በዚህ ዘመን ለመብል የሚሞት ሳይሆን ለቤተ ክርስቲያን ትንሣኤ የሚሞት አባት/ጳጳስ ያስፈልጋል ተባለ

የ2013 ዓ/ም የጌታችን ትንሣኤ በዓልን ምክንያት በማድረግ የብፁዕ አቡነ መልከጼዴቅ የእንኳን አደረሶት ዝግጅት በሀገረ ስብከቱ በድምቀት ተከብሮ ውሏል።

በዝግጅቱ የተገኙት በሰሜን አመሪካ የካልፎርንያ አከባቢ ሊቀ ጳጳስ ብፁዕ አቡነ ቴዎፍሎስ ትምህርት ሰጥተዋል።

ጌታችን “የዮና ልጅ ስምዖን ሆይ፥ ትወደኛለህን? ብሎ ጴጥሮስን ሲጠይቀው “አዎን ጌታ ሆይ እንድወድህ አንተ ታውቃለህ” ሲለው “ጠቦቶቼን ጠብቅ፣ በጎቼን አሰማራ” የሚል ትልቅ ሐላፊነት አሸከሞታል ብለዋል።

የዛሬ ጴጥሮሶች እኛው ነንና ሓላፊነታችን ልንወጣ ይገባል ያሉት ሊቀ ጳጳሱ በዚህ ዘመን ቤተ ክርስቲያን ፈተና ውስጥ ስለ ሆነች ሓላፊነታችን በመወጣት ተሎ ልንደርስላት ያስፈልጋል ብለዋል።

ሊቀ ጳጳሱ አስቀድመን ግን ራሳችን እንመርምር ካሉ በኋላ በዚህ ዘመን ለመብል የሚሞት ሳይሆን ለቤተ ክርስቲያን ትንሣኤ የሚሞት አባት/ጳጳስ እንደሚያስፈልግ ሳይጠቁሙ አላለፉም ።

በዝግጅቱ በብፁዕ አቡነ መልከጼዴቅ ዘመን በሀገረ ስብከቱ የተከናወኑ ሥራዎችን ተዘርዝሯል።
ከነዚህ መካከል፦ ሀገረ ስብከቱ በዕቅድ እንዲመራ መደረጉ፤ የሀገረ ስብከቱ ሠራተኞች አስፈላጊ ሥልጠናዎች መውሰዳቸው፤ ብዙ ሥር ነቀል ለውጥ መከናወናቸው፤ የሀገረ ስብከቱና የአድባራቱ ሠራተኞች ተመጣጣኝ ክፍያ/ደሞዝ እንዲያገኙ መደረጉና ብዙ መልካም ሥራዎች እየተሰሩ መሆናቸውን ተገልጿል።

ይህ ዝግጅት ሀገረ ስብከቱ ራሱን ችሎ በራሱ ሊቀ ጳጳስ መመራት ከጀመረ በታሪክ ለመጀመሪያ ጊዜ የተደረገ መርሐ-ግብር መሆኑንም ተገልጿል።

ብፁዕ አቡነ መልከጼዴቅም ወቅቱ ጌታችን በሞቱ ሞታችን ደምስሶ ነጻነታችን ያስገኘልን ስለ ሆነ የምስጋና ቀን ነው። ዘመነ ፈሲካ እንኳን አደረሳችሁ የምንባባልበት ወቅት ነው። ልዩነቱ በአዲስ አበባ ሀ/ስብከት ለመጀመሪያ ጊዜ መሆኑን ነው ብለዋል።

ብፁዕነታቸው በዓሉ የአዲስ አበባ ሀገረ ስብከት በዓል እንጂ የግል ሰው በዓል አለመሆኑንም ገልጸዋል።

በዝግጅቱ ብፁዓን አበው ሊቃነ ጳጳሳት፣ የሀገረ ስብከቱ ዋና ሥራ አስኪያጅ፣ የሀገረ ስብከቱና የሰባቱ ክፍላተ ከተማ የየዋና ክፍል ሓላፊዎችና ሠራተኞች፣ የአዲስ አበባ ሀገረ ስብከት አድባራትና ገዳማት አለቆች፣ ጸሓፊዎችና ሊቃነ መናብርት ተገኝቷል።

በሊቃውንትና በሰንበት ት/ት ቤት ወጣቶች ያሬዳዊ ዜማና ቅኔም ቀርቧል።

ዘጋቢ መ/ር ኪደ ዜናዊ

ፎቶ በመ/ር ዋሲሁን ተሾመ

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *