በመ/ፓ/ጠ/ጽ/ቤት የሰበካ ጉባኤ ማደራጃ መምሪያ በኩል ሲካሄድ በቆየው በ39ኛው አገር አቀፍ ስምሪት ላይ በችግሮችና በመፍትሔዎች ዙሪያ ውይይት ተካሄደ

በቀን 23/2013 ዓ.ም በመንበረ ፓትርያርክ ጠቅላይ ጽ/ቤት ጽርሐ ተዋሕዶ የስብከተ ወንጌል አዳራሽ በተካሄደው መርሐ ግብር ላይ የቅዱስ ሲኖዶስ ዋና ጸሐፊ ብፁዕ አቡነ ዮሴፍ፣ የጠቅላይ ቤተክህነት ዋና ሥራ አስኪያጅ ብፁዕ አቡነ ያሬድ፣ የመ/ፓ/ጠ/ጽ/ቤት የሰበካ ጉባኤ ማደራጃ መምሪያ ሊቀ ጳጳስ ብፁዕ አቡነ ኤርምያስ፣ ብፁዓን ሊቃነ ጳጳሳት፣ የጠቅላይ ቤተክህነት ምክትል ሥራ አስኪያጅ ሊቀ አእላፍ ቀሲስ በላይ መኮንን፣ የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ላዕከ ሰላም ቀሲስ ሰሎሞን ቶልቻ፣ የጠቅላይ ቤተክህነት የሥራ ኃላፊዎች፣ የአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ፣ የአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ መልአከ ብርሃን ሳሙኤል ደምሴ፣የሰባቱ ክፍላተ ከተሞች ዋና ሥራ አስኪያጆች፣ ከየክፍለ ከተማው የተወከሉ የአድባራትና የገዳማት አስተዳዳሪዎች ተገኝተዋል።
በላዕከ ሰላም ቀሲስ ሰሎሞን ቶልቻ የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ” የ39ኛውን አገር አቀፍ ስምሪት በተመለከተ ችግሮችንና መፍትሔዎችን የጠቆመ ” ለውውይት የሚሆን ሪፖርት ከቀረበ በኋላ ውይይት ተካሂዷል።
ከቀረቡት ችግሮች በመነሣት ከጉባኤውም አጽንኦት ተሰጥቷቸው የተጠቀሱት ችግሮች እንደሚከተለው ቀርበዋል፦ የቤተክርስቲያን ውስጣዊ ፈተናዎች፣ የቤተክርስቲያን ውጫዊ ፈተናዎች፣ በመዋቅር መዳከም ምክንያት እየተፈጠሩ ያሉ ችግሮች፣በስብከተ ወንጌል አገልግሎት ተደራሽነት በኩል ያሉ ድክመቶች፣ በገጠራማው ክፍል ባሉ አብያተክርስቲያናት የሚታዩ ዘርፈ ብዙ ችግሮች፣ ምእመናንን በቋንቋቸው አለማስተማር፣ የቤተክርስቲያን የሀብት አጠቃቀም ዙሪያ የሚታዩ ክፍተቶች በሰፊው ተጠቅሰዋል።
በመቀጠልም ከቀረቡት የመፍትሔ አቅጣጫዎች በመነሣት ከጉባኤውም አጽንኦት ተሰጥቷቸው የተሰነዘሩ የመፍትሔ አቅጣጫዎች መካከል መዋቅራዊ አደረጃጀቶች ላይ ጠንካራ ሥራ መሥራትና በጥናት በተደገፈ መልኩ ማዘመን፣ ውስጣዊ ችግሮችን መፍታት፣በጋራ ለቤተክርስቲያን ክብር መቆም፣ሰልጠናዎችንና ምክክርን ማስፋፋት፣ በስብሰባዎች መወሰን ብቻ ሳይሆን ተፈጻሚነት ሊኖራቸው የሚችሉ ውሳኔዎችን መወሰን፣ለሚወሰኑ ውሳኔዎች ስለመፈጸማቸው ልዩ ክትትልና የአስፈጻሚ አካላት ተጠያቂነት መዘርጋት፣አሁን ያለውን አደረጃጀትና አሠራር ገምግሞና አስጠንቶ ካለው አገራዊና ነባራዊ ሁኔታ ጋር አጣጥሞ መዋቅራዊ ክለሳ ለማድረግ መሞከር፣ሕገ ቤተክርስቲያኑና ቃለ አዋዲው ለተፈጻሚነታቸው ደንብና መመሪያ ቢወጣላቸው በሕግም ፊት ተቀባይነት እንዲኖራቸው ማድረግ፣ ቅዱሳት መጻሕፍትን በተለያዩ ቋንቋዎች በበቂ ሁኔታ አስተርጉሞ ለምእመናን ማዳረስና በቋንቋቸው ማስተማር፣ ሒሳብ የሚሠራባቸውን ደረሰኞችንም ጭምር በተለያዩ ቋንቋዎች አሳትሞ በሥራ ላይ ማዋል እንደሚገባና ሁሉም የቤተክርስቲያኒቱ አካል ኃላፊነቱን በአግባቡ መወጣት እንዳለበት ተነግሯል።
በተያያዘም የቅዱስ ሲኖዶስ ምልአተ ጉባኤም በመጪው ርክበ ካህናት ዓመታዊ ጉባኤ ላይ እነዚህን ጉዳዮች አንሥቶ እንደሚወያይ ይጠበቃል።
በመርሐ ግብሩ ላይ የተገኙት የአዲስ አበባ ሀገረ ስብከት ዋና ሥራ አስኪያጅ መ/ር አካለወልድ ተሰማ የአዲስ አበባን ሀገረ ስብከት ራሱን ችሎ በሊቀ ጳጳስ መመራቱን ተከትሎ ያካሄደውን አንደኛ መደበኛ አጠቃላይ ሰበካ መንፈሳዊ ጉባኤ በተመለከተና አጠቃላይ በአሁን ጊዜ እየተከናወኑ ያሉትን ሥራዎች ለጉባኤው አብራርተዋል።
በመጨረሻም የጠቅላይ ቤተክህነት ዋና ሥራ አስኪያጅ ብፁዕ አቡነ ያሬድ መመሪያዎችን አስተላልፈው ጉባኤው በጸሎት ተጠናቋል።
ዘጋቢ መ/ር ወንድምአገኝ ደጀኔ

ብፁዕ አቡነ መልከ ጼዴቅ በተገኙበት በቦሌ ክፍለ ከተማ ቤተ ክህነት አዘጋጅነት ለሁለት ቀናት እየተሰጠ የቆየው ስልጠና በዛሬው ዕለት ተጠናቀቀ!!

መጋቢት 22 ቀን 2013 ዓ/ም በቦሌ ክፍለ ከተማ ሥር ለሚገኙ የገዳማትና አድባራት አስተዳዳሪዎችን ጨምሮ ልዩ ልዩ የሥራ ኃላፊዎች በክፍለ ከተማው የትምህርትና ስልጠና ክፍል አስተባባነት በአዲስ አበባ ሀገረ ስብከት የስብሰባ አዳራሽ ለሁለት ቀናት እየተሰጠ የቆየው የግንዛቤ ማስጨበጫ ስልጠና በብጹዕ አቡነ መልከጼዴቅ መመሪያ ሰጭነት በዛሬው ተጠናቋል፡፡
በዕለቱ የአዲስ አበባ ሀገረ ስብከት ም/ሥራ አስኪያጅ መጋቤ ጥበብ ምናሴ ወልደ ሐና ከመንፈሳዊ የእረኛነት ጽንሰ ሐሳብ ምንነት ጀምሮ፡የእረኝነት ሥራ በሁለቱ የኪዳን ዘመናት ምን ይመስል እንደነበርና ዛሬ ባለንበት ዘመን በቅድስት ቤተ ክርስቲያናችን ስላለውና ሊኖር ስለሚገባው የእረኝነት አገልግሎት ሰፊ ገለጻ አድርገዋል፡ከተሳታፊዎች ለተነሡ ጥያቄዎችም ምላሽ ሰጥተዋል፡፡
የዕለቱን መርሐግብር የመሩት የክፍለከተማው የሰው ኃይል አስተዳደር ኃላፊ መ.ር ልሳነወርቅ
አሸናፊ በክፍለ ከተማው ልዩ ልዩ ክፍሎች አስተባባሪነት የተጀመረው እንቅስቃሴ እጅግ የሚበረታታ መሆኑን ገልጸው በቅርብ ጊዜም በግጭት አፈታትና በመልካም አስተዳደር ዙሪያ በሰው ኃይል አስተዳደርና በሰበካ ጉባኤ ማደራጃ ክፍልየጋራ ትብብር የሚሰጥ ስልጠና እንደሚኖርም አሳውቀዋል፡፡
የመርሐ ግብሩ ተሳታፊዎችም በሁለቱም ቀናት የተሰጡት ስልጠናዎች እጅግ ጠቃሚና አነቃቂ መሆናቸውን አውስተው፡በሚቀጥሉት ስልጠናዎች ግን የቤተ ክርስቲያንን ህልውና የሚገዳደሩ አንገብጋቢ ችግሮች እና አፋጣኝ መፍትሔ በሚያስፈልጋቸው ጉዳዮች ዙሪያ ትኩረት ተሰጥቶ እንዲዘጋጅ ጠይቀዋል፡፡
በመጨረሻም የጉራጌና አዲስ አበባ አህጉረ ስብከት ሊቀ ጳጳስ ብፁዕ አቡነ መልከጼዴቅ
የቦሌ ክፍለ ከተማ ቤተ ክህነት ችግሮችን ለመፍታትና የአገልጋዮችን ግንዛቤ ከፍ ለማድረግ ያደረገውን ጥረት ከልብ እናመሠግናለን እናደንቃለንም፡ ወደፊት ግን በማዕከላዊነት የተደራጀ ሆኖ በሀገረ ስብከቱ የትምህርትና ስልጠና በበላይነት የሚመራ መሆን እንዳለበት አሳውቀዋል፡ እንደዚህ ዓይነት ጉባኤ ሲኖር የጉባኤ ተሳታፊዎች የቤተ መልክ ያለው አለባበስ ለብሰው እንዲመጡም መመሪያ ሰጥተዋል፡፡
መጋቢት 16 ቀን 2013 ዓ/ም በቦሌ ክፍለ ከተማ የሰንበት ትምህርት ቤቶች ማደራጃ ክፍል አስተባባሪነት በደብረ ጽጌ ቅ/ዑራኤል
ቤተ ክርስቲያን የስብከተ ወንጌል አዳራሽ
“ኦርቶዶክሳውያን ከየት ወደየት ከባቢያችንስ”
በሚል ርእስ የገዳማትና አድባራት ልዩ ልዩ የሥራ ኃላፊዎች እና የሰ/ት/ቤት አመራሮች
በተገኙበት የመጀመሪያ ዙር ስልጠና መሰጠቱ
የሚታወስ ነው፡፡
ዘጋቢ:-መ/ር ሽፈራው እንደሻው
ፎቶ:-በመ/ር ዋሲሁን ተሾመ

በቦሌ ክፍለ ከተማ ቤተ ክህነት ጽ/ቤት የትምህርትና ስልጠና ክፍል አስተባባነት በክፍለ ከተማው ሥር ለሚገኙ አገልጋዮች የግንዛቤ ማስጨበጫ መርሐ ግብር ተሰጠ!!

መጋቢት 17 ቀን 2013 ዓ/ም የክፍለ ከተማው ሥራ አስኪያጅ መ/ብ ሩፋኤል የማነ ብርሃንን ጨምሮ የክፍለ ከተማው እና የገዳማትና አድባራቱ ልዩ ልዩ የሥራ ኃላፊዎች በተገኙበት በአዲስ አበባ ሀገረ ስብከት የስብሰባ አዳራሽ በሁለት ርእሰ ጉዳዮች ዙሪያ የግንዛቤ ማስጨበጫ ስልጠና ተሰጥቷል፡፡
የስልጠና መርሐግብሩን በጸሎት የከፈቱት
የአዲስ አበባና ጉራጌ አህጉረ ስብከት ሊቀ ጳጳስ ብፁዕ አቡነ መልከ ጼዴቅ እንደዚህ ዓይነቱ የመተናነፅና እርስ በእርስ የመሳሳል ግንዛቤ ማስጨበጫ መርሐ ግብር መሰጠቱ በዚህ ዘመን ለምንገኝ የቤተ ክርስቲያን አገልጋዮች ወሳኝ መሆኑን ገልጸው የስልጠናው ተሳታፊዎችም ያገኙትን የስልጠና ዕድል በአግባቡ እንዲጠቀሙና ወደ ተግባራዊ ሕይወት እንዲለውጡትም አሳስበዋል፡፡
የቅድስት ሥላሴ መንፈሳዊ ዮንቨርስቲ መ/ር
መ/ሰ አባ ጌዴዎን ብርሃነ”ወንድሞች ሆይ፥ ከእኛ እንደ ተቀበለው ወግ ሳይሆን ያለ ሥርዓት ከሚሄድ ወንድም ሁሉ ትለዩ ዘንድ በጌታችን በኢየሱስ ክርስቶስ ስም እናዛችኋለን”(2ኛተሰ.3:6) የሚለውን መጽሐፍ ቅዱሳዊ ትእዛዝ መነሻ በማድረግ በሥርዓተ ቤተ ክርስቲያንና ሥርዓተ አምልኮ ዙሪያ አጭር ዳሰሳ ያቀረቡ ሲሆን የቅድስት ሥላሴ መንፈሳዊ ዮንቨርስቲ ምክትል ፕሬዘዳንት ቀሲስ ዶ/ር መዝገቡ ካሣ ደግሞ መጽሐፍ ቅዱሳዊ የአገልጋይነት ሥነ ምግባር ዙሪያ ጊዜ ተኮር የሆነ ስልጠና ሰጥተዋል፡፡
የስልጠና መርሐ ግብሩን የመሩትና በበላይነት ያስተባበሩት የክፍለ ከተማው የትምህርትና ስልጠና ክፍል ኃላፊ አባ ገሪማ ተፈራ ይህ ስልጠና እንዲሳካ በገንዘባቸው ድጋፍ ላደረጉ፡
በብዙ ድካም ውስጥ ሆነው ዕውቀታቸውን ላካፈሉ እና ተረጋግተው በመቀመጥ ስልጠናውን ለተካፈሉ በሙሉ ምስጋና አቅርበዋል፡ ወደፊትም በተሻለ መልኩ ተጠናክሮ እንደሚቀጥል አረጋግጠዋል፡፡
የስልጠናው ታዳሚዎችም በክፍለ ከተማውም ሆነ በሀገረ ስብከቱ ደረጃ በልዩ ልዩ ርእሰ ጉዳዮች ዙሪያ የተጀመረው የግንዛቤ ማስጨበጫ ስልጠና ጅማሬ ተስፋ የሚጣልበት መሆኑን ገልጸው ለአገልግሎት ውጤታማነት ሌሎች አገልጋዮችም በእንደዚህ ዓይነቱ ስልጠና ላይ እንዲሳተፉ ቢደረግ መልካም መሆኑን አውስተዋል፡፡
በመጨረሻም የክፍለ ከተማው ሥራ አስኪያጅ መልአከ ብርሃን ሩፋኤል የማነብርሃን የቅድስት
ቤተ ክርስቲያናችን ችግሮች ከጊዜ ወደ ጊዜ እየተወሳሰበ መጥቷል፡ይህንን ውስብስብ ችግር ለመፍታት ደግሞ በእንዲህ መልኩ መወያየትና መነጋገር እንዲሁም የጋራ መፍትሔ ማስቀመጥ አለብን ለዚህ ደግሞ የእናንተ ድርሻ ዋጋው የማይተመን ነው ብለዋል፡፡
ዘጋቢ:-መ/ር ሽፈራው እንደሻው

በአዲስ አበባ ሀገረ ስብከት በሰባቱም ክፍላተ ከተሞች ሲካሄድ የነበረው የ39ኛው የሰበካ ጉባኤ ስልጠና በዛሬው ዕለት ተጠናቀቀ!!!

መጋቢት 21/2013 ዓ.ም በመንበረ ፓትርያርክ ጠቅላይ ቤተ ክህነት የሰበካ ጉባኤ ማደራጃ መምሪያ እና በአዲስ አበባ ሀገረ ስብከት ሰበካ ጉባኤ ማደራጃ ዋና ክፍል አዘጋጅነትና በሰባቱ ክፍላተ ከተሞች አስተባባሪነት በሁሉም ክፍላተ ከተሞቹ ለሰባት ቀናት ሲካሄድ የነበረው ስልጠና በዛሬው ዕለት ተጠናቋል፡፡
በከፍተኛ ፍጥነት እየተስፋፋ የሚገኘውን የCovid-19 በሽታ ለመግታት የወጣውን መመሪያ መሠረት በማድረግ በክፍለ ከተማው ሥር የሚገኙ የገዳማትና አድባራት የሥራ ኃላፊዎች ብቻ በተገኙበት በነፋስ ስልክ ላፍቶ ክፍለ ከተማ አስተባባሪነት በደብረ ብሥራት ቅዱስ ገብርኤል ቤ/ክ የስብከተ ወንጌል አዳራሽ ስልጠናው ተካሂዷል፡፡
የስልጠና መርሐ ግብሩ ከተጠናቀቀ በኀላ በተደረገው ውይይትና ምክክር ስልጠናው የፈጠረው ግንዛቤና መነቃቃትና መልካም ቢሆንም ተመሳሳይ ስልጠና በተመሳሳይ ሰዎች በሁሉም ክፍላተ ከተሞች መቅረቡ አሰልች ከመሆኑም በላይ ለሌሎች ምሁራን ዕድል የነፈገ መሆኑን ገልጸው ወደፊት በሚደረገው ስልጠና ግን እንደዚህ ዓይነቱ አካሄድ እንዳይደገም የስልጠናው ተሳታፊዎች በጥብቅ አሳስበዋል፡፡
በመጨረሻም የሀገረ ስብከቱ የሰበካ ጉባኤ ማደራጃ ዋና ክፍል ኃላፊ መ/ብ ሳሙኤል ደምሴ ለተከታታይ ሰባት ቀናት የሰጠው ስልጠና ለሀገረ ስብከታችን ብሎም ለቤተ ክርስቲያናችን ስኬት ነው፡ ወደፊትም የሰጣችሁንን ገንቢ ሐሳቦች እንደግብዓት ተጠቅመን የተሻለ ነገር ይዘን እንቀርባለን ሲሉ የነፋስ ስልክ ላፍቶ ክፍለ ከተማ ቤተ ክህነት ሥራ አስኪያጅ መ/ም ዘካርያስ ሐዲስ ደግሞ የስልጠና መርሐግብሩን በማዘጋጀትም ይሁን በማሰልጠን አስተዋጽኦ ላደረጉት ሁሉ ምስጋና አቅርበዋል፡እንደ ክፍለ ከተማ ለሚደረገው ስልጠናም የተሰጠውን አስተያየት ተግባራዊ እንደሚያደርጉ አረጋግጠዋል፡፡
ዘጋቢ መ/ር ሽፈራው እንደሻው
ፎቶ መ/ር ዋሲሁንተሾመ

ብፁዕ አቡነ መልከጼዴቅ በተገኙበት ለአዲስ አበባ ሀገረ ስብከት የሥራ ኃላፊዎች በቪድዮ ኮንፈረንስ የታገዘ የቴክኖሎጂ ግንዛቤ ማስጨበጫ ስልጠና ተሰጠ!!

የአዲስ አበባና የጉራጌ አህጉረ ስብከት ሊቀ ጳጳስ ብፁዕ አቡነ መልከጼዴቅን ጨምሮ የሀገረ ስብከቱ ዋና ሥራ አስኪያጅ መ/ር አካለ ወልድ ተሰማ፣ የሀገረ ስብከቱና የሥራ ኃላፊዎችና ተጋባዥ እንግዶች በተገኙበት ቴክኖሎጅ ተኮር ግንዛቤ ማስጠበጫ በቪድዮ ኮንፈረንስ (video conference) በመታገዝ ተሰጥቷል፡፡
የቪድዮ ኮንፈረንስ ሥልጠናውን የሰጡት በኖርዌይ ሀገር የሚገኘው የተክሌ ኮንሰልቲግ ባለቤት ኢ/ር ኪዳኔ መብራቱ እና በሳይበር ደኅንነት ዘርፍ ከፍተኛ ባለሙያ የሆነው ዲ/ን ተመስገን ቅጣው ሲሆኑ የሥልጠናውም ዓላማ በጽ/ቤቱ እየተዘረጋ የሚገኘው ዘመናዊና ቀልጣፋ አሠራር በተሻለ መልኩ ለማደራጀትና ለማስቀጠል መሆኑም ተገልጿል፡፡
በሥልጠና መርሐ ግብሩ ላይ ከቴክኖሎጅ ጽንሰ ሐሳብ ምንነት ጀምሮ፣ በዓለማችን፣ በሀገራችን እንዲሁም በቤተ ክርስቲያናችን ስላለውና ሊኖር ስለሚገባው የቴክኖሎጅ ትግበራ፣ እንዲሁም ስለ ቴክኖሎጂ ዋና ክፍል አደረጃጀትና እና ስለ ቴክኖሎጂ ፕሮጀክት ቀረጻ ሂደት ሁለቱ ባለሙያዎች ሰፊ ገለጻ አድርገዋል፡፡
አያይዘውም በሀገረስብከቱ ደረጃ የተጀመረው የቴክኖሎጅ ጅማሬ ተስፋ የሚጣልበት ቢሆንም ጥንታዊትና ታሪካዊት የሆነችው የኢትዮጵያ ኦርቶዶክስ ተዋሕዶ ቤተ ክርስቲያን በቴክኖሎጂ ረገድ የተከተለችው መርህ ግን እምብዛም አጥጋቢ አለመሆኑን ገልጸው ወደፊት ለሚደረገው የቴክኖሎጂ ትግበራና የፕሮጀክት ቀረጻ ለእናት ቤተ ክርስቲያናቸው በትሩፋት ሊያገለግሉ እንደሚችሉ ቃል ገብተዋል፡፡
በሥልጠናው የተሳተፉት የሀገረ ስብከቱ ሊቀ ጳጳስ ብፁዕ አቡነ መልከጼዴቅ ስልጠናው ሀገረ ስብከቱ ለጀመረው ቴክኖሎጂ ተኮር ዘመናዊ አሠራር ከመሆኑም በላይ አሁን ላለንበት ዘመን እጅግ አስፈላጊ መሆኑን ገልጸዋል።
በቅርቡ ከሚተገበሩ የቴክኖሎጂ መፍትሔዎች አንዱ የሆነው ዘመናዊ የባለጉዳይ መከታተያ አሁን እየታየ ያለውን ሰፊ የሥራ ጫና እንደሚያቀል ገልጸዋል። ለአቅራቢዎቹም በሚተገበረው የቴክኖሎጂ በበጎ ፈቃደኝነት ሥልጠናውን ለሰጡ የዘርፉ ባለሙያዎችም ከፍ ያለ ምሥጋናቸውን አቅርበዋል፡፡
ወደፊትም እንደዚህ ዓይነቱ ሥልጠና እንዲቀጥልና ሀገረ ስብከቱን በዘመናዊ አሠራር ለማደራጀት በሚደረገው ጥረት ባለሙያዎቹ የበኩላቸውን አስተዋጽኦ እንዲያበረክቱ አሳስበዋል፡፡
ዘጋቢ:-መ/ር ሽፈራው እንደሻው

ሰበር_ዜና:- የአዲስ አበባ ሀገረ ስብከት ጽ/ቤት ራሱን ችሎ በሊቀ ጳጳስእንዲመራ ከተደረገ በኀላ ለመጀመሪያ ጊዜ እጅግ በርካታ የሥራ ኃላፊዎች ማለትም የሠላሳ ዘጠኝ (39) ገዳማትና አድባራት አስተዳዳሪዎችን ዝውውር አደረገ(መጋቢት 17 ቀን /2013)

የዝውውር አሠራሩም ከኢፍትሐዊነት እና አድሎዊነት፡ ከዘርና ከመድሎ እንዲሁም ከግለሰባዊነት በጸዳ መልኩ በአስተዳደር ጉባኤ ውሳኔ የተፈጸመ መሆኑን ተገልጿል፡፡
ከዚህም ጋር ተያይዞ የተወሰኑ የገዳማትና አድባራት አስተዳዳሪዎች የጡረታ መብታቸው ተከብሮ ጡረታ ሲወጡ ጥቂት የሚባሉ የገዳማትና አድባራት ዋና ጸሐፊዎች ደግሞ ወደ አስተዳዳሪነት ማድጋቸውን ጽ/ቤቱ አሳውቋል፡፡
የዝውውር ቦታውን እንደሚከተለው ቀርቧል
1.ከአየር ጤና ረጲ ኪዳነ ምህረት ወደ ካራ ሥላሴ ቤ/ክ

  1. ከከራ ሥላሴ ወደ ረጲ ኪዳነ ምህረት ቤ/ክ
    3.ከላምበረት አቡነ አረጋዊ ወደ አያት ደብረ በረከት/ገመናይ ማርያም/ ቤ/ክ
  2. ከአያት ደ/ቤቴል ቅ/እግዚአብሔር አብ ወደ ኮተቤ ሉቄ አቡነ ገ/መንፈስ ቅዱስ ቤ/ክ
    5.ከአባዶ ጽ/አርያም ቅ/ሩፋኤል ወደ አያት ደ/ቤቴል ቅ/እግዚአብሔር አብ ቤ/ክ
    6.ከአያት ጨፌ ደ/ሰ/ቅ/ገብርኤል ወደ የካ አባዶ ማርያም ቤ/ክ
    7.ከወይብላ ማርያም ወደ ወደ ኩርፎ ቅዱስ ጊዮርጊስና መ/ዓለም ቤ/ክ
  3. ከየካ አባዶ ጽ/አ/ቅ/ማርያም ወደ ድል በር መድኃኒዓለም ቤ/ክ
  4. ከድል በር መድኃኒዓለም ወደ ደ/ሰሊሆም ቅ/ዮሐንስ ቤ/ክ
  5. ኩርፎ ቅዱስ ጊዮርጊስና መ/ዓለም ወደ ላምበረት አቡነ አረጋዊ ቤ/ክ
  6. ከደ/ሰሊሆም ቅ/ዮሐንስ ወደ ቃሊቲ ዓለም ባንክ ቅ/ገብርኤል ቤ/ክ
  7. ከዓለም ባንክ ቅ/ገብርኤል ወደ አያት ጣፎ ተ/ሃይማኖት ቤ/ክ
    13.ከአስኮ መ/ሕ አ/ገ/መንፈስ ቅዱስ ወደ ወይብላ ማርያም ቤ/ክ
  8. ከአያት ጣፎ ተ/ሃይማኖት ወደ አስኮ መ/ሕ አ/ገ/መንፈስ ቅዱስ ቤ/ክ
  9. ከቦሌ ለሚ አ/ገ/መ/ቅዱስ ወደ የረር ምሥ/ጸሐይ ቅ/ዑራኤል ቤ/ክ
    16.ከየረር ምሥ/ፀሐይ ቅ/ዑራኤል ወደ ጀሞ ፈለገ ዮርዳኖስ ቅ/ዮሐንስና ቅ/ማርያም ቤ/ክ
  10. ከጀሞ ፈለገ ዮርዳኖስ ቅ/ዮሐንስና ቅ/ማርያም ወደ ኮተቤ ኢያቄም ወሐና ቤ/ክ
  11. ከየረር ምሥ/ፀሐይ ቅ/ዑራኤል ዋና ፀሐፊነት ወደ ቦሌ ለሚ አ/ገ/መ/ቅዱስ ቤ/ክ
    19.ከቀበና መ/ዓለም ቤ/ክ ወደ ሰዋስወ ብርሃን ቅ/ ጳውሎስ ቤ/ክ
  12. ከካራ መ/ሰ/ቅ/ሥላሴ ወደ አንፎ ቅ/ዑራኤል ቤ/ክ
  13. ከአንፎ ቅ/ዑራኤል ቤ/ክ ወደ ቅሊንጦ ቅ/ሚካኤል ቤ/ክ
  14. ከቀበና ም/ጸ/አ/ተ/ሃይማኖት ወደ አያት ጨፌ ደ/ሰ/ቅ/ገብርኤል ቤ/ክ
    23.መ/ጽ/ አባ እስጢፋኖስ ይርጋ ወደ ቀበና መ/ዓለም ቤ/ክ
    24.መ/ሰ/ልሳነ ውርቅ ግርማ ወደ ካራ መ/ሰ/ቅ/ሥላሴ ቤ/ክ
    25.ከፉሪ ኆኅተ ብርሃን ቅ/ኪ/ምህረት ውደ ጎፋ መ/ብ ቅ/ዑራኤል ቤ/ክ
  15. ከጎፋ መ/ብ ቅ/ዑራኤል ወደ ፉሪ ኆኅተ ብርሃን ቅ/ኪ/ምህረት ቤ/ክ
    27.መ/ሃይማኖት ቀ/ፀጋዬ መኳንንት ቀበና ም/ጸ/አ/ ተ/ሃይማኖት ቤ/ክ
    28.ከቂሌ አሞራ ገደል መ/ዓለም ወደ አያት ጣፎ ሽሬ ቅ/ሚካኤል ቤ/ክ
  16. ከአባዶ አ/ገ/መ/ቅዱስ ወደ ቂሌ አሞራ ገደል መ/ዓለም ቤ/ክ
  17. ከአያት ጨርሶ ልደታ ለማርያምና ቅ/ገብርኤል ወደ ቦሌ አራብሳ አ/ገ/መ/ቅዱስ ቤ/ክ
  18. ከቦሌ አራብሳ አ/ገ/መ/ቅዱስ ወደ አያት ጨርሶ ልደታ ለማርያምና ቅ/ገብርኤል ቤ/ክ
  19. ከቀበና መ/ሕ/አ/ገ/መ/ቅዱስ ወደ ቦሌ ቡልቡላ ሳሙኤልና ቅ/ሚካኤል ቤ/ክ
  20. ከቦሌ ቡልቡላ ሳሙኤልና ቅ/ሚካኤል ወደ ቀበና መ/ሕ/አ/ገ/መ/ቅዱስ ቤ/ክ
    34.ከኮንቶማ ቅ/ኪዳነ ምህረት ወደ ቤቴል ጉለሌ መ/ዓለም ቤ/ክ
  21. ከቤቴል ጉለሌ መ/ዓለም ወደ ኮንቶማ ቅ/ኪዳነ ምህረት ቤ/ክ
  22. ከኮተቤ ሀገረ ገነት ቅ/ጊዮርጊስ ወደ ቀበና ቅ/ኪዳነ ምህረት ቤ/ክ
    37.መ/ር አብርሃም ዲበኩሉ 22 ቅ/አርሴማና ቅ/ገብርኤል ቤ/ክ
  23. ከ22 ቅ/አርሴማና ቅ/ገብርኤል ወደ ኮተቤ ሀ/ገ/ቅ/ጊዮርጊስ ቤ/ክ
    39.መ/ፍስሐ ፍስሐ ጌትነት ኤርቱ ሞጆ መድኃኔ ዓለም ቤ/ክ

የኢትዮጵያ ኦርቶዶክስ ተዋሕዶ ቤተ ክርስቲያን ከትናንት እስከ ዛሬ ለሀገር ግንባታ ያበረከተችው አስተዋጽኦ የማይተካ ሚና እንዳለው የሚገልጽና መልካም አስተዳደር በቤተ ክርስቲያን አስተምህሮ የሚያትት ሥልጠና በልደታ፥ ቂርቆስና አዲስ ክፍለ ከተማ ተሰጠ!

በአራዳና በአቃቂ ክፍላተ ከተማ በተከታታይ ሲካሄድ የቆየው የ39ኛው የሰበካ ጉባኤ የኢትዮጵያ ኦርቶዶክስ ተዋሕዶ ቤተ ክርስቲያን ከትናንት እስከ ዛሬ ለሀገር ግንባታ ያበረከተችው አስተዋጽኦ የማይተካ ሚና እንዳለው የሚገልጽና መልካም አስተዳደር በቤተ ክርስቲያን አስተምህሮ የሚያትት ስልጠና ዛሬም በልደታ፥ ቂርቆስና አዲስ ክፍለ ከተማ ቤተ ክህነት አስተባባሪነት በደብረ ኃይል ቅዱስ ራጉኤል ቤ/ክ የስብከተ ወንጌል አዳራሽ ቀጥሎ ውሏል።
በዛሬው ዕለት መጋቢት 15 ቀን 2013 ዓ.ም መ/ር አካለወልድ ተሰማ የአዲስ አበባ ሀገረ ስብከት ዋና ሥራ አስኪያጅ፥ ላዕከ ሰላም ቀሲስ ሰሎሞን ቶልቻ የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ፣ መ/ብርሃን ሳሙኤል ደምሴ የአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ፥ የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ምክትልና ጸሐፊ፥ የልደታ፥ ቂርቆስና አዲስ ከፍለ ከተማ ቤተ ክህነት ዋና ሥራ አስኪያጅ ሊቀ ጉባኤ አባ ተክለሃይማኖት ወልዱ(ቆሞስ) ፥ የሀገረ ስብከቱና የክፍለ ከተማው የሥራ ኃላፊዎች እንዲሁም በአዲስ ክፍለ ከተማ ሥር የሚገኙ የገዳማትና የአድባራት አስተዳዳሪዎች፣ ዋና ጸሐፊዎች፣ ቁጥጥሮች፣ ሒሳብ ሹሞች፣ የስብከተ ወንጌል ኃላፊዎች፥ የሰንበት ት/ቤት ተወካዮች እና የእስታስቲክስ ሠራተኞች በተገኙበት በልደታ፥ ቂርቆስና አዲስ ክፍለ ከተማ ቤተ ክህነት አስተባባሪነት በደብረ ኃይል ቅዱስ ራጉኤል ቤ/ክ የስብከተ ወንጌል አዳራሽ ተካሂዷል።
ክቡር መ/ር አካለወልድ ተሰማ የአዲስ አበባ ሀገረ ስብከት ዋና ሥራ አስኪያጅ ሥልጠናው አስመልክተው የመክፈቻ ንግግር ያደረጉ ሲሆን ሥልጠናው በሀገረ ስብከቱ በኩል በተደረገ አጠቃላይ ሰበካ መንፈሳዊ ጉባኤ መነሻነት ለመጀመሪያ ጊዜ በሀገረ ስብከታችን አየተሰጠ ያለ ሥልጠና ስለ ሆነ ታሪካዊ ስብሰባ/ሥልጠና ነው ብለዋል። ከዚህ ጋር አያይዘውም ከጉባኤተኛው የሚገኘው ሓሳብ ለሀገረ ስብከቱ መልካም የሥራ ለውጥ ትልቅ ሚና ስለሚኖረው ገንቢ የሆነ ሐሳባችሁን እንድታጋሩን እንፈልጋለን ብለዋል።
መርሐ ግብሩ በመ/ብርሃን ሳሙኤል ደምሴ የአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ እየተመራ በመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ምክትል የሆኑት ሊቀ ስዩማን ወልደ ሰንበት አለነ “መልካም አስተዳደር በቤተክርስቲያን አስተምህሮ” በሚል ርእስ ዳሰሳዊ ጽሑፍ ቀርቧል። ዳሰሳዊ ጽሑፉ የመልካም አስተዳደር ምንነት፥ የመልካም እረኛ ተልእኮ እና በርከት ያሉ መልካም እረኛ የሚያካትታቸው ጉዳዮችንና የመልካም አስተዳደር እጦት የሚያስከትለው ችግር ዳስሰዋል።
በመቀጠልም ሊቀ ካህናት ቁሙላቸው ደርሰህ በመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ዋና ጸኃፊ “በኢትዮጵያ ኦርቶዶክስ ተዋሕዶ ቤተ ክርስቲያን የሰበካ መንፈሳዊ ጉባኤ አደረጃጀት የተዘጋጀ የገንዘብና ወጪ ቅጽ ቀርቦ ማብራርያ ተሰጥቶበታል።
በማስከተልም የኢትዮጵያ ኦርቶዶክስ ተዋሕዶ ቤተ ክርስቲያን ለሀገር ግንባታ ያበረከተችውን አስተዋጽኦ ከትናንት እስከ ዛሬ የሚል ዳሰሳዊ ጽሑፍ በላዕከ ሰላም ቀሲስ ሰሎሞን ቶልቻ የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ቀርቧል። በዳሰሳዊ ጽሑፉ ቤተ ክርስቲያኒቱ ሕግና አስተዳደር፥ ፊደል፥ ካላንደር፥ የማኅበራዊና የመንፈሳዊ፥ የግብረ ገብነት ትምህርት ወዘተ አዘጋጅታና አሰናድታ በማቅረብ ሀገርን እንደ ሀገር እንድትቀጥል ያደረገችው አስተዋጽኦ የማይተካ ሚና መጫወትዋን ተብራርቷል።
ከዚህ በተያያዘም ስለ ሀገርንና ነገሥታት ዘወትር በጸሎት እየተጋች ሀገርን እንደ ሀገር ሊስቀጥላት የሚችል በመሠረተ ልማት፣ በኢኮኖሚው ዘርፍና ለሰላም ዘብ በመቆም ያበረከተችውን አስተዋጽኦም ዘመን የማይሽረው ሚና መሆኑን ተገልጿል።
ሥልጠናው ካለቀ በኋላ ከተሳታፊዎች ጋር ውይይት የተደረገ ሲሆን፡ ከተሳታፊዎች ሥልጠናው መዋቅሩን ጠብቆ ከላይ ጀምሮ እስከ ታች ለሁሉም ቢሰጥና ችግሮችን ለመፍታት ከበላይ አካላት ውይይት ቢደረግ ብለዋል።
ከዚህ በተጨማሪም ሥልጠናው ችግሮች ባሉበት ቦታ እየተለየ ቢሰጥ የሚል አስተያየትም ቀርቧል።
በመጨረሻም የዕለቱ የአቋም መግለጫ ተነብቦ መርሐ-ግብሩ ተጠናቋል።
ዘጋቢ መ/ር ኪደ ዜናዊ
ፎቶ በመ/ር ዋሲሁን ተሾመ

ዐውደ ወንጌል ዘተዋሕዶ በሚል መሪ ቃል በCMC ደብረ ጽባሕ ቅዱስ ሚካኤል ቤተ ክርስቲያን ለ4 ቀናት የተዘጋጀው መንፈሳዊ ጉባኤ ብፁዕ አቡነ መልከጼዴቅ በተገኙበት በዛሬው ተጠናቀቀ !!!

መጋቢት 14 ቀን /2013 ዓ.ም የአዲስ አበባና የጉራጌ አህጉረ ሰብከት ሊቀ ጳጳሰ ብፁዕ አቡነ መልከጼዴቅን ጨምሮ የሀገረ ስብከቱ የሕዝብ ግንኙነት ዋና ክፍል ኃላፊ መ/ም በቃሉ ወርቅነህ፡ የደብሩ አስተዳዳሪ መልአከ ጽባሕ አባ ጥዑመልሳን አድነውና የደብሩ ዋና ጸሐፊ መ/ር ዕዝራ ነዋይ እንዲሁም የደብሩ ካህናትና መምህራን የደብሩ ሰንበት ትምህርት ቤት ወጣቶችና እጅግ በርካታ ኦርቶዶክሳውያን ምዕመናን በተገኙበት ወርኃዊውን የቅዱስ ሚካኤልን በዓልና የዐብይ ጾምን የሱባኤጊዜ አስመልክቶ የተዘጋጀው ጉባኤ በብፁዕ አቡነ መልከጼዴቅ ቃለ ምዕዳንና መመሪያ ሰጭነት በዛሬው ዕለት በሰላም ተጠናቋል፡፡
ሀገረ ስብከቱ የስብከተ ወንጌል አገልግሎት እንዲጠናከርና መንፈሳዊጉባኤያት እንዲዘረጉ ባስተላለፈው መመሪያ መሠረት ይህን ለብዙ ሰዎች መጽናኛ የሆነውን የወንጌል መድረክ ዐውደ ወንጌል ዘተዋሕዶ በሚል መሪ ቃል በደብሩ ሰበካ ጉባኤ ጽ/ቤትና ልማት ኮሚቴ እንዲሁም በደብሩ ማኅበረ ካህናት፡የሰንበት ት/ቤት ዘማርያንና የአካባቢው ወጣቶች የጋራ ትብብር የተዘጋጀ ጉባኤ መሆኑን የዕለቱን መርሐ ግብር የመሩት የደብሩ ዋናጸሐፊ መ/ር ዕዝራ ነዋይ አሳውቀዋል፡፡
አያይዘውም የስብከተ ወንጌል አገልግሎት የቤተ ክርስቲያን ዋና ተልእኮና ዐብይ ተግባር በመሆኑ ከየትኛውም ልማትና አገልግሎት በተለየ መልኩ ሰፊ ትኩረትና በቂ በጀት ተመድቦለት ሊሠራ እንደሚገባው ገልጸው ፡በደብሩ በኩል ወደፊትም ሳምንታዊና ወርኃዊ ጉባኤያትን በማጠናከር ከዚህ በተሻለ መልኩ እንደሚቀጥል አረጋግጠዋል፡፡
የCMC ደብረ ጽባሕ ቅዱስ ሚካኤል ቤተ ክርስቲያን ረቡዕና አርብ በደብሩ የሰብከተ ወንጌል አዳራሽ ለሁሉም ካህናት ስልጠና እየሰጠ ከመሆኑም በላይ ሳምንታዊ ጉባኤ ማክሰኞና እሁድ ለመጀመር ዝግጅት ማጠናቀቁንና ይህንንም አገልግሎት በሁሉም ቦታ ለሚገኙ ምዕመናን ለማዳረስ በደብሩ ስም የFACE BOOk PAGe መክፈቱንም ይፋ አድርጓል፡፡
የደብሩ አስተዳዳሪ መልአከ ጽባሕ አባ ጥዑመ ልሳን አድነው በበኩላቸው በእነዚህ ተከታታይ አራት ቀናት የእግዚአብሔርን ድምፅ በጋራ ቁጭ ተብሎ የተሰማበትና ንስሐ የተገባበት ሳምንት መሆኑን ገልጸው ብፁዕነታቸውን እንኳን ደህና መጡ ብለዋል፡ለጉባኤው ስኬት ለተሳተፉት አካላት ሁሉ ምሥጋና አቅርበዋል።
በመጨረሻም ብፁዕ አቡነ መልከጼዴቅ ሰው በምግብ ብቻ እንደማይኖር ጌታ የተናገረበትን ክፍል ጠቅሰው፡ ከሥጋ በዘለለ ለመንፈስና ነፍስ ምግብ የሚሆነውን የእግዚአብሔር ቃል
ሁሉም እንዲመገብ ይህንን መንፈሳዊ ጉባኤ በማዘጋጀት ለደከማችሁት በሙሉ ምሥጋና ይድረሳችሁ ብለዋል፡፡
የቤተ ክርስቲያን መሪዎችም ቅድሚያ ሰጥተው
ሊሠሩትና ትልቅ በጀትሊመድቡለት የሚገባው ለወንጌል አገልግሎት መሆን እንደሚገባው በጽኑ አሳስበዋል፡፡
ዐውደ ወንጌል ዘተዋሕዶ በሚል መሪ ቃል እየተካሄደ የሚገኘው ታላቅ መንፈሳዊ ጉባኤ የሀገረስብከቱ ስብከተ ወንጌልና ሐዋርያዊ ተልእኮ ዋና ክፍል፡ከሰባቱም ክፍላተ ከተሞች የሰብከተ ወንጌል ክፍል ኃላፊዎች እንዲሁም ከገዳማትና አድባራቱ ጋር በመተባበር የሚዘጋጅ መሆኑ አይዘነጋም፡፡
ዘጋቢ መ/ር ሽፈራው እንደሻው
ፎቶ በመ/ር ወሲሁን ተሾመ

የዛሬው የ39ኛው የሰበካ ጉባኤ ስልጠና በአቃቂ ቃሊቲ ክፍለ ከተማ ቤተ ክህነት አስተባባሪነት በሳሪስ ም/ቅ አቡነ ገብረ መንፈስ ቅዱስ ቤ/ክ የስብከተ ወንጌል አዳራሽ ተካሄደ

በዛሬው ዕለት መጋቢት 14 ቀን 2013 ዓ.ም የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ላዕከ ሰላም ቀሲስ ሰሎሞን ቶልቻ፣ የአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ መልአከ ብርሃን ሳሙኤል ደምሴ፣ የአቃቂ ቃሊቲ ክፍለ ከተማ ቤተ ክህነት ዋና ሥራ አስኪያጅ ሊቀ ኅሩያን ዳዊት ታደሰ፣ የሀገረ ስብከቱና የክፍለ ከተማው የሥራ ኃላፊዎች እንዲሁም በአቃቂ ቃሊቲ ክፍለ ከተማ ሥር የሚገኙ የገዳማትና የአድባራት አስተዳዳሪዎች፣ ጸሐፊዎች፣ ቁጥጥሮች፣ ሒሳብ ሹሞች፣ የሰንበት ት/ቤት ተወካዮች እና የስብከተ ወንጌል ኃላፊዎች በተገኙበት በሳሪስ ምዕራፈ ቅዱሳን አቡነ ገብረ መንፈስ ቅዱስ ቤ/ክ የስብከተ ወንጌል አዳራሽ በአቃቂ ቃሊቲ ክፍለ ከተማ ቤተ ክህነት አስተባባሪነት ተካሂዷል።
የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ላዕከ ሰላም ቀሲስ ሰሎሞን ቶልቻ የኢትዮጵያ ኦርቶዶክስ ተዋሕዶ ቤተ ክርስቲያን ለሀገረ መንግሥት ግንባታ ያበረከተችውን አስተዋጽኦ በዳሰሳዊ ጽሑፍ በሰፊው አብራርተዋል። የኢትዮጵያ ኦርቶዶክስ ተዋሕዶ ቤተክርስቲያን ሀገርን እንደ ሀገር ያቆመች እንደሆነች፣ሀገርንና መንግሥትን በጸሎት የምታስብ መሆኗን፣በመሠረተ ልማት፣ በኢኮኖሚው ዘርፍና በትምህርት እድገት በኩል ያበረከተችውን አስተዋጽኦ በሰፊው ገልጸዋል።
የሰዋስወ ብርሃን ቅዱስ ጳውሎስ መንፈሳዊ ኮሌጅ ምክትል አካዳሚክ ዲን መጋቤ ሐዲስ ጸጋው ወ/ትንሣኤ “ካህናትና የካህናት ተልዕኮ” በሚል ርዕስ ዳሰሳዊ ጽሑፍ ያቀረቡ ሲሆን ስለ ክህነት ምንነት፣ስለ ካህናት አገልግሎት ታሪካዊ ዳራ፣ስለ ካህናት ኃላፊነትና ተግባር፣ በ1ጢሞ ምዕ 3 ላይ በመመርኮዝ የካህናት መስፈርቶች ምን እንደሆኑ፣ የካህናት የመጀመሪያው አገልግሎት ወንጌልን መስበክ እንደሆነ፣ ትውልዱን በመልካም ስነ ምግባር ኮትኩቶ ማሳደግ፣ ከገዢነት መንፈስ ይልቅ በፍቅር መንፈስ ምእመናንን ማገልገል፣በዚህ ዘመን ያለው የካህናት ሕይወት ምን እንደሚመስልና ዛሬ ለቤተ ክርስቲያን የሚያስፈልጋት ካህን ሐቀኛና አገልጋይ መሆን እንዳለበት በሰፊው አብራርተዋል።
በመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ማስተባበሪያ ዋና ኃላፊ ሊቀስዩማን ወ/ሰንበት አለነ “መልካም እረኛና አስተዳደር”በሚል ርዕስ ማብራሪያ የሰጡ ሲሆን ዋናው የካህን ሥራ እረኝነት እንደሆነ ገልጸው ነገር ግን በአሁን ጊዜ በአብዛኛው የእረኝነት አገልግሎት ተዘንግቶ አብዛኛው ካህን በአስተዳደር ሥራ ላይ መሠማራቱን ገልጸዋል። የመጀመሪያው የካህን አገልግሎት ለምእመናን ወንጌልን መስበክ፤ ምእመናንን መጠበቅ፤ ቀጥሎም የአስተዳደሩ ሥራ በሁለተኛ ደረጃ የሚከናወን እንደሆነ አብራርተዋል። አያይዘውም ምእመናን የሚጠይቁትን ጥያቄዎች በአግባቡና በወቅቱ መመለስ፣ ፍቅረ እግዚአብሔርንና ፍቅረ ቢጽን በትውልዱ ልቦና ውስጥ እንዲሰርጽ ማስተማር የካህን አገልግሎት እንደሆነ ገልጸዋል።
የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ዋና ጸሐፊ ሊ/ካህናት ቁምላቸው ደረሰው የኢትዮጵያ ኦርቶዶክስ ተዋሕዶ ቤተ ክርስቲያን “የሰበካ ጉባኤ አጀረጃጀት ትናንትናና ዛሬ” በሚል ርዕስ ስለ ሰበካ ጉባኤ ምንነት፣ስለ መንፈሳዊ ሰበካ ጉባኤ ታሪካዊ ዳራና ሰበካ ጉባኤ ለቤተክርስቲያን ቁልፍ የሆነ አስተዳደር መሆኑን አውስተዋል።
በአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ መልአከ ብርሃን ሳሙኤል ደምሴ መርሐግብር መሪነት በቀረቡት ዳሰሳዊ ጽሑፎች ላይ ውይይት ተካሂዷል።
የአቃቂ ቃሊቲ ክፍለ ከተማ ቤተ ክህነት ዋና ሥራ አስኪያጅ ሊቀ ኅሩያን ዳዊት ታደሰ የክፍለ ከተማውን ጥሪ አክብረው በስልጠናው ላይ የተገኙትን የአድባራትና ገዳማት አስተዳዳሪዎች፣ ጸሐፊዎች፣ ቁጥጥሮች፣ ሒሳብ ሹሞች፣ የሰንበት ት/ቤት ተወካዮች እና የስብከተ ወንጌል ኃላፊዎችን በሙሉ አመስግነዋል።
በመጨረሻም በአርቃቂ ኮሚቴ የአቋም መግለጫ ተነቦ መርሐግብሩ በጸሎት የተዘጋ ሲሆን መርሐግብሩ በሌሎች ክፍላተ ከተማ እንደሚቀጥልም ተገልጿል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

የሙዳይ በጎ አድራጎት ማኅበር ለአዲስ አበባ ሀገረ ስብከት ጽ/ቤት የምስጋና ምስክር ወረቀት አበረከተ

የሙዳይ በጎ አድራጎት ማኅበር በአሁኑ ሰዓት 450 ሴቶችንና 650 ሕጻናትን የሚንከባከብና የሚያስተምር የበጎ አድራጎት ማኅበር ነው።
የአዲስ አበባ ሀገረ ስብከት ጽ/ቤት ይህንን በእግዚአብሔርም ሆነ በሰው ፊት መልካም የሆነውን የማኅበሩን ሥራ ለማበረታታትና የድርሻውን ለመወጣት በሀገረ ስብከቱ ምግባረ ሰናይ ዋና ክፍል አስተባባሪነት የተሰበሰቡ የትምህርት ቁሳቁሶችንና የተለያዩ አልባሳትን ከአንድም ሁለት ጊዜ ለማኅበሩ ድጋፍ ማድረጉ የሚታወስ ነው።
የሙዳይ በጎ አድራጎት ማኅበርም የአዲስ አበባ ሀገረ ስብከት ጽ/ቤት ላደረገው አስተዋጽኦ የምስጋና ምስክር ወረቀት ሰጥቷል።
የምስጋና ምስክር ወረቀት ስጦታው የሀገረ ስብከቱ ሊቀ ጳጳስ ብፁዕ አቡነ መልከጼዴቅ፣ የሀገረ ስብከቱ ዋና ሥራ አስኪያጅ መ/ር አካለወልድ ተሰማ፣ የሀገረ ስብከቱ ምግባረ ሰናይ ዋና ክፍል ኃላፊ መጋቤ ሐዲስ ለማ በየነ በተገኙበት በማኅበሩ ተወካዮች በኩል ለሀገረ ስብከቱ ተበርክቷል።
የማኅበሩ ተወካዮች ለብፁዕነታቸው፣ ለዋና ሥራ አስኪያጁና ለ ምግባረ ሰናይ ዋና ክፍል ኃላፊው ማኅበሩ ያለበት ቦታ ድረስ በመገኘት ጉብኝት እንዲያደርጉና ድጋፉም ለወደፊት ተጠናክሮ እንዲቀጥል ጥሪ አስተላልፈዋል።
ብፁዕነታቸው ማኅበሩ እየሠራ ያለውን መልካም ሥራ አጠናክሮ እንዲቀጥልበት አባታዊ ምክራቸውን ለግሰዋል።
ዘጋቢ መ/ር ወንድምአገኝ ደጀኔ