ብፁዕ አቡነ መልከጼዴቅ በቦሌ ቡልቡላ ፈለገ ዮርዳኖስ ቅዱስ ሚካኤልና ተክለሃይማኖት አንድነት ገዳም በመገኘት ገዳሙ በተጠናከረ መልኩ እንዲገደም መመሪያን አስተላለፉ

በዛሬው ዕለት መጋቢት 24 ቀን 2013 ዓ/ም የጉራጌ እና የአዲስ አበባ አህጉረ ስብከት ሊቀ ጳጳስ ብፁዕ አቡነ መልከጼዴቅ ከአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ፣ከሀገረ ስብከቱ የዋና ክፍል ኃላፊዎች፣ ከክፍላተ ከተማ ዋና ሥራ አስኪያጆችና ከአድባራትና ገዳማት አስተዳዳሪዎች ጋር በመሆን በቦሌ ቡልቡላ ፈለገ ዮርዳኖስ ቅዱስ ሚካኤልና ተክለሃይማኖት አንድነት ገዳም በመገኘት ገዳሙ ከዚህ በፊት ከነበረው ይበልጥ እንዲገደም መመሪያን አስተላለፉ።
በመርሐ ግብሩ ላይ ንግግር ያደረጉት የአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ የአዲስ አበባ ሀገረ ስብከት ራሱን ችሎ በሊቀ ጳጳስ መመራት ከጀመረ በኋላ በአስተዳደር ሥራዎች፣ በልማት ሥራዎችና በመንፈሳዊ አገልግሎት የተሻለ ሥራ እየሠራ መሆኑን ገልጸው ይህንን ገዳም ወደ ትልቅ ደረጃ ላይ ለማድረስ በሀገረ ስብከቱ ዕቅድ መያዙን አብራርተዋል። አያይዘውም ቦታው ለመንፈሳዊ ትምህርትና ለገዳማውያን ምቹ መሆኑን ገልጸው በቦታው የሚያገለግሉ ቀሳውስትና ዲያቆናት ወደ ሌላ አድባራትና ገዳማት ተዘዋውረው በእነርሱ ምትክ ገዳሙ ሙሉ በሙሉ በአባቶች መነኩሳት እንዲገለገል በሀገረ ስብከቱ ዕቅድ መያዙን አክለው አውስተዋል።
መርሐ ግብሩን የመሩት የቦሌ ክፍለ ከተማ ቤተክህነት ዋና ሥራ አስኪያጅ መ/ብርሃን ሩፋኤል የማነብርሃን በገዳሙ ውስጥ ከአባቶች መነኮሳት በተጨማሪ እናቶች ገዳማዊያትም እንደሚገኙ ጠቅሰው ክፍለ ከተማው ገዳሙን ይበልጥ ለማጠንከር ከምንጊዜውም በላይ ጠንክሮ እንደሚሠራ ተናግረዋል።
በገዳሙ የተገኙት የገዳማትና የአድባራት አስተዳዳሪዎች የቦታውን አቀማመጥ ለገዳማዊ ኑሮና ለመንፈሳዊ ትምህርት ምቹ መሆኑን ደጋግመው የገለጹ ሲሆን ገዳሙን ለማሳደግና ለማጠናከር በሚደረገው ርብርብ የራሳቸውን ሚና እንደሚወጡ ቃል ገብተዋል። በገዳሙ የሚገኙትን ቀሳውስትና ዲያቆናት ወደ ደብራቸውና ገዳማቸው ለመውሰድ መልካም ፈቃዳቸውንም ገልጸዋል።
ገዳሙን በመጀመሪያ ያቋቋሙት መ/መንክራት ኃይሌ አብርሃ የገዳሙን ታሪካዊ ደኃራ ለብፁዕነታቸውና በገዳሙ ለተገኙት ሁሉ አብራርተው ከአሁን በኋላም ላለው ሥራ የራሳቸውን አስተዋጽኦ እንደሚወጡ ቃል ገብተዋል።
የአቃቂ ቃሊቲ ክፍለ ከተማ ቤተ ክህነት ዋና ሥራ አስኪያጅ ሊቀ ኅሩያን ዳዊት ታደሰ ገዳሙን ለመገደም በሚደረገው ትብብር የተለያዩ አካላትን እንደሚያስተባብሩ ገልጸዋል።
በመጨረሻም ብፁዕ አቡነ መልከጼዴቅ በዚህ አንድነት ገዳም ከዚህ በፊት ከሁለትም ሦስት ጊዜ በቦታው በመገኘት ቦታው ለገዳማውያን ሕይወትና ለአብነት ትምህርት ምቹ መሆኑን እንደተመለከቱ ጠቅሰዋል። ከሀገረ ስብከቱና ከክፍለ ከተማው የሥራ ኃላፊዎች ጋር በመሆን ትልቅ ትኩረት ተሰጥቶት እንደተመከረበትና ዕቅድ ተይዞ አሁን በፍጥነት ወደ ትግበራ እንደሚገባ አብራርተዋል። አያይዘውም የአዲስ አበባ ሀገረ ስብከት መንበረ ጵጵስና ስለሌለው እንደ እግዚአብሔር መልካም ፍቃድ በዚህ ገዳም የአዲስ አበባ ሀገረ ስብከት መንበረ ጵጵስና እንዲሠራ ዕቅድ መያዙንም ገልጸዋል። ብፁዕነታቸው የክፍላተ ከተማ ዋና ሥራ አስኪያጆች፣ የአድባራትና ገዳማት አስተዳዳሪዎች የገቡትን ቃል እንዲፈጽሙና ምእመናንን አስተባብረው ከገዳሙ አስተዳዳሪ መ/ኃ ቆሞስ አባ ቢኒያም ጋር በጋራ በመሆን የገዳሙ ሕንጻ ቤ/ክ በፍጥነት እንዲጀመር መመሪያ ካስተላለፉ በኋላ መርሐ ግብሩ በጸሎት ተጠናቋል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *