ማኅበረ- ቅዱሳን ለብፁዕ አቡነ መልከጼዴቅ እና ለሊቀ ጉባኤ አባ ተክለሃይማኖት ወልዱ የእንኳን አደረሳችሁ መርሐግብር አደረገ!!

ሚያዝያ 4 2014 ዓ.ም በሳሬም ኢንተርናሽናል ሆቴል  በተዘጋጀው የእራት ፕሮግራም ላይ ለብፁዕ አቡነ መልከጼዴቅ የአዲስ  አበባ እና ጉራጌ አህጉረ ስብከት ሊቀ ጳጳስ ለክቡር ሊቀጉባኤ አባ ተክለሃይማኖት ወልዱ ቆሞስ የአዲስ አበባ ሀገረ ስብከት ዋና ሥራ አስኪያጅ የእንኳን አደረሳችሁ መርሐ ግብር ተዘጋጅቶ  ስጦታ ተበርክቶላቸዋል።

በመርሐ ግብሩም ማኀበሩ ለሚያዘጋጀው ሐዊረ ፍኖት መርሐ ግብር በአጋርነት አብረው ለሰሩ የግልና የመንግሥት ተቋማት የዕውቅና ሰርተፍኬት በብፁዕነታቸው ተሰጥቷቸዋል።

በመድረኩ ላይ ብፁዕነታቸው ባደረጉት ንግግር ማኅበረ ቅዱሳን አንጋፋ ማኅበር እንደመሆኑ ለአዳዲስ ማኅበራት ልምዱን እና አሠራሩን በማጋራት ቤተ ክርስቲያንን ይበልጥ እንዲያግዝ አደራ እላለሁ ብለዋል።

ማኅበሩ አባቶችን አክብሮ እንዲህ ዓይነት መርሐግብር ማዘጋጀቱ የሚያስመሰግነው እና ከቤተክርስቲያን ተቀራርቦ ለመሥራት ጥሩ አጋጣሚ ነው ብለዋል።

በመርሐግብሩ ላይ የሊቀጳጳሱ ፕሮቶኮል ሹም ሊቀ ጉባኤ አባ ኃይሉ እና ታዋቂው ዘማሪ ሊቀመዘምራን ይልማ እንዲሁም የማኅበረ ቅዱሳን ዋና ጸሐፊ ተገኝተዋል።

       በተክለሃይማኖት አዳነ ጋዜጠኛ

በአዲስ አበባ ሀገረ ስብከት ጽ/ቤት ለብፁዕ አቡነ መልከጼዴቅ የእንኳን አደረስዎ መርሐ ግብር ተካሄደ!

ለአዲስ አበባና ለጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅ ለ2014 ዓ.ም የጌታችን የመድኃኒታችን የኢየሱስ ክርስቶስ በዓለ ትንሣኤ የእንኳን አደረስዎ መርሐ ግብር፣
የሀገረ ስብከቱ ዋና ሥራ አስኪያጅ ሊቀ ጉባኤ አባ ተክለሃይማኖት ወልዱ፣ የቀድሞው የሀገረ ስብከቱ ሥራ አስኪያጅ መ/ር አካለወልድ ተሰማ፣ የጠቅላይ ቤተ ክህነትና የሀገረ ስብከቱ ኃላፊዎች፣ የአዲስ አበባ ገዳማትና አድባራት አስተዳዳሪዎች፣ በርካታ ሊቃውንትና ጥሪየተደረገላቸው እንግዶች በተገኙበት በአዲስ አበባ ሀገረ ስብከት ጽ/ቤት በድምቀት ተከብሮ ውሏል።
መርሐ ግብሩ በንፋስ ስልክ ላፍቶ ክፍለ ከተማ ቤተክህነት ጽ/ቤት አስተባባሪነት የተዘጋጀ መሆኑን መርሐ ግብሩን በመሩት በሀገረ ስብከቱ ዋና ፀሐፊ መ/ር ታዴዎስ ሽፈራው ተገልጿል።
መርሐ ግብሩ የጌታችን የመድኃኒታችን የኢየሱስ ክርስቶስ ትንሣኤና በሐዋርያት በኩል ለቤተ ክርስቲያን የተሰጣትን ተልእኮ የሚገልጽ የማቴዎስ ወንጌል ምዕራፍ 28፥1-20 ተነብቦ በጸሎት ተክፍቷል።
በንፋስ ንፋስ ላፍቶ ስልክ ክፍለ ከተማ ቤተ ክህነት ጽ/ቤት ሥር የሚገኙት፤ የጀሞ ደብረ ሰላም መድኃኔዓለምና የደብረ ትጉኃን ላፍቶ ቅዱስ ሚካኤል ቤተክርስቲያን ሊቃውንትና የሰንበት ትምህርት ቤት ያሬዳዊ ዝማሬ አቅርበዋል።
በመቀጠልም ከሁለቱም አድባራት በመጡት ሁለት የቅኔ ሊቃውንት በዓሉን በተመለከተ ቅኔ ቀርቧል።
የንፋስ ስልክ ላፍቶ ክፍለ ከተማ ቤተክህነት ጽ/ቤት ዋና ሥራ አስኪያጅ ሊቀ ኅሩያን ዳዊት ታደሰም ለብፁዕነታቸው ሰላም ላገኘንበት በዓለ ትንሣኤ የእንኳን አደረስዎ መልእክት አስተላልፈዋል።
የገዳማቱና የአድባራቱ አስተዳዳሪዎች በጋራ ሆነው በመቆም ለብፁዕነታቸው እንኳን ለ2014 ዓ/ም የጌታችን የመድኃኒታችን የኢየሱስ ክርስቶስ የትንሣኤ በዓል በሰላም አደረስዎ ብለዋል።
አያይዘውም የብፁዕነታቸውን መልካም አሠራርን አድንቀው ለወደፊትም በቃለ ዐዋዲው መሠረት ከሀገረ ስብከቱ የሚወርዱ መመሪያዎች ተቀብለው ለተፈጻሚነቱ እንደሚተጉ በጋራ ቃል ገብተዋል።
የአዲስ አበባ ሀገረ ስብከት ዋና ሥራ አስኪያጅ ሊቀ ጉባኤ አባ ተክለሃይማኖት ወልዱ ለብፁዕነታቸው እንኳን ለ2014 ዓ.ም ለጌታችን ለመድኃኒታችን ለኢየሱስ ክርስቶስ የትንሣኤ በዓል በሰላም አደረስዎ ብለዋል።
ለጉባኤውም በዓሉ ትንሣኤ ልቡና ብቻ ሳይሆን ትንሣኤ ዘጉባኤም እያሰብን መሆን አለበት ሲሉ አባታዊ መልእክታቸውንአስተላልፈዋል።
ብፁዕ አቡነ መልከጼዴቅ እንኳን ለ2014 ዓ.ም ለጌታችን ለመድኃኒታችን ለኢየሱስ ክርስቶስ የትንሣኤ በዓል በሰላም አደረሳችሁ በማለት መርሐ ግብሩን ላዘጋጁ እና በመርሐ ግብሩ ለተገኙት ሁሉ በቤተ ክርስቲያንንና በሀገረ ስብከቱ ስም አመስግነዋል።
ፋሲካችን ክርስቶስ ታርዷልና ደስ ይበላችሁ በማለት ፋሲካችን በደስታና በፍቅር እያከበርን በቃሉ መሠረት መኖር አለብን ብለዋል።
ብፁዕነታቸው መጽሐፉ “ልባችሁ አይታወክ፤ በእግዚአብሔር እመኑ፥ በእኔም ደግሞ እመኑ። በአባቴ ቤት ብዙ መኖሪያ አለ፤ እንዲህስ ባይሆን ባልኋችሁ ነበር፤ ስፍራ አዘጋጅላችሁ ዘንድ እሄዳለሁና፤ ሄጄም ስፍራ ባዘጋጅላችሁ፥ እኔ ባለሁበት እናንተ ደግሞ እንድትሆኑ ሁለተኛ እመጣለሁ ወደ እኔም እወስዳችኋለሁ።ዮሐ14፥1-3)
እንደሚለው ትንሣኤውን ስናከብር የዘለዓለም ሕይወትን እንደምናገኝ በመተማመን፣ በሙሉ ተስፋና በደስታ መኖር እንዳለብን አስተምረዋል።
በመጨረሻም በዓሉን ስናከብር ለተቸገሩ ወገኖቻችን በምንችለው ሁሉ በመደገፍና በጸሎት በማሰብ መሆንአለበት ሲሉ አባታዊ መልእክታቸውን አስተላልፈዋል።

በመ/ር ኪደ ዜናዊ
ፎቶ በመ/ር ዋሲሁን ተሾመ

ሕያዉንከሙታንመካከልስለምንትፈልጋላችሁ?/ሉቃ. 24፡5/

ጌታችን አምላካችን መድኃኒታችን ኢየሱስ ክርስቶስ ከሙታን እንደሚነሣ ቅዱሳን ነቢያት አስቀድመው ትንቢት ተናግረዋል፡፡ ከትንቢቶቹም አንዱ (ወተንሥአ እግዚአብሔር ከመ ዘንቃሕ እምንዋም፡፡ ወከመ ኃይል ወኅዳገ ወይን፡፡ ወቀተለ ጸሮ በድኅሬሁ፡፡( /የተኛ ሰው ከእንቅልፍ እንደሚነቃ እግዚአብሔር ከሙታን ተነሣ የወይን ስካር እንደተወው እንደ ኃያልም ሰው፤ በኋላው በተተከለ መስቀል ጠላቱን ድል አደረገ/ /መዝ. 77፡65/
ስለ ጌታችን ትንሣኤ አራቱም ወንጌላውያን ጽፈዋል፡፡ ይህም /ማቴ. 28፡1-15/ ማር. 16፡1-18/ /ሉቃ. 24፡ 1-12/ ዮሐ. 20፡ 1-18/ ይህን መሠረት በማድረግ የትንሣኤው ታሪክ እንደሚከተለው ተገልጻ(ል፡፡
ትንሣኤ፡- ቃሉ ግእዝ ሲሆን ትርጉሙ መነሣት ማለት ነው፡፡ የሰላም አምላክ ኢየሱስ ክርስቶስ መጀመሪያ ትንሣኤውን የገለጠው ለማርያም መግደላዊትና ለያዕቆብ እናት ማርያም፤ ለሰሎሜ እንዲሁም ለሌሎች ቅዱሳት አንስት ነው፡፡

ማርያም መግደላዊት አገሯ መግደሎን ስለሆነ በአገሯ መግደላዊት ተብላለች ሰባት አጋንንት አድረውባት ሰባት ዓይነት ኃጢአት ያሠሯት ነበር፡፡ መድኃኒታችን ኢየሱስ ክርስቶስ ሰባቱንም አጋንንት አወጣላት፡፡ ይህን ከባድ ውለታ በማሰብ ከሳምንቱ በመጀመሪያው ቀን እጅግ ማልዳ ከላይ ከተጠቀሱት ቅዱሳት አንስት ጋር ሽቶ ይዛ ወደ መቃብሩ ሄደች ይህም በአገራቸው በእስራኤል ልማድ ነው፡፡ በእስራኤል ሰው በተቀበረ በሦስተኛው ቀን በመቃብሩ ላይ ሽቶ ያርከፈክፉበታል፡፡ ወደ መቃብሩ በደረሱ ጊዜ መቃብሩ ተከፍቶ ሁለት መላእክት ነጭ ልብስ ለብሰው አንዱ መልአክ በመቃብሩ በራስጌ ሌላው በግርጌ ሆነው ታዩአቸው፡፡ እነርሱም እጅግ ፈሩ፣ መፍራታቸውን አይተው ሁለቱ መላእክት “አትፍሩ አይዟችሁ ሕያዉን ከሙታን መካከል ስለምን ትፈልጋላችሁ? እርሱ ተነሥቷል በዚህ የለም በኃጢአተኞች እጅ አልፎ እንደሚሰጥና እንደሚሰቀል፣ በሦስተኛውም ቀን እንደሚነሣ አስቀድሞ በገሊላ ሳለ ለእናንተ እንደተናገረ አስቡ፡፡
መነሣቱንም ሄዳችሁ ለደቀ መዛሙርቱ ፈጥናችሁ ንገሯቸው” በማለት ሁለቱ መላእክት አጽናንተዋቸዋል፡፡ እነርሱም ሄደው መነሣቱን ለደቀ መዛሙርቱ ነግረዋል፡፡ በዮሐንስ ወንጌል ምዕራ 20፡ ቁ. 19-31 እንደተጻፈው በትንሣኤ ዕለት ማታ ደቀ መዛሙርቱ አይሁድን ስለፈሩ በዝግ ቤት ተሰብስበው ሳሉ የሰላም ንጉሥ ኢየሱስ ክርስቶስ መጣ፡፡ ተሰብስበው በነበሩበት ቤት ገባ፡፡ በመካከላቸው ቆሞ ሰላም ለእናንተ ይሁን አላቸው ይህንንም ብሎ እጆቹንም ጎኑንም አሳያቸው፡፡ እነርሱም በጣም ደስ አላቸው፡፡ እርሱም ዳግመኛ ሰላም ለእናንተ ይሁን አብ እንደላከኝ እኔ ደግሞ እልካችኋለሁ አላቸው፡፡ ይህንም ብሎ እፍ አለባቸውና መንፈስ ቅዱስን ተቀበሉ፡፡ ኃጢአታቸውን ይቅር ያላችኋቸው ሁሉ ይቀርላቸዋል የያዛችሁባቸው ግን ይያዝባቸዋል አላቸው፡፡ ነገር ግን ከአሥራ ሁለቱ ሐዋርያት አንዱ ዲዲሞስ የሚሉት ቶማስ በዚሁ ቀን አልነበረም ሌሎች ደቀ መዛሙርት ጌታን አይተነዋል አሉት፡፡ እርሱ ግን የችንካሩን ምልክት በእጆቹ ካላየሁ ጣቴንም በችንካሩ ምልክት ካላገባሁ እጄንም በጎኑ ካላኖርሁ አላምንም አላቸው፡፡

ከስምንት ቀን በኋላም ደቀ መዛሙርቱ ደግመው በውስጥ ነበሩ ቶማስም ከእነርሱ ጋር ነበር፡፡ ደጆችም ተዘግተው ሳሉ የሰላም አምላክ ኢየሱስ ክርስቶስ መጣ፤ በመካከላቸውም ቆሞ ሰላም ለእናንተ ይሁን አላቸው፡፡ ከዚያም በኋላ ቶማስን ጣትህን ወደዚህ አምጣና እጆቼን እይ እጅህንም አምጣና በጎኔ አግባው እመን እንጂ ተጠራጣሪ አትሁን አለው፡፡ ቶማስም ጌታዬ፤ አምላኬም ብሎ መለሰለት መድኃኒታችን ኢየሱስ ክርስቶስም ቶማስን ስለአየኸኝ አምነሀል ሳያዩ የሚያምኑ ብፁዓን ናቸው አለው፡፡ ይህ ቀን ጌታችን ለሁለተኛ ጊዜ ቶማስ ባለበት ለደቀ መዛሙርቱ የተገለጠበት ቀን ስለሆነ ዳግም ትንሣኤ ተብሏል፡፡

የጌታችን ትንሣኤ ለክርስትናው ትምህርት መሠረት ነው፡፡ የጌታችን ትንሣኤ የእኛም ትንሣኤ ነው፡፡ ለምን፡- በእርሱ ትንሣኤ የእኛ ትንሣኤ ተረጋግጧልና እኛ ሞተን ፈርሰን በስብሰን አንቀርም በትንሣኤ ዘጉባኤ እንነሣለን፡፡ ሐዋርያው ቅዱስ ጳውሎስ የእኛን ትንሣኤ በዘርዕ ምሳሌ ተናግሯል፡፡ ይህም “አንተ ሰነፍ አንተ የምትዘራው እንኳን ካልፈረሰ አይበቅልም” /1ኛ. ቆሮ. 15፡36/ ይህም ማለት አንድ ገበሬ ዘርዕ ይዘራል፤ ያ ዘርዕ ከአፈር ጋር ይቀላቀላል፤ ይፈርሳል ከዚያም ይበቅላል እኛም ሞተን ፈርሰን በስብሰን አንቀርም እንነሳለን፡፡ መቃብራችን ላይ መስቀል መደረጉ የትንሣኤያችን ምልክት ነው፡፡

ስለዚህ ለእኛ ትንሣኤ መሠረቱ የጌታችን የአምላካችን የመድኃኒታችን የኢየሱስ ክርስቶስ ትንሣኤ ነው፡፡ ከላይ እንደተገለጸው ሁላችንም በትንሣኤ ዘጉባኤ እንነሣለን፡፡ ከዚያም በሕይወተ ሥጋ ሳሉ መልካም የሠሩ ተመስግነው ወደ ዘለዓለማዊ ሕይወት ወደ መንግሥተ ሰማያት ይገባሉ፡፡ በሕይወተ ሥጋ ሳሉ ክፉ የሠሩ ደግሞ ተወቅሰው ዘለዓለማዊ ፍዳ ወዳለበት ወደ ገሃነመ እሳት ይገባሉ፡፡ ይህንንም ጌታችን በቅዱስ ወንጌል እንዲህ ሲል ተናግሯል፡፡ “ስለዚህ ነገር አታድንቁ በመቃብር ያሉት ሙታን ሁሉ ቃሉን የሚሰሙባት ሰዓት ትመጣለች ሕጉን የፈጸሙ በሕይወት ለመኖር ይነሣሉ፡፡ ክፉ ሥራ የሠሩ ግን በፍዳና በጨለማ ለመኖር ይነሣሉ፡፡” /ዮሐ. 5፡29/
በዚህ መሠረት ሀገረ ሕይወት መንግሥተ ሰማያትን እንድንወርስ ትንሣኤ ልቡና ያስፈልገናል፤ ትንሣኤ ልቡና ማለትም የልብ መነሣት ማለት ነው፤ ልባችን መልካም ሥራ ለመሥራት መነሣት አለበት፡፡ ይህንንም ሐዋርያው ቅዱስ ጳውሎስ እንዲህ ሲል ተናግሯል፡፡ “አንተ የምትተኛ ንቃ ከሙታንም ተነሣ ክርስቶስም ያበራልሃል” /ኤፌ. 5፡14/

መሠረተ ቤተ ክርስቲያን ቅዱስ ያሬድ “ትንሣኤከ ለእለ አመነ ብርሃነከ ፈኑ ዲቤነ” (ትንሣኤህን ላመንን ለእኛ ብርሃነ ረድኤትህን ላክ) ብሎ በተናገረው መሠረት ፈጣሪያችን ብርሃነ ረድኤቱን እንዲልክልን ትንሣኤውን ማመን ያስፈልጋል፡፡ ለመንፈሳዊ ጉዞ መሠረቱ እምነት ነውና፡፡ እምነተ ጠንካሮች መሆን እንደሚገባን መድኃኒታችን ኢየሱስ ክርስቶስ እንዲህ ሲል ተናግሯል፡፡ “የሰናፍጭ ቅንጣት ያህል እምነት ቢኖራችሁ ይህን ተራራ ከዚህ ተነሥተህ ወደዚያ እለፍ ብትሉት ያልፋል” /ማቴ. 17፡20/ ይህንን ሊቃውንት ሲያመሰጥሩት በሰናፍጭ ፍሬ ላይ ትንሽ እንኳን የመሰንጠቅ ምልክት አይታይም በእምነታችሁ ትንሽ እንኳን ጥርጥር እንዳይኖር፣ ጥርጥርን አስወግዳችሁ ፍጹም እምነትን ገንዘብ ካደረጋችሁ ተራራ ታፈልሳላችሁ፡፡ እንዲሁም በተራራ የተመሰለው ሰይጣንን ታወጣላችሁ ማለት ነው፡፡

እምነታችንን ደግሞ በሥራ መግለጽ ያስፈልጋል ሰው በእምነት ብቻ አይድንም ከእምነት ጋር ግድ ሥራ ያስፈልጋል፡፡ “እምነት አለኝ የሚል ሥራ ግን የሌለው ሰው ቢኖር ምን ይጠቅመዋል እምነቱስ ሊያድነው ይችላልን?” /ያዕ. 2፡14/ እምነትማ ብቻ ከሆነ አጋንንትም ያምናሉ፣ ይንቀጠቀጡማል፡፡ /ያዕ. 2፡19/
ቅዱስ ያዕቆብ በዚሁ ምዕራፍ ቁጥር 26 ላይ በእምነት ብቻ መዳን እንደማይቻል እጅግ በሚያስደንቅ ምሳሌ ተናግሯል፡፡ ይህም፡- “ከነፍስ የተለየ ሥጋ የሞተ እንደሆነ እንዲሁ ደግሞ ከሥራ የተለየ እምነት የሞተ ነው፡፡”

በዚህ መሠረት ከመከራ ሥጋ፣ ከመከራ ነፍስ እንድንድን፤ በረከተ ሥጋ፣ በረከተ ነፍስ እንድናገኝ እምነታችንን በሥራ መግለጽ ያስፈልጋል፡፡
እምነታችንን በሥራ ገልጸን ሀገረ ሕይወት መንግሥተ ሰማያትን እንድንወርስ የእመቤታችን ቅድስት ድንግል ማርያም እንዲሁም የቅዱሳን አማላጅነት አይለየን፡፡

ለብርሃነ ትንሣኤው ያደረሰን አምላክ ለብርሃነ ዕርገቱ በሰላም ያድርሰን!!
ወስብሐት ለእግዚአብሔር

ከላእከ ወንጌል በእደ ማርያም ይትባረክ /ቀሲስ/
የአዲስ አበባ ሀገረ ስብከት ትምህርት ስርጭት ኃላፊ

“ኒቆዲሞስ “

የዐቢይ ጾም ሰባተኛው ሳምንት ኒቆዲሞስ ይባላል። ስያሜውን ያገኘው እውነተኛ እውቀትንና ሕይወትን ፈልጎ ነገር ግን ምድራዊ ሥልጣኑን በአይሁድ ሸንጎ እንዳይነጠቅ ፈርቶ በሌሊት ወደ ጌታ  እየሄደ ይማር ከነበረው ከአይሁድ አለቃ ከኒቆዲሞስ ነው።

ዳግም ልደትን በተመለከተ ኒቆዲሞስ የጠየቀው ጥያቄና ጌታችን ኢየሱስ ክርስቶስ የመለሰው መልስ በዮሐንስ ወንጌል ምዕራፍ 3 ላይ በሰፊው ተብራርቶ ተጽፏል።

ኒቆዲሞስ በፍርሃት ተውጦ እየተደበቀ በሌሊት ብቻ ኢየሱስ ክርስቶስን ሲከተለው የነበረ ሲሆን በኋላ በቃሉ ተመስጦና በፍጹም ፍቅሩ ተስቦ በድፍረት ተከትሎታል። የኢየሩሳሌም ሸንጎ ኢየሱስን ሊከሰው ሲፈልግ ኒቆዲሞስ ግን መከሰስ እንደሌለበት በድፍረት ሲመሰክር እናየዋለን (ዮሐ 7፥45-52)።

በተጨማሪም ኢየሱስ ክርስቶስ ከተሰቀለ በኋላም ሌሎች ደቀ መዛሙርት በፍርሃት ተውጠው ሲሸሹ እርሱ ለመግነዝ የሚሆን   መቶ ንጥር የሚያህል የከርቤና የእሬት ቅልቅል ይዞ በድፍረት በቦታው ሲገኝም እንመለከተዋለን (ዮሐ 19፥39)።

የዘለዓለም ሕይወትን መውረስ የሚፈልግ ሁሉ በመድኃኒታችን በኢየሱስ ክርስቶስ በማመን ከውኃና ከመንፈስ ዳግመኛ መወለድ እንዳለበት የዮሐንስ ወንጌል ምዕ 3 ያስተምረናል።

ክርስቶስ ” ከሥጋ የተወለደ ሥጋ ነው፥ ከመንፈስም የተወለደ መንፈስ ነው ” ብሏል። የመጀመሪያው ልደት ከእናትና አባት ከሥጋ መወለድ ሲሆን ዳግም ልደት ደግሞ ከመንፈስ ቅዱስ የመወለድ ምሥጢር ነው። ይህ ደግሞ በሰው ኃይል ሳይሆን በእግዚአብሔር ኃይል ነው የሚሆነው።

መድኃኒታችን ኢየሱስ ክርስቶስ ለኒቆዲሞስ ያስተማረው ዘለዓለማዊ ሕይወት የሚገኝበት ዳግም ልደት ለእኛም ጭምር የተነገረ መሆኑን ከልብ ልናስተውል ይገባል። ምክንያቱም የእግዚአብሔር ቃል  ሕያውና  ዘለዓለማዊ ነው።

ጠቅለል ባለ መልኩ ” ኃጢአተኞችን ሊያድን ክርስቶስ ኢየሱስ ወደ ዓለም መጣ የሚለው ቃል የታመነና ሁሉ እንዲቀበሉት የተገባ ነው” (1ኛ ጢሞ 1፥15) ብሎ ሐዋርያው እንደተናገረው ክርስቶስ የከፈለልንን የደም ዋጋ ከልብ በማመንና ዘወትር ያለማቋረጥ ፍቅሩንና ቤዛነቱን በማሰብ በፍርሃትና በሌሊት ሳይሆን በፍጹም እምነትና በብርሃን  ልንከተለው ይገባል።

የዳግም ልደት ዋናው ጽንሰ ሃሳብም ለምድራዊው ሥልጣንና ሀብት ቅድሚያ በመስጠት በሥጋ ልደት ጸንቶ መኖር ሳይሆን ለዘለዓለማዊ ሕይወት ቅድሚያ በመስጠት ዳግም ከመንፈስ ቅዱስ  በመወለድ ሰማያዊ ዜግነትን ማግኘት ነው። 

       ወስብሐት ለእግዚአብሔር!

       በመ/ር ወንድምአገኝ ደጀኔ

“እንደ አብነት ትምህርት ቤቱ ከሰ/ት/ቤትም ጳጳስና ፓትርያርክ መውጣት አለበት…ብፁዕ አቡነ መልከጸዴቅ

የቦሌ ደብረ ገነት ቅዱስ ጊዮርጊስ እና ቅዱስ ገብርኤል ቤተ ክርስቲያን የፍሬ ሃይማኖት ሰንበት ትምህርት ሁለገብ ሕንፃ የመሠረት ድንጋይ በአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅ ተጥሏል።

ብፁዕነታቸው አንተ አለት ነህ በዚች ዐለት ላይ ቤተ ክርስቲያኔን  እመሠርታለሁ  የሚለውን ቃለ ወንጌል ጠቅሰው ጥዑም ትምርህት ሰጥተዋል።

በሃይማኖት ጸንቶ ማደግ የአሁን ጊዜ ወጣቶች መለያ  እየሆነ መምጣቱ እንዳስደሰታቸው ገልፀው  የደብሩ አስተዳደር እና ሰበካ ጉባእ እንዲሁም የፍሬ ሃይማኖት ሰ/ት/ቤት ወጣቶች ያላቸውን አንድነትም አድንቀዋል።

እናት እና አባቱን የሚያከብር ትውልድ እና በሦነ ምግባር የታነጹ የሰንበት ትምህርት ቤት ወጣቶች መኖራቸው ለሌሎች አንዳንድ አድመኛና ስም አጥፊ ቡድኖች አርዓያ ናችሁ በርቱ ብለዋል።

ለቤተክርስቲያን መሠረት የሆነው የአብነት ትምህርት ቤት ብዙ ሊቃውንት መፍለቂያ እንደሆነ ሁሉ ከሰንበት ትምህርት ቤቶችም ሊቃውንት፣ ጳጳሳትና ፓትርያኮችም መውጣት አለባቸው ሲሉ ተናግረዋል።

የፍሬ ሃይማኖት ሰንበት ትምህርት ቤት ሁለገብ ህንጻ  G+3 ምሰለ ንድፉን በ/ት/ ቤቱ ባለሙያዎች በነጻ የተሠራ  መሆኑ እንዳስደሰታቸው እና ቤተ ክርስቲያንን የሚያንጿት የቤተክርስቲያን ልጆች መሆናቸው ኩራት ነው ብለዋል።

ሁለገብ ህንጻው ለካህናት ልጆች መዋያ የሚሆን መዋዕለ ህጻናትን ጨምሮ ብዙ አገልግሎት የሚሰጥ እና በ2500 ካሬ ላይ ያረፈ በ49 ሚሊዮን ብር የሚገነባ እንደሆነ ከመድረኩ ተነግሯል።

ከሃያ ዓመታት በፊት ለሐዋርያዊ አገልግሎት ወደ ቦሌ ደብረ ገነት ቅዱስ ጊዮርጊስ እና ቅዱስ ገብርኤል ቤተ ክርስቲያን ብፁዕነታቸው ይመጡ እንደነበር ጠቅሰው ያኔ በብዛት ይገነባ የነበረው ለሙታን የሚሆን መቃብር ቤት እንደ ነበር እና አሁን ለህያዋን የሚሆን የሰንበት ትምህርት ቤት ሁለገብ ህንጻ መገንባቱ ይበል ነው ብለዋል።

የፍሬ ሃይማኖት ሰንበት ትምህርት ቤት ወጣቶች የደብሩን አስተዳዳሪ መልአከ መዊዕ አባ ገብረሥላሴ ጠባይን እና የደብሩን ዋና ጸሐፊ መምህር ሰሎሞን ዳዊትን በአንድ ዓመት ውስጥ ያመጡትን ልማት አድንቀው በብፁዕ አቡነ መልከጼዴቅ በኩል ሽልማት አበርክተዋል።

በመሠረት ድንጋይ መጣል መርሐ ግብሩ ላይ የቦሌ ክፍለ ከተማ ሥራ አስኪያጅ መልአከ ብርሃን ሩፋኤል የማነ እና የአዲስ አበባ ሀገረ ስብከት የልማትና እቅድ ዋና ክፍል ሃለፊ መልአከ ምህረት አምሃ መኮንን የተገኙ ሲሆን መድረኩን የደብሩ አስተዳዳሪ መልአከ መዊዕ አባ ገብረ ሥላሴ ጠባይ እየመሩት ብፁዕነታቸውም የመሠረት ድንጋይ እንደጣልነው ግንባታው ተጠናቆ ለምርቃቱ ያብቃን በሚል ንግግር ተጠናቋል።

    በተክለሃይማኖት አዳነ ጋዜጠኛ
         ፎቶ በዋሲሁን ተሾመ

ብፁዕ አቡነ መልከ ጼዴቅ በቅዱስ ዜና ማርቆስ መንፈሳዊ ኮሌጅ ሥልጠና በመስጠት ላይ ይገኛሉ!

የአዲስ አበባ እና ጉራጌ አህጉረ ስብከት ሊቀ ጳጳስ እንዲሁም የአዲስ አበባ ሃይማኖት ተቋማት ሰብሳቢብፁዕ አቡነ መልከጼዴቅ በጉራጌ ሀገረ ስብከት በቅርቡ በተከፈተው በቅዱስ ዜና ማርቆስ መንፈሳዊ ኮሌጅ” ለሦስት ወራት የሚቆይ ሥልጠና በመስጠት ላይ ይገኛሉ።
ብፁዕነታቸውን ጨምሮ በሌሎች አሰልጣኝ መምህራንየሚሰጠው ስልጠና በጉራጌ ሀገረ ስብከት አጥቢያ አብያተክርስቲያናት በልዩ ልዪ አገልግሎት የሚያገለግሉ አገልጋይ ካህናትን፣የወረዳ ቤተ ክህነት ጽ/ቤት እና የሀገረ ስብከት ልዩ ልዪ የሥራ ኃላፊዎችንና ሠራተኞችን እንዲሁም የአጎራባች ወረዳዎችና አህጉረ ስብከት አገልጋዮችን ያካተተ መሆኑ ተገልጿል።
በቅዱስ ዜና ማርቆስ መንፈሳዊ ኮሌጅ”ለሦስት ወራት ያክል እየተሰጠ የሚገኘው ሥልጠና ትምህርተ ሃይማኖት(ዶግማ)፣ የቤተ ክርስቲያን ታሪክ፣ የስብከት ዘዴ፣ ቀኖና ቤተ ክርስቲያንና የመጽሐፍ ቅዱስ ጥናትን
የሚያጠቃልል እንደሆነም ተረጋግጧል።
በብፁዕነታቸው አሰልጣኝነት “የቤተ ክርስቲያን ታሪክ በዓለም መድረክ” በሚል ርዕስ ሐሙስና ቅዳሜ በሳምንት ሁለት ቀናት እየተሰጠ እንደሚገኝ ተገልጿል።
የትምህርት ተቋም (መንፈሳዊ ኮሌጅ) ከመመሥረት ጀምሮ በተቋቋመው የትምህርት ተቋም በየክፍሉ ተገኝቶ በማስተማር ረገድ ከቀዳማዊ ብፁዕ አቡነ ጎርጎርዮስ ቀጥሎ ብፁዕ አቡነ መልከጼዴቅ መሆናቸውም ተወስቷል።
በሀገረ ስብከቱ ሊቀ ጳጳስ ብፁዕ አቡነ መልከጼዴቅ አርቆ አሳቢነትና ጠንካራ አመራር እንዲሁም በቅዱስ ሲኖዶስ መልካም ፈቃድ በብፁዓን አባቶች ጥቅምት 21 ቀን 2014 ዓ.ም ተመርቆ የተከፈተው “ቅዱስ ዜና ማርቆስ መንፈሳዊ ኮሌጅ” መሥፈርቱን የሚያሟሉ ደቀ መዛሙርትን ከየአህጉረ ስብከቱ ተቀብሎ በወርኃ መስከረም መደበኛ ትምህርት ማስተማር እንደሚጀምር
ከሀገረ ስብከቱ ጽ/ቤት ያገኘነው መረጃ ያመላክታል።
በመ/ር ሽፈራው እንደሻው

“ዛሬም ኢትዮጵያ ውስጥ ዓመት እስከ ዓመት ስቅለት ነው”….ብፁዕ አቡነ ኤርምያስ

የጌታችን የመድኃኒታችን የኢየሱስ ክርስቶስ ጥንተ ስቅለቱ ዛሬ በቦሌ ደብረ ሳሌም መድኃኔ ዓለም ካቴድራል ብፁዕ አቡነ መልከጼዴቅ የአዲስ አበባ እና የጉራጌ አህጉረ ስብከት ሊቀ ጳጳስ እና ብፁዕ አቡነ ኤርምያስ የሰሜንና ደቡብ ወሎ እንዲሁም የከሚሴ አህጉረ ስብከት ሊቀጳጳስ በተገኙበት ታብታተ ሕጉ ከመንበረ ክብራቸው ወተው ሕዝበ ክርሲቲያኑም ከአፍ እስከገደፉ በሞላበት ተከብሮ ውሏል።

ብፁዕ አቡነ መልከጼዴቅ  ረፋድ ላይ በአቃቂ ቃሊቲ አካባቢ በሃይማኖቱ ምክንያት የተሰዋውን ወጣት ቤተሰቦችን ለማጽናናት እና በጸሎተ ፍትሐቱም ላይ ተገኝተው እንደመጡ ጠቅሰው የኦርቶዶክስ ተዋሕዶ አማኞች ላይ እየደረሰ ያለው ግድያ እና መፈናቀል ሊቆም ይገባል ብለዋል።

አክለውም ብፁዕነታቸው ኦርቶዶክሳውያን ምዕመናን በስሜት ሳይሆን በትዕግሥት የአባቶቻቸሁን ምክር እየሰማችሁ ብትሄዱ ከአሳሳቾች ትጠብቃላችሁ ሲሉ መክረዋል።

በብፁዕ አቡነ መልከጼዴቅ የዕለቱን ትምህርት እንዲሰጡ የተጋበዙት ብፁዕ አቡነ ኤርምያስ ዕለቱን በተመለከተ ጥዑም ትምህርት ሰጥተዋል።

የጲላጦስን ፍርድ አንስተው አንድም ጥፋት አላገኘሁበት ብሎ መመስከሩ ግሩም እና የክርስቶስ እውነተኛ አምላክነት የመሰከረበት እኔዲሁም ይህ ምስክርነት ከአይሁዳውያን ወገን ወይንም ከሐዋርያት ቢሆን ኑሮ ያን ያህል አይደንቅም ነበረ ብለዋል።

ብፅዕነታቸው በዋናነት  ክርስቶስ የሞተለት ሰው አሁን በኢትዮጵያ በየቀኑ እየተገደለ ነው አሁንም ክርስቶስ እየተሰቀለ ነው ዛሬም ኢትዮጵያ ውስጥ ዓመት እሰከዓመት ስቅለት ነው ሲሉ እንባና ሳግ እየተናነቃቸው ነበረ።

የካቴድራሉ መምህራን ወረብ ያቀረቡ ሲሆን የደብሩ ሰንበት ትምሀርት ቤት ዘማርያንም በለኒ መሐርኩከ የሚል ዝማሬ በነጫጭ አልባሳት ደምቀው አቅርበዋል።

የዕለቱን መርሐ ግብር የካቴድራሉ አስተዳዳሪ መልአከገነት ቆሞስ አባ ተክለማርያም አምኜና የደብሩ ስብከተ ወንጌል ኃላፊ ልሳነ ክርስቶስ መምህር ጳውሎስ ሰይፈሥላሴ መርተውታል።

በበዓሉ ላይ የሰንሻይን ኮንስትራክሽን ባለቤት አቶ ሣሙኤል ታፈሰ እና መጋቤ አዕላፍ ፀጋዬ ደበበ ተገኝተው  ለቤተመቅደሱ ዕድሣት ላበረከቱት አስተዋጽኦ በብፁዕ አቡነ መልከጼዴቅ የካባ ሽልማት ተበርክቶላቸዋል።

ማስታወሻ፦የአቃቂ ቃሊቲውን ሰማዕት ዘመድኩን አማረን የተመለከተ ልዩ ዘገባ ይዘን እንደምንመለስ ከወዲሁ እናሳውቃለን።

በተክለሃይማኖት አዳነ ጋዜጠኛ
ፎቶ በዋሲሁን ተሾመ

ገብር ኄር =ቸር አገልጋይ (ማቴ. 25፥ 21-23)

በቅዱስ ያሬድ ስያሜ መሠረት በዓቢይ ጾም የሚገኝ 6ኛው ሳምንት እሑድ ገብር ኄር እየተባለ ይጠራል። ገብር ኄር ማለት ቸር አገልጋይ ማለት ነው፤ ቀኑ ወይም ሳምንቱ ቸር፣ ቅን እና ታማኝ አገልጋዮች የሚዘከሩበት፣  የቸርነቱ ባለቤት ርኅሩህ አምላካችን የቸርነቱና ምኅረቱ ብዛት በማሰብ በቅን አገልጋዮች  የሚዘመርበት፣ የሚመሰገንበትና የሚመለክበት ጊዜ ነው፡፡

ወቅቱ ስለ አገልጋይና በባለቤቱ ለአገልጋዮች ስለሚከፈል ዋጋ፣ ታማኝ አገልጋዮች ስለሚያገኙት ሽልማት እና ተማኝ አገልጋዮች ሆነን ሽልማትን ለመውሰድ እንድንዘጋጅ የሚነገርበት ጊዜ ነው፡፡

ጌታችን መድኃኒታችን ኢየሱስ ክርስቶስም ያዘዘንን ቃል አክብረን ሠርተን የተገኘን እንደሆነ  ሕያው የደስታ ሽልማት እንደሚሰጠን በምሳሌ አስተምሮናል። (ማቴ. 25፥ 21፣23)። በአንጻሩ ደግሞ የተሰጠንን ኃላፊነትም ሆነ ትእዛዝ ሳናከብር ስንቀር የማይጠቅም አገልጋይ ተብለን ከፍርድ ማምለጥ እንደማንችል  በምሳሌው ተነግሯል (ማቴ. 25፥ 30)።

በዚህ መልክ ሁላችንም ውስጣች መመርመር አለብን። በመጀመሪያ ደረጃ የተሰጠን ለይተን ማወቅ አለብን፣ በመቀጠል ታማኝ ባሪያ ሊያስብል ሕይወት አለን ወይ?  የሚጠብቀኝ ሽልማቱ ወይስ ፍርዱ ብለን በቃሉ ሚዛን ሕይወታችን መመዘን ያስፈልጋል።

ለምሳሌ የያዝነው ጾም መሠረተ ሓሳቡ 40 ቀንና 40 ሌሊትን በመጾም በመጨረሻም ስለ እኛ ሕማማቱንና ስቃዩን ታግሶ በሞቱ ሕይወት የሆነል ጌታችን መድኃኒታችን ኢየሱስ ክርስቶስ  ማሰብ፣ መዘከር፣ መተባበርና ትእዛዙን በማክበር  በፍቅር እየተመላለስን አምላካችንን ማመስገን እና ማምለክ ነው።

ይህ ሁሉ የሚሆነው ደግሞ  ከስጦታዎች ሁሉ የከበረ የፍቅር ስጦታ  እንደ ተሰጠን ካልዘነጋን ነው። ይህም በነብዩ አንደበት “ወልድ ተውህበ ለነ፤ ወንድ ልጅ ተሰጠን” (ኢሳ 9፡6) በሚል ወርቃማ ቃል ተገልጿል። 
ወልድ የተባለ ከላይ ስሙ የጠቀስነው ስለ እኛ የጾመ (የተራበና የተጠማ) እርሱ ፈጣሪ ሲሆን ስለ እኛ በኃጥአን በፍጡራን አንደበት የተሰደበ፣ ምራቅ የተተፋበት፣ የተገረፈ፣ የተሰቀለና በሞቱ ሕይወት የሆነልን ጌታችን አምላካችን መድኃኒታችን ኢየሱስ ክርስቶስ ነው። እርሱ ዕዳችን የከፈለ፣ ነውራችን ያራቀ፣ ኃጢአታችን ያስወገደ  ዘለዓለማዊ ሕይወታችን መድኃኒታችን ነው።

ሐዋርያትም ታማኝ አገልጋዮች በመሆን በእርሱ ሕይወትና መድኃኒትነት  ብዙ ተአምራትን በመስራት የተሰጣቸውን መክሊት በአግባቡ ተጠቅመውበታል።
ይኸውም ቅዱስ ጴጥሮስና ቅዱስ ዮሐንስ በምኩራብ ተገኝተው በስሙ ደዌ ሥጋና ደዌ ነፍስ ሲያስወግዱ እናያለን።

ሐዋርያቱ ያላቸውን ለይተው በማወቅ ለማን? መቼ እንደሚሰጥ ጠንቅቀው በመረዳት ሲያገለግሉ እንደነበር መጽሐፍ ቅዱስ ሕያው ምስክር ነው። “ጴጥሮስ ግን ብርና ወርቅ የለኝም፤ ይህን ያለኝን ግን እሰጥሃለሁ፤ በናዝሬቱ በኢየሱስ ክርስቶስ ስም ተነሣና ተመላለስ።”(የሐዋ. ሥራ 3:6)። በማለት ዕድሜ ልካቸውን የቃሉን ባለቤት ትእዛዝ በማክበር አምላካቸውንና ቤተክርስቲያንን በታማኝነት  አገልግለዋል።

የአገልግሎታቸውን ሁሉ ዋጋ ሲጠይቁም ስለ ስሜ ሁሉን የተወና በታማኝነት ያገለገለኝ “መቶ እጥፍ ይቀበላል የዘላለምንም ሕይወት ይወርሳል” (ማቴ. 19፥29) በማለት ሰማይና ምድር በፈጠረ ቃሉ ቃል ኪዳን ገብቶላቸዋል።

እኛስ ስጦታውን ተቀብለናል? የተሰጠን ስጦታውስ ለይተን አውቀናል? በታማኝነትስ እያገለገልን ነው?   ነፍሳችን እንመርምር እና ከሽልማት ሁሉ የበለጠ ሽልማት የዘለዓለም ሕይወት እንዳያመልጠን በቃሉ መሠረት እንመላለስ፨

  ወስብሐት ለእግዚአብሔር!

በመምህር ኪደ ዜናዊ

“ያለው ቦታ ጠባብ ነው ከማለት ይልቅ ባለው ቦታ ልማትን ማልማት ብልህነት ነው” …ብፁዕ አቡነ መልከጼዴቅ

“ያለው ቦታ ጠባብ ነው ከማለት ይልቅ ባለው ቦታ ልማትን ማልማት ብልህነት ነው” ሲሉ ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀጳጳስ ገለጹ።

ብፁዕነታቸው ይህንን ያሉት ከብፁዕ አቡነ ናትናኤል የምሥራቅ ወለጋ ሀገረ ስብከት ሊቀጳጳስ ጋር በአፍሪካ ኅብረት ደ/ም/ቅዱስ ሚካኤል ካቴድራል በመገኘት ምእመናንን፣ የልማት ሥራዎችንና በመጠናቀቅ ላይ የሚገኘውን ሕንጻ በጎበኙበት ወቅት ነው።

በመጠናቀቅ ላይ የሚገኘው ሕንጻ መታሰቢያነቱና ስያሜው በሊቢያ ምድር  ሰማዕታት ለሆኑት ኢትዮጵያውያን ኦርቶዶክስ ወጣቶች እንደሆነ ተገልጿል።

ብፁዕነታቸው በዚህ በጠባብ ቦታ ይህን የሚያህል ትልቅ ሕንጻ በማነጻችሁ የሚደነቅ ነው ብለዋል።

የሕንጻው ስያሜ ከዓመታት በፊት በሊቢያ ሰማዕታት በሆኑት ኦርቶዶክሳውያን ወጣቶች መሆኑ የሚያስደስት እንደሆነ አያይዘው ጠቅሰዋል።

ዲ/ን ሄኖክ ኃይሌ የማቴዎስ ወንጌል ምዕራፍ 4 ቁጥር 4 ላይ ያለውን የእግዚአብሔር ቃል መነሻ በማድረግ ሰፊ ትምህርት ሰጥተዋል።

በተያያዘም ዲ/ን ሄኖክ ኃይሌ  “አበረታች መድኃኒት” በሚል ስያሜ የጻፉትን መጽሐፍ  ካቴድራሉ አሳትሞ ከመጽሐፉ የሚገኘውን ገቢ ለሕንጻው እንዲያውል በስጦታ አበርክተዋል።

ሕንጻው በመጠናቀቅ ላይ የሚገኝ ሲሆን ለካህናት ማረፊያ፣ ለሰንበት ት/ቤት ወጣቶች መማሪያ፣ ለስብሰባና ለመንፈሳዊ ትምህርት ሥልጠና፣ ለቢሮና መሰል አገልግሎቶች እንደሚውል ተገልጿል።

የካቴድራሉ አስተዳዳሪ መ/ሳ ቀሲስ አለማየሁ ዘውዴ ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀጳጳስ፣ ብፁዕ አቡነ ናትናኤል የምሥራቅ ወለጋ ሀገረ ስብከት ሊቀጳጳስ በቦታው ተገኝተው ምእመናንንና የካቴድራሉን የልማት ሥራዎች በመጎብኘታቸው የተሰማቸውን ደስታ ገልጸዋል፤ ምሥጋናም አቅርበዋል።

በመ/ር ወንድምአገኝ ደጀኔ

ፎቶ በመ/ር ዋሲሁን ተሾመ

ደብረ ዘይት ( የዐቢይ ጾም አምስተኛ ሳምንት)

            ትርጉም

በኢትዮጵያ ኦርቶዶክስ ተዋሕዶ ቤተክርስቲያን የዐቢይ ጾም አምስተኛ ሳምንት ደብረ ዘይት ይባላል። ስያሜውም የተገኘው ከቅዱስ ያሬድ ነው።

ደብረ ዘይት ማለት የወይራ ዛፍ ያለበት ተራራ ማለት እንደሆነና  ከኢየሩሳሌም በስተምሥራቅ አቅጣጫ በኩል እንደሚገኝ የመጽሐፍ ቅዱሰ መዝገበ ቃላት ይገልጻል።

እንደ ማቴዎስ ወንጌል ምዕራፍ 24 ገለጻ ጌታችን መድኃኒታችን ኢየሱስ ክርስቶስ በደብረ ዘይት ተራራ ላይ የሚከተሉትን ዋና ዋና ትምህርቶች አስተምሯል፦

  1. ስለ ዓለም ፍጻሜ የመጀመሪያ ምልክቶች ተናግሯል፦

ክርስቶስ በደብረዘይት ተቀምጦ ሳለ ደቀመዛሙርቱ የዓለም መጨረሻው ምልክቱ ምን እንደሆነ? ጠይቀውት ነበር።

እርሱም ለጥያቄያቸው መልስን የሰጠ ሲሆን በስሙ በመምጣት የሚያስቱ እንዳሉ፣ የጦርም ወሬ እንደሚሰማ፣ ሕዝብ በሕዝብ ላይ መንግሥትም በመንግሥት ላይ እንደሚነሣ፣ ራብም ቸነፈርም የምድርም መናወጥ በልዩ ልዩ ስፍራ እንደሚሆን፣ የብዙ ሰዎች ፍቅርም እንደምትቀዘቅዝ ከነገራቸው መልሶች መካከል ዋና ዋናዎቹ ናቸው። እነዚህም ሁሉ የምጥ ጣር መጀመሪያ ናቸው በማለት ነግሮአቸዋል። ሰለሆነም እኛም ይህንን በዓል ስናከብር የዘመኑ ፍጻሜ ምልክቶች ምን ያህል እየተፈጸሙ መሆናቸውን እያስተዋልን ወደ እግዚአብሔር አብዝተን የምንቀርብበት እንደሆነ ልንገነዘብ ይገባል።

  1. ስለ ዳግም ምጽአቱ (ተመልሶ እንደሚመጣ) አስተምሯል፦

ደቀመዛሙርቱ ስለ ዓለም ፍጻሜ ብቻ ሳይሆን መምጣቱንም በተመለከተ ጥያቄ አቅርበው ነበር።

ጌታችን ኢየሱስ ክርስቶስ ቁጥር 39 ላይ በኖኅ ዘመን የነበረውን ታሪክ ጠቅሶ “የጥፋት ውኃም መጥቶ ሁሉን እስከ ወሰደ ድረስ እንዳላወቁ፥ የሰው ልጅ መምጣት ደግሞ እንዲሁ ይሆናል ” በማለት እንደሚመጣ ብቻ ሳይሆን እንዴትና በምን መልኩ እንደሚመጣ ተናግሯል። በሥርዓተ ቅዳሴውም  “እግዚአብሔርሰ ገሃደ ይመጽእ ወአምላክነሂ ኢያረምም እሳት ይነድድ ቅድሚሁ” እየተባለ ይሰበካል (መዝ 49፥2-3)።

3.  ተዘጋጅተን እንድንጠብቀው አዟል፦

ቁጥር 42 ላይ እንዲህ ብሏል ” ጌታችሁ በምን ሰዓት እንዲሚመጣ አታውቁምና እንግዲህ ንቁ ” ነቅቶ መጠበቅ መንፈሳዊ ብልህነት ነው። ቁጥር 44 ላይም ” ስለዚህ እናንተ ደግሞ ተዘጋጅታችሁ ኑሩ፥ የሰው ልጅ በማታስቡበት ሰዓት ይመጣልና ” ብሏል። ሙሽራው ክርስቶስ ሲመጣ ሁላችንም በመንፈሳዊ ሕይወታችን ውብ ሆነን ልንጠብቀው ይገባል።

“ተዘጋጅታችሁ ኑሩ” የሚለው የጌታችን ትዕዛዝ የቤተክርስቲያን የሁልጊዜም መልእክት ነው!

ተዘጋጅቶ መኖር በየትኛውም የሥራና የሙያ ዘርፍ ወሳኝ ነገር ነው፤ ተማሪ የተማረውን ትምህርት በሚገባ አጥንቶ ለፈተና ዝግጁ ካልሆነ ወደ ሚቀጥለው ክፍል ማለፍ አይችልም። ለእርሻ የሚሆኑ በሬዎችንና ቁሳቁሶችን አስቀድሞ ያላዘጋጀ አርሶ አደር የእርሻ ወቅት ሲደርስ ማረስ አይችልም፤በሌሎች የሥራ መስኮችም ያሉ እንዲሁ።

በመንፈሳዊ ሕይወትም ተዘጋጅቶ መኖር ትልቅ ስፍራ የሚሰጠው ጉዳይ ሲሆን የሚከተሉትን ነጥቦችም በውስጡ ይይዛል፦

ሀ. በጽኑ እምነት መኖር፦

ክርስቶስ ወደዚህ ምድር የመጣበት ዋና ዓላማ እኛ በእርሱ ቤዛነት በፍጹም ልባችን አምነን ከኩነኔ እንድን ዘንድ ነው። ለዚህም ነው ” እንግዲህ በክርስቶስ ኢየሱስ ላሉት አሁን ኵነኔ የለባቸውም “(ሮሜ  8፥1) የሚለው። በክርስቶስ ኢየሱስ ላሉት ማለት በእርሱ አምኖ በትክክለኛው መንፈሳዊ ሕይወት  መኖር ማለት ነው። እግዚአብሔርን የምናስደስተው በእምነት ስንኖር ነው።  እምነት ከሌለን እርሱን ደስ ማሰኘት አንችልም፤ ለዚህም ነው  “ያለ እምነትም ደስ ማሰኘት አይቻልም” (ዕብ 11፥6) ተብሎ በቅዱሱ መጽሐፍ የተጻፈው። ስለሆነም በጽኑ እምነት መኖር ከሁላችንም የሚጠበቅ ነው።

ለ. በንስሐ ሕይወት መመላለስ፦

ሁላችንም በዚች ፈታኝ ዓለም ላይ ስንኖር በማሰብ፣ በመናገርና በማድረግ ኃጢአትን እንሠራለን። አግዚአብሔር ደግሞ በባህርይው ቅዱስ ስለሆነ ኃጢአትን ይጸየፋል። ስለሆነም ከእግዚአብሔር ጋር ኅብረት ለማድረግ ዘወትር በንስሐ ሕይወት በመመላለስ በቅድስና ሕይወት መኖር ያስፈልጋል።

” ነገር ግን እርሱ በብርሃን እንዳለ በብርሃን ብንመላለስ ለእያንዳንዳችን ኅብረት አለን፥ የልጁም የኢየሱስ ክርስቶስ ደም ከኃጢአት ሁሉ ያነጻናል “(1ኛዮሐ1፥7) ስለሚል ቃሉ እርሱ መድኃኔዓለም በዕለተ አርብ ባፈሰሰው ደሙ እንዲያነጻን “ዘወትር ጠዋት ማታ ያለማቋረጥ ባፈሰስከው ደምህ ይቅር በለን፤ አንጻን ልንለው” ይገባል።

ሐ. ቅዱስ ሥጋውንና ደሙን መቀበል፦

ጌታችን መድኃኒታችን ኢየሱስ ክርስቶስ ቅዱስ ሥጋውንና ደሙን እንድንቀበል አዞናል። ስለሆነም ሥርዓተ ቅዳሴውን እየተከታተልን ብቻ ወደ ቤታችን መሄድ ሳይሆን ንስሐ በመግባት ቅዱስ ሥጋውንና ደሙን መቀበል ይኖርብናል።

መ. በፍቅር ሕይወት መመላለስ፦

ፍቅር የእግዚአብሔር ባህርይ ነው፤ እኛም በፍቅር እንድንኖር አዞናል። ፍቅር በብዙ ሰዎች ዘንድ እየቀዘቀዘች ባለችበት ወቅት በፍቅር መኖር ታላቅ መታደል መሆኑን ተረድተን በፍቅር ልንኖር ይገባል። እግዚአብሔር አምላካችንን በፍጹም ልባችን በመውደድ እንዲሁም አጠገባችን ያለውን ወንድማችንን በመውደድ ፍቅርን በሕይወት ልንኖረው ይገባል።  “በፍቅሬ ኑሩ” (ዮሐ 15፥9) የሚለውን ትዕዛዝ ፈጽመን ቢሆን ኖሮ ዛሬ ላይ በሀገራችንም ሆነ በዓለም ላይ የንጹሐን ደም አይፈስም ነበር። ዘወትር በፍቅር ሕይወት በመመላለስ ጥላቻ እንዲወገድ የበኩላችንን ድርሻ ልንወጣ ያስፈልጋል።

ሠ. በተስፋ መኖር፦

በመንፈሳዊው ዓለም በተስፋ መኖር ማለት በተረጋገጠና እውነተኛ በሆነ ተስፋ መኖር ማለት ነው። መንፈሳዊው ተስፋ እንደምድራዊው ተስፋ ይሆናል ወይም አይሆንም በሚሉ ሁለት ሃሳቦች የተከፈለ አይደለም። ፈተናዎችና መከራዎች እንኳን አብዝተው ሊያስጨንቁን ቢሞክሩ ” እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ” (ማቴ 11፥28) ብሎ ጌታችን የተናገረውን በማሰብና በመረዳት በእርሱ እርፍ እያልን በተስፋ መኖር ይገባናል። በተስፋ መኖር በምድራዊውና በሚጠፋው ነገር እንዳንወስድ ያደረግናል።

ጠቅለል ባለ መልኩ የደብረዘይትን በዓል በዓመት አንድ ጊዜ ብቻ የምናስበው ሳይሆን ዘወትር ዕለት ዕለት ያለመዘንጋት በልባችን በማስታወስ በታዘዝነው መሠረት ተዘጋጅተን በመኖር ሁለተኛ ወደ እኛ ተመልሶ የሚመጣውን ንጉሣችንን ኢየሱስ ክርስቶስን በንቃትና በናፍቆት ሆነን የምንጠብቅበት ታላቅ መልእክት የተላለፈበት ነው።

             ከጾሙ በረከት ያሳትፈን!!

             ወስብሐት ለእግዚአብሔር!

        በመ/ር ወንድምአገኝ ደጀኔ