የኢትዮጵያ ኦርቶዶክስ ተዋሕዶ ቤተ ክርስቲያን ለሀገረ መንግሥት ግንባታ ያበረከተችው አስተዋጽኦ የማይተካ ሚና እንዳለው በ39ኛው የሰበካ ጉባኤ ስልጠና ላይ ተገለጸ!!

መጋቢት 13 ቀን 2013 ዓ.ም የመ/ፓ/ጠቅላይ ቤተ ክህነት የሰበካ ጉባኤ ማደራጃ መምሪያ ኃላፊ ላዕከ ሰላም ቀሲስ ሰሎሞን ቶልቻ፡ የአዲስ አበባ ሀገረ ስብከት የሰበካ ጉባኤ ማደራጃ ዋና ክፍል ኃላፊ መልአከ ብርሃን ሳሙኤል ደምሴ፡የአራዳና ጉለሌ ክፍለ ከተማ ቤተ ክህነት ሥራ አስኪያጅ መጋቤ ሃይማኖት ጸጋዬ ገ/ዮሐንስ፡ የሀገረ ስብከቱና የክፍለ ከተማው የሥራ ኃላፊዎች እንዲሁም በአራዳና ጉለሌ ክፍለ ከተማ ሥር የሚገኙ ገዳማትና አድባራት አስተዳዳሪዎች፡ ጸሐፊዎች እና የስብከተ ወንጌል ኃላፊዎች በተገኙበት በመንበረ ጸባዖት ቅድሥት ሥላሴ ካቴድራል የስብከተ ወንጌል አዳራሽ በአዲስ አበባ ሀገረ ስብከት አራዳና ጉለሌ ክፍለ ከተማ ቤተ ክህነት አስተባባሪነት የ39ኛውን መደበኛ ሰበካ ጉባኤ የስምሪት ሪፖርት አስመልክቶ በቀረበው ዳሰሳዊ ጥናት የኢትዮጵያ ኦርቶዶክስ ተዋሕዶ ቤተ ክርስቲያን ለሀገረ መንግሥት ግንባታ ያበረከተችው አስተዋጽኦ የማይተካ ሚና እንዳለው ተገልጿል፡፡
የሀገረ ስብከቱ የሰበካ ጉባኤ ማደራጃ ዋና ክፍል ኃላፊ መ/ብ ሳሙኤል ደምሴ በዚህ በያዝነው ዓመት የአዲስ አበባ ሀገረ ስብከት በሀገረ ስብከት ደረጃ የሚደረገውን አንደኛ መደበኛ ሰበካ ጉባኤ በወርኃ የካቲት ማደረጉን አስታውሰዋል፡ የስልጠና እና የምክክር መርሐ ግብሩ የተዘጋጀው በጠቅላይ ቤተ ክህነት ሰበካ ጉባኤ ማደራጃ መምሪያ እንዲሁም በሀገረ ስብከቱ ሰበካ ጉባኤ ማደራጃ ዋና ክፍል የጋራ ትብብር ሆኖ በክፍለ ከተማው አስተባባሪነት መሆኑንም አሳውቀዋል፡፡
የመ/ፓ/ጠ/ቤተ ክህነት የ39ኛው አጠቃላይ መደበኛ ሰበካ መንፈሳዊ ጉባኤ መደረጉን ተከትሎ ችግር ካለባቸው የሀገሪቱ ክፍሎች ውጭ በመላው አህጉረ ስብከት አጠቃላይ ስምሪት መደረጉን እና ሪፖርት መቅረቡን ገልጸዋል፡ከሁሉም የስምሪቱ የሀገሪቱ ክፍሎች ለማደራጃ መምሪያው የቀረበው ሪፖርት የቤተ ክርስቲያናችንን አሁናዊ ሁኔታ በግልፅ ያሳየ መሆኑን የጠ/ቤተ ክህነት ሰበካ ጉባኤ ማደራጃ መምሪያ ኃላፊው ላዕከ ሰላም ሰሎሞን ቶልቻ አብራርተዋል፡፡
መርሐ ግብሩ ጠዋትና ከስአት ለአንድ ቀን ያክል የተደረገ ሲሆን ቤተ ክርስቲያን ሀገረ መንግሥትን ከመገንባት አንጻር ያላት ሚና፡በቤተ ክርስቲያናችን እየተፈጸመ ስላለው የክህነት አገልግሎትና የሰበካ ጉባኤ አደረጃጀትና ጉዞው እንዲሁም የቤተ ክርስቲያን አስተዳደር በሚሉ አራት የተለያዩ ርእሰ ጉዳዮች ዙሪያ ዳሰሳዊ ጥናቶች ቀርበዋል፡ውይይትና ምክክርም ተደርጎባቸዋል፡፡
ይኸው የ39ኛው አጠቃላይ መደበኛ የሰበካ ጉባኤ የስምሪት ስልጠና እና ምክክር በቀሩት ስድስት ክፍላተ ከተሞች ላይ የሚቀጥል መሆኑንም ተገልጿል፡፡
ዘጋቢ:-መ/ር ሽፈራው እንደሻው
ፎቶ፡-በመ/ር ዋሲሁን ተሾመ

ብፁዕ አቡነ መልከጼዴቅ በመካኒሳ ደብረ ገነት ቅዱስ ሚካኤል ካቴድራል በተዘጋጀው ዐውደ ወንጌል ዘኦርቶዶክስ ተዋሕዶ ጉባኤ ተገኝተው ትምህርተ ወንጌልና ቃለ ምዕዳን ሰጡ

የአዲስ አበባ እና የጉራጌ አህጉረ ሰብከት ሊቀ ጳጳሰ ብፁዕ አቡነ መልከጼዴቅ በመካኒሳ ደብረ ገነት ቅዱስ ሚካኤል ካቴድራል በተዘጋጀው ዐውደ ወንጌል ዘኦርቶዶክስ ተዋሕዶ ጉባኤ ተገኝተው ትምህርተ ወንጌልና ቃለ ምዕዳን ሰጥተዋል።
በጉባኤው ክቡር መ/ር አካለወልድ ተሰማ የአዲስ አበባ ሀገረ ስብከት ዋና ሥራ አስኪያጅ ፥ መልአከ ሕይወት አባ ወልደ ኢየሱስ ሰይፈ የሀገረ ሰብከቱ የካህናት አስተዳደር ዋና ክፍል ኃላፊ፥ ሊቀ ሥልጣናት አባ ኪሮስ ጸጋየ (ቆሞስ) የደብሩ አስተዳዳሪ፥ የደብሩ ካህናት አገልጋዮች፥ ዘማርያን፥ ሰባክያነ ወንጌል፥ የሰንበት ት/ቤት ወጣቶችና በርከት ያሉ ምእመናን ተገኝተዋል።
ጉባኤው በካቴድራሉ ለሦስት ተከታታይ ቀናት ሲካሄድ የቆየ ዐውደ ወንጌል ዘኦርቶዶክስ ተዋሕዶ መሆኑን ተገልጿል።
በዕለቱ በተለያዩ ሰባክያነ ወንጌል ሰፋ ያለ ትምህርተ ወንጌል፥ በሊቃውንት ያሬዳዊ ዝማሬና በዘማሪት ምርትነሽ መዝሙር ቀርቧል።
የዕለቱ መርሐ ግብር በካቴድራሉ ዋና ጸኃፊ መጋቤ ሥርዓት ልዑል ሰገድ የተመራ ሲሆን የመጀመሪያው ተጋባዥ ሰባኪ አባ አትናቴዎስ ወልደጎርጎሬዎስ የሐመረ ብርሃን ዝዋይ ቅዱስ ገብርኤል ርእሰ መምህር ” እግዚኦ መኑ የሐድር ውስተ ቤትከ፤ አቤቱ፥ በድንኳንህ ውስጥ ማን ያድራል?” (መዝ 15:1) በሚል የመዘምሩ ቃል መነሻነት ዕለቱን በተመለከተ ሰፋ ያለ ትምህርተ ወንጌል ተሰጥቷል።
በእግዚአብሔር ቤት እሱ ራሱ ባለቤቱ ቅዱስ እግዚአብሔር፥ ቅድስተ ቅዱሳን ድንግል ማርያምና ቅዱሳን መላእክትን ጨምሮ ሁሉም ቅዱሳኑ ይገኙበታል ካሉ በኋላ፡ እኛም እኔ ቅዱስ እንደሆንኩ እናንተም ቅዱሳን ሁኑ ባለው መሠረት በቃሉ ጸንተን በቅድስና በቤቱ ልንኖር ይገባል ብለዋል።
በመቀጠልም ልሣነ ክርስቶስ ጳውሎስ መልክዓ ሥላሴ ኃይለ ሥላሴ የቦሌ ደብረ ሳሌም የስብከተ ወንጌል ኃላፊ “ኢትግበሩ ቤተ አቡየ ቤተ ምስያጥ ፤ የአባቴን ቤት የንግድ ቤት አታድርጉት ።” (ዮሐ 2:16) በሚል መነሻነት 3ኛ ሳምንት የጌታችን የኢየሱስ ክርስቶስ ፆም (ምኩራብ) በተመለከተ ሰፋ ያለ ትምህርት አስተምረዋል።
ጌታችን ኢየሱስ ክርስቶስ ወደ አይሁድ ምኩራብ ገብቶ ቤቱ እንዳጸዳ ሁሉ ወደ አምላክ እየጸለይን ቤተ መቅደሳችን እናጽዳ። ቤተ መቅደስ እግዚአብሔር የሚገኝበት፥ ድኅነተ ሥጋና ድኅነተ ነፍስ የምናገኝበት፥ ከእግዚአብሔር የምንገናኝበት የቅድስና ቤት ነውና በቅድስና እየኖርን ቤተ መቅደሳችን ከክፋት፥ ተንኮል፥ ዘረኝነት፥ ቂምና በቀል በማጽዳት፥ ውስጣችን አንጽተን በንሥሓ ተመልሰን በቅድስና እንኑር ብለዋል።
የካቴድራሉ አስተዳዳሪ ሊቀ ሥልጣናት አባ ኪሮስ ጸጋየ በበኩላቸው ብፁዕ ሊቀ ጳጳሱና ዋና ሥራ አስኪያጁን ጨምሮ በጉባኤው ተገኝተው ላስተማሩና ለዘመሩ እንዲሁም ለጉባኤው ስኬት ለተሳተፉት አካላት ሁሉ ምሥጋናቸውን አቅርበዋል።
የሀገረ ስብከቱ ዋና ሥራ አስኪያጅ መ/ር አካለወልድ ተሰማም የካቴድራሉ አመሠራረትና ዕድገት በማውሳት እሳቸውም በካቴድራሉ ሲያገለግሉ እንደነበሩና አሁንም በይበልጥ ካቴድራሉን እንደሚያገለግሉ ቃል ገብተዋል።
በጉባኤው የተገኙት ብፁዕ አቡነ መልከጼዴቅ መርሐ ግብሩ ለቤተ ክርስቲያኒቱ እጅግ አስፈላጊ መሆኑን በመግለጽ ጉባኤው መቀጠል እንዳለበት ተናገረዋል ።
የእግዚአብሔር ቃል የሕይወት ምግብና የሕይወት ውሃ ስለ ሆነ ነፍሳችን ዘወትር የእግዚአብሔርን ቃል እንደሚያስፈልጋት ገልጸዋል።
ለክርስቶስ ወንጌል እንደ ሚገባ ኑሩ አንዳለው ቅዱስ ጳውሎስ የእግዚአብሔር ቃል ሰምተን በቃሉ መሠረት እየኖር ለእግዚአብሔር መንግሥት ተዘጋጅተን መኖር አለብን ብለዋል።
የቤተ ክርስቲያን ዋና ዓላማ ወንጌልን ማስተማር ነው ያሉት ብፁዕነታቸው ቅዱስ ጳውሎስ በጊዘውና ያለጊዜው ቃሉን ስበክ እንዳለው እኛም ዘወትር ቃሉን መስበክ አለብን ብለዋል።
በመጨረሻም ብፁዕነታቸው ምእመናኑን በመባረክና አባታዊ መመሪያን በማስተላለፍ ጉባኤው በጸሎትና በቡራኬ ተዘግቷል።
ዘጋቢ መ/ር ኪደ ዜናዊ
ፎቶ በመ/ር ወሲሁን ተሾመ

