሰነድ ማስረጃ መሠረት የሌለው የባለቤትንት ጥያቄ በማንሣት እየፈጠሩት ያለውን አላስፈላጊ ሁከትና ብጥብጥ እንዲያቆሙ፣

ዴርሱልጣን የኢትዮጵያ ገዳም ምንጊዜም ቢሆን የኢትዮጵያ የነበረና ወደፊትም የኢትዮጵያ ሆኖ የሚቆይ ታሪካዊና ሃይማኖታዊ ቅርሳችን፣ የኢትዮጵያውያን በኢየሩሳሌም ቅድስት ሀገር በሁሉም ዘመን በቋሚነት ለመገኝታቸው ምስክር ስለሆነ ከዚህ የተሳሳተ ትንኮሳና ሁከት እንዲታቀቡ ጥሪያችንን እናስተላልፋለን፡፡

በመጨረሻም የተጀመረው የእድሳት ሥራ ተጠናክሮ በመቀጠል ሁሉንም የኢትዮጵያ የዴርሱልጣን ይዞታዎች በአግባቡ እንዲጠገኑልን፣

በኢትዮጵያ መንግሥትም ሆነ የሰው ልጅ ቅርስ ጥበቃ ለሚያሳስባቸው በጎ አድራጊዎች ሁሉ ጥሪያችንን እያስተላለፍን እድሳቱ ያለምንም እንቅፋትና ሁከት ከፍጻሜ እንዲደርስ ጸሎታችንና ምኞታችን መሆኑን እናስታውቃለን፡፡

እግዚአብሔር ኢትዮጵያንና ሕዝቦቿን ይባርክ

ወስብሐት ለእግዚብሔር አሜን!

አባ ማትያስ ቀዳማዊ ፓትርያርክ ርእሰ ሊቃነጳጳሳት ዘኢትዮጵያ ሊቀጳጳስ ዘአኵስም ወዕጨጌ ዘመንበረ ተክለሃይማኖት

ጥቅምት 21 ቀን 2011 ዓ.ም.

አዲስ አበባ፡ ኢትዮጵያ

የጥቅምት 2011 ዓ.ም ቅዱስ ሲኖዶስ ምልዓተ ጉባኤ ተጠናቀቀ

በስመ አብ ወወልድ ወመንፈስ ቅዱስ አሐዱ አምላክ አሜን

ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ በዓመት ሁለት ጊዜያት እንዲሆን በፍትሕ መንፈሳዊ አንቀጽ 5 ቁጥር 164 በተደነገገው መሠረት ምልዓተ ጉባኤው የመክፈቻው ሥርዓተ ጸሎት ከተፈጸመበት ከጥቅምት 11 ቀን 2011 ዓ.ም ጀምሮ እስከ ጥቅምት 21 ቀን 2011 ዓ.ም ድረስ የተለመደውን ዓመታዊ መደበኛ ስብሰባ ሲያካሒድ ሰንብቶ ማህበራዊና መንፈሳዊ ለቤተ ክርስቲያናችንና ለሀገራችን የሚበጁ ውሳኔዎችን አሳልፎአል ፡፡በዚሁ መሠረት፤

  1. ለቅዱስ ሲኖዶስ ምልዓተ ጉባኤ በቀረበው አጀንዳ ተራ ቁጥር አንድ ላይ በተገለፀው የጉባኤ መክፈቻ ንግግር የተመዘገበው ፍሬ ሐሳብ የበጀት ዓመቱ መመሪያ ሆኖ ያገልግል ዘንድ ምልዓተ ጉባኤው ተቀብሎታል፤
  2. የብፁዓን አባቶች የሥራ ምደባና ዝውውር በማስፈለጉ ቅዱስ ሲኖዶስ ያለውን ሁኔታ ከመረመረ በኋላ ዝውውሩን አከናውኗል፤ አዲስ የሥራ ምደባም ተካሒዷል ፡፡
  3. በሀገራችን ኢትዮጵያ በአንዳንድ ክልሎችና ዞኖች ተከስቶ የነበረው ሕልፈተ ሕይወት፣ የአብያተ ክርስቲያናት መቃጠልና የንብረት መውደም የዜጎች መፈናቀል ይገታ ዘንድ በመደጋገም የተላለፈው ጥያቄ በኢትዮጵያ ፌደራላዊ ዲሞክራሲያዊ ሪፑብሊክ መንግሥት በኩል ተቀባይነትን ያገኘ ቢሆንም፤ አሁንም በሀገሪቱ አንዳንድ ችግሮች እንዳሉ እየተሰማ ነው ፡፡

ስለዚህ ከየአቅጣጫው እየተሰማ ላለው ችግር አስቸኳይ መፍትሔ ተፈልጎ እንዲገታ ካልተደረገ እየሰፋና እያደገ ሊሔድ ስለሚችል መንግሥት ከአቅም በላይ እየሆነ ለሚታየው ችግር አጽንዖት ሰጥቶ አስፈላጊውን ሕጋዊ መፍትሔ እንዲገኝ በማድረግ ተገቢውን እንዲፈጸም የቅዱስ ሲኖዶስ ምልዓተ ጉባኤ በድጋሚ ያሳስባል ፡፡

  1. የዘንድሮውን የቅዱስ ሲኖዶስ ምልዓተ ጉባኤ ልዩ ታሪካዊ ጉባኤ ከሚያደርጉት መካከል፣ የብፁዕ ወቅዱስ አቡነ መርቆሬዎስ ዐራተኛ ፓትርያርክ፣ አብረዋቸው ከነበሩት አባቶች ጋር ወደ እናት ሀገራቸው ኢትዮጵያ የመመለሳቸው ጉዳይ አንዱ እንደሆነ አያጠያይቅም፤
  2. ለኢትዮጵያ ምእመናን ከኤርትራ ምእመናን፤ ለኤርትራ ቤተ ክርስቲያን ከኢትዮጵያ ቤተ ክርስቲያን፣ ለኢትዮጵያ ቤተ ክርስቲያንም የኤርትራ ቤተ ክርስቲያን የመፈቃቀርና የአንድነት እንዲሁም የበለጠ የክፉ ቀን ደራሽ ይኖራል ተብሎ አይገመትም ፡፡ስለዚህ በሁሉም መንፈሳዊና ማኅበራዊ አገልግሎት ዘርፍ ተቀራርቦ እየሠሩ መረዳዳት ይቻል ዘንድ ከወዲሁ ሁኔታዎችን የሚያመቻች የጋራ ኮሚቴ እንዲቋቋም ምልዓተ ጉባኤው ተስማምቷል ፡፡
  1. በቅዱስ ሲኖዶስ ምልዓተ ጉባኤ የጸደቀው ሠላሳ ሰባተኛው የመንበረ ፓትርያርክ አጠቃላይ ሰበካ መንፈሳዊ ጉባኤ የጋራ መግለጫ በአፈጻጸም ዙሪያ የሚከሰት ችግር ካጋጠመው በቋሚ ሲኖዶስ እየተመረመረ ለውጤት ይበቃ ዘንድ ቅዱስ ሲኖዶስ ተስማምቶ መመሪያ አስተላልፏል፤
  2. በአሁኑ ጊዜ በሀገራችን ኢትዮጵያ በአንዳንድ አካባቢዎች እየታየ ያለው የሰላም እጦት ችግር በቀላሉ የሚገታ ሆኖ ካልተገኘ ወደፊት አስቸጋሪ ሁኔታዎች ሊከሰቱ ይችላሉ የሚል ሥጋት አለ፤

ስለዚህ እንደ ቤተ ክርስቲያናችን ቀኖናዊ ሥርዓት የወንጌል ስምሪት ተዘጋጅቶ ከመቼውም ጊዜ በበለጠ ትምህርተ ወንጌል ተጠናክሮ እንዲሰጥ ሆኖ ከዚህም ጋር ከኅዳር 1 እስከ ኅዳር 7 ቀን 2011 ዓ.ም. ድረስ በመላው የኢትዮጵያ ኦርቶዶክስ ተዋሕዶ አብያተ ክርስቲያናት ጸሎተ ምሕላ እንዲደረግ የቅዱስ ሲኖዶስ ምልዓተ ጉባኤ መመሪያውን አስተላልፎአል፤

  1. በተቀረፀው አጀንዳ መሠረት አቤቱታ የቀረበባቸውን አህጉረ ስብከቶች በተመለከተ መርምሮና አጣርቶ መፍትሔን የሰጠ ሲሆን በአንጻሩ ከቅን አስተዳደር የሚጠበቅ ድርሻ ስለሆነ አስተዳደራዊ ችግር ያጋጠማቸው አህጉረ ስብከት ተመርምረው ውጤታቸው ተፋጥኖ ይቀርብ ዘንድ ቅዱስ ሲኖዶስ መመሪያን ሰጥቷል ፡፡
  2. በበጀትና ሒሳብ መምሪያ በኩል የቀረበው የዘመኑ ገቢና ወጭ ሒሳብ ሪፖርት ከተሰማ በኋላ ገቢው በትክክል እንዲመዘገብ ሆኖ፤ የወጭው አርእስት ተጠብቆ በበጀት ዓመቱ እንዲሠራበት ቅዱስ ሲኖዶስ መመሪያን ሰጥቷል፡፡
  3. በጥንታዊት ኦርቶዶክሳዊት ተዋሕዶ ቤተ ክርስቲያናችን በመንፈሳዊውም ሆነ በማህበራዊው ረገድ ከፍተኛ ሥራ መሠራቱን ቅዱስ ሲኖዶስ ገምግሟል፡፡ በቀጣይም የቤተ ክርስቲያኒቱን ተልዕኮ ለማስፋት በቤተ ክርስቲያኒቱ ከላይ እስከታች የሚተገበር የቤተ ክርስቲያን ሁለንተናዊ ችግርና መሪ እቅድ ተዘጋጅቶ የቀረበ በመሆኑ ለዚሁ ተግባር በተከፈተው ጽ/ቤት ሥራው እንዲቀጥል፣

በውጭ አገር ለምትገኘውም ቤተ ክርስቲያናችን የየአገሮቹን ሕገ መንግሥት ባገናዘበ መልኩ ቃለ ዓዋዲ እንዲዘጋጅና ሁሉም አብያተ ክርስቲያናት በመዋቅራዊ አስተዳደር እንዲመራ ተወስኖአል፡፡

  1. አሁን በቤተ ክርስቲያናችን ቅዱስ ሲኖዶስ መካከል የተፈጠረው አንድነት ለቀጣይ መንፈሳዊና ማህበራዊ ሥራችን መቃናት በር ከፋች በመሆኑ ከአሁን በኋላ በአገር ውስጥም ሆነ በውጭው ዓለም ያለችው ቤተ ክርስቲያን በአንዲት ቀኖናዊት ቤተ ክርስቲያን በማዕከል እንድትመራ ወስኗል፡፡
  2. ከሐምሌ ወር በዋሽንግተን ዱሲ የሁለቱ ሲኖዶስ ልዑካን የስምምነቱን ሠነድ የቅዱስ ሲኖዶስ ምልዓተ ጉባኤ ተቀበሎ በማጽደቅ በሠነድነት እንዲቀመጥ ወስኗል፡፡
  3. በቅድስት ሀገር ኢየሩሳሌም በዴር ሡልጣን ገዳማችን ይዞታ ላይ እየታየ ያለው ችግር ከጊዜ ወደጊዜ እየጨመረ ከመሔዱ የተነሣ ችግሩ ይፈታ ዘንድ ቅዱስ ሲኖዶስ በጽሑፍም ሆነ በቃል ለሚመለከተው ሁሉ በአካል ቀርቦ ከማመልከት የተገታበት ጊዜ እንደሌለ ይታወቃል፤ታሪካዊ እውነትን ለመሻር በማይገባ ሁኔታ የኮፕቲክ ኦርቶዶክስ ቤተ ክርስቲያን በሌላት ርስትና መብት የዴርሡልጣን ገዳማችን ባለቤትነታችንን ለማሳጣት ብዙ የፈጠራ ወሬዎችን በመንዛት የተሰማሩት ግብጻውያን ኮፕቲኮች ሊያውቁት የሚገባ ትልቁ ጉዳይ በማን ርስት ማን ያዝዛል? ኢትዮጵያውያን ለዘመናት ሕይወታቸውን ሳይቀር መስዋዕት በማድረግ ሃይማኖታቸውንና ጥንታዊ ታሪካቸውን ጠብቀው ለእኛ አስረክበውናል፤ እኛም ጠብቀን ለትውልዱ የማስረከብ ኃላፊነታችንን እንወጣለን፡፡

የግብጽ ኮፕቲክ ኦርቶዶክስ በይዞታችን ላይ አግባብነት የሌለው ሥራን የማደናቀፍና በታሪክም ሆነ በማንኛውም የሠነድ መረጃ የሌለው የባለቤትነት ጥያቄ በማንሳት እየተፈጠረ ያለውን አላስፈላጊ ሁከትና ብጥብጥ ማቆም አለባቸው፤ ዴርሡልጣን ትናትም ዛሬም ነገም የኢትዮጵያ ገዳም ነው፡፡

ዳሩ ግን መፍትሔውን ከማስገኘት ይልቅ እየደረሰ ያለው ተፅዕኖ እየሰፋና እየከበደ መጥቶ በአሁኑ ወቅት ገዳሙን በሚጠብቁና በሚቆጣጠሩ መነኮሳት ላይ በኮፕቲክ ቤተ ክርስቲያን አማካኝነት ያልተጠበቀ ከፍተኛ ችግር እየደረሰ ስለሆነ የችግሩን አስገዳጅነት አስመልክቶ የኢትዮጵያ መንግሥት የጉዳዩ ባለቤት እንደመሆኑ አስፈላጊውን መፍትሔ እንዲያስገኝልን እንጠይቃለን፡፡

  1. የቦታቸው ታላቅነትና የታሪካቸው ስፋት ዓለም አቀፍ ዕውቅናን ባስገኘላቸው በርእሰ አድባራት ወገዳማት አክሱም ጽዮን ቤተ ክርስቲያን እየተገነባ ላለው ሙዝየምና፣ የመሰነጣጠቅ አደጋ ለሚታይበት ለቅዱስ ላሊበላ ውቅር አብያተ ክርስቲያናት ለጥገናና ለግንባታ አገልግሎት የሚውል ገንዘብ ተፈቅዶዋል፤
  2. አንዳንድ ግለሰዎች በግልና በቡድን በመደራጀት የቤተ ክርስቲያኗ መብትና ቀኖና እየተጋፉ መሆናቸውን ከቀረበው ሪፖርት ጉባኤው ተገንዝቧል፡፡

ስለዚህ መንግሥት በዚህ ተግባር ላይ የተሠማሩትን የሕግ ከለላ እንዲያደርግ እንጠይቃለን፡፡

በዚሁ መሠረት፤

  1. ለርእሰ አድባራት ወገዳማት አክሱም ጽዮን ቤተ ክርስቲያን ቤተ መጻሕፍት ወመዘክር ሥራ ማከናወኛ ብር 20,000,000.00 /ሃያ ሚሊዮን ብር/
  2. ለቅዱስ ላሊበላ ውቅር አብያተ ክርስቲያናት ማስጠገኛ ብር 20,000,000.00 /ሃያ ሚሊዮን ብር/ ከመንበረ ፓትርያርክ ጠቅላይ ጽ/ቤት ወጭ ሆኖ እንዲሰጥ ተወስኗል፤

ቅዱስ ሲኖዶስ ከዚህ በላይ በተጠቀሱትና በሌሎችም ዓበይት ጉዳዮች ላይ ለ11 ቀናት ያህል በአገር አቀፍና በዓለም አቀፍ ጉዳዮች በስፋትና በጥልቀት ሲወያይ ሰንብቶ ስብሰባውን በጸሎት አጠናቋል ፡፡

ወስብሐት ለእግዚአብሔር አሜን

አባ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት

አዲስ አበባ፣ ኢትዮጵያ

ጥቅምት 21 ቀን 2011 ዓ.ም.

የጥቅምት 2011 ዓ.ም. የቅዱስ ሲኖዶስ ምልዓተ ጉባኤ ተጀመረ

                                                       መልእክተ ቅዱስ ፓትርያርክ

በስመ አብ ወወልድ ወመንፈስ ቅዱስ አሐዱ አምላክ፤ አሜን

  • ብፁዕ ወቅዱስ አቡነ መርቆሬዎስ ራብዓይ ፓትርያርክ ርእሰ ሊቃነ ጳጳሳት ዘኢትዮጵያ፤
  • ብፁዕ አቡነ ዲዮስቆሮስ፣ የመንበረ ፓትርያርክ ጠቅላይ ጽ/ቤት ዋና ሥራ አስኪያጅና በክልል ትግራይ ደቡባዊ ዞን ማይጨውና ደቡባዊ ምሥራቅ አህጉረ ስብከት ሊቀ ጳጳስ፤
  • ብፁዕ አቡነ ሳዊሮስ፣ የቅዱስ ሲኖዶስ ዋና ጸሐፊ እና የደቡብ ምዕራብ ሸዋ ሀገረ ስብከት ሊቀ ጳጳስ፤
  • ብፁዓን ሊቃነ ጳጳሳት ወኤጲስ ቆጶሳት የቅዱስ ሲኖዶስ አባላት፤
  • በአጠቃላይ በዚህ ዓመታዊ የቅዱስ ሲኖዶስ ጉባኤ የመክፈቻ ሥነ ሥርዐት የተገኛችሁ ኹሉ፤

ከጽንፍ እስከ ጽንፍ ባለችው ሐዋርያዊት ቤተ ክርስቲያናችን፣ ሃይማኖታዊ አገልግሎታችንን እየባረከ ዘወትር የማይለይ እግዚአብሔር አምላካችን፣ አሁንም ለበለጠ ሐዋርያዊ ሥራ እንድንመካከር በስሙ ስለ ሰበሰበን ስሙ የተመሰገነ ይኹን፡፡

በቤተ ክርስቲያናችንም ኾነ በዓለም አቀፍ ክርስቲያናዊ አስተምህሮ እንደሚታወቀው፣ የቅዱስ ሲኖዶስ ጉባኤ መሠረቱ ክርስቶሳዊ አስተምህሮ፣ ሐዋርያዊ ትውፊትና ቀኖና ቅዱሳን አበው ነው፡፡

ክርስቶስ መድኃኒታችን፣ በስሜ በምትሰበሰቡበት እኔ በመካከላችሁ እኖራለሁ፤ ብሎ ቃል ኪዳን ገብቶአል፤ ይህን ተከትሎም የመጀመሪያው ሲኖዶሳዊ ጉባኤ፣ በቅዱሳን ሐዋርያትና በቀሲሳን ኅብረት በቅድስት ሀገር በኢየሩሳሌም ማእከላዊነት፣ በቅዱስ ያዕቆብ እኁሁ ለእግዚእነ ርእሰ መንበርነት፣ በዘመነ ሐዋርያት እንደተካሔደ፣ ወአንገለጉ ሐዋርያት ወቀሲሳን ከመ ይርአዩ ዘይገብሩ በእንተዝ ነገር፤ ሐዋርያትና ቀሳውስትም ስለዚህ ነገር ለመመካከር ተሰባሰቡ ተብሎ በቅዱስ መጽሐፍ ተመዝግቦአል፡፡ የተወሰነው ውሳኔም፣ መንፈስ ቅዱስ ያለበት መኾኑን ለማመልከት፣ እኛና መንፈስ ቅዱስ ፈቅደናል ተብሎ ተገልጾአል፡፡ (የሐዋ ሥራ 15፥6-29)ከዚህ ጊዜ ጀምሮ በቤተ ክርስቲያናችን ያጋጠሙ ፈተናዎችን ለማየት፣ ላለፈው እርማትና ማስተካከያ ለመስጠት፣ ለሚቀጥለው የሥራ አቅጣጫን ለማስቀመጥ፣ ተላውያነ ሐዋርያት በየጊዜው ሲኖዶሳዊ ጉባኤ ያካሒዱ እንደነበር ኹላችንም የምናውቀው ነው፤ በተለይ የቅዱስ ሲኖዶስ ምልዓተ ጉባኤ በዓለ ቅዱስ መስቀል በተከበረ በኻያ አምስተኛ ቀን ጥቅምት ዐሥራ ኹለት እና የትንሣኤ በዓል በዋለ በኻያ አምስተኛው ቀን በርክበ ካህናት፣ በድምሩ በዓመት ኹለት ጊዜ እንዲካሔድ በቀኖና ቤተ ክርስቲያን መደንገጉ በፍትሕ መንፈሳዊ ተጽፎ ይገኛል፡፡

የቅዱስ ሲኖዶስ ምልዓተ ጉባኤ ዋና ዓላማ፣ ቤተ ክርስቲያን፥ ከዓላውያን፣ ከአረማውያንና ከከሐድያን በየጊዜውና በየአቅጣጫው የሚሰነዘርባትን ጥቃት በሃይማኖት ጽናት ለመቋቋም፣ በድንበር፣ በወንዝ፣ በባሕር፣ በየብስ፣ በዘር፣ በጎሣ፣ በፆታ፣ በቀለም፣ በሀብት፣ በሥልጣን፣ በዕውቀት፣ በጉልበት፣…ወዘተ ሳትገደብ መንግሥተ እግዚአብሔርን በዓለም ዙሪያ ኹሉ ለመስበክ፣ ለምእመናን መንፈሳዊ፣ ማኅበራዊና ኢኮኖሚያዊ አገልግሎትን ለማበርከት፣ በሰው ልጆች መካከል እኩልነት፣ ሰብአዊነትና ፍትሕ እንዲሰፍን የበኩሏን አስተዋፅኦ ለማድረግ እንድትችል ነው፡፡

ሐዋርያዊት፣ዓለም አቀፋዊት፣ አንዲትና ቅድስት የኾነችው ቤተ ክርስቲያናችን የክርስቶስን አስተምህሮ፣ የቅዱሳን ሐዋርያትና የቀደምት ቅዱሳን አበውን ፈለግ ተከትላ፣ እነኝህን ዓላማዎች በመፈጸም ለኹለት ሺሕ ዘመናት ያህል ኢትዮጵያንና ሕዝቦቿን ስታገለግል ኖራለች፡፡

ቅድስት ቤተ ክርስቲያናችን ጥንታዊውን የሐዋርያት ትውፊት፣ ቀኖና እና ሥርዐት ጠብቃ በማስጠበቅ ያልተበረዘ፣ ያልተከለሰና ያልተሸራረፈ ሃይማኖታዊ አስተምህሮን በመከተል በዓለም ውስጥ የተዋጣላት ብቸኛዋ ቤተ ክርስቲያን እንደኾነች ኹሉም የዓለም ክርስቲያኖችና ተመራማሪዎች ያረጋገጡት እውነት ነው፡፡

ቤተ ክርስቲያናችን በምትከተለው ጥንቁቅ አስተምህሮና የማይናወጽ ጽንዐ ሃይማኖት፣ ለሀገሪቱ አንድነትና ነጻነት፣ የግልዋ መለያ ለኾኑ ባህላዊ፣ ቁሳዊና መንፈሳዊ ቅርሶች መጠበቅ የአንበሳዋን ድርሻ ወስዳ እስከ ዛሬ በድል ለመዝለቅ የቻለች ብቸኛ ኃያል እርስዋ እንደኾነች ማንም አይክደውም፤ ቤተ ክርስቲያናችን ይህ ጽናቷ በአፍሪቃ ክፍለ ዓለም እና በኦሪየንታል አብያተ ክርስቲያናት ዘንድ የቁጥር አንድ ደረጃን፣ በአጠቃላይ በኦርቶዶክሱ ዓለም ደግሞ በታሪክና በዶግማ ባይኾንም በቁጥር ብቻ ከሩስያ ቤተ ክርስቲያን ቀጥላ የቁጥር ኹለት ደረጃን ይዛ ትገኛለች፤ይህ ጥንካሬና ጸጋ በቀደምት ኢትዮጵያውያን ተጋድሎ የተገኘ ደማቅና አኩሪ ታሪክ መኾኑን ኦርቶዶክሳውያን ብቻ ሳይኾኑ መላ ኢትዮጵያውያን ሊያውቁት፣ ሊኮሩበት፣ ሊንከባከቡትና ሊጠቀሙበት የሚገባ የጋራ ሀብት ነው፡፡

ምክንያቱም፣ ኹሉም ኢትዮጵያውያን በዚህ ሀብተ ጸጋ ሲጠቀሙ ኖረዋል፤ አሁንም እየተጠቀሙ ነውና፤ የቅድስት ቤተ ክርስቲያናችን ካህናትና ምእመናንም ይህን ሐቅ ለኢትዮጵያውያን ኹሉ የማሳወቅ ሓላፊነት ስላለባቸው በዚህ ዙሪያ በሰፊው ሊሠሩበት እንደሚገባ ሳንመክር አናልፍም፡፡

ብፁዓን ሊቃነ ጳጳሳት የቅዱስ ሲኖዶስ አባላት፤

የዘንድሮ የቅዱስ ሲኖዶስ ምልዓተ ጉባኤ ስብሰባ ልዩ የሚያደርገው፣ ቤተ ክርስቲያናችን ሐዋርያዊ ተልእኮዋን በአግባቡ እንዳትወጣ ዕንቅፋት ኾኖ የቆየው የመለያየት ጠንቅ ተወግዶ፣ በምትኩ አንድነትዋ ገሐድ ኾኖ በምሕረተ እግዚአብሔር በተጎበኘችበት ወቅት የሚካሔድ ጉባኤ መኾኑ ነው፡፡

ይህን ዕድል በመልካም ጎኑ የምንመለከተው ኾኖ፣ በተቃራኒው ደግሞ ቤተ ክርስቲያናችን በከፋ መልኩ የተደፈረችበት፣ ካህናቶቻችንና ምእመናን ልጆቻችን ለሰው ኅሊና በሚከብድ ድርጊት በአሠቃቂ ጭካኔ የሰማዕትነት ጽዋ በተቀበሉበት ማግሥት የሚካሔድ ጉባኤ መኾኑ ነው፡፡

በመኾኑም፣ ከዐሥር ዓመታት በፊት በጂማና በኢሉባቦር አህጉረ ስብከት፣ በጉራጌና በአርሲ ነገሌ፣ በቅርቡም በባሌ ተቃጥቶ በነበረው አደገኛ ሙከራ፣ ከኹሉም የባሰ ደግሞ በሶማሌ ሀገረ ስብከት የተፈጸመው ጣራ የነካ ግፍና ጭካኔ፣ እልቂትና ውድመት ቤተ ክርስቲያናችንን ክፉኛ የጎዱና የተዳፈሩ ኾነው ተገኝተዋል፡፡

ቤተ ክርስቲያናችን ችግሩ ወደ ሌሎችም እንዳይስፋፋና የከፋ ጉዳት እንዳያስከትል በከፍተኛ የሓላፊነት ስሜት ሐዘንዋን በልብዋ አምቃ ለማለፍ ብትሞክርም፣ ድፍረቱ ከቀን ቀን እየባሰ፣ ዕልቂቱም እየጨመረ፣ ተጽዕኖው እየተባባሰ በመሔዱ ልትታገሠው ከማትችልበት ደረጃ እየደረሰ ነው፡፡

የኢትዮጵያ ኦርቶዶክስ ተዋሕዶ ቤተ ክርስቲያን፣ ለኢትዮጵያውያን ኹሉ በፊደልዋ ማዕድ ዕውቀትን እየመገበች፣ በታቦትዋ አዝማችነት ለነጻነትና ለወገን ክብር መተኪያ የሌለው መሥዋዕትነት እየከፈለች፣ የኹሉንም እምነቶች ነጻነት ሳትጋፋ፣ አንዱን እንኳን ሳትጫንና ክብሩን ሳትነካ በሺሕ ለሚቆጠሩ ዘመናት እንዳልዘለቀች ኹሉ፣ ዛሬ በኢትዮጵያውያን ወገኖችዋ ስትቃጠል ማየት አሳፋሪና የድፍረት ድፍረት ነው፤ የቤተ ክርስቲያናችን ተከታይ ምእመናንና አገልጋይ ካህናት በነጻነት የማስተማር፣ የማምለክና የመኖር ሕገ መንግሥታዊ መብታቸውን በሚቃረን አኳኋን በሚደርስባቸው ተጽዕኖ ከቀዬአቸው እየተፈናቀሉ እንዲወጡና ሃይማኖቱ እንዲዳከም የሚደረጉ ደባዎች እየተበራከቱ ነው፡፡

ይህ ኹሉ እየኾነ ቅዱስ ሲኖዶስ፣ ለካህናትና ለምእመናን አስተማማኝ የኾነ መፍትሔ አበጅቶ ዘላቂ ዋስትና የማያረጋግጥ ከኾነ በታሪክና በእግዚአብሔር ዘንድ ተወቃሽ መኾኑ አይቀርም፤ በመኾኑም ቅዱስ ሲኖዶስ ይህን መሰሉ ችግር ተወግዶ ካህናትና ምእመናን ያለምንም ተጽዕኖና ስጋት በነጻነት ሥርዐተ አምልኳቸውን የሚፈጽሙበትና የመኖር መብታቸው የሚከበርበት ድባብ ለመፍጠር በየአካባቢው ጠንካራ የግንኙነት መረብ ዘርግቶ የቅድመ ትንበያ ሥራ በመሥራት፣ እንደዚሁም ከፍትሕና ከጸጥታ አካላት ጋራ በቅንጅት በመሥራት፣ በቤተ ክርስቲያንና በአማንያን ላይ የሚሰነዘረውን ጥቃት አስቀድሞ ማምከን የሚቻልበትን አሠራር መቀየስ የግድ ይላል፡፡

ያለንበት ወቅት፣ ሀገራችን በብሩህ ተስፋና በስጋት መንታ መንገድ ላይ የቆመችበት ጊዜ እንደኾነ በግልጽ የሚታይ ነው፡፡ በመኾኑም ስጋቱ ተወግዶ ብሩህ ተስፋው ብቻ እንዲፈነጥቅ፣ ቀጣዩ ዘመን ለሕዝባችን ወንድማማችነትና እኩልነት፣ ለሀገር አንድነትና ለዜጎች ደኅንነት ያለዕረፍት ድምፃችንን ከፍ አድርገን የምንሰብክበት፣ ከማንም የፖሊቲካ ርእዮተ ዓለም ገለልተኛ በመኾን በአስታራቂነት ብቻ የምንቆምበት ጊዜ እንደኾነ መገንዘብ ይኖርብናል፡፡

እኛ የቤተ ክርስቲያን መሪዎች፣ ካህናት፣ መምህራንና ሰባክያን የኹሉም ፖሊቲከኞች አባቶች መኾናችን አውቀን ኹሉንም በአባትነት መንፈስ መመልከት፣ ማስተማርና መምከር እንጅ አንዱን አግልሎ ሌላውን አቅርቦ ማየት፣ ከሃይማኖት አስተምህሮ ጋራ የማይሔድ ስለኾነ ልንጠቀቅበት ይገባል፡፡

የቤተ ክርስቲያናችንን አስተዳደር ክፉኛ እያስተቸ ያለው የመልካም አስተዳደር ዕጦት፣ የሀብት አያያዝ ክፍተት፣ የምእመናን ፍልሰት፣ የተልእኮ ሐዋርያት አለመጠናከር፣ በውስጥም በውጭም ከቤተ ክርስቲያን መዋቅር ውጭ በግላቸው አስተዳደራዊ መዋቅርን ከላይ እስከ ታች እየዘረጉ ቤተ ክርስቲያንን የሚጋፉ ልዩ ልዩ ማኅበራት፣ ቀኖና ቤተ ክርስቲያን በሚፈቅደው መሠረት፥ በሕግ፣ በመሪ ዕቅድ፣ በፖሊሲ፣ በደንብና በመመሪያ መልክ እያስያዙ የቤተ ክርስቲያንን ሉዓላዊነት፣ አንድነት፣ ክብርና መብት መጠበቅ ጊዜ የማይሰጠው ጉዳይ ነው፡፡

የቤተ ክርስቲያናችን አጠቃላይ አሠራር የዘመነና የሠለጠነ፣ ግልጸኝነትና ተኣማኒነት ያሰፈነ፣ በልጆቻችን ምእመናን ዘንድ አድናቆትን፣ ተቀባይነትንና ይኹንታን ያተረፈ እንዲኾን ለማድረግ ኹሉን የቤተ ክርስቲያን ሥራዎች ያካተተ፣ ጥልቅና ችግር ፈቺ የኾነ፣ ሰፊና ረዥም ጊዜ የሚያገለግል መሪ ዕቅድ የሚዘጋጅበት መደላድል መፍጠር አለብን፤ ይህም ጊዜ ሳይወስድ በፍጥነት ተሠርቶ ለቀጣዩ ስብሰባ እንዲቀርብ ዛሬ መወሰን አለብን፡፡

ቤተ ክርስቲያናችን የተዋጣለት መሪ ዕቅድ ሲኖራት፣ በርግጠኝነት ኹሉንም ችግሮች ተቋቁመን የተሻለ ልማትና ዕድገትን በኹሉም አቅጣጫ እናስመዘግባለን፤ የምንጓዝበትን ፍኖተ ምሕዋርና የምንደርስበት ጫፍም በትክክል ማወቅ እንችላለን፤ ፈጣን፣ ሐዋርያዊ፣ መንፈሳዊ፣ አስተዳደራዊና ኢኮኖሚያዊ ዕድገትንም እናስመዘግባለን፡፡

ስለኾነም፣ የቤተ ክርስቲያናችን አስተዳደራዊ ችግርን ለመፍታት የምንችለው በመሪ ዕቅድ በመመራትና መልካም አስተዳደርን በማበልጸግ እንደኾነ፣ ከዚህ ውጭ ግን ሌላ አማራጭ ሊኖር እንደማይችል መገንዘብ ይኖርብናል፡፡

ሌላው በዚህ ጉባኤ ሳናነሣው የማናልፈው ዐቢይ ነጥብ፣ የኤርትራ ኦርቶዶክስ ተዋሕዶ ቤተ ክርስቲያን ጉዳይ ነው፤ የታሪክ አጋጣሚና የትውልድ ዕድል ጉዳይ ኾኖ አሁን ላለንበት ኹኔታ ብንዳረግም፣ ከኢትዮጵያ የተነጠለ የኤርትራ ታሪክ፣ ከኤርትራ የተነጠለ የኢትዮጵያ ታሪክ ፍጹም እንደሌለ እኛ ብቻ ሳንኾን ዓለም በሙሉ የሚያውቀው ሐቅ ነው፡፡

ከጅምሩም ግራና ቀኛችን በሚገባ አርቀን ካለማየታችን የተነሣ ለጊዜው ተለያይተን ቆየን እንጅ የሚለያየን ሃይማኖታዊም ኾነ ቀኖናዊ ምክንያት የለንም፤ ምድራዊ መንግሥት በፖሊቲካ ምክንያት ቢለይም እንኳ፣ ለሃይማኖት ድንበር ስለሌለው በአንድነት እየተደጋገፍን መቀጠል ይገባን ነበር፡፡

ይህ እውነታ፣ ለእኛ ለኦርቶዶክሳውያኑ ባያድለንም፣ ሌሎች መሰል አብያተ ክርስቲያናት ግን እስከ አሁን ጠብቀውት እንዳለ ማየት እንችላለን፤ ነገር ግን፣ ላለፈው ክረምት ቤት አይሠራም እንደሚባለው ያለፈውን ለታሪክ ትተን፣ ለወደፊቱ ተጋግዘን፣ ተረዳድተንና ተደጋግፈን፣ የጋራችን የኾነ ሃይማኖትን፣ ታሪክና ባህልን ጠብቀን በማስጠበቅ፣ ኦርቶዶክሳዊውን ሕዝብ ማገልገል እግዚአብሔርና ታሪክ የጣሉብን አደራ መኾኑን መገንዘብ አለብን፡፡

እውነቱን ለመናገር፣ ለኢትዮጵያ ምእመናን ከኤርትራ ምእመናን፣ ለኤርትራ ቤተ ክርስቲያን ከኢትዮጵያ ቤተ ክርስቲያን የበለጠ የክፉ ቀን ደራሽ የላቸውም፡፡ በመኾኑም፣ በሁሉም ሃይማኖታዊ የሥራ መስክ ተቃርቦ ለመሥራት ቅዱስ ሲኖዶስ ዝግጁነቱን መግለጽ ይኖርበታል፤ በኹለቱም አብያተ ክርስቲያናት የጠበቀ ግንኙነት እንዲኖር የጋራ ኮሚሽን አቋቁመን መንቀሳቀስ ይኖርብናል፤”

በመጨረሻም፤

የቅዱስ ሲኖዶስ ምልዓተ ጉባኤ፣ ከላይ በዝርዝር የተጠቀሱትን አንገብጋቢ የአገርና የቤተ ክርስቲያን ጉዳዮችን አንድ በአንድ ተመልክቶና በጥልቀት መርምሮ አገራችንንና ቤተ ክርስቲያናችንን የሚጠቅሙ ውሳኔዎችን ያሳልፍ ዘንድ፣ እንደዚሁም የቤተ ክርስቲያናችንን የቀደመ ክብርና ሞገስ፣ ሉዓላዊነትና አንድነት ጠብቆ ያስጠብቅ ዘንድ ከማሳሰብ ጋራ የጥቅምቱን የቅዱስ ሲኖዶስ ምልዓተ ጉባኤ በዛሬው ዕለት በጸሎት መከፈቱን በእግዚአብሔር ስም እናበሥራለን፡፡

በኢትዮጵያ ኦርቶዶክስ ተዋሕዶ ቤተክርስቲያን 37ኛው የሰበካ ጉባኤ መደበኛ ስብሰባ ተጀመረ

                                                                                  በመ/ር ሣህሉ አድማሱ

ጥቅምት 5 ቀን 2011 ዓ.ም ጉባኤው የተጀመረ ሲሆን ስብሰባው በጸሎት ወንጌል ተከፍቷል፡፡
“ቀዳሚሃ ለጥበብ ፈሪሃ እግዚአብሔር፣ምክር ሰናይት ለኲሉ ዘይገብራ ውስብሓትሁኒ ይነብር ለዓለም” የሚለው የዳዊት መዝሙር ልብሰ ተከክህኖ በለበሱ ዲያቆናት በዜማ ቀርቧል፡፡
ብፁዕ ወቅዱስ አቡነ መርቆርዮስ ቀዳማዊ ፣ፓትርያርክ ርእሰ ሊቃነ ጳጳሳት ዘኢትዮጵያ በጉባኤው ላይ የተገኙ ሲሆን በመርሐ ግብሩ መሠረት
በማቴዎስ ወንጌል ምዕራፍ 18 ቁጥር 18 ላይ የተፃፈው “በስሜ አንድም ሁለት ሆናችሁ ብትሰበሰቡ እኔ በመካከላችሁ እገኛለሁ” የሚለው ቃል በብፁዕ ወቅዱስ አቡነ ማትያስ ቀዳማዊ ፣ፓትርያርክ ርእሰ ሊቃነ ጳጳሳት ዘኢትዮጵያ ፣ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት በንባብ ተነቧል፡፡ፓትርያርኩ ባስተላለፉት መልክትም ቤተክርስቲያኑቱ በሰላም በፍቅርና በሀገር ግንባታ የበኩሏን እየተወጣች እንደሆነ ገልጸዋል።
በመቀጠልም ሰላም ለክሙ ኦ ማኅበራኒሁ ለክርስቶስ እለተገባዕክሙ ውስተ ዛቲ ቤተ ክርስቲያን ጳጳሳት፣ ቀሳውስት ወዲያቆናት ወማኅበረ ምዕመናን የሚል ያሬዲዊ ወረብ በማህደረ ስብሐት ልደታ ለማርያም የሰንበት ት/ቤት ወጣቶች ተዘምሯል፡፡
ከዚህ በኋላ ብፁዕ አቡነ ዲዮስቆሮስ የጠቅላይ ቤተክህነተ ዋና ሥራ አስኪያጅ፣ በክልል ትግራይ የደቡባዊ ማይጨው ሀገረ ስብከት ሊቀ ጳጳስ ጠቅላላ ሪፖርት የቀረበ ሲሆን ብፁዕነታቸው በታላቁ ጉባኤ ባቀረቡት ሪፖርት “ዮም በዛቲ ዕለት አስተጋብአነ በመንፈስ ቅዱስ ከመንንግር ሠናይቶ ወከመንዘከር አበዊነ እንዘ ናረትዕ አእጋሪነ ውስተ ፍኖተ ሰላም” በሚል የመጽሐፍ ቃል ንግግራቸውን በመጀመር ባቀረቡት ሰፊ እና ጥልቅ ሪፖርት በዘንድሮው 37ኛው አጠቃላይ የሰበካ መንፈሳዊ ጉባኤ ልዩ የሚያደርገው ከሃያ ሰባት ዓመታት በኋላ በውጭ ሀገር የነበሩ ቅዱስ ፓትርያርኩና ብፁዓን ሊቃነ ጳጳሳት ወደሀገራቸው ተመልሰው የቅድስት ቤተክርስቲያን አንድነትና የቅዱስ ሲኖዶስ ውሕደት በተፈጸመበት ማግስት የሚካሄድ በመሆኑ ነው፡፡


ይህ ብዙ የተደከመበት ታሪካዊ የቤተ ክርስቲያን አንድነትና የቅዱስ ሲኖዶስ ውህደት እውን እንዲሆን ቅዱስ ሲኖዶስን ሁለቱ ቅዱሳን ፓትርያርኮችን እና ቅዱስ ሲኖዶስን ወክለው በተሾሙ በጥቂት ወራት ውስጥ ታሪክ የማይረሳው የቤተክርስቲያናችን የአንድነት ባለውለታ በመሆን የበኩላቸውን ሃላፊነት የተወጡ የኢፌዲሪ ጠቅላይ ሚኒስቴር ዶክተር ዐቢይ አህመድ በቅድስት ቤተክርስቲያንና በዚህ ዓለም አቀፍ ጉባኤ ስም አመስግነዋል፡፡በመቀጠልም ከቤቶችና ሕንፃዎች ይገኝ ከነበረው ገቢ ከሦስት እጥፍ በላይ ለማሳደግ መቻሉን፣ የጨረታ ሥርዓትን በመከተል በበጀት ዓመቱ ሁለት ባለ 10 ፎቅ ዘመናዊ ሕንፃዎች በ1000 እና በ480 ካሬ ሜትር ስፋት ቦታዎች ላይ እየተገነቡ የሚገኙ መሆኑን፣ ለብፁዓን አባቶች ሐዋርያዊ አገልግሎት ሊሰጡ የሚችሉ 13 ዘመናዊ መኪኖች በጠቅላይ ቤተ ክህነት በጀት ተገዝተው በሥራ ላይ የዋሉ መሆናቸውን፣ በበጀት ዓመቱ በመጀመሪያ ላይ 15 ኤጲስ ቆጶሳት በአንብሮተ ዕድ መሾማቸውን፣ ጠቅላይ ቤተ ክህነቱ 22 ሠራተኞችን በዕድገት፣ 34 ሠራተኞችን ደግሞ በዝውውር መድቦ ማሠራቱን ተሻሽሎ የታተመው ቃለ ዓዋዲ 50 ሺህ ኮፒ ለአህጉረ ስብከት መሠራጨቱን፤
የሰሜን ወሎ፣ ሲዳማ፣ ሰሜን ሸዋ፣ ስላሌ የተደራጀና ዘመናዊ የሒሳብ አሠራር በመከተላቸው በአርአያነት መጠቀሳቸውን፣አንዳንድ አህጉረ ስብከት የባንክ ገቢ ወጪ ሒሳብ በየወሩና በየዓመቱ የማይዙ መሆኑን፣ በሞዴል 64 ገቢ የተደረገ ገንዘብ ወደ ባንክ ገቢ ሳይደረግና ሳይወራረድ ወይም ሳይመለስ ለረጅም ዓመት በካዝና እየተንከባለለ መቆየቱን፣ ጠቅላይ ቤተ ክህነት ያልፈቀደውና ያላጸደቀው የደመወዝ ጭማሪ መደረጉን፣የሕንፃ ግንባታ፣ የመኪና ግዢ ያለጨረታ መከናወኑ፣ ከጠቅላይ ቤተ ክህነት የሚሰጡ የዕርምት እርምጃዎች አለመተግበራቸው፣በትንሣኤ ዘጉባኤ ማተሚያ ቤት በበጀት ዓመቱ ቃለ ዓዋዲን ጨምሮ 466,351 የተለያዩ የኅትመት ውጤቶች ታትመው በሥርጭት ላይ መዋላቸውን፣ በበጀት ዓመቱ ከወጪ ቀሪ 7,844,365.00 ካለፈው በጀት በንጽጽር 279,540 መመዝገቡ፣ በወቅቱ መፍትሔ መስጠት ባለመቻሉ በተለያየ አቅጣጫ የአስተዳደር ክፍተት፣ የሃብት ብክነት እየተከሠተ፣ ጽ/ቤቶች እየታሸጉ፣ አስተዳዳሪዎችና የጽ/ቤት ሠራተኞች እየተባረሩ፣ ሕዝቡም በአስተዳዳሪዎች እየተማረረ ፍትሕ ፍለጋ በአንዳንድ ቦታዎች ሰላማዊ ሰልፍ እየወጣ ሰብአዊ መብት ጸረ ሙስና ኮሚሽን እና በመሳሰሉ የመንግሥት መሥሪያ ቤቶች አቤቱታ በመቅረቡ በሀገሪቱ ሚዲያዎች ሳይቀር እየተወቀስን የምንገኝ መሆኑን፣ ብፁዕነታቸው ባቀረቡት ሰፊ ዓመታዊ የሥራ ክንውን ሪፖርት የተጠቆመ ሲሆን ብፁዕነታቸው አክለው ለጉባኤው ባቀረቡት የመፍትሔ ሐሳብ፡-
ሀ/ በሀገር ውስጥና በመላው ዓለም ዙሪያ ያለችውን የኢትዮጵያ ኦርቶዶክስ ተዋሕዶ ቤተክርስቲያንን ሊያሳድግና አንድነቷንና ሃይማኖቷን ሊጠብቅ፣ ምእመኖቿን ሊያስደስትና መልካም አስተዳደርዋን ሊያጎለብት የሚችል ሰፊ መሪ ዕቅድ በአስቸኳይ እንዲዘጋጅ ቢደረግ፣


ለ/ ግልጽነትና ተጠያቂነትን የሚያረጋግጥ በዘመናዊ ቴክኖሎጂ የታገዘ የፋይናንስ፣ የንብረትና የሰው ኃይል አስተዳደር ደምብ ተዘጋጅቶ ሥራ ላይ እንዲውል ቢደረግ፣
ሐ/ የቤተ ክርስቲያናችን ሕልውና መሠረት በሆኑት በአብነት ት/ቤቶች፣ በከፍተኛ የትምህርት ተቋማት፣ በገዳማት፣ በስብከተ ወንጌል፣ በሰንበት ት/ቤቶችና በውጭ ግንኙነት ሥራዎች መሠረታዊ የሆነ ለውጥና ተጨባጭ ውጤት የሚያመጡ የአሠራር ፖሊሲዎችና ደምቦች እንዲዘጋጁና ወደ ሥራ እንዲገባ ቢደረግ፣
መ/ በመላ ሀገሪቱና በውጭ ሀገራት የሚገኙ የቤተ ክርስቲያኒቱ የመሬት ይዞታዎች በአግባቡ ለምተው ለቤተ ክርስቲያኒቱ አገልግሎት ይውሉ ዘንድ አንድ ገዢ እና ወጥ የሆነ የልማት ፖሊሲ ወጥቶ ወደ ሥራ ቢገባ፣
ሠ/ ቤተ ክርስቲያናችን በአሁኑ ጊዜ በመላው ዓለም ዙሪያ ቀላል የማይባል ቁጥር ያላቸው አብያተ ክርስቲያናት ያሏት ሲሆን በነበረው የአባቶች መለያየት ምክንያት የውጭ፣ የግል እና የሀገር ውስጥ ወዘተ በሚል ጎራ ተለያይተው መቆየታቸው የሚታወቅ ነው፡፡
ረ/ አሁን ግን ምስጋና ለእግዚአብሔር ይድረሰውና ሁላችንም ወደ አንድነት ስለመጣን በውጭ ያሉት አብያተ ክርስቲያናት ሁሉ በአንድ ቅዱስ ሲኖዶስና በእናት ቤተ ክርስቲያን መዋቅር ሥር ሆነው የቤተ ክርስቲያኒቱ አንድነት እንዲጠናከር እንደየሀገራቱ ሕጎችና ደንቦች ሊያሠራ የሚችል መተዳደሪያ ደንብና መመሪያ ወጥቶ፣ የተልዕኮተ ሐዋርያት ማስፈጸሚያ ተቋም ተደራጅቶ ዓለም አቀፍ ሥራዎች እንዲያከናውኑ ቢደረግ፣
ሰ/ ቅድስት ቤተ ክርስቲያናችን በብዙ ሺዎች የሚቆጠሩ ገዳማት፣ አድባራት፣ አጥቢያ አብያተ ክርስቲያናትና አገልጋይ ካህናት፤ በብዙ ሚሊዮኖች የሚቆጠሩ ምእመናን እንዳሏት ይታወቃል፡፡ ሆኖም እነዚህ ሁሉ የንዋየ ቅድሳት አቅርቦት የሚያገኙት ከግል ነጋዴዎችና ከእምነቱ ተቃራኒዎች ነው፤ ይህንን ሁኔታ ከመሠረቱ ለማስተካከልና ቤተ ክርስቲያናችንን ተጠቃሚ ሊያደርጉ የሚችሉ ልዩ ልዩ የንዋየ ቅድሳት ማምረቻ ማእከላት ተቋቁመው ሥራ የሚጀመርበት ጥናት ቢካሄድ፣ የቤተ ክርስቲያናችን መንፈሳዊ፣ ማኅበራዊ፣ ኢኮኖሚያዊና አስተዳደራዊ አሠራር ለውጥ በወሳኝ መልኩ ማምጣት ይቻላል፡፡ ነገር ግን ይህንን ለውጥ ማምጣት ሳንችል ቀርተን ባለው የድንግዝግዝ አሠራር የምንቀጥል ከሆነ አደጋው ለቤተ ክርስቲያናችን የከፋ ሊሆን እንደሚችል መዘንጋት ያለብን አይሆንም፡፡


