“ከሰማዕታት እውነተኛ ምስክርነትን ልንማር ያስፈልጋል” ብፁዕ አቡነ መልከጼዴቅ

ዓመታዊው የሰማዕቱ የቅዱስ ጊዮርጊስ  ክብረ በዓል በጉራጌ ሀገረ ስብከት በአትርፎ ደብረ ወርቅ  ቅዱስ ጊዮርጊስ ካቴድራል  በድምቀት ታስቦ ውሏል።

ብፁዕ አቡነ መልከጼዴቅ የአዲስ አበባ እና የጉራጌ አህጉረ ስብከት ሊቀ ጳጳስ በበዓሉ ላይ ተገኝተው “ከሰማዕታት እውነተኛ ምስክርነትን ልንማር ያስፈልጋል” ሲሉ አባታዊ መልእክታቸውን አስተላልፈዋል።

እውነተኛ ምስክርነት የሰማዕታት የዕለት ተዕለት ተግባር እንደሆነም ጠቅሰዋል።

የሰው ልጆች በሙሉ የፈጠራቸውን እና ከዘለዓለም ሞት የታደጋቸውን አምላካቸውን እንዲያውቁ እና እንዲያምኑ ማስተማር፤ ከጣዖት እና ከሐሰት እንዲጠበቁ ማድረግ የእውነተኛ ምስክርነት መገለጫዎች እንደሆኑ አብራርተዋል።

ሰማዕትነት ራስን ለመድኃኔዓለም አሳልፎ በመስጠት እውነተኛ  አገልግሎትን ማገልገል ነው ሲሉ አክለው ገልጸዋል።

ሰማዕታት የዚህ ምድር ተድላ ሳያታልላቸው ለመለኮታዊው ሃሳብ በመቆሞ እና ሐሰትን በመቃወም መከራን የተቀበሉ ናቸው ብለዋል።

አያይዘውም ሰማዕቱ ቅዱስ ጊዮርጊስ በከሀዲዎች ነገሥታት ፊት ምንም ሳይፈራ እውነትን በመመስከር ለፈጠረው እና ላዳነው ጌታ  በመታመን ሰማዕትነትን እንደተቀበለ አስተምረዋል።

እኛም  የሰማዕታትን በዓል ማክበር ብቻ ሳይሆን ዘወትር በእምነት፣ በፍቅር እና በተስፋ በመመላለስ የተሰጠንን መንፈሳዊ አደራ በአግባቡ ልንወጣ ያስፈልጋል በማለት በአጽንኦት ተናግረዋል።

ያለንበት ዘመን ክፋት፣ ተንኮል እና ራስ ወዳድነት የነገሠበት መሆኑን አውቀን በደግነት እና በርኅራኄ መንፈስ በመመላለስ የሰማዕትነትን ሕይወት መኖር እንደሚገባን መክረዋል።

ሰማዕታት ወንጌልን በመስበክ ያለፍርሃት መከራን እና ስቃይን  እንዲቀበሉ ያደረጋቸው ምሥጢሩ ሕይወቱን አሳልፎ የሰጣቸውን መድኃኔዓለምን ከልባቸው ማመናቸው መሆኑንም አብራርተዋል።

ይህ ዓለም ጊዜያዊ እና ኃላፊ መሆኑን ተረድተን ለሰማያዊው ሕይወት ቅድሚያ በመስጠት ቃሉ በሚያዘን መሠረት በንስሐ ሕይወት ልንኖር ይገባል ሲሉም አሳስበዋል።

ብፁዕነታቸው በካቴድራሉ ግቢ ውስጥ ሊሠራ ለታቀደው 40 ሜትር ከፍታ ላለው መስቀል የመሠረት ድንጋይ ጥለዋል።

ይህም በዞኑ የመስቀል በዓልን ከዚህ በፊት ከነበረው በተሻለ መልኩ በአንድነት ተሰባስቦ እና  መንፈሳዊ ትርጉሙን በመረዳት ለማክበር እንደሚጠቅም ገልጸዋል።

ሊሠራ የታሰበው መስቀልም 10 ሚሊየን 2 መቶ ሺህ እንደሚፈጅ ተጠቅሷል።

ብፁዕነታቸው ለ 600 ዲያቆናት እና ለ20 ካህናት  ሥልጣነ ክህነትን ሰጥተዋል።

በመ/ር ወንድምአገኝ ደጀኔ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ:-
1. ድረ-ገጽ:- www.addisababa.eotc.org.et
2. ፌስ ቡክ ገጽ:- www.facebook.com/AddisAbabaDiocese/
3. ተሌ ግራም ቻናል:- t.me/AddisAbabaDiocese
4. ትዊተር :-www.Twitter.com/AddisDiocese

የኢትዮጵያው ጃንደረባ ትውልድ መንፈሳዊ ማኅበር በዋግ ኽምራ ሀገረ ስብከት ለሚገኙ ተፈናቃዮች ከግማሽ ሚልዮን ብር በላይ የሚገመት ድጋፍ አደረገ

የኢትዮጵያው ጃንደረባ ትውልድ መንፈሳዊ ማኅበር በዋግ ኽምራ ሀገረ ስብከት ለሚገኙ ተፈናቃዮች ከግማሽ ሚልዮን ብር በላይ የሚፈጅ የአልባሳት፥ የምግብና የተለያዩ የቁሳቁስ ድጋፍ አድርጓል።

ድጋፉ በአዲስ አበባ ሀገረ ስበከት ጽ/ቤት የዋግ ኽምራ ሀገረ ስብከት ተወካዮች እና የኢትዮጵያው ጃንደረባ ትውልድ መንፈሳዊ ማኅበር አባላት በተገኙበት በብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ ርክክብ ተደርጓል።

ብፁዕ አቡነ መልከጼዴቅ በርክክብ ሥነ ሥርዓቱ ላይ የኢትዮጵያው ጃንደረባ ትውልድ መንፈሳዊ ማኅበር ሥራው ከመጀመሩ አስቀድሞ ዕቅዱንና ዓላማው ወደ ሀገረ ስብከታችን አቅርቦ በማስገምገም፥  በሀገረ ስብከቱ ይሁንታና መመሪያ መሠረት እውቅና አግኝቶ መንፈሳዊ ማኅበሩ  እንደተመሠረተ ገልጸዋል።

ብፁዕነታቸው አያይዘውም የቤተ ክርስቲያኒቱ መዋቅርና ሥርዓት ጠብቀው ቤተ ክርስቲያኒቱ ማገልገል ለሚፈልጉ ሁሉ ከልክላ እንደማታውቅ በመግለጽ እንዲህ ዓይነት የበጎ አድራጎት ሥራ እንደሚያበረታቱ ተናግረዋል።

ማህበሩ ያደረገው የተቀደሰ ተግባር እጅግ የሚያስመሠግን ነው ያሉት ብፁዕነታቸው ከበጎ ሥራ ጋራ ተባበሩ በማለት በዚህ ሰዓት ሁሉም እንዲተጋገዝና ለመልካም ሥራ እጁን እንዲዘረጋ አባታዊ መልእክታቸውን አስተላልፈዋል።

ድጋፉ ለሁለተኛ ዙር በተደረገ የበጎ አድራጎት ዘመቻ ከምእመናን የተሰበሰበ መሆኑን የተነገረ ሲሆን ማኅበሩ ለወደፊትም ቢሆን እንዲህ ዓይነት መልካም ሥራ አጠናክሮ እንደሚቀጥልበት በማኅበሩ ተወካይ ተገልጿል።

ዘገባ በመ/ር ኪደ ዜናዊ
ፎቶ በመ/ር ዋሲሁን ተሾመ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ:-
1. ድረ-ገጽ:- www.addisababa.eotc.org.et
2. ፌስ ቡክ ገጽ:- www.facebook.com/AddisAbabaDiocese/
3. ተሌ ግራም ቻናል:- t.me/AddisAbabaDiocese
4. ትዊተር :-www.Twitter.com/AddisDiocese

ዜና ሕይወቱ ወዕረፍቱ ለብፁዕ አቡነ ሚካኤል ሊቀ ጳጳስ ዘኢሉባቡር (ከ1960 እስከ 2014 ዓ.ም.)

ብፁዕ አቡነ ሚካኤል ከአባታቸው ከአቶ ወልደ አምላክ ሁንዴና ከእናታቸው ወ/ሮ በላይነሽ በዲየ በቀድሞ ሸዋ ክፍለ ሀገር፤ በፍቼ ዞን በሙከጡሪ ወረዳ በበቾ ፋኒሊ ቀበሌ ልዩ ስሙ ደሴ በሚባል ቦታ በ1960 ዓ.ም ተወለዱ፡፡

መንፈሳዊ ትምህርታቸውን በታላቁ የደብረ ሊባኖስ ገዳም የጀመሩት ብፁዕነታቸው፤ በገዳሙ ከሚገኘው አንጋፋው የመምህር ገብረ ማርያም ንባብ ቤት መሠረታዊ የግእዝ ንባብ፣ በደብረ ጽጌ ገዳም ከመምህር ልዑል ቅዳሴ ቤት ገብተው የግብረ ዲቁና ትምህርታቸውን ተከታትለዋል፡፡

በተጨማሪም ከየኔታ መርዓዊ ዜና ከቃል ትምህርት ጀምረው እስከ ዐቢይ ምዕራፍ ያለውን በማጠናቀቅ ጾመ ድጓና ድጓ የተማሩ ሲሆን፤ ከመምህር ወልደ ገብርኤል ዝማሬ መዋሥዕት እንዲሁም ከአቋቋሙ መምህር ከየኔታ በትረ ማርያም ክብረ በዓል፣ መዝሙርና አርባዕት፣ ወርኃ በዓልና መኃትው፣ ስብሐተ ነግህና ኪዳን ሰላም፣ ቅንዋትና አርያም በድጋሚ ዝማሬ መዋሥዕት በሚገባ ተምረው አጠናቅቀው በመምህርነት ተመርቀዋል፡፡

በተጨማሪም ከመምህር ምሕረተ ሥላሴ የቅኔ ጉባኤ ቤት ቅኔ ተምረው የተቀኙ ሲሆን፤ በድጋሚ ከመምህር አምዴ ጉባኤ ቤት ገብተው ለሁለተኛ ጊዜ ቅኔ ተቀኝተው አገባቡን ቀጽለዋል፡፡

በታላቁ የደብረ ሊባኖስ ገዳም በመምህር ገብረ ኢየሱስ ስም በተቋቋመው የብሉያትና ሐዲሳት ትርጓሜ አዳሪ መንፈሳዊ ትምህርት ቤት፤ በብሉይ ክፍል ገብተው ለስምንት ዓመታት ትምህርታቸውን የተከታተሉ ሲሆን፤ በብፁዕ ወቅዱስ አቡነ ጳውሎስ 5ኛ የኢትዮጵያ ፓትርያርክ መልካም ፈቃድ የብሉይ ኪዳን ትርጓሜ ምክትል መምህር ሆነው አስተምረዋል፡፡

ብፁዕነታቸው ለመንፈሳዊ ትምህርት ካላቸው ፍቅር ብሉይ ኪዳኑን እያስተማሩ የሐዲስ ኪዳን ትርጓሜንና መጽሐፍተ ሊቃውንት በዚሁ በገዳሙ ተምረው ተመርቀዋል፡፡

ብፁዕ አቡነ ሚካኤል መዐርገ ዲቁናን በደብረ ጽጌ ገዳም የተቀበሉ ሲሆን፤ የአበውን ፍኖት በመከተል በታኅሣሥ 24 ቀን 1996 ዓ.ም. በደብረ ሊባኖስ ገዳም ሥርዓተ ምንኩስናን በመፈጸም በ1997 ዓ.ም. በጊዜው የሰሜን ሸዋ ሰላሌ ሀገረ ስብከት ሊቀ ጳጳስ ከነበሩት ከብፁዕ አቡነ ዮሴፍ መዐርገ ቅስናን ተቀብለዋል፡፡

ብፁዕነታቸው መንፈሳዊ ትምህርት ለመቅሰም ከነበራቸው ትጋት ባልተናነሰ መልኩ በአገልግሎታቸውም እጅግ ትጉህ፣ ምስጉንና ሰፊ አስተዋጽዖ ያበረከቱ አባት ነበሩ፡፡

ከሰጡት አገልግሎት በጥቂቱም÷ በፍቼ ሀገረ ስብከት በስብከተ ወንጌልና በትምህርት ክፍል ሓላፊነት፤ በደብረ ሊባኖስ ገዳም ካሉ የአብነት ጉባኤ ቤቶች ለተወጣጡ ከ300 ያላነሡ ደቀ መዛሙርት የመጽሐፍ ቅዱስ ጥናትና መሠረታዊ የቤተ ክርስቲያን ትምህርቶችን ተከታታይ ሥልጠና ሰጥተዋል።

በመንፈሳዊ የትምህርት መስክ ያላቸውን መክሊት ከግንዛቤ በማስገባት በሰዋስወ ብርሃን ቅዱስ ጳውሎስ መንፈሳዊ ኮሌጅ ገብተው እንዲያስተምሩ ታጭተው የነበረ ቢሆንም፤ የደብረ ሊባኖስ አባቶችና ደቀ መዛሙርት በገዳሙ እንዲቆዩላቸው በጠየቁት መሠረት በገዳሙ ቆይተው በመምህራቸው በመምህር ጥበቡ አስናቀ እግር ተተክተው ከ1997 ዓ.ም. ጀምሮ በዋና መምህርነት አስተምረዋል፡፡

የብፁዕ አቡነ ሚካኤልን አገልግሎት፣ የትምህርት ዝግጅትና መንፈሳዊ ሕይወት ተመልክቶ የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ግንቦት 10 ቀን 2009 ዓ.ም. ባደረገው ምልአተ ጉባኤ የኢሊባቡር ሀገረ ስብከተ ኤጲስ ቆጶስ ሆነው እንዲሠሩ መርጧቸው ሐምሌ 9 ቀን 2009 ዓ.ም. በብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት አንብሮተ እድ በመንበረ ጸባዖት ቅድስት ሥላሴ ካቴድራል ከሌሎች 14 አባቶች ጋር ሥርዓተ ሢመታቸው ተከናውኗል፡፡

ብፁዕነታቸው በአገልግሎታቸው ትጉህ፣ ለመንጋቸው እጅግ የሚጨነቁና በተመደቡበት የኢሊባቡር ሀገረ ስብከት ለስማቸው ሐውልት ሆነው የሚመሰክሩ ተግባራትን አከናውነዋል፡፡

ከእነዚህም መካከል በሀገረ ስብከቱ ረጅም ዘመናትን ያስቆጠሩ አብያተ ከርስቲያናትን በማሳደስ ለአገልግሎት ምቹ ያደረጉ ሲሆን፤ በተጨማሪም ማኅበረ ምእመናንን እና በጎ አድራጊዎችን በማስተባበር 14 የሚደርሱ የታላላቅ ካቴድራሎችና አድባራት ህንጻ ቤተ ክርስቲያንን አሳንጸዋል።

በሀገረ ስብከቱ በነበረው የአብያተ ክርስቲያናት በየሥፍራው አለመኖር ምእመናን የመካነ መቃብር እጦትን ጨምሮ መንፈሳዊ አገልግሎትን ለማግኘት መቸገራቸውን የተረዱት ብጹዕነታቸው፤ ችግሩ ባለባቸው አካባቢዎች 22 አዳዲስ አብያተ ክርስቲያናትን በመትከል በሀገረ ስብከቱ የሚገኙትን የአብያተ ክርስቲያናት ብዛት ወደ 373 አሳድገዋል።

ብፁዕነታቸው በሀገረ ስብከቱ ያለውን የአገልጋይ ካህናት እጥረት እና የስብከተ ወንጌል ውሱን ተደራሽነትን መቅረፍን ዐቢይ ዓላማ በማድረግ በጎ አድራጊዎችን በማስተባበር በመቱ ፈለገ ሕይወት ቅድስት ኪዳነ ምሕረት ገዳም እና ካህናት ማሰልጠኛ ማዕከል የአብነት ትምህርት ቤቶችን በማቋቋም ከየወረዳው የተወጣጡ 46 ደቀ መዛሙርት እንዲማሩ አድርገዋል።

በሀገረ ስብከቱ ላሉ ምእመናን ወንጌልን በአፋን ኦሮሞ ተደራሽ ለማድረግ አይነተኛ መፍትሔ መሆኑን የተረዱት እኚህ ደገኛ አባት፤ የካህናት ማሰልጠኛዎች እንዲጠናከሩ ደከመኝ ሰለቸኝ ሳይሉ መሠረት ጥለዋል።

ከካህናት ማሰልጠኛው በተጨማሪ ሀገረ ስብከቱን በገቢ ለማጠናከር ግምቱ ከሰማንያ ሚሊየን ብር በላይ የሚገመት ዘመናዊ ባለ 5 ፎቅ ሁለገብ ሕንጻ በማስገንባት ላይ ነበሩ።

ብጹዕ አቡነ ሚካኤል የመጻሕፍት ሊቅ በመሆናቸውና በትምህርት መስፋፋት ላይ በርትተው መሥራትን የሚመርጡ ስለነበሩ የካህናት ማሠልጠኛውን ወደ መንፈሳዊ ኮሌጅ ለማሳደግ የሕንጻ ግንባታን አስጀምረዋል።

ምእመናን በመንፈሳዊና በአስኳላ ትምህርት በሁለት በኩል የተሳሉ ሰይፍ እንዲሆኑ በማሰብም የአጸደ ሕጻናት እና የአንደኛ ደረጃ ትምህርት ቤትን በማሳነጽ የመማር ማስተማር ሂደት እንዲቀጥል አድርገዋል።

የሀገረ ስብከቱን ገቢ ለማሳደግ በመቱ ከተማ ሁለት ተጨማሪ ሕንጻዎችን በማስገንባት የቤተ ከርስቲያን መገለጫዋ የሆነውን የአካባቢ ጥበቃ በገቢ ማስገኛ አማራጭ እንደሚሆን በማቀድ የመናፈሻ ሥፍራዎችን በመቱ ከተማ በማደራጀት ተፈጥሮአዊ ሀብትን የማስጠበቅ ሥራን ሠርተዋል።

ብጹዕ አቡነ ሚካኤል ሀገራችን ኢትዮጵያ በገጠማት የሰላም እጦት ወቅት በሀገረ ስብከታቸው ባሉ አድባራትና ገዳማት ጸሎተ ምሕላ እንዲደርስ በማድረግ የሰላም ባለቤት የሆነው እግዚአብሔር ለኢትዮጵያ ሰላምን ይሰጥ ዘንድ ሲጸልዩ ቆይተዋል።

ዝም ብለው የሠሩት ሥራቸው ብዙ የሚናገርላቸው፣ እጅግ መንፈሳዊና ተሐራሚ የሆኑት ብፁዕ አቡነ ሚካኤል ቤተ ክርስቲያን የሰጠቻቸውን መክሊት በብዙ አትርፈው በአደረባቸው ህመም ምክንያት በሕክምና ሲረዱ ቆይተው ጥር 9 ቀን 2014 ዓ.ም. በ54 ዓመታቸው በዕረፍተ ሥጋ ተለይተውናል።

የቀብር ሥነ ሥርዓታቸውም ጥር 16 ቀን 2014 ዓ.ም. ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት፣ ብፁዓን አበው ሊቃነ ጳጳሳት፣ የመንበረ ፓትርያርክ ጠቅላይ ጽ/ቤትና የአዲስ አበባ ሀገረ ስብከት የሥራ ሓላፊዎች፣ የኢሉባቡር ሀገረ ስብከት ሓላፊዎችና ምእመናን በተገኙበት በደብረ ሊባኖስ ገዳም ተከናውኗል።

እግዚአብሔር አምላካችን የብፁዕ አባታችንን ነፍስ ለወዳጆቹ ቅዱሳን፣ ጻድቃንና ሰማዕታት ባዘጋጀው መካነ ዕረፍት በክብር ያሳርፍልን፣ እኛንም ያጽናን!

በብፁዕ አቡነ ሚካኤል ሊቀ ጳጳስ ሥርዓተ ቀብር ላይ የተገኛችሁትን ሁሉ በቅድስት ቤተ ክርስቲያናችን ስም እናመሰግናለን፣ ከአባታችን በረከት ይክፈልልን!!

   ምንጭ :- የኢኦተቤ ቲቪ ፌስቡክ ገጽ

” እግዚአብሔር የስስትን መንፈስ ከልባችን አስወገደልን” … ብፁዕ አቡነ ኤርምያስ

የሰሜንና የደቡብ ወሎ እንዲሁም የከሚሴ አህጉረ ስብከት ሊቀ ጳጳስ ብፁዕ አቡነ ኤርምያስ የቦሌ እና ለሚ ኩራ ክፍላተ ከተማ ቤተክህነት ጽ/ቤት ባካሄደው መንፈሳዊ ሰበካ ጉባኤ ላይ ተገኝተው ያደረጉት ንግግር ነው።

ብፁዕነታቸው በጦርነቱ ወቅት ለአምስት ወራት ገደማ በአህጉረ ስብከታቸው ከምእመናን እና ከሕዝቡ ጋር ስላሳለፉት ሁኔታዎች አስመልክተው ማብራሪያ ለጉባኤው ሰጥተዋል።

በዚያ በችግር ወቅት ምእመኑ እና ሕዝቡ አንዱ ለሌላው ሃይማኖትንና ዘርን ሳይለይ በትክክለኛ የሰብአዊነት ስሜት መድኃኒትን፣ ምግብን፣ አልባሳትን እና ገንዘብን ሲያካፍል መቆየቱን ገልጸዋል።

የቤተክርስቲያን መዋቅር በዚያ በፈተና ወቅት እንደረዳቸውም ጠቅሰዋል፤ በሀገረ ስብከት፣ በወረዳ እና በአጥብያ በካህናት አባቶች በኩል ምእመናኑን በማስተባበር የተለያዩ ድጋፎች እንደተደረጉም ጠቅሰዋል።

እግዚአብሔር የስስትን መንፈስ ከልባችን ስላስወገደልን ያለንን ነገር ሁሉ እየተካፈልን በአንድነት ያንን ክፉ ጊዜ በፍቅር አሳለፍን ሲሉ ተደምጠዋል።

አያይዘውም የቦሌ እና ለሚ ኩራ ክፍላተ ከተማ ቤተክህነት 15 ሚሊዮን የሚገመት የአልባሳት፣ የአስቤዛ እና የቁሳቁስ ድጋፍ ማድረጉን ከልብ አመስግነዋል።

ዕርዳታውም ብፁዕነታቸው በተገኙበት ጉዳት ለደረሰባቸው ወገኖች በአግባቡ መድረሱንም ለጉባኤው አረጋግጠዋል።

ዕርዳታውን ይዘው በቦታው ለተገኙት የክፍለ ከተማው ቤተክህነት የሥራ ኃላፊዎች እና ምእመናን በተጨማሪም ለክፍለ ከተማው የመንግሥት የሥራ ኃላፊዎች ምስጋና አቅርበዋል።

በአህጉረ ስብከታቸው በምእመናን እና በሕዝቡ ላይ የደረሰው ሰቆቃ እጅግ በጣም አስከፊ እና አሳሳቢ መሆኑንም ጠቅሰዋል። ትምህርት ቤቶች እና ሌሎች መሠረተ ልማቶች መውደማቸውን አብራርተዋል።

በመሆኑም ተማሪዎች ወደ ትምህርት ገበታቸው መመለስ እንዳልቻሉ ጠቅሰዋል።

ትምህርት ቤቶችን ገንብተን ተማሪዎቹን ማስቀጠል የሁላችንንም ዕርዳታ የሚጠይቅና የቤት ሥራችን ነው ብለዋል።

ሁሉም በመተባበር እና ያቅሙን ድጋፍ በማድረግ በኢኮኖሚ እና በስነ ልቦና የተጎዳውን ማኅበረሰብ ልንደርስለት ይገባል በማለት አባታዊ መልእክታቸውን አስተላልፈዋል።

ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ:-

  1. ድረ-ገጽ:- www.addisababa.eotc.org.et
  2. ፌስ ቡክ ገጽ:- www.facebook.com/AddisAbabaDiocese/
  3. ተሌ ግራም ቻናል:- t.me/AddisAbabaDiocese
  4. ትዊተር :-www.Twitter.com/AddisDiocese

“የወንጌል አገልግሎትን በማስቀደም ዘመኑን የዋጀ ሥራ ልንሠራ ይገባል” …ብፁዕ አቡነ መልከጼዴቅ

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ የቦሌ እና ለሚ ኩራ ክፍላተ ከተማ ቤተክህነት ጽ/ቤት የበጀት ዓመት የሥራ አፈጻጸምን አድንቀዋል።

ክፍለ ከተማው ያከናወናቸውን ሥራዎች እና የገጠሙትን ተግዳሮት በመጽሔት አሳትሞ ለአድባራቱና ለገዳማቱ ለንባብ ማብቃቱም ለቀጣይ ሥራዎች ትልቅ መነሣሣትን የሚፈጥር ነው ብለዋል።

ብፁዕነታቸው የክፍለ ከተማው ዋና ሥራ አስኪያጅ መልአከ ብርሃን ሩፋኤል የማነብርሃን በበጀት ዓመቱ ያሳዩት ቆራጥ አመራር የሚበረታታ መሆኑን ገልጸዋል።

የክፍለ ከተማው ቤተክህነት ጽ/ቤት ድረስ በመሄድ የአሠራር ሂደቱን በተለያያ ጊዜ  እንደተመለከቱም ጠቅሰዋል።

በወንጌል አገልግሎት እና በልማት በኩል ጥሩ ሥራዎች እየተሠሩ መሆኑን አንስተዋል።

አያይዘውም በሰሜኑ ክፍል በጦርነት ምክንያት ለተፈናቀሉ እና ለተጎዱ ወገኖች ክፍለ ከተማው ዕርዳታ ማድረጉ መንፈሳዊ ኃላፊነቱን እየተወጣ መሆኑን የሚገልጽ ነው ብለዋል።

ሁሉም የቤተክርስቲያን አገልጋይ በንቃትና በሥራ ወዳድነት መንፈስ ኃላፊነቱን ከተወጣ በቤተክርስቲያን ላይ የሚታየውን የሥራ ክፍተትና የሚሰነዘረውን ትችት ሙሉ በሙሉ ማስወገድ ይቻላል ሲሉ ገልጸዋል።

ለዚህም ደግሞ የወንጌል አገልግሎትን በማስቀደም ዘመኑን የዋጀ ሥራ ልንሠራ ይገባል በማለት አባታዊ መልእክታቸውን አስተላልፈዋል።

ክፍለ ከተማው የተፈናቀሉትንና የተጎዱትን የመርዳት መርሐግብርንም  አጠናክሮ መቀጠል እንዳለበት አጽንኦት ሰጥተው ገልጸዋል።

አክለውም ወደፊት ክፍለ ከተማው በሁሉም በተሰጡት የሥራ መስኮች የበለጡ ሥራዎችን በትጋት እንዲያከናውን አሳስበዋል።

ሌሎቹም  ክፍላተ ከተማ ከቦሌ እና ለሚ ኩራ ክፍላተ ከተማ ቤተክህነት በመማር የተጎዱትን እንዲያግዙ አጽንኦት ሰጥተው መልእክት አስተላልፈዋል።

በመጨረሻም በቦሌ እና ለሚ ኩራ ክፍላተ ከተማ የሚገኙ አድባራትና ገዳማት ከክፍለ ከተማው ጋር ተናበው ላስመዘገቡት ውጤት ምስጋና አቅርበዋል።

ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ:-
1. ድረ-ገጽ:- www.addisababa.eotc.org.et
2. ፌስ ቡክ ገጽ:- www.facebook.com/AddisAbabaDiocese/
3. ተሌ ግራም ቻናል:- t.me/AddisAbabaDiocese
4. Twitter.com/AddisDiocese

የቦሌ እና ለሚ ኩራ ክፍላተ ከተማ ቤተክህነት ጽ/ቤት በሥሩ ካሉት አድባራትና ገዳማት ጋር በመሆን የሰበካ መንፈሳዊ ጉባኤን እያካሄደ ይገኛል!

በኢትዮጵያ ኦርቶዶክስ ተዋሕዶ ቤ/ክ በአዲስ አበባ ሀገረ ስብከት የቦሌ እና ለሚ ኩራ ክፍላተ ከተማ ቤተክህነት ጽ/ቤት በሥሩ ካሉት አድባራትና ገዳማት ጋር በመሆን የሰበካ መንፈሳዊ ጉባኤን አካሄደ።

ብፁዕ አቡነ መልከጼዴቅ የአዲስ አበባ እና የጉራጌ አህጉረ ስብከት ሊቀ ጳጳስ፤ የሰሜንና የደቡብ ወሎ እንዲሁም የከሚሴ አህጉረ ስብከት ሊቀ ጳጳስ ብፁዕ አቡነ ኤርምያስ ጉባኤውን በጸሎት ከፍተዋል።

ጉባኤው የተካሄደው በቦሌ ደብረ ሳሌም መድኃኔዓለም ካቴድራል የስብከተ ወንጌል አዳራሽ ነው።በካቴድራሉ ሊቃውንት እና የሰንበት ት/ቤት ወጣቶች ያሬዳዊ ዝማሬ ቀርቧል።

መልአከ ብርሃን ሩፋኤል የማነብርሃን የክፍለ ከተማው ቤተክህነት ዋና ሥራ አስኪያጅ ብፁዓን ሊቃነ ጳጳሳትን ጨምሮ በጉባኤው ላይ የተገኙትን በሙሉ “የእንኳን ደህና መጣችሁ” መልእክት አስተላልፈዋል።

ክቡር ዋና ሥራ አስኪያጁ ጠቅለል ባለ መልኩ “የ2013 ዓ.ም የበጀት ዓመት የሥራ አፈጻጸም ሪፖርትን” በተመለከተ ገለጻ አድርገዋል።

የጉባኤው ዋና ዓላማ በክፍላተ ከተማው ሥር ባሉት አድባራትና ገዳማት ስለተሠሩ ሥራዎች እና ላደረጉት አስተዋጽኦ የሚገባቸውን ሽልማት እና ምሥጋና ለማቅረብ፤ ሲቀጥልም ከዚህ የበለጠ እንዲሠሩ ለማበረታት እንደ ሆነ አብራርተዋል።

ክፍላተ ከተማው በልማት በኩል እድገት እያሳየ መሆኑን፣ የተቸገሩትን አብያተክርስትያናትንና በጦርነት ምክንያት ጉዳት የደረሰባቸውን ምእመናንን በመርዳት ላይ እንደሚገኝ ጠቅሰዋል።

የአዲስ አበባና የጉራጌ አህጉረ ስብከት ሊቀጳጳስ ብፁዕ አቡነ መልከጼዴቅ የክፍለ ከተማውን የአሠራር ሂደት በተለያያ ጊዜ በመጎብኘትና አመራር በመስጠት ያደረጉት አስተዋጽኦ ለክፍለ ከተማው ውጤታማነት ትልቅ ድርሻ እንዳለው ገልጸዋል።

ክቡር ዋና ሥራ አስኪያጁ የሰሜንና የደቡብ ወሎ እንዲሁም የከሚሴ አህጉረ ስብከት ሊቀ ጳጳስ ብፁዕ አቡነ ኤርምያስ በጦርነቱ ወቅት ለምእመናን ያሳዩትን በጎነት አውስተው በጉባኤው ስም አመስግነዋቸዋል።

በበጀት ዓመቱ 91 ሚሊዮን ብር በክፍለ ከተማው ካሉት አድባራትና ገዳማት መሰብሰቡን የክፍለ ከተማው ፋይናንስ እና በጀት ክፍል ኃላፊ መ/ር ወንድወሰን ስለሺ ጠቅሰዋል።

ክፍለ ከተማው በመንፈሳዊ አገልግሎት እና በልማት ሥራ በኩል ውጤት ላስመዘገቡት አድባራትና ገዳማት ከአንደኛ አስከ አራተኛ ደረጃ በማውጣት የመጽሐፍ ቅዱስ ስጦታ እና የምስክር ወረቀት አበርክቷል።

ለብፁዕ አቡነ መልከጼዴቅና ለብፁዕ አቡነ ኤርምያስ መጽሐፍ ቅዱስና ምእመናንን የሚባርኩበት የመስቀል ስጦታ ተበርክቶላቸዋል።

በተያያዘም በሁለቱ ክፍላተ ከተማ ከሰላምና ፀጥታ ጋር በተያያዘ በተጨማሪም የቤተክርስቲያንን ይዞታን በማስከበር በኩል አስተዋጽኦ ላበረከቱ ለመንግሥት የሥራ ኃላፊዎች የመጽሐፍ ቅዱስና የምስክር ወረቀት ተሰጥቷል።

የመጽሐፍ ቅዱሱን ስጦታ ያበረከቱት የኢትዮጵያ መጽሐፍ ቅዱስ ማኅበር ዋና ጸሐፊ ሊ/ኅ ይልማ ጌታሁን እንደሆኑ ተገልጿል።

አጠቃላይ መርሐ ግብሩን መ/ጥ ሰሎሞን ንጉሤ የክፍለ ከተማው የስብከተ ወንጌልእና ሐዋርያዊ ተልዕኮ ክፍል ኃላፊ መርተዋል።

የክፍለ ከተማው ዋና ሥራ አስኪያጅ መርሐ ግብሩ ባማረ መልኩ እንዲዘጋጅ ትብብር ያደረጉትን የቦሌ ደብረ ሳሌም መድኃኔዓለም ካቴድራል እና የደብረ ጽጌ ዑራኤል የሥራ ኃላፊዎችን ጨምሮ ሁሉንም አመስግነዋል።

በጉባኤው ላይ ብፁዕ አቡነ መልከጼዴቅ እና ብፁዕ አቡነ ኤርምያስ የሚያደርጉትን ንግግር ከቆይታ በኋላ የምንዘግብ መሆኑን እናሳውቃለን።

ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ፣ like እና Join በማድረግ ይቀላቀሉ፣ ለሌሎችም ሼር ያድርጉ!!!

  1. ድረ-ገጽ:- www.addisababa.eotc.org.et
  2. ፌስ ቡክ ገጽ:- አዲስ አበባ ሀገረ ስብከት/Addis Ababa Diocese
  3. ተሌ ግራም ቻናል:- t.me/AddisAbabaDiocese

የኢትዮጵያ ሃይማኖት ተቋማት ጉባኤ ወይብላ ቅድስት ማርያም ቤተክርስቲያን ላይ የተፈጸመውን አስነዋሪ ድርጊት እንደሚያወግዝ አስታወቀ!!!

የኢትዮጵያ ሃይማኖት ተቋማት ጉባኤ በጥምቀት በዓል ላይ በቡራዩ ከተማ አስተዳደር የተፈጸመውን ሕገወጥ ድርጊት በመቃወም መግለጫ አወጥቷል።

ጉባኤው በመግለጫው ሃይማኖቶች የትህትና፣ የሰላምና የአንድነት፣ የፍቅርና መከባበር መሠረቶች ናቸው ብሏል።

የኢትዮጵያ ኦርቶዶክስ ተዋሕዶ ቤተ ክርስቲያን ለዘመናት የሰላም መሠረት ሆና ዘልቃለች ያለው የጉባኤው መግለጫ ከቅርብ ጊዜ ወዲህ ሃይማኖትን ሽፋን አድርገው ግጭት ለመፍጠር የሚንቀሳቀሱ ኃይሎችን አጥብቀን እንቃወማለን ነው ያለው።

ጥር 12 ቀን 2014 ዓ.ም በቡራዩ ከተማ አስተዳደር በሕግ ማስከበር ሽፋን በቤተ ክርስቲያኗ ላይ የተቃጣው ድርጊት ፍጹም ሕገ ወጥ ነው ያለው መግለጫው መንግሥት አጥፊዎችን ተከታትሎ ለሕግ እንዲያቀርብም ጠይቋል።

መንግሥት የሃይማኖትን እና የዜጎችን ሰላም እና ደኅንነት የማስጠበቅ ኃላፊነቱን እንዲወጣ የጠየቀው የጉባኤው መግለጫ የሕይወት፣ የአካል እና የመንፈስ ስብራት በደረሰባቸው ወገኖች የተሰማንን ጥልቅ ሐዘንም በተሰበረ ልብ እንገልፃለን ሲል በፌስቡክ ገጹ አስታውቋል።

በመ/ር ሽፈራው እንደሻው

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ፣ like እና Join በማድረግ ይቀላቀሉ፣ ለሌሎችም ሼር ያድርጉ!!!

  1. ድረ-ገጽ:- www.addisababa.eotc.org.et
  2. ፌስ ቡክ ገጽ:- አዲስ አበባ ሀገረ ስብከት/Addis Ababa Diocese
  3. ተሌ ግራም ቻናል:- t.me/AddisAbabaDiocese

“እየተፈጠረብን ያለውን ችግር ለመፍታት ቅዱስ ሲኖዶስ አስፈላጊውን ሁሉ ያደርጋል” …ብፁዕ አቡነ መልከጼዴቅ

የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅ በማኅደረ መለኮት ወይብላ ቅድስት ማርያም ቤተ ክርስቲያን ተገኝተው እየተፈጠረብን ያለውን ችግር ለመፍታት ቅዱስ ሲኖዶስ አስፈላጊውን ሁሉ ያደርጋል” ሲሉ  አስታወቁ።

ብፁዕነታቸው በቦታው ተገኝተው ሕዝበ ክርስቲያኑን  ያፅናኑ እና ቡራኬ የሰጡ ሲሆን እየተፈጠሩ ያሉ ዘርፈ ብዙ ችግሮች እስከ ሕይወት መስዋዕትነት እያስከፈለ የሚገኝ መሆኑን ገልጸዋል።

የተፈጠረውን ችግር ለቅዱስ ሲኖዶስ ጽ/ቤት ሪፖርት ማድረጋቸውን በመግለፅ ቅዱስ ሲኖዶስ አስፈላጊውን ሁሉ እንደሚያደርግ ብፁዕነታቸው አስታውቀዋል።

አክለውም ብፁዕነታቸው ምዕመናን አንድነታቸውንና ኅብረታቸውን በማጠናከር ጥያቄዎቻቸውን በሰላማዊ መንገድ ማቅረብ እንዳለባቸው አሳስበዋል።

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ፣ like እና Join በማድረግ ይቀላቀሉ፣ ለሌሎችም  ሼር ያድርጉ!!!

1. ድረ-ገጽ:- www.addisababa.eotc.org.et
2. ፌስ ቡክ ገጽ:- www.facebook.com/AddisAbabaDiocese/
3. ተሌ ግራም ቻናል:- t.me/AddisAbabaDiocese

ሰው በመገደሉና በዓሉ በተገቢው ባለመከበሩ መንግሥት በጥልቅ ማዘኑን ይገልጻል…የመንግሥት ኮሙኒኬሽን አገልግሎት

ኢትዮጵያ በዓለም ደምቃ እንድትታይ ከሚያደርጓት በዓላት መካከል አንዱ የሆነው የጥምቀት በዓል በመላ ሀገሪቱ በደማቅ ሁኔታ ተከብሮ አልፏል።

በበዓለ ጥምቀቱ የታዩት ሃይማኖታዊ፣ ባህላዊና ማኅበራዊ ዕሴቶች በዓሉ የኢትዮጵያውያን ለዘመናት የዘለቀ ውብ አብሮነትንም ለዓለም ያሳየ ሆኗል።

በዓሉ የኢትዮጵያውያንን መፋቀር፣ ኅብረ ብሔራዊ አንድነትና ሰላም በሚገልጽ መንገድ እንዳይከበር የተለያዩ አካላት የሸረቧቸውን ሤራዎች ሕዝቡና የጸጥታ አካላት ተናብበውና ተቀናጅተው አክሽፈውታል።

ኢትዮጵያ የምታስተናግዳቸው ታላላቅ ዓለም አቀፋዊ ክንውኖች ከፊታችን አሉ። እነዚህ ክንውኖች እንዳይሳኩ የኢትዮጵያን ገጽታ ማበላሸት የፈለጉ አካላት የጥምቀትን በዓል በመረበሽ ተልኳቸውን ለማሳካት ሞክረው ነበር፣ ነገር ግን አልተሳካላቸውም።

የሀገራቸውን ጥሪ ተቀብለው የመጡት በውጭ የሚኖሩ ኢትዮጵያውያንና ትውልደ ኢትዮጵያውያንም የማኅበራዊ መስተጋብሩ አካል በመሆን በተለያዩ አካባቢዎች ተገኝተው በዓሉን አድምቀዋል።

የጥምቀት በዓል ከመንፈሳዊ በዓልነቱ ባሻገር ለኢትዮጵያውያን የእርስ በርስ ግንኙነት፣ ለቱሪዝም መስሕብነትና ኢትዮጵያን ለዓለም በማሳየት ታላቅ ሚና አለው። በዚህም የተነሣ ከበዓሉ ቀደም ብሎ በተደረገ ሁሉን አቀፍ ዝግጅት የሃይማኖት አባቶች፣ የአካባቢው መስተዳድር አመራሮች፣ የጸጥታ አካላትና ወጣቶች በጋራ በመሥራት በዓሉ በአብዛኛው በሰላም ተጀምሮ እንዲጠናቀቅ ለማድረግ ተችሏል።

የጥምቀት በዓል በመላ ኢትዮጵያ በደመቀና በሰላማዊ መንገድ ቢከበርም በአዲስ አበባ ኮልፌ ቀራንዮ ክፍለ ከተማ እና በቡራዩ አዋሳኝ ወይ ብላ ማርያም ቤተክርስቲያን አካባቢ በተፈጠረው ችግር በዓሉ መስተጓጎሉና በሰዎች ላይም ሞትና ከባድ ጉዳት መድረሱ ታውቋል።

በዓሉ በተገቢው መንገድ ባለመከበሩ፣ እንዲሁም በደረሰው የሰው ሕይወት መጥፋትና የአካል ጉዳት መንግሥት የተሰማውን ጥልቅ ኀዘን ይገልፃል። መንግሥት በስፍራው የተፈጠረውን ክሥተት በማጣራት ለድርጊቱ ተጠያቂ የሆኑ አካላትን ለሕግ እንደሚያቀርብ ያስታውቃል።

ለዘመናት የኢትዮጵያዊነታችን መገለጫ እንዲሁም የጠንካራ ማኅበራዊ መስተጋብራችን ማሳያ በሆኑ እንደ ጥምቀት በዓል ያሉ ሀብቶቻችንን ለማደብዘዝ የሚደረግ ማንኛውም ጥረት በሁሉም ኢትዮጵያዊ ትብብር ይከሽፋል ሲል የመንግሥት ኮሙኒኬሽን አገልግሎት መግለጫ አውጥቷል።

        በተክለሃይማኖት አዳነ ጋዜጠኛ

ለተጨማሪ መረጃ የሀገረ ስብከቱን ማኅበራዊ ድረ-ገጾችን ይጎብኙ፣ like እና Join በማድረግ ይቀላቀሉ፣ ለሌሎችም  ሼር ያድርጉ!!!

1. ድረ-ገጽ:- www.addisababa.eotc.org.et
2. ፌስ ቡክ ገጽ:- www.facebook.com/AddisAbabaDiocese/
3. ተሌ ግራም ቻናል:- t.me/AddisAbabaDiocese

በቀራንዮ መድኃኔ ዓለም ቤተ ክርስቲያን በጊዜያዊነት ያረፉት የወይብላ ቅድስት ማርያምና ታቦተ ሚካኤል ወደ መንበረ ክብራቸው በመመለስ ላይ ይገኛሉ!!!

በመንግሥት የጸጥታ አካላትና በወጣቶች መካከል በተፈጠረው አለመግባባት የተነሣ ወደ ኋላ ተመልሰው ቀራንዮ መድኃኔ ዓለም ቤተ ክርስቲያን በጊዜያዊነት ያረፉት የወይብላ ቅድስት ማርያምና ታቦተ ቅዱስ ሚካኤል ወደ መንበራቸው ክብራቸው በመመለስ ላይ ይገኛሉ።

የአዲስ አበባ እና የጉራጌ አህጉረ ስብከት ሊቀ ጳጳስ ብፁዕ አቡነ መልከ ጼዴቅ የተፈጠረውን ችግር በማረጋጋትና ምእመናንንም በማጽናናት ታቦታቱን ወደ መንበረ ክብራቸው የመመለስ ጉዞውን እየመሩ ይገኛሉ።

የሀገረ ስብከቱ ዋና ሥራ አስኪያጅ ሊቀ ጉባኤ ቆሞስ አባ ተክለሃይማኖት ወልዱ: የሀገረ ስብከቱና የክፍለ ከተማው የሥራ ኃላፊዎች እንዲሁም እጅግ በርካታ ኦርቶዶክሳዊ ምእመናን በቦታው ተገኝተዋል።

የተፈጠረውን አለመግባባት ምክንያትና በክስተቱ የደረሰውን አጠቃላይ ጉዳት አስመልክቶ ጉዳዩ የሚመለከታቸው የአዲስ አበባ ሀገረ ስብከትና ሌሎች የቤተ ክርስቲያናችን ክፍሎች የሚሰጡትን ዝርዝር መረጃ ተከታትለን ከቆይታ በኋላ የምናቀርብ ይሆናል።

በመ/ር ሽፈራው እንደሻው