ብፁዕ አቡነ መልከጼዴቅና መ/ር አካለወልድ ተሰማ በየካ ደብረ ሣህል ቅዱስ ሚካኤል ቤተ ክርስቲያን ተገኝተው ትምህርተ ወንጌልና የሥራ መመሪያ ሰጡ

የአዲስ አበባ እና የጉራጌ አህጉረ ሰብከት ሊቀ ጳጳሰ ብፁዕ አቡነ መልከጼዴቅና የሀገረ ስብከቱ ዋና ሥራ አስኪያጅ መ/ር አካለወልድ ተሰማ በየካ ደብረ ሣህል ቅዱስ ሚካኤል ቤተ ክርስቲያን ተገኝተው ትምህርተ ወንጌልና የሥራ መመሪያ ሰጥተዋል።
በቦታው ክቡር አባ ወልደኢየሱስ ሰይፈ የሀገረ ሰብከቱ የካህናት አስተዳደር ዋና ክፍል ኃላፊ፥ ክብር መልአከ ሣህል ቆሞስ አባ ተክለ ብርሃን ደስታ የደብሩ አስተዳዳሪ፥ የደብሩ ካህናት አገልጋዮችና በርከት ያሉ ምእመናን ተገኝተዋል።
የደብሩ አስተዳዳሪ ክብር መልአከ ሣህል ቆሞስ አባ ተክለ ብርሃን ደስታ የቤተ መቅደሱ አገልግሎት እንደ ደብረ ሊባኖስ በ7 ካህናት የሚቀደስና በዕለተ ሰንበት በሁለት መንበር በ14 ቀዳሲያን እንደሚቀደስ አብራርተዋል።
ዕለቱን የተመለከተ ሰፋ ያለ ትምህርት በሀገረ ስብከቱ ዋና ሥራ አስኪያጅ መምህር አካለወልድ ተስማ ተሰጥቷል።
ትምህርቱ 3ኛ ሳምንት የኢየሱስ ፆም ምክንያት በማድረግ የተሰጠ ሲሆን ጌታችን ኢየሱስ ክርስቶስ ወደ አይሁድ ምኩራብ ገብቶ ቃለ ሃይማኖትን በማስተማር ቤተ መቅደሱን ከወንበዴዎች ያፀዳበት ዕለት መሆኑን በመጥቀስ ዛሬም ምዕመናን ሰውነት ቤተ መቅደሳችንን ከኃጢያት በማንጻት ቃሉ በሚፈቅደው መሠረት በንጽህና መኖር አለብን ብለዋል።
ብፁዕ አቡነ መልከጼዴቅም “የእግዚአብሔር መልአክ እግዚአብሔርን በሚፈሩ ሰዎች ዙሪያ ይሰፍራል ያድናቸውማል” በሚል ከቅዱስ ዳዊት መዝሙር መነሻ በማደረግ የእግዚአብሔር ቸርነት፥ የመላእክት ተራዳኢነትና ጥበቃ የሚያትት ሰፋ ያለ ትምህርትና አባታዊ መመሪያ ሰጥተዋል።
በመጨረሻም የደብሩ የጸበል ቦታ ጎብኝተዋል።


ዘጋቢ መ/ር ደምስ አየለ
ፎቶ በመ/ር ወሲሁን ተሾመ

ጎተራ አካባቢ የሚገኘው ጥንታዊው የደብረ ይባቤ ቅዱስ ያሬድ ሕንጻ ቤ/ክ እድሳት ሊካሄድለት ነው

በዛሬው ዕለት መጋቢት 11 ቀን 2013 ዓ/ም የጉራጌ እና የአዲስ አበባ አህጉረ ስብከት ሊቀ ጳጳስ ብፁዕ አቡነ መልከጼዴቅ፣ የአዲስ አበባ ሀገረ ስብከት የካህናት አስተዳደር ዋና ክፍል ኃላፊ መልአከ ሕይወት አባ ወልደ ኢየሱስ ሰይፈ፣ የደብረ ይባቤ ቅዱስ ያሬድ ቤተ-ክርስቲያን አስተዳደሪ መልአከ ፀሐይ ተስፋ ማርያም ነጋሽ፣ የደብሩ ማኅበረ ካህናት እና የደብሩ የሰ/ት/ቤት መዘምራን ወጣቶች እንዲሁም በርካታ ምዕመናን በተገኙበት በአባቶች ያሬዳዊ ዝማሬ ቀርቦ፣በብፁዕ አቡነ መልከጼዴቅ ትምህርተ ወንጌል ተሰጥቶ ጽላቱ ከዋናው ቤ/ክ ወደ ተዘጋጀለት መቃኞ የገባ ሲሆን እድሳቱም በፍጥነት እንደሚጀመርና ግንቦት 11/2013 ዓ.ም እንደሚጠናቀቅ ተገልጿል። ስለሆነም የሚመለከተው አካል ሁሉ የራሱን ድርሻ እንዲወጣ ከደብሩ ጥሪ ቀርቧል።

በመርሐግብሩ ላይ የደብረ አስተዳደሪ መልአከ ፀሐይ ተስፋ ማርያም ነጋሽ በብፁዕ አቡነ መልከጼዴቅ መመሪያ ሰጪነት በሀገረ ስብከቱ እየተከናወኑ ያሉትን መልካም ሥራዎች ለምእመናን ገለጻ አድርገዋል።

ብፁዕ አቡነ መልከጼዴቅ የደብረ ይባቤ ቅዱስ ያሬድ ሕንጻ ቤ/ክ እድሳት ቢዘገይም አሁን መጀመሩ መልካም እንደሆነ ገልጸው ሕንጻ ቤተክርስቲያንን የማነጽና የማደስ ትልቁ ዓላማ በኅብረት በመሆን እግዚአብሔርን ለማምለክ፣ ኪዳን ለማድረስ፣ ለማስቀደስ፣ ሥጋውን ደሙን ለመቀበል፣ ወንጌልን ለምእመናን ለማሰተማር እንደሆነ አብራርተው እድሳቱ በታቀደው መሠረት እንዲጠናቀቅ መመሪያ አስተላልፈዋል።

በተያያዘ ዜናም በጠቅላይ ቤተክህነትና በአዲስ አበባ ሀገረ ስብከት ዕውቅና አግኝቶ በየዓመቱ በዐቢይ ጾም “አውደ ወንጌል ዘኦርቶዶክስ” በሚል ስያሜ የሚዘጋጀው “የአድባራትና የገዳማት የአንድነት ጉባኤ” ዘወትር በደብሩ እየተካሄደ እንደሚገኝ ተነግሯል። ስብከተ ወንጌል የቤተክርስቲያን የጀርባ አጥንትና ዋና ተልዕኮዋ ስለሆነ መርሐግብሩ በሁሉም አድባራትና ገዳማት ተጠናክሮ መቀጠል እንዳለበት አጽንዖት ተሰጥቶ መልእክት ተላልፏል።

ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ አዲሱ የሀገረ ስብከቱ አሰራርን አስመልክተው ከምኒልክ ቴሌቪዥን ጋር ያደረጉት ቀለ መጠይቅ

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ አዲሱ የሀገረ ስብከቱ አሰራርን አስመልክተው ከምኒልክ ቴሌቪዥን ጋር ያደረጉትን ቀለ መጠይቅ ይመልከቱ ሌሎችም እንዲያዩት በፌስ ቡክ፣ በቴሌግራም፣ በዩቲዩብ….. ሼር ያድርጉ!!!

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ የዐብይ ጾም መግቢያን አስመልክተው ያስተላለፉት አባታዊ መልእክት

ብፁዕ አቡነ መልከጼዴቅ የዐብይ ጾም መግቢያን አስመልክተው አባታዊ መልእክት አስተላለፉ

ብፁዕነታቸው እንደገለጹት የኢትዮጵያ ኦርቶዶክስ ተዋሕዶ ቤተ ክርስቲያን ከደነገገቻቸው አጽዋማት መካከል አንዱ የዐቢይ ጾም ነው ፤ ዐቢይ የሚለው ቃል ትርጉሙ ትልቅ ማለት ሲሆን የጾሙን ታላቅነት ይገልጻል፤ ዐቢይ ጾም የተባለበት ምክንያት ጌታችን አምላካችን መድኃኔዓለም ኢየሱስ ክርስቶስ ስለጾመውና ለተከታታይ ስምንት ሳምንታት ሳይቋረጥ የሚጾም ጾም በመሆኑ ነው፤ በእያንዳንዱ ሳምንት ውስጥ ያሉት እሑዶች የየራሳቸው የሆነ ስያሜ፣ ትርጉምና ልዩ ምሥጢር እንዳላቸው አብራርተዋል።

ጾም ማለት ከምግብና ከመጠጥ ለተወሰኑ ሰዓታት መቆጠብ ብቻ ሳይሆን አንደበትም ከሀሜት፣እጅም የሌላውን ከመውሰድ፣እግርም ወደ ክፉ ከመሄድ፣ኅሊናም መጥፎውን ከማሰብ፣ዐይንም የሚያሰናክሉ ነገሮችን ከማየት፣ጆሮም ምናምንቴ የሆነውን የዓለም ነገር ከመስማት ሊቆጠቡ ይገባል ሲሉ አጽንዖት ሰጥተው ገልጸዋል።

በትንቢተ ኢሳይያስ ምዕራፍ 58 ላይ ስለ ጾም የተጠቀሰውን የእግዚአብሔርን ሃሳብ አንስተው እግዚአብሔር የማይፈልገውን ጾም ሳይሆን እግዚአብሔር የሚፈልገውን ጾም መጾም እንዳለብን አውስተዋል።

እግዚአብሔር የማይፈልገው ጾም በተጠቀሰው ምዕራፍ ላይ “እነሆ፥ በጾማችሁ ቀን ፈቃዳችሁን ታደርጋላችሁ፣ ሠራተኞቻችሁንም ሁሉ ታስጨንቃላችሁ፣ እነሆ ለጥልና ለክርክር ትጾማላችሁ በግፍ ጡጫም ትማታላችሁ” ተብሎ መጠቀሱን አንስተዋል።

ከዚሁ ጋር አያይዘውም ስንጾም በቤታችን ውስጥ ያሉት ሠራተኞች ላይ የምንጮህና የምናሰቃይ ከሆነ፣ በድርጅታችን ውስጥ ያሉትን ሠራተኞች የሠሩበትን የጉልበታቸውን ዋጋ የምንነፍግ ከሆነ፣ለወንድማችን ጉድጓድ የምንምስ ከሆነ፣ ከቤተሰባችን ከጎረቤታችን ከሥራ ባልደረቦቻችን ጋር እየተጣላን የምንጾም ከሆነ እንዲህ አይነቱን ጾም እግዚአብሔር እንደማይፈልገው ገልጸው ይልቁንም እነኚህን ነገሮች በማስተካከል ትክክለኛውንና እግዚአብሔር የሚፈልገውን ጾም ልንጾም እንደሚገባ አብራርተዋል።

አክለውም እግዚአብሔር የሚፈልገው ጾም በዚሁ ምዕራፍ ላይ “የበደልን እስራት ትፈቱ ዘንድ፥ የቀንበርንስ ጠፍር ትለቅቁ ዘንድ፥ የተገፉትንስ አርነት ትሰድዱ ዘንድ፥ ቀንበሩንስ ሁሉ ትሰብሩ ዘንድ አይደለምን? እንጀራህንስ ለተራበ ትቈርስ ዘንድ፥ ስደተኞቹን ድሆች ወደ ቤትህ ታገባ ዘንድ፥ የተራቈተውንስ ብታይ ታለብሰው ዘንድ፥ ከሥጋ ዘምድህ እንዳትሸሽግ አይደለምን? ” ተብሎ መጠቀሱን ገልጸዋል።

በመጨረሻም በተሰጠን ጸጋ ሌሎችን በማገዝና በመርዳት፣የተራቡትን በመመገብ፣ የተጠሙትን በማጠጣት፣ የታረዙትን በማልበስ፣ የተጨነቁትን በመምከር፣የታሰሩትን በመጠየቅ፣ስለ ሀገራችን ፣ስለ ዓለም በመጸለይ ልንጾም ይገባል ሲሉ አባታዊ ምክራቸውን አስተላልፈዋል።

ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

የሀገረ ስብከቱ የኢንፎርሜሽን ቴክኖሎጂ አጠቃቀም ትግበራ

“እንግዲህ እንደ ጥበበኞች እንጂ ጥበብ እንደሌላቸው ሳይሆን እንዴት እንድትመላለሱ በጥንቃቄ ተጠበቁ፤ ቀኖቹ ክፍዎች ናቸውና ዘመኑን ዋጁ”፡፡ ኤፌ. 5÷15

በመ/ር ዘሩ ብርሃኔ

አሁን የምንገኝበት ዘመን የኢንፎርሜሽን ቴክኖሎጂ ጥቅም ጎልቶ የታየበት ዘመን በመሆኑ በዚሁ ቴክኖሎጂ ኦቶሜሽን ሲስተም ያልታገዘ አሠራር አዝጋሚ እና አድካሚ ከመሆኑም በላይ ብክነትን ባስወገደ መልኩ የሚፈለገውን ያህል  አጥጋቢ እና ውጤታማ ለመሆን ያስቸግራል። ሀገረ ስብከቱ በሥሩ ከሚገኙ ገዳማትና አድባራት ጋር ቀልጣፋ የሆነ ዘመናዊ የመረጃ ልውውጥ እንዲኖር ለማድረግ እንዲሁም ወቅታዊ እና ልዩ ልዩ ዳሰሳዎችን በተፈለገው ጊዜ እና ጥራት ለማግኘት የኢንፎርሜሽን ሲስተም መዘርጋት አስፈላጊ ሆኖ በመገኘቱ ከመቸውም ጊዜ በተሻለ ሁኔታ ሁለንተናዊ የሥራ እንቅስቃሴዎቹን  በቴክኖሎጂ የታገዘ ለማድረግ በብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ የሚመራው የሀገረ ስብከቱ አስተዳደር ሌት ተቀን በመሥራት ላይ ይገኛል ።ይህም የሀገረ ስብከቱን አቅም ግንባታ በማሳደግ የተቀላጠፈ እና ከስህተት የጸዳ አገልግሎት ለመስጠት ያስችለዋል። ሀገረ ሰብከቱ ይህን ቴክኖሎጂ በመጠቀም ዓላማውን ሙሉ በሙሉ ከማሳካቱም ባሻገር በሥራ ዓለም ውስጥ ብቁና ተወዳዳሪ እንዲሆን ያደረገዋል፡፡

በኢትዮጵያ ኦርቶዶክስ ተዋሕዶ ቤተ ክርስቲያን ሥር ካሉ 50 አህጉረ ስብከት መካከል በተደራጀ መልኩ ኢንፎርሜሽን ቴክኖሎጂ በመጠቀም አዲስ አበባ ሀገረ ስብከት የመጀመሪያው ነው፡፡አዲስ አበባ ሀገረ ስብከት ዘመኑ ያስገኘውን ቴክኖሎጂ በመጠቀም አገልግሎቱን የበለጠ ለማሳደግና በመላው ዓለም ስርጭቱን ተደራሽ እንዲሆን ታስቦ  እጅግ ዘመናዊ የሆነ  ይፋዊ(ኦፊሻል) ድረ-ገፅ አዘጋጅቶ ሥራ ላይ እንዲውል አድርጓል፡፡

የዚሁ ቴክኖሎጂ አገልግሎትም ዘመኑ ባስገኘው  ቴክኖሎጂ በመጠቀም ስብከተ ወንጌልን ፤ የቤተ ክርስቲያናችንን አስተምህሮ እና የቤተ ክርስቲያኒቱን ማኅበራዊ አገልግሎቶች ለዓለም ሕዝብ በማዳረስ ዓይነተኛ መሣሪያ ሆኖ አገልግሎት መስጠት ሲሆን በተጨማሪም ድረ ገጹን  በመጠቀም የቤተ ክርስቲያናችንን አኩሪ ታሪክ ቅርስና ታሪካዊ ቦታዎችን  ከማስተዋወቅ ባሻገር ወቅታዊ የሆኑ መረጃዎችን ፤ዕቅዶችን እና  የሥራ አፈጻጸም ሪፖርቶችን ለኢትዮጵያ ኦርቶዶከስ ተዋሕዶ ቤተ ክርስቲያን እምነት ተከታዮች በቀላሉ እንዲዳረስ በማድረግ በኩል ከፍተኛ የሆነ የግልፅነትና የተአማኒነት ሚና እንዲጫወት ማድረግ ነው ፡፡

የኢንፎርሜሽን ቴክኖሎጂ ሥራ አንዴ ተሠርቶ የሚያልቅ ሥራ ባለመሆኑ ሀገረ ስብከቱ በብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ መመሪያ ሰጭነትና መሪነት ወቅታዊ የሆኑ የቴክኖሎጂ ውጤቶችን/ሲስተሞችን አዘጋጅቶ ሥራ ላይ አውሏል፡፡ ለተሠሩት ሲስተሞች ግብዓት የሚሆኑ የሰው ኃይል እና የንብረት ሀብት መረጃ የሚሰበስቡ ኮሚቴዎች አዋቅሮ ከ170 በላይ ገዳማትና አድባራት መረጃ ተሰብስቦ ወደ ሥራ ተግብቷል፡፡የሀገረ ስብከቱ አይቲና ዶክሜንቴሽን ክፍሉን በአግባቡ ከማደራጀት ጀምሮ የተሻሉ የቴክኖሎጂ ሥራዎችን ለመሥራት በሙሉ አቅም ላይ ይገኛል፡፡

በሀገረ ስብከቱ ከተሠሩ የኢንፎርሜሽን ቴክኖሎጂ ሥራዎች መካከል፡-

  1. የሰው ሀብት አስተዳደር ሲስተም/ Human Resource management system 
    1. የንብረትና ሀብት አስተዳደር ሲስተም/ Asset Management System
    1.  የመዝገብ ቤት ፋይል አስተዳደር ሲስተም/Archive File Management system
    1. እስቶክ አስተዳደር ሲስተም/ Stock Management System
    1. ድረ ገጽ∕ ዌብ ሳይት፣ ማኅበራዊ ፌስ ቡክ ገጽ፣ዩትዮብ ቴሌግራም ቻናል/ Web site, Face book page እና
    1. የሀገረ ስብከቱ ሕንፃ ኔትዎርክ ዝርጋታ፣ የ20 ሜጋ ባይት ብሮድባንድ ኢንተርኔት እና ዋይ ፋይ(Wi- Fi)  አገልግሎት ከብዙ በጥቂቱ ናቸው፡፡

ሲስተሞቹ የሚሰጧቸው  አገልግሎቶች በከፊል

1የሰው ሀብት አስተዳደር ሲስተም/ Human Resource management system: – ይህ ሲስተም የሀገረ ስብከቱን፣ የክፍላተ ከተማዎችንና የአዲስ አበባ ገዳማትና አድባራት ሠራተኞች ሙሉ መረጃ መዝግቦ በመያዝ፤ ሥራው የሚመለከታቸው የሀገረ ስብከቱ ኃላፊዎች መረጃዎችን ለማግኘት ቀጥታ በአካል መሄድ ሳያስፈልጋቸው ባሉበት ቦታ ሆነው በተመሳሳይ ሰዓት የተለያዩ ዶክሜንቶችን በተፈለገው ሰዓት የሚፈልጉትን መረጃ በጥራትና በፍጥነት ለማግኘት የሚያግዝ በጣም ፈጣንና አስተማማኝ የሆነ ሲስተም ነው፡፡ ይህም የሰው ኃይል፣ጊዜ፣ገንዘብ፣ጉልበት፣ድካም እና የተለያዩ ስጋቶችን ይቀንሳል፡፡

2.   የንብረትና ሀብት አስተዳደር ሲስተም/ Asset Management System: – ይህ ሲስተም የሀገረ ስብከቱን፣ የክፍላተ ከተማዎችንና የአዲስ አበባ ገዳማትና አድባራት ንብረትና ሀብት (ሕንፃ፣ መሬት፣ መኪና እና የተለያዩ የይዞታ ካርታዎች ወዘተ…) ሙሉ መረጃ መዝግቦ የሚይዝ ሲስተም ነው፡፡

3. የመዝግብ ቤት ፋይል አስተዳደር ሲስተም/ File Management system:-ይህ ሲስተም እስከ አሁን የነበረውን ባህላዊ/Manual/ የሀገረ ስብከቱ ሪከርድ ክፍል አሠራር ወደ ዘመናዊ/ Computerized System በመቀየር በልምድ ይከናወን የነበረውን አሠራር ከመቅረፉም በላይ ሥራው ከሀሜት በፀዳ መልኩ እንዲሠራ ይረዳል፤ በዚህም መሠረት እስከ አሁን በሀገረ ስብከቱ የተሠሩት እና ወደ ፊትም የሚሠሩትን ሥራዎች ሁሉ ወደ አዲሱ መረጃ ቋት/ሲስተም/ከገባ በኋላ የተለያዩ የመፈለጊያ መንገዶችን በመጠቀም በአጭር ጊዜ ውስጥ የተለያዩ አገልግሎቶችን ማግኘት የሚያስችል ሲስተም ነው፡፡

4. የአላቂ ዕቃዎች ዕቃዎች አስተዳደር ሲስተም/ Stock Management System

አጠቃላይ የሀገረ ስብከቱ አላቂ ዕቃዎች ዝርዝር መዝግቦ የሚይዝ ሲስተም ሲሆን ይህ  የቴክኖሎጂ ሲስተም ሀገረ ስብከቱ የሚሰጠውን አገልግሎት በዘመናዊ የኮምፒዩተር ቴክኖሎጂ የታገዘና አንድ ማዕከላዊ በሆነ ኮምፒዩተር/ሰርቨር/ ላይ ሲስተሙ በመጫን በLocal Area Network IP Address አማካኝነት ሥራው የሚመለከታቸው አካላት በሀገረ ስብከቱ ያሉ ኮምፒዩተሮችን በመጠቀም ባሉበት ቦታ ሆነው በንብርት ክፍል ያሉትን ኣላቂ ዕቃዎች ዝርዝር በቀላሉ መቆጣጠር /ማስተዳደር የሚችሉበት ሲስተም ነው፡፡

5. ድረ ገጽ∕ ዌብ ሳይት∕ Web site እና ፌስቡክ ገጽ

ይህ ቴክኖሎጂ በየቀኑ፡-

  1. ወቅታዊ መረጃዎችን/ዜናዎችን/ ለአንባቢዎች ያደርሳል፤
  2. የሀገረ ስብከቱ መንፈሳዊና ማኅበራዊ አገልግሎቶችን ለዓለም ሕዝብ ያሰራጫል፤
  3. በሀገረ ስብከቱ እንዲሁም በአጠቃላይ የኢትዮጵያ ኦርቶዶክስ ተዋሕዶ ቤተ ክርስቲያንን የተመለከቱ መግለጫዎችን፤ ለበዓላት የሚተላለፉ መልእክቶችን እንዲሁም ሌሎች ልዩ ልዩ መረጃዎችን ለሕዝበ ክርስቲያኑ በማቅረብ ላይ ይገኛል፡፡

የኢንፎርሜሽን ቴክኖሎጂ ሥራ አንዴ ተሠርቶ የሚያልቅ ሥራ  ባለመሆኑ  ሀገረ ስብከቱ ተጨማሪና ወቅታዊ የሆኑ የቴክኖሎጂ ውጤቶችን/ሲስተሞችን/ አዘጋጅቶ ሥራ ላይ ለማዋል በዝግጅት ላይ ይገኛል፡፡

በአዲስ አበባ ሀገረ ስብከት ጽ/ቤት ሥር ለሚገኙት የአድባራትና ገዳማት የስብከተ ወንጌል ኃላፊዎች ለሁለት ቀናት ሲሰጥ የቆየው የግንዛቤ ማስጨበጫ ሥልጠና ባማረ መልኩ ተጠናቀቀ

በአዲስ አበባ ሀገረ ስብከት ጽ/ቤት የስብከተ ወንጌልና ሐዋርያዊ ተልዕኮ ዋና ክፍል አዘጋጅነት በትናንትናው ዕለት የተጀመረው የግንዛቤ ማስጨበጫ ሥልጠና መርሐ-ግብር በዛሬው ዕለትም ቀጥሎ የዋለ ሲሆን በመጀመሪያ በነበረው መርሐ -ግብር “ዘመኑን ማወቅ /ግሎባላይዜሽን/ ” በሚል ርዕስ በመ/መ ሳሙኤል እሸቱ ተሰጥቷል።
መምህሩ ስለ ስብከተ ወንጌል ምንነት በሰፊው ያነሱ ሲሆን ስብከተ ወንጌል የወንጌሉን የምሥራች ቃል ማብሰሪያ ብቸኛው መንገድ መሆኑን ገልጸው በጌታችን በአምላካችን በኢየሱስ ክርስቶስ በማመን የሚገኝ የኃጢአት ሥርየትና የዘለዓለም ሕይወት የሚታወጅበት መንገድ መሆኑን አጽንዖት ሰጥተው አብራርተዋል።
አያይዘውም የስብከተ ወንጌል ዋናው ዓላማ የጠፋን መፈለግ፣ያላመነውን ማሳመን፣ፍቅርን መስበክና የእግዚአብሔርን መንግሥት ማስፋፋት እንደሆነ በሰፊው ጠቅሰው የመልእክተኛው አጠቃላይ ዝግጁነት ለተቀበለው መልእክት ታማኝ መሆን፣ የመልእክቱን ክቡርነት መረዳት፣ የላከውን ማንነትና የላከበትን ዓላማ ማወቅ እንዳለበት ገልጸዋል።
በሌላ መልኩ መምህሩ በዘመናችን በስብከተ ወንጌል ዙሪያ እየተስተዋሉ ያሉትን ተግዳሮቶቾ በሰፊው የጠቀሱ ሲሆን ያለውን ክፍፍል፣ድህረ ዘመናዊነት ያመጣውን ጫና፣ እንዲሁም በተለያዩ መንገዶች እየተከሰቱ ያሉትን መከራዎችና ፈተናዎች አብራርተው የመፍትሔ አቅጣጫዎችንም ጠቅሰዋል፤ ከተሳታፊዎች ለተነሣላቸው ጥያቄዎችም መልስ ሰጥተዋል።
በሁለተኛ በነበረው መርሐ-ግብር “የቤተክርስቲያን ተግዳሮትና መፍትሔ” በሚል ርዕስ በመ/ር ዳንኤል ሰይፈ የግንዛቤ ማስጨበጫ የተሰጠ ሲሆን ዘመነ ሐዋርያትንና ዘመነ ሰማእታትን አካተው በየዘመኑ የነበሩትን የቤተክርስቲያን ተግዳሮቶችን ጠቅሰዋል።
አክለውም የቤተክርስቲያንን ዓላማ በማወቅና በመረዳት ዘመኑን የሚዋጅ፣የሚያይ፣የሚያነብና የሚዳስስ አገልጋይ በመሆን፣አገልጋይነትን አምኖ በመቀበል፣ አርዓያ በመሆን፣ በጸሎት ሕይወት በመበርታትና ተግቶ በማገልገል የመፍትሔ አካል መሆን እንደሚገባ ትኩረት ሰጥተው አብራርተዋል።
በመርሐ -ግብሩ ላይ በአርቃቂ ኮሚቴ ባለ አስራ ሁለት ነጥብ የጋራ አቋም መግለጫ ተነቧል።
መርሐ -ግብሩን የመሩት የሀገረ ስብከቱ የስብከተ ወንጌልና ሐዋርያዊ ተልዕኮ ዋና ክፍል ኃላፊ መልአከ ሰላም ዳዊት ያሬድ ለብፁዕ አቡነ መልከጼዴቅ፣ለክቡር ዋናው ሥራ አሰኪያጁ መ/ር አካለወልድ ተሰማ፣ የግንዛቤ ማስጨበጫ ሥልጠና ለሰጡት መምህራን፣ለክፍላተ ከተማ የስብከተ ወንጌል ኃላፊዎችና ለሚዲያ ክፍል አባላት ምስጋና አቅርበው ለአድባራቱና ገዳማቱ የስብከተ ወንጌል ኃላፊዎች መመሪያዎችን አስተላልፈዋል።
በመጨረሻም ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ የግንዛቤ ማስጨበጫ ሥልጠናውን በተመለከተ ንግግር ያደረጉ ሲሆን ያለፈውን የአገልግሎታችንን ሕይወት በመፈተሽ ጠንካራው ጎናችንን የምናስቀጠልበት፣ ደካማው ጎናችንን የምናርምበትና ለመጪው ጊዜ የተሻለ አገልግሎት የምናገለግልበትን እውቀትና ልምድ ያገኘንበት መርሐ -ግብር ነው በማለት አብራርተዋል። አያይዘውም ሀገረ ስብከቱ ቅድሚያ ለስብከተ ወንጌል እንደሚሰጥ ገልጸው የግንዛቤ ማስጨበጫ ሥልጠናው እንዲዘጋጅ ላደረጉት ለሀገረ ስብከቱ የስብከተ ወንጌልና ሐዋርያዊ ተልዕኮ ዋና ክፍል ኃላፊ ለመልአከ ሰላም ዳዊት ያሬድ ያላቸውን አድናቆት አቅርበው በጸሎት ጉባኤውን ዘግተዋል።
ዘጋቢ መ/ር ወንድምአገኝ ደጀኔ
ፎቶ መ/ር ዋሲሁን ተሾመ

ጾምበክርስትናሕይወት

በዚህ ትምህርታዊ ጹሑፍ ስለ ጾም አራት ነጥቦችን እናያለን
1.የጾም ትርጉም
2.ጾም ያስፈለገበት ምክንያት
3.የጾም ጥቅሞች
4.በምን ዓይነት መንገድ መጾም እንዳለብን፡፡
ከላይ ከ1-4 ተራ ቊጥር የተገለጹትን እንደሚከተለው በዝርዝር እናያለን፡፡
1ኛ/ የጾም ትርጉም
ጾም፡- ማለት ክርስቲያን የሆነ ሰው ሁሉ ለተወሰነ ጊዜና ሰዓት ከእህል ከውኃ ተከልክሎ መቆየት ማለት ሲሆን ከሥጋ፣ ከቅቤና፣ ከእንቁላል ደግሞ እንድንጾምባቸው የተወሰኑ የአጽዋማት ሳምንታት እስኪጠናቀቁ የምንከለከልበት ማለት ነው፡፡ /ፍትሕ መንፈሳዊ አንቀጽ 15/
ከዚህም ጋር ጾም ማለት፡- ዓይን ክፉ ከማየት ጆሮ ክፉ ከመስማት፣ አንደበት ክፉ ከመናገር፣ እጅ ክፉ ከመሥራት በአጠቃላይ ሰውነት የኃጢአት ሥራ ከመሥራት የሚገታበት፣ የሚከለከልበት ማለት ነው፡፡ /ቅዱስ ያሬድ/
ጾም፡- ሁለት ዓይነት ነው ይኸውም
ሀ. የአዋጅ ጾም ነው፡- ይህም በስውር ሳይሆን ሁሉ አውቆት ክርስቲያን የሆነ ሁሉ የሚጾመው ጾም ነው፡፡ ይህም መጽሐፍ ቅዱሳዊ መሠረት አለው፡፡ “በጽዮን መለከትን ንፉ ጾምንም ቀድሱ ጉባኤውንም አውጁ” /ኢዩ. 2፡15/
ሰባቱ አጽዋማት የአዋጅ ጾሞች ናቸው፡፡ እነዚህም እንደሚከተለው ተዘርዝረዋል፡፡

  1. የነቢያት ጾም
  2. የገሀድ ጾም
  3. የነነዌ ጾም
  4. ዐቢይ ጾም
  5. የሐዋርያት ጾም
  6. ጾመ ድኅነት /ረቡዕና ዓርብ/
  7. 7.ጾመ ፍልሰታ
    ለ. የግል ጾም ነው፡- የግል ጾም ስንል አንድ ሰው በሠራው ኃጢአት ምክንያት ለንስሓ አባቱ ተናግሮ የሚሰጠው የንስሓ ጾም ሲሆን እንዲሁም አንድ ሰው ስለደረሰበትና በእርሱ ላይ ስለሆነ ነገር ስለሚፈልገው ጉዳይ እግዚአብሔር ተገቢውን መልስ እንዲሰጠው የሚጾመው ጾም ነው፡፡ ለምሳሌ ነቢዩ ዳዊት ልጁ በታመመ ጊዜ ጹሟል፡፡ /2ኛ.ሳሙ. 12፡16/
    ነገር ግን በግል ጾም ጊዜ ጾሙ ይፋ ስላልሆነ ራስን መሰወር እንደሚያስፈልግ ታዟል፡፡
    ይህንንም አምላካችን ኢየሱስ ክርስቶስ እንዲህ ሲል ተናግሯል፡፡ “ስትጾሙም እንደ ግብዞች አትጠውልጉ ለሰዎች ሊታዩ እንደ ጾመኛ ፊታቸውን ያጠወልጋሉና አንተ ግን ስትጾም ለሰዎች እንዳትታይ ራስህን ተቀባ በስውር የሚያይህ አባትህ በግልጥ ይከፍልሃል” /ማቴ. 6፡16-18/ ይህ ቅዱስ ቃል ስለግል ጾም የተነገረ ነው፡፡ በዚህ መሠረት የግል ጾምን ከጿሚው ሰው እና ከእግዚአብሔር ውጭ ማንም ማወቅ የለበትም፡፡
    2ኛ/ ጾም ያስፈለገበት ምክንያት
    ጾም፡- ያስፈለገበት ምክንያት ልጓመ ሥጋ ስለሆነ ነው፡፡ ሰው ሁልጊዜ