በመሆኑም “ወእመሰ ኰነነ ለሊነ ርእሰነ እምኢተኰነነ ምስለ ዓለም” እንዳለው ቅዱስ ጳውሎስ እኛው ራሳችን የቤት ሥራችንን ሠርተን ማስተካከል ስንችል፣ በአንጻሩ ሳንችል ከቀረን በእግዚአብሔርም፣ በታሪክም፣ በሰውም ወቀሳው ከባድ ይሆናል፡፡ ሁላችንም እንደምንገነዘበው አሁን ያለንበት ወቅት የለውጥ ወቅት ነውና “ጎረቤት ሲታማ ለኔ ብለህ ስማ” የተባለውን ብሂል ወስደን ከዛሬ ጀምሮ በቀጥታ ወደ ፈጣን የአሠራር ለውጥ ብንገባ ቤተ ክርስቲያንንም ሆነ ራሳችንን ማዳን የምንችልበት ዕድል ሰፊ ነው በማለት ብፁዕ ጠቅላይ ሥራ አስኪያጁ ሪፖርታቸውን በማቅረብ ከሰዓት በፊት የነበረው የስብሰባ መርሃ ግብር በጸሎት ተዘግቷል፡፡

የአዲስ አበባ ሀገረ ስብከት ከገዳማትና አድባራት አስተዳዳሪዎችና ሰባክያን ጋር ውይይት አደረገ

                                                                    በመ/ር ሣህሉ አድማሱ

የሀገረ ስብከቱ የሥራ መሪዎች ከገዳማትና አድባራት አስተዳዳረዎችና ሰባክያነ ወንጌል ጋር “የስብከተ ወንጌልና የሚድያ አገልግሎት ለቤተ ክርስቲያን ያለው ሚና” በሚል ርእስ መስከረም 14 ቀን 2011 ዓ/ም በሀገረ ስብከቱ የመሰብሰቢያ አዳራሽ ለግማሽ ቀን የቆየ የምክክርና የውይይት መርሐ ግብር አካሂደዋል፡፡ በመርሐ ግብሩ ሂደት ላይ ሰፋ ያለ ትምህርታዊ የግንዛቤ ማስጨበጫ መልእክት ያስተላለፉት ብፁዕ አቡነ አረጋዊ የውጭ ግንኙነት የበላይ ሓላፊና በአዲስ አበባ ሀገረ ስብከት የብፁዕ ወቅዱስ ፓትርያርክ ረዳት ጳጳስ ስለስብከተ ወንጌል ምንነት ሲገልጹ የስብከተ ወንጌል እንቅስቃሴ የሕይወታችን አካል ፣ያገልግሎታችን መሠረት ነው፡፡

ለሁለት ሺህ ዓመታት ወንጌል የተዘራባት ፣በተዘራው መልኩ ውጤቱን በፍሬው መገምገም የቻልንበት ዘመን ላይ ነው ያለነው፡፡

ስብከተ ወንጌል በቤተ ክርስቲያን ሁለንተናዊ ማንነት ትልቅ ሚና አለው፡፡ስብከተ ወንጌል ለቤተ ክርስቲያን ዕድገትና ጥንካሬ ፣ለምዕመናን ሕይወት መሠረት መሆኑን ፣ስብከተ ወንጌል ትእዛዘ እግዚአብሔር መሆኑን ፣ይህም በመሆኑ ለስብከተ ወንጌል ልዩ ትኩረት ሊሰጠው እንደሚገባ ፣የእግዚአብሔር ቃል ያልገራውና ያልተቆጣጠረው ህሊና ለእግዚአብሔርም ለሰውም የማይመች መሆኑን በመግለጽ ብፁዕነታቸው ጥናታዊ በሆነ አቀራረብ ሰፋ የለ ማብራሪያ ሰጥተዋል፡፡

የሀገረ ስብከቱ ዋና ሥራ አስኪያጅ መምህር ይቅር ባይ እንዳለ አክለው እንደገለጹት የስብከተ ወንጌል ጉዳይ ከቀን ወደቀን አሳሳቢ እየሆነ መምጣቱን ፣ቢፅ ሓሳውያን አስተሳሰብን የሚያራምዱ ኃይሎች በቤተ ክረርስቲያን መሰግሰጋቸውን ፣የቅዱሳኑን ስም የመጥራት ፍላጎት የማያሳዩ መሆናቸውን ፣በክብረ በዓላት የሚታየው ከፍተኛ የምዕመናን ቁጥር በሌላ አካሄድ ሲታይ እየቀነሰ ያለ መሆኑን ፣የስብከተ ወንጌል ሙያ የሚያጥራቸው ግለሰቦች የሚሰጡት ትምህርት ከጥቅሙ ጉዳቱ የሚያመዝን መሆኑን ፣ለስብከተ ወንጌል ሥራ የሚበጀተው በጀት አናሳ መሆኑን ፣ የቤተ ክርስቲያን የመጀመሪያው ዓላማ ስብከተ ወንጌል መሆኑን የሀገረ ስብከቱ ዋና ሥራ አስኪያጅ አብራርተዋል፡፡

ተሰብሳቢዎችም የተሰጠውን ማብራሪያ በመከተል በገዳማቱና በአድባራቱ የሚመደቡ የወንጌል መምህራን የሙያ ችሎታቸው ፣ሃይማኖታዊ አቋማቸው ሊፈተሽ የሚገባው መሆኑን ፣በሀገረ ስብከቱ መጽሔትና ጋዜጣ ላይ የሚወጡ ጽሑፎች ኦርቶዶክሳዊ ይዘት እንዲኖራቸው በሊቃውንተ ቤተ ክርስቲያን እየታዩ እንዲታተሙ መደረግ የሚገባቸው መሆኑን ፣ከዚህ ቀደም መጋቢት ወር ላይ የታተሙት መጽሔቶችና ጋዜጦች ላይ የታዩት ግድፈቶች እርማት እንዲደረግባቸው ወዘተርፈ የሚሉ ሓሳቦች በስፋት ተተንትነዋል፡፡

ሀገረ ስብከቱ በ2011 ዓ/ም የበጀት ዓመት በሚከራየው የቴሌቭዥን አየር የበኩላችንን አስተዋጽኦ እናበረክታለን በማለት ከተሰብሳቢው ገንቢ የሆነ ሐሳብ ከተሰጠ በኋላ የስብከተ ወንጌሉንና የሚድያውን እንቅስቃሴ የሚያጠናክሩ ስምንት ኮሚቴዎች ማለትም፡-

  1. ሊቀ ኅሩያን ሰርፀ አበበ
  2. መጋቤ ሐዲስ ኀይለ እግዚእ
  3. መልአከ ብርሃን ክብሩ ገ/ፃድቅ
  4. ሊቀ ብርሃናት ቀሲስ ተ/ማርያም
  5. መልአከ ፀሐይ ደሳለኝ
  6. መጋቤ ሥርዓት ወንድወሰን
  7. በኩረ ትጉሃን ደሳለኝ ቶጋ
  8. መጋቤ ሚስጢር ቀለመወርቅ በምልአተ ጉባኤው ከተመረጡ በኋላ የመርሐ ግብሩ ፍጻሜ ሆኗል፡፡