ብፁዕ አቡነ መልከጼዴቅ የአዲስ አበባ ሀገረ ስብከት ጽ/ቤት በአሮጌ ቄራ ሊገነባው ያቀደው ባለ 3B+ G+15 ሕንጻ ግንባታ ባርከው አስጀመሩ

የአዲስ አበባና የጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅ የአዲስ አበባ ሀገረ ስብከት ጽ/ቤት በአሮጌ ቄራ ሊገነባው ያቀደው ባለ 3B + G+ 15 ሕንጻ ግንባታው በጸሎት ባርከው አስጀምረዋል።
ብፁዕነታቸው ሕንጻው ለቤተ ክርስቲያን ዘርፈ ብዙ ጥቅም ያለውና በብዙ ምእመናን በጉጉት የሚጠበቅ መሆኑን በመጥቀስ ግንባታው እንዲፋጠን ትእዛዝ ሰጥተዋል።
ሕንጻው ተጠናቅቆ ሥራውን ጀምሮ ማየት የሚናፍቅ ብዙ ነው ያሉት ብፁዕ ሊቀ ጳጳሱ ይህን እውን ለማድረግ የግንባታው ቁፋሮ ከተጀመረበት ቀን ጀምሮ ሕንጻው እስኪጠናቀቅ ድረስ ሥራው ያለ ምንም መቋረጥ እንዲቀጥል አሳስበዋል።
የሚገነባው ሕንጻ ከ70 በላይ ፓርክ ያለው ሲሆን ብፁዕነታቸው ግንባታው ሲጠናቀቅ በሕጻው ጫፍ የምትገኘው ባለ ሁለት ወለል ፔንት ሀውስ ለሀገረ ሰብከቱ መንበረ ጵጵስና ሆኖ እንደሚያገለግልና ሀገረ ስብከቱ ከፐርሰት ውጪ የራሱ የሆነ የገቢ ምንጭ እንዲኖረው የሚያስችል መሆኑን ባለፈው ወር መግለጻቸው የሚታወስ ነው ።
የሕንጻው መሠረተ ድንጋይ ባለ 10 ፎቆ ( G+ 10) ሁለገብ ሕንጻ በሚል በግንቦት 2010 ዓ/ም በብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት የተጣለ መሆኑን ይታወሳል።
በመርሐ ግብሩ መ/ር አካለ ወልድ ተሰማ የአዲስ አበባ ሀገረ ስብከት ዋና ሥራ አስኪያጅ፣ መ/ር ታዴዎስ ሽፈራው የሀገረ ስብከቱ ዋና ጸሐፊ፣ መጋቤ ሐዲስ ለማ በየነ የሀገረ ስብከቱ የሥነ-ምግባር ዋና ክፍል ኃላፊ እና ሌሎች ሠራተኞች ተገኝተዋል።
ዘጋቢ መ/ር ኪደ ዜናዊ
ፎቶ በመ/ር ዋሲሁን ተሾመ

ብፁዕ አቡነ መልከጼዴቅ በርእሰ አድባራት እንጦጦ መንበረ ፀሐይ ቅድስት ማርያም ቤተ ክርስቲያን የተጠናቀቁ ሦስት ፕሮጀክቶችን መርቀው ለአገልግሎት ክፍት አደረጉ፡፡

በአራዳ ክፍለ ከተማ ቤተ ክህነት ሥር በምትገኘው ርእሰ አድባራት እንጦጦ መንበረ ፀሐይ ቅድስት ማርያም ቤተ ክርስቲያን በበጀተ ዓመቱ በደብሩ ሰበካ ጉባኤ ጽ/ቤት፡ በበጎ አድራጊ ኦርቶዶክሳውያንና በማኅበረ ካህናቱ የጋራ ትብብር የተጠናቀቁ ሦስት ፕሮጀክቶች በአዲስ አበባና ጉራጌ አህጉረ ስብከት ሊቀ ጳጳስ በብፁዕ አቡነ መልከጼዴቅ ተመርቀዋል፡፡
ከሦስቱ ፕሮጀክቶች መካከል አንዱ የሆነውና በደብሩ ካህናት የአንድ ወር ደመወዝ ስጦታ የታደሰው የዳግማዊ አፄ ምኒልክ ቤተ መንግሥት በብፁዕነታቸው ተመርቆ ለድጋሚ አገልግሎት ክፍት ተደርጓል፡፡
ባለ ሳር ክዳኑ የዳግማዊ አጼ ምኒልክ ቤተ መንግሥት የንጉሡን እልፍኝ ጨምሮ የእንግዳ መቀበያና ማረፊያ እንዲሁም የንጉሥ የግብር ማብያን ያካተተ እና 138 ዓመታትን ያስቆጠረ ታሪካዊ ቤተ መንግሥት መሆኑም ተገልጿል፡፡
ይህ ጥንታዊ ቤተመንግሥት ለበርካታ ዓመታት ዕድሳትና ጥገና ስላልተደረገለት ታሪካዊ ማንነቱን ከማጣቱ በፊት ለኢትዮጵያ ቅርስ ጥናትና ጥበቃ ባለሥልጣንና ለአዲስ አበባ ባህል፡ ኪነ ጥበብና ቱሪዝም ቢሮ ተደጋጋሚ ጥያቄ ቢቀርብ መልስ ባለመገኘቱ በደብሩ ሰባካ ጉባኤና በማኅበረ ካህናቱ የጋራ ትብብር ከሰባት መቶ ሽህ ብር በላይ በሆነ ወጭ ዕድሳት እንደተደረገለት በደብሩ ዋና ጸሐፊ መጋቤ ጥበብ ምሥጋናው አዳሙ የቀረበው ሪፖርት ያመላክታል፡፡
ከዚህም በተጨማሪ በ1870 ዓ.ም በዳግማዊ አፄ ምኒልክና በእቴጌ ጣይቱ ብጡል መቃኞ ቤተ ክርስቲያኑ ተመሠርቶ በ1879 ዓ.ም ዋናው ቤተክርስቲያን እንደተሠራ የሚነገርለትን ደብር ደረጃውን በጠበቀ መልኩ የመብራት፡ የቀለምና የምንጣፍ የውስጥ ዕድሳት በበጎ አድራጊ ኦርቶዶክሳውያን መደረጉን አስረድተዋል፡፡
ለረጅም ዓመታት አገልግሎት ሲሰጥ የነበረው ጥንታዊው መንበርም ራሱን የቻለ ቤት በቅጥር ግቢው ውስጥ ተሠርቶለት በቅርስነት በክብር ተቀምጦ እንዳለ በጉብኝቱ ወቅት ለማወቅ ተችሏል፡፡
የደብሩ አስተዳዳሪ መልአከ ፀሐይ ቆሞስ አባ ኪዳነ ማርያም ዮሴፍ በምጣኔ ሀብት ራስን የመቻልና የመለወጫ ምስጢሩ ልማት መሆኑን
ተገንዝበንና በጋራ ለማልማት ወስነን በደብሩ ስም ከሚተዳደረው 90 ሽህ ካሬ ቦታ ለልዩ ልዩ አገልግሎትና ለመኖሪያ ቤት የሚውሉ 11 ክፍል ቤቶች በ8 ወራት ውስጥ ሠርተን ለኪራይ ዝግጁ አድርገናል ይህም በዚህ ዓመት ካሳካናቸው ፕሮጀክቶች ሦስተኛው ነው ብለዋል፡፡
አያይዘውም በዚህ መንፈሳዊ ተግባር ውስጥ ባለመሰልቸትና ባለመድከም በገንዘብ፡ በሐሳብ፡በጸሎትና በልዩ ልዩ ሙያ አስተዋጾኦ የታሪክ አሻራቸውን ያኖሩትንና የደከሙትን ሁሉ አመስግነዋል፡፡
ያየነው ነገር እጅግ አስደናቂና አስደሳች ነው፡ንጹሐ ባሕርይ ለሆነው እግዚአብሔር ንጹሕ የማምለኪያ ሥፍራ ያስፈልገዋል ብላችሁ በዘመን ብዛት ያረጀውን ቤተ መቅደስ ያደሳችሁና የታሪክ ማማችን የሆነውን ቤተ መንግሥት ጥንተ ክብሩ የጠበቃችሁ ሁሉ ምሥጋና ይገባችኀል ያሉት ደግሞ የሀገረ ስብከቱ ዋና ሥራ አስኪያጅ መ/ር አካለወልድ ተሰማ ናቸው፡፡
የጉራጌ አህጉረ ስብከት ሊቀ ጳጳስ ብፁዕ አቡነ መልከ ጼዴቅ ተግባራዊ ሥራ በቃል ከመናገር በላይ መሆኑን ገልጸው ወደፊትም በዚሁ ሂደት እንዲቀጥል አሳስበዋል፡፡
በመርሐ ግብሩ የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅን ጨምሮ፡ የሀገረ ስብከቱ ዋና ሥራ አስኪያጅ መ/ር አካለ ወልድ ተሰማ፡ የጠቅላይ ቤተ ክህነት፡የአዲስ አበባ ሀገረ ስብከት እና የአራዳ ክፍለ ከተማ ቤተ ክህነት የሥራ ኃላፊዎች እንዲሁም የደብሩ አስተዳዳሪ መልአከ ፀሐይ ቆሞስ አባ ኪዳነ ማርያም ዮሴፍ፡ጥሪ የተደረገላቸው እንግዶችና በርካታ ኦርቶዶክሳዊ ምዕመናን ተገኝተዋል፡፡
ዘጋቢ:- መ/ር ሽፈራው እንደሻው
ፎቶ፡- በመ/ር ዋሲሁን ተሾመ

“በሥራ ለተተረጎመ ቦታ በቃል ብዙ ማውራት አስፈላጊ አይደለም “…ብፁዕ አቡነ መልከ ጼዴቅ

የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከ ጼዴቅ በርእሰ አድባራት እንጦጦ መንበረ ፀሐይ ቅድስት ድንግል ማርያም ቤተ ክርስቲያን በበጀተ ዓመቱ የተሠሩ የልማት ሥራዎችንና የንጉሡን ቤተ መንግሥትና የቤተ ክርስቲያኑን ውስጣዊ ክፍል ታሪካዊ ይዘቱን በጠበቀ መልኩ የተደረገውን ዕድሳት በመረቁበት ወቅት ያስተላለፉት መልእክት ነው፡፡
ብፁዕነታቸው በገዳሙ የሰበካ ጉባኤ ጽ/ቤት አስተባባሪነት በደብሩ ካህናትና በበጎ አድራጊ ኦርቶዶክሳውያን የጋራ ትብብር ተሠርተው የተጠናቀቁ የልማት ሥራዎችን፡ በሁለት ወራት ጊዜ ውስጥ የተጠናቀቀውን የቤተ ክርስቲያኑን ውስጣዊ ክፍሎችና የቤተ መንግሥቱን የዕድሳት ሥራ ተዘዋውረው ጎብኝተዋል፡፡
የቡራኬና ጉብኝት መርሐ ግብር መጠናቀቁን ተከትሎ ባደረጉት ንግግር ርእሰ አድባራት እንጦጦ መንበረ ፀሐይ ቅድስት ድንግል ማርያም ቤተ ክርስቲያን በደገኛው ንጉሥ በዳግማዊ አፄ ምኒልክ ከተመሠረቱ ጥንታዊ አብያተ ክርስቲያናት መካከል አንዷ መሆኗን አብራርተዋል፡፡
በአጭር ጊዜ ውስጥ በዚህ ጥንታዊና ታሪካዊ ቤተ ክርስቲያን ከተሠሩ የልማት ሥራዎች ባሻገር የንጉሡን ቤተ መንግሥትና የገዳሙን ውስጣዊ ክፍል ታሪካዊ ይዘቱን በጠበቀ መልኩ የተደረገው ዕድሳት በእጅጉ እንዳስደሰታቸው ገልጸው፡ በሥራ ለተተረጎመ ቦታ በቃል ብዙ ማውራት አስፈላጊ አይደለም ብለዋል፡፡
የቦታውን ታሪካዊነት ሲያስረዱም ዳግማዊ አፄ ምኒልክ ቤተ መንግሥታቸውን ከዚሁ ሥፍራ መሥርተው የዛሬይቱን የኢትዮጵያ ርእሰ መዲና ቁልቁል በማየት አዲስ አበባ የሚል ስያሜ የሰጡበት ቦታ መሆኑንም ጠቁመዋል፡፡
አክለውም እዚህ ያለውን ከፍተኛ ቅዝቃዜ ተቋቁማችሁ ታሪካዊውን ሥፍራ እየጠበቃችሁ የምታገለግሉ አገልጋዮች እና አገልግሎቱን የምትደግፉ ሕዝበ ክርስቲያን በእጅጉ እናከብራችኀለን፡ በማለት አድናቆታቸውን ገልጸዋል፡፡
በመጨረሻም ደብሩ በጥናት ላይ የተመሠረተ ጥያቄ ካቀረበ የአዲስ አበባ ሀገረ ስብከት በሚቻለው ሁሉ ለመደገፍ ዝግጁ መሆኑን አረጋግጠዋል፡፡
የኢትዮጵያ ኦርቶዶክስ ተዋሕዶ ቤተ ክርስቲያን የታሪክ ምልክትና መነሻ የሆነውን ታሪካዊ ቤተ ክርስቲያንም በመጠበቅና በመንከባከብ ረገድ ሁሉም ኦርቶዶክሳዊ የበኩሉን እንዲወጣም አባታዊ ጥሪና መመሪያ አስተላልፈዋል፡፡
ዘጋቢ፡-መ/ር ሽፈራው እንደሻው
ፎቶ፡-በመ/ር ዋሲሁን ተሾመ

“ከሰው የሚጠበቀው ማመንና መታዘዝ ነው” ብፁዕ አቡነ መልከጼዴቅ

የሊቀ መላእክት ቅዱስ ገብርኤል ዓመታዊ ክብረ በዓል በቦሌ ክፍለ ከተማ በተለምዶ 24 በሚባለው አካባቢ በሚገኘው በምዕራፈ ሰማዕታት ቅዱስ ገብርኤልና አርሴማ ቤተ ክርስቲያን በድምቀት ተከብሮ ውሏል፡፡
የአዲስ አበባና የጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅ ክብረ በዓሉን የተመለከተ ትምህርት አስተላልፈዋል።
የሕጻን ቅዱስ ቂርቆስንና የእናቱን የቅድስት እየሉጣን የእምነት ጽናት አብራርተዋል።
በሕይወታቸውና በልባቸው ውስጥ ሰማያዊውን ንጉሥ ስላነገሡ ምድራዊው ንጉሥ በወታደሮቹ ያስጣደውን የፈላ የጋን ውኃና እንደ ክረምት ነጎድጎድ የሚጮኸውን ድምጽ አልፈሩም ብለዋል።
ለንጉሡ ጣዖት ባለመስገድም ፈጣሪያቸውን እግዚአብሔርን አክብረዋል ሲሉ ገልጸዋል።
መልአኩ ቅዱስ ገብርኤል ከእግዚአብሔር ተልኮ በመምጣት ፈጣን ተራዳኢ መልአክ መሆኑን አብራርተዋል።
እግዚአብሔር እውነተኛና የታመነ አምላክ ስለሆነ በእርሱ የሚታመኑትን ዘወትር ከክፉ ነገር ይጠብቃቸዋል ብለዋል።
አያይዘውም “ከሰው የሚጠበቀው ማመንና መታዘዝ ነው” ሲሉም አጽንዖት ሰጥተዋል።
በቅዱስ ቂርቆስና በቅድስት ኢየሉጣ ሕይወትም የተመለከትነው ይህንኑ እውነት ነው ሲሉ አብራርተዋል።
እንደ ቅዱስ ቂርቆስና ቅድስት ኢየሉጣ በእግዚአብሔርና በሰዎች ፊት በጽኑ እምነት መመላለስ አለብን ብለዋል።
በዚህ ቤተ ክርስቲያን የቅዱስ ቂርቆስንና የቅድስት ኢየሉጣን ክብረ በዓል ብቻ ሳይሆን የሁለት ወንድሞች ሰማዕትነትን ጭምር ነው የምናከብረው በማለትም ገልጸዋል።
በሕይወታችን ላይ ሰው ሰራሽ የሆነውን ጣዖት ሳይሆን ሕያው የሆነውን እግዚአብሔርን በማንገሥ፣ በማምለክና ለእርሱ በመታመን በጽድቅና በቅድስና ሕይወት በመኖር ለተፈጠርንለት ዓላማ ልንኖር ይገባል ብለዋል።
እንደ ቅዱስ ቂርቆስና ቅድስት ኢየሉጣ መከራንና ፈተናን በመታገስና በጽናት በማለፍ የእምነት አርበኞች ልንሆን ይገባል ሲሉም አባታዊ መልእክታቸውን አስተላልፈዋል።
ብፁዕነታቸው ቤተክርስቲያኑ ሊያሠራ ላቀደው የአንደኛ ደረጃ ትምህርት ቤት የመሠረት ድንጋይ አስቀምጠዋል።
በክብረ በዓሉ ላይ በአባቶችና በሰንበት ት/ቤት ወጣቶች ያሬዳዊ ዝማሬ ቀርቧል።
ቤተክርስቲያኑም የካርታ ይዞታን ስለማግኘቱ ለምእመናን በመድረኩ ላይ ይፋ ተደርጓል።
መልአከ ምሕረት አምሐ መኳንንት የአዲስ አበባ ሀገረ ስብከት የዕቅድና ልማት ዋና ክፍል ኃላፊ የካርታ ይዞታውን አስመልክተው የብፅዕነታቸውን ጠንካራ አመራር ገልጸዋል።
በደብሩ የሚገኙ ወጣቶችም የካርታው ይዞታ እስኪሰጥ ድረስ ያላለሰለሰ ጥረት ማድረጋቸውን አውስተዋል።
የደብሩ አስተዳዳሪ መልአከ ብስራት አብርሃም ዲበኩሉ ወደ ደብሩ ተመድበው ከመጡበት ጊዜ ጀምሮ ከሰበካ ጉባኤ አባላት ጋር በመሆን ያከናወኗቸውን የአራት ወራት የሥራ ሪፖርትና ለወደፊት ሊሠሩ የታቀዱ ዕቅዶችን ገልጸዋል።
የካህናት ወራዊ ደሞዝ እንደተሻሻለ፣ ቤተክርስቲያኑ የካርታ ይዞታን እንዳገኘ፣ ከአከባቢው ምእመናን ጋር በጋራና በሰላም አብሮ መሥራትና ስብከተ ወንጌልን በማስፋፋት በኩል ሥራዎች እንደተሠሩ ከሪፖርቱ ተደምጧል።
በልማት ሥራና በተለያዩ አገልግሎት ለቤተክርስቲያኑ አስተዋጽኦ ላደረጉ ሰዎች የምስክር ወረቀት ተበርክቶላቸዋል።
ሊሠራ ለታሰበው የአንደኛ ደረጃ ትምህርት ቤት በበክረ ትጉሃን ደመላሽ ቶጋ በመድረኩ ላይ የገቢ ማሰባሰቢያ ተካሄዷል።
በክብረ በዓሉ ላይ ብፁዕ አቡነ መልከጼዴቅን ጨምሮ የጠቅላይ ቤተክህነት የመምሪያ ኃላፊዎች፣ የአዲስ አበባ ሀገረ ስብከት የዋና ክፍል ኃላፊዎች፣ የቦሌ ክፍለ ከተማ ቤተክህነት የሥራ ኃላፊዎች፣ የደብሩ አስተዳዳሪ መልአከ ብስራት አብርሃም ዲበኩሉ፣ የአድባራትና የገዳማት አስተዳዳሪዎች፣ ሊቀ መዘምራን ቴዎድሮስ ዮሴፍ፣ የሰንበት ትምህርት ቤት ወጣቶችና በርካታ ምእመናን ተገኝተዋል።
ዘጋቢ፦ መ/ር ወንድምአገኝ ደጀኔ
ፎቶ ፦መ/ር ዋሲሁን ተሾመ

በብፁዕ አቡነ መልከጼዴቅ መመሪያ ሰጭነት ተገንብቶ የተጠናቀቀው የአዳሪ ትምህርት ቤት ደቀ መዛሙርትን ተቀበለ

በብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀጳጳስ መመሪያ ሰጭነት በጉራጌ አህጉረ ስብከት ተገንብቶ የተጠናቀቀው የአዳሪ ትምህርት ቤት ደቀ መዛሙርትን ተቀበለ።
ብፁዕ አቡነ መልከጼዴቅ ለደቀመዛሙርቱ “የእንኳን ደህና መጣችሁ” መልእክት አስተላልፈውላቸዋል።
ብፁዕነታቸው የትምህርት ቤቱ መገንባት ዋናው ዓላማ ካህናትን በማሰልጠን ምእመናንን በመንፈሳዊ ትምህርት ተደራሽ ለማድረግ እንደሆነ አውስተዋል።
አያይዘውም ካህናቱ በትምህርት ቆይታቸው የሚሰጣቸውን ሥልጠናዎች በአግባቡ በመውሰድ መንፈሳዊ ኃላፊነታቸውን በአግባቡ እንዲወጡ አጽንዖት ሰጥተው ገልጸዋል።
ካህናት የእግዚአብሔርን ቃል ለምእመናን የሚመግቡ እንመሆናቸው መጠን እራሳቸውን በሥልጠናዎች ለማጠናከር እንደዚህ ያሉ ትምህርት ቤቶች ለቤተክርስቲያኒቱ በብዛት ሊገነቡ እንደሚያስፈልግ አብራርተዋል።
ተገንብቶ የተጠናቀቀው ሕንጻ G+1 ሲሆን ለመማር ማስተማር ምቹ መሆኑም ተገልጿል።
በዛሬው ዕለት ትምህርት ቤቱ የተቀበላቸው ካህናት በቁጥር 60 መሆናቸውም ተጠቅሷል።
ካህናቱ በትምህርት ቤቱ የሶስት ወራት ሥልጠና እንደሚወስዱ ተገልጿል።
በሶስት ወራት የሥልጠና ጊዜ ውስጥ የተለያዩ የቤተክርስቲያኒቱን መንፈሳዊ ትምህርት እንደሚወስዱም ተጠቅሷል።
መንፈሳዊ ትምህርት ቤቱ የኢትዮጵያን ኦርቶዶክስ ተዋሕዶ ቤተክርስቲያን ተልዕኮ ለማስፈጸም የራሱ ድርሻ እንዳለውም ተገልጿል።
በብፁዕ አቡነ ጎርጎርዮስ እንደተገነባው እንደ ዝዋይ የካህናት ማሰልጠኛ ተቋም ብዙ መንፈሳዊ ጥቅሞችንም ለቤተክርስቲያኒቱ እንደሚሰጥ ይጠበቃል ።
ዘጋቢ መ/ር ወንድምአገኝ ደጀኔ

የብፁዕ አቡነ መልከጼዴቅ አራተኛ በዓለ ሲመት በድምቀት ተከብሮ ዋለ

የብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀጳጳስ አራተኛ በዓለ ሲመት በወልቂጤ ከተማ በደብረ ጽዮን ቅድስት ማርያም ካቴድራል በድምቀት ተከብሮ ዋለ።
ብፁዕ አቡነ መልከጼዴቅ ባስተላለፉት መልእክት በዓሉ የአንድ መንፈሳዊ አባት በዓል ሳይሆን የኢትዮጽያ ኦርቶዶክስ ተዋሕዶ ቤተክርስቲያን በዓል ነው ሲሉ ገልጸዋል።
የኢትዮጽያ ኦርቶዶክስ ተዋሕዶ ቤተክርስቲያን ለበርካታ ዘመናት ከግብጽ ኮፕቲክ ቤተክርስቲያን በሚመጡ ጳጳሳት ስትተዳደር እንደነበር አውስተዋል።
ይህም ለቤተክርስቲያን በተለይ አገልግሎትንና ወንጌልን በሰፊው ለማዳረስ እንቅፋት ሆኖ መቆየቱን ጠቅሰዋል።
አያይዘውም የኢትዮጽያ ኦርቶዶክስ ተዋሕዶ ቤተክርስቲያን የራሷን ጳጳሳት መሾም ከጀመረች በኋላ ምእመናንን በሀገሪቱ ቋንቋዎች ማስተማርና ማገልገል ችላለች ብለዋል።
ጳጳሳት የቤተክርስቲያን አምባሳደሮች፣ የእግዚአብሔር እንደራሴዎችና የአገልግሎት መሪዎች ናቸው ሲሉም ገልጸዋል።
ጳጳሳት አብያተክርስቲያናትን ባርከው ለአገልግሎት ያበቃሉ፣ዲያቆናትንና ካህናትን ይሾማሉ፣ የቤተክርስቲያንን ምሥጢራት ይፈጽማሉ በማለት አብራርተዋል።
የጉራጌ ሀገረ ስብከት ዋና ሥራ አስኪያጅ መ/ሰ ሳህሉ ብፁዕነታቸው በአራት ዓመት ውስጥ በሀገረ ስብከቱ ያከናወኗቸውን በርካታ ሥራዎች በሪፖርት አቅርበዋል።
ስብከተ ወንጌልን እንዳስፋፍ፣ የመንፈሳዊ ኮሌጅ ግንባታን እንዳስጀመሩ፣ በመንበረ ጵጵስና ግቢ ውስጥ ለመንፈሳዊ አገልግሎቶች የሚውሉ ግንባታዎች እንዲገነቡ ማድረጋቸውን፣ አዲስ የተሠሩ አብያተክርስቲያናትን ባርከው ለአገልግሎት እንዳበቁ፣ የተለያዩ የልማት ሥራዎችንም እንደሠሩ ከሪፖርቱ ተደምጧል።
የአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ ብፁዕነታቸው በጥቂት ወራት ውስጥ በአዲስ አበባ ሀገረ ስብከት ያከናወኗቸውን ሥራዎች ጠቅሰዋል።
በሀገረ ስብከቱ ዘመናዊ አሠራርን በመዘርጋት፣ ስብከተ ወንጌልን በማስፋፋት፣ የካርታ ይዞታ የሌላቸውን አብያተክርስቲያናት የካርታ ይዞታ እንዲያገኙ ማድረጋቸውንና የልማት ሥራዎችን በማፋጠን በኩል ያበረከቱትን አስተዋጽኦ አብራርተዋል።
የወልቂጤ ከተማ ከንቲባ በበዓሉ ላይ ተገኝተው ባደረጉት ንግግር ብፁዕነታቸው ወደ ሀገረ ስብከቱ በኃላፊነት ከመጡ ጀምሮ በዞኑ ያበረከቱትን አስተዋጽኦ ገልጸዋል።
የተለያዩ የሃይማኖት መሪዎችን በፍቅር በመያዝና በዞኑ የጸጥታ ጉዳይ ላይ ግንባር ቀደም በመሆን ለከተማዋ እድገት ጉልህ ሚና አበርክተዋል ብለዋል።
የወልቂጤ ከተማ የጸጥታ ዘርፍ ኃላፊም ብፁዕነታቸው መልካም አባት፣ የሃይማኖት አባትና የልማት አርበኛ ናቸው በማለት ጠቅሰዋል።
ብፁዕነታቸው በመልካም አስተዳደር በኩል ላበረከቱት አስተዋጽኦ ከአዲስ አበባና ከጉራጌ አህጉረ ስብከት መንፈሳዊ አገልግሎት የሚያከናውኑበት ስጦታ ተበርክቶላቸዋል።
በክብረ በዓሉ ላይ የቅዱስ ሲኖዶስ ፀሐፊ ብፁዕ አቡነ ዮሴፍ፣ የአዲስ አበባና የጉራጌ አህጉረ ስብከት የሥራ ኃላፊዎች፣ የክፍላተ ከተማ ዋና ሥራ አስኪያጆች፣ የአድባራትና የገዳማት አስተዳዳሪዎች፣የወልቂጤ ከተማ የመንግሥት የሥራ ኃላፊዎች፣ የሰንበት ትምህርት ቤት ወጣቶችና ምእመናን ተገኝተዋል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ
የዜናው ምንጭ መ/ር ዋሲሁን ተሾመ

“አስከፊ የኑሮ ሁኔታና ቅንነት ከጎደለው የካራን አስተሳሰብ ወጥተን የዕረፍት ምድራችን ወደ ሆነችው ከነዓን እንግባ“…ብፁዕ አቡነ ፊልጶስ

የአጋዕዝተ ዓለም ቅድስት ሥላሴ ዓመታዊ ክብረ በዓል በመንበረ ጸባዖት ቅድስት ሥላሴ ካቴድራል በርካታ አገልጋዮችና ኦርቶዶክሳዊ ምዕመናን በተገኙበት ተከብሮ ውሏል፡፡
በአዲስ አበባና ጉራጌ አህጉረ ስብከት ሊቀ ጳጳስ በብፁዕ አቡነ መልከ ጼዴቅ ጋባዥነት የቅድስት ሥላሴ መንፈሳዊ ዩንቨርስቲ ኮሌጅ ፕሬዘዳንትና የደቡብ ኦሞ ሀገረ ስብከት ሊቀ ጳጳስ ብፁዕ ፊልጶስ የዕለቱን ትምህርተ ወንጌል ሰጥተዋል፡፡
በትምህርታቸውም የእምነት አርበኛ የሆነውን የአብርሃምን የጥሪ ሕይወት: ለጠራው እግዚአብሔር የታመነበትን መንገድ እና በመታዘዙ የተነሣ ከእግዚአብሔር ዘንድ የተቀበለውን የእምነት ፍሬ አብራርተዋል፡፡
አያይዘው ዓለማችን በክፋትና በባዕድ አምልኮ ተሞልቷል፡የቀደመችውን ካራንንም መስሏል፡ ስለዚህ አስከፊ የኑሮ ሁኔታና ቅንነት ከጎደለበት የካራን አስተሳሰብ ወጥተን የዕረፍት ምድራችን ወደ ሆነችው ከነዓን እንግባ ብለዋል፡፡
የካቴድራሉን ሕንፃ ዕድሳት በሚያጠናው ፋሲል ጊዮርጊስ በተባለው የአርክቴክት ድርጅት እና በቴክኒክ ኮሚቴ አባላት አማካኝነት ተጠንቶ የተደረሰበትን የጥናት ግኝት በካቴድራሉ ዋና ጸሐፊ ሊቀ ስዩማን ሽታው ሪፖርት ቀርቧል፡፡
በቀረበው የጥናት ሪፖርት የካቴድራሉን ታሪካዊና ትውፊታዊ ይዘት በጠበቀ መልኩ እንዲታደስ ቅድመ ዕድሳት የሚያስፈልገው ሁሉ ተጠንቶና አዲስ ፕላን ተዘጋጅቶ ዘጠና አምስት በመቶ (95%) መድረሱም ተገልጿል፡:
የጥናቱን መጠናቀቅ ተከትሎ በመስከረም ወር ዕድሳት እንደሚጀመርና ከዕድሳቱ በኀላም ለሚቀጥሉት 80 ዓመታት ያክል ያለምንም ችግር አገልግሎት እንደሚሰጥ ገለጻ ተደርጓል፡፡
ያለምንም ክፍያ ለጉልበታቸውና ጊዜያቸው ሳይሰስቱ በበጎ ፈቃድ የሕንፃ ቴክኒክ ኮሚቴ በመሆን አገልግሎት በመስጠት የሚገኙት በዘርፉ ከፍተኛ ሙያ ያላቸው የቤተ ክርስቲያን ልጆች መሆናቸውን የደብሩ ሰ/ጉ/ጽ/ቤት መረጃ ያመላክታል፡፡
የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከ ጼዴቅ ዕለቱ የእምነት ጥንካሬ የተፈተሸበት፡ እግዚአብሔር ለወዳጆቹ ምን ያክል ቅርብ መሆኑን የተረዳንበት ነው ብለዋል፡፡
በሕንፃ ዕድሳቱ ቴክኒክ ኮሚቴ እና በጥናት ድርጅቱ ሲጠና ቆይቶ የቀረበልን የጥናት ግኝት ሪፖርት ምን ያክል እንደ ደከሙ አመላካች መሆኑን ገልጸው ፡ በዚህ ታሪካዊ ሥራ ላይ በገንዘብ፡ በሐሳብ፡በጸሎትና በልዩ ልዩ ሙያ አስተዋጾኦ ያደረጉትንና የደከሙትን ሁሉ አመስግነዋል፡፡
አክለው የካቴድራሉ ሕንጻ የኢትዮጵያ ኦርቶዶክስ ተዋሕዶ ቤተ ክርስቲያንን የኪነ ሕንፃን ቀደምትነትና ታሪካዊነት ከማሳየቱም ባሻገር የብፁዓን ወቅዱሳን አባቶቻችን በዓለ ሲመት የሚከበርበት፡ሁለንተናዊ የቤተ ክርስቲያን አገልግሎት የሚሰጥበት እንዲሁም ከፍተኛ የቱሪስት መስህብ ያለበት ትልቅ ቦታ ስለሆነ በአጭር ጊዜ ዕድሳት ተደርጎለት አገልግሎት እንዲሰጥ ሁላችንም የቻላችሁት ሁሉ አድርጉ በማለት አባታዊ ጥሪ አስተላልፈዋል፡፡
በመርሐ ግብሩ የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅን ጨምሮ ፡ብፁዓን አበው ሊቃነ ጳጳሳት፡ የሀገረ ስብከቱ ካህናት አስተዳደር ዋና ክፍል ኃላፊ መልአከ ሕይወት አባ ወልደ ኢየሱስ ሰይፉ፡ የሀገረ ስብከቱ የሕዝብ ግንኙነት ዋና ክፍል ኃላፊ መልአከ ምህረት በቃሉ ወርቅነህ፡ የደብሩ አስተዳዳሪ ሊቀ ሥልጣናት አባ ሲራክ አድማሱ፡ የአራዳ ክፍለ ከተማ ቤ/ክህነት የሥራ ኃላፊዎችና ጥሪ የተደረገላቸው እንግዶችና እንዲሁም በርካታ ኦርቶዶክሳዊ ምዕመናን ተገኝተዋል፡፡
ዘጋቢ፡-መ/ር ሽፈራው እንደሻው
ፎቶ፡-በመ/ር ዋሲሁን ተሾመ

ብፁዕ አቡነ መልከጼዴቅ የጎፋ መካነ ሕያዋን ቅዱስ ገብርኤል ካቴድራል ሰ/ት/ቤት “ራዕየ ቴዎፍሎስ” በሚል ስያሜ ሊያስገነባ ያቀደውን ሕንጻ ሥራውን አስጀመሩ

የአዲስ አበባና የጉራጌ አህጉረ ስብከት ሊቀጳጳስ ብፁዕ አቡነ መልከጼዴቅ በጎፋ መካነ ሕያዋን ቅዱስ ገብርኤል ካቴድራል በመገኘት በሰ/ት/ቤቱ “ራዕየ ቴዎፍሎስ” በሚል ስያሜ ሊገነባ የታቀደውን ሕንጻ ሥራውን አስጀመሩ።
ብፁፅነታቸው ሰንበት ትምህርት ቤት ለቤተክርስቲያን የችግኝ ጣቢያ ነው ሲሉ የሰንበት ትምህርት ቤትን አስፈላጊነት ጠቅሰዋል።
የችግኝ ጣቢያ ችግኝ የሚበቅልበትና ለተለያዩ ቦታዎች ሥርጭት የሚደረግበት እንደሆነ ሁሉ ሰንበት ትምህርት ቤትም ዲያቆናት፣ ቀሳውስት፣ ጳጳሳት፣ ለቤ/ክንና ለሀገር የሚጠቅሙ ትውልዶች የሚወጡበት መሆኑን አብራርተዋል።
ትውልድን በመንፈሳዊ እውቀት ለመገንባትና ለማልማት ታስበው የሚሠሩ ሕንጻዎችም እጅጉን ሊበረታቱና ሊደገፉ እንደሚያስፈልግ ብፁዕነታቸው ጠቅሰዋል።
የዮሐንስ ወንጌል ምዕራፍ 21፥15-17 ያለውን መለኮታዊ ቃል መነሻ በማድረግ በበጎች፣ በጠቦትና በግልገል የተመሰሉትን አረጋውያንን፣ ወጣቶችንና ሕጻናትን የመጠበቅና የማስተማር የቤተክርስቲያን ድርሻ መሆኑንም አስተምረዋል።
ብፁዕነታቸው በካቴድራሉ የሚገኘውን “ቤተ መዘክር ዘቴዎፍሎስ ፓትርያርክ” ተብሎ የተሰየመውን ቤተ መዘክርም ጎብኝተዋል።
ካቴድራሉ በብፁዕ ወቅዱስ አቡነ ቴዎፍሎስ ሁለተኛው የኢትዮጵያ ፓትርያርክ እንደተመሠረተ ከመድረኩ ተገልጿል።
የአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ ሊሠራ የታሰበው ሕንጻ መሠረቱ ከተጣለ በኋላ ለረዥም ጊዜ ሥራው እንዳይጀምር ብዙ መሰናክሎችና እንቅፋቶች እንደነበሩ አውስተዋል።
ክቡር ዋና ሥራ አስኪያጁ በብፁዕ አቡነ መልከጼዴቅ የአመራር ዘመን ያሉት ችግሮች ተፈተው ሥራው መጀመሩ እንዳስደሰታቸው ጠቅሰዋል።
ሊሠራ የታሰበው ሕንጻ G+3 ሁለገብ ሕንጻ ሆኖ 600 ካሬ ቦታ ላይ ያረፈ ስለመሆኑም ተጠቅሷል።
ሕንጻው ሲጠናቀቅ ትውልድን በመንፈሳዊ እውቀት በመገንባት በኩል ያለውን ዘርፈ ብዙ ጥቅሞች የሰ/ት/ቤቱ ሊቀ መንበር ዲ/ን ያዕቆብ ቦጋለ አብራርተዋል።
የሰ/ት/ቤቱ የተልዕኮ ማስተባበሪያ ክፍል ኃላፊ ዲ/ን ዮናስ ኢሳይያስ ሀገረ ስብከቱ የካቴድራሉን ጥያቄዎች ተቀብሎ ምላሽ በመስጠቱ አመስግነዋል።
በካቴድራሉ 820 ሕጻናትና 450 ወጣቶች በመደበኛ መንፈሳዊ ትምህርታቸውን እየተከታተሉ ስለመሆናቸው ተገልጿል።
በተጨማሪም 400 ገደማ የሆኑ የመንግሥት ሠራተኞች በተልዕኮ የመንፈሳዊ ትምህርት እየተከታተሉ እንደሚገኙም ተጠቅሷል።
ሰንበት ት/ቤቱ ለብፁዕነታቸው፣ ለክቡር ዋና ሥራ አስኪያጁና ለካቴድራሉ አስተዳዳሪ ስጦታ አበርክተዋል።
በመርሐግብሩ ላይ ብፁዕ አቡነ መልከጼዴቅን ጨምሮ የሀገረ ስብከቱ ዋና ሥራ አስኪያጅ መ/ር አካለ ወልድ ተሰማ፣ መልአከ ሕይወት አባ ወልደ ኢየሱስ ሰይፉ የሀገረ ስብከቱ የካህናት አስተዳደር ዋና ክፍል ኃላፊ፣ የካቴድራሉ አስተዳዳሪ መልአከ ብርሃን አባ ገብረ ሥላሴ (ቆሞስ)ና የሰንበት ት/ቤት አባላት ተገኝተዋል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

” ቅድምያ ከሁሉም በላይ ፍቅር፣ ሰላምና አንድነት ላይ መሥራት ያስፈልጋል” ብፁዕ አቡነ መልከጼዴቅ

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ ቅድምያ ከሁሉም በላይ ፍቅር፣ ሰላምና አንድነት ላይ መሥራት እንደሚያስፈልግ መልእክት አስተላለፉ።
ብፁዕነታቸው መልእክቱን ያስተላለፉት በቦሌ ቡልቡላ ደብረ መድኃኒት መድኃኔዓለም ቤ/ክ በመገኘት አዲስ እየተገነባ የሚገኘውን ግዙፉን ሕንጻ ቤ/ክን በጎበኙበት ነው።
በግንባታ ላይ የሚገኘው ሕንጻ ቤተክርስቲያን 5200 ካሬ ላይ ያረፈ ስለመሆኑም ተገልጿል።
ብፁዕነታቸው ቤተክርስቲያኑ ሊሠራ ላቀዳቸው G+2 እና G+3 ሕንጻዎችም የመሠረት ድንጋይ አስቀምጠዋል።
G+2 ሕንጻው ለቢሮ አገልገሎት የሚውል ሲሆን G+3 ሕንጻው ደግሞ ለቤተክርስቲያኑ ገቢ ማስገኛ እንደሚውል ተገልጿል።
ብፁዕነታቸው ለቤተክርስቲያኑ አስተዳዳሪ ለመልአከ ጽዮን አባ ገብርኤል ወ/ዮሐንስ (ቆሞስ) በጥቂት ወራት ላሳዩት የመልካም አስተዳደር ውጤት አድናቆታቸውን ገልጸዋል።
በሕንጻ ኮሚቴው፣ በሰበካ ጉባኤውና በምእመናን መካከል ያለውንም ኅብረት አድንቀዋል።
ከዚህ በፊት በቤተክርስቲያኑ በመገኘት የነበረውን የአስተዳደርና የልማት ሥራዎችን እንደጎበኙ ብፁዕነታቸው አውስተዋል።
አያይዘውም በጊዜው አስተዳደራዊ ችግሮች እንደነበሩ ጠቅሰዋል።
ሀገረ ስብከቱም ፈጣን እርምጃ በመውሰድ ጠንካራ የአመራር ልምድ ያላቸውን አባት መልአከ ጽዮን አባ ገብርኤል ወ/ዮሐንስን (ቆሞስ) ለቤተክርስቲያኑ እንደመደበ ገልጸዋል።
በመሪና በተመሪ መካከል ፍቅር፣ አንድነትና ሰላም ካለ በአጭር ጊዜ ውስጥ ትልቅ ሥራ መሥራት እንደሚቻል ይህ በግንባታ ላይ የሚገኘው ሕንጻ ቤተክርስትያን ምስክር ነው ብለዋል።
ቅድምያ ከሁሉም በላይ ፍቅር፣ አንድነትና ሰላም ላይ ከተሠራ ሌሎች ሥራዎችን ለመሥራት አይከብድም ሲሉም አብራርተዋል።
አቶ አምዴ እና አቶ ፀሐይዬ የተባሉ ሁለት አባቶች ከመጀመሪያ ሕንጻ ቤተክርስቲያኑ ሲመሠረት ጀምሮ ላደረጉት አስተዋጽኦ የካባ ሽልማት ከብፁዕነታቸው ተቀብለዋል።
በመርሐግብሩ ላይ ብፁዕ አቡነ መልከጼዴቅን ጨምሮ የሀገረ ስብከቱ ዋና ሥራ አስኪያጅ መ/ር አካለ ወልድ ተሰማ፣ መልአከ ሕይወት አባ ወልደ ኢየሱስ ሰይፉ የሀገረ ስብከቱ የካህናት አስተዳደር ዋና ክፍል ኃላፊ፣ መልአከ ምሕረት በቃሉ ወርቅነህ የሀገረ ስብከቱ የሕዝብ ግንኙነት ዋና ክፍል ኃላፊና የቤተክርስቲያኑ አስተዳዳሪ መልአከ ጽዮን አባ ገብርኤል ወ/ዮሐንስ (ቆሞስ) ተገኝተዋል።
ዘጋቢ መ/ር ወንድምአገኝ ደጀኔ

የአዲስ አበባ ሀገረ ስብከት ጽ/ቤት የ12 አቅመ ደካሞችን መኖሪያ ቤቶች እድሳት ሊያካሄድ ነው

የአዲስ አበባ ሀገረ ስብከት ጽ/ቤት እድሳቱን የሚያካሂደው በአራዳ ክፍለ ከተማ ወረዳ ሰባት ነው።
የአዲስ አበባ ሀገረ ስብከት ዋና ሥራ አስኪያጅ መ/ር አካለ ወልድ ተሰማ ለእድሳት መርሐ ግብሩ አንድ ሚሊዮን ብር መመደቡን አስታውቀዋል።
ክቡር ዋና ሥራ አስኪያጁ ሀገረ ስብከቱ በአገራችን የተለያዩ ችግሮች ሲገጥሙ መንፈሳዊና ኢኮኖሚያዊ ድጋፍ ሲያደርግ መቆየቱንም ተናግረዋል።
የ12 አቅመ ደካሞች መኖሪያ ቤቶችን እድሳት ለማከናወን ሙሉ ዝግጅት ሲደረግ መቆየቱንም ጠቅሰዋል።
ሀገረ ስብከቱ ከመንፈሳዊ አገልግሎት ባሻገር የበጎ ፈቃደኝነት ሥራዎች ላይ እንደሚሳተፍም አብራርተዋል።
ሀገረ ስብከቱ ከምእመናን ከሚያገኘው ገንዘብ መልሶ ለምእመናን የሚሆኑ የልማት ሥራዎችንና የኢኮኖሚ ድጋፎችን ማድረጉ የሚበረታታ ድርጊት መሆኑን ገልጸዋል።
ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ “ለመስጠት ርኅሩኅ ልብ ያስፈልጋል” ብለዋል።
” እንግዲህ ሰዎች ሊያደርጉላችሁ የምትወዱትን ሁሉ እናንተ ደግሞ እንዲሁ አድርጉላቸው፤ ሕግም ነቢያትም ይህ ነውና “(ማቴ 7:12) የሚለውን መለኮታዊ ቃል በመጥቀስ ለሌሎች መልካም ማድረግ የተቀደሰ ሥራ መሆኑን አብራርተዋል።
በኢኮኖሚ አቅመ ደካማ ለሆኑት ካለን ላይ አካፍለን መስጠት መንፈሳዊ ግዴታችን ነው ብለዋል።
ባልጀራን እንደ ራስ በመውደድ የተለያዩ ድጋፎችን ማድረግ መንፈሳዊ ደስታና የአእምሮ እርካታ ይሰጣል ሲሉ ጠቅሰዋል።
ብፁዕነታቸውም ለአንድ አቅመ ደካማ እናት በየወሩ ሁለት ሺህ ብር ለአንድ ዓመት የሚሆን 24 ሺህ ብር ከራሳቸው ድጎማ አድርገዋል።
የቤቶቹ እድሳት እስኪከናወን ለተቀሩት ለአስራ አንዱ አባ ወራና እማ ወራ ለእቃ ማጓጓዣና ለእገዛ የሚሆን ለእያንዳንዱ 1800 ብር ልገሳ ተደርጓል።
ብፁዕነታቸው ሀገረ ስብከቱ ይህንን እገዛ ሲያደርግ የመጀመሪያው አይደለም ብለዋል።
ከዚህ በፊት ለአዲስ አበባ ከተማ መስተዳድር ጽ/ቤት በቀድሞው ከንቲባ ኢንጂነር ታከለ ኡማ ጊዜ አስር ሚሊዮን ብር ለተማሪዎች ምገባና ለትምህርት መሣሪያ መሟላት ድጋፍ ማድረጉን ጠቅሰዋል።
አክለውም በትግራይና በቤንሻንጉል በተከሰቱት ችግሮች ምክንያት ለተጎዱት ማሕበረሰብ ሀገረ ስብከቱ አስራ አምስት ሚሊዮን ብር እና ሌሎችንም ድጋፎችን ማድረጉን አውስተዋል።
የእድሳት መርሐ ግብሩን ብፁዕነታቸው አስጀምረዋል።
በቦታው ብፁዕ አቡነ መልከጼዴቅን ጨምሮ የሀገረ ስብከቱ ዋና ሥራ አስኪያጅ መ/ር አካለ ወልድ ተሰማ፣ የሀገረ ስብከቱ የዋና ክፍል ኃላፊዎች፣ የአዲስ አበባ ሃይማኖት ተቋማት ጉባኤ የሥራ ኃላፊዎችና የአራዳ ክፍለ ከተማ ወረዳ ሰባት የመንግሥት ኃላፊዎች ተገኝተዋል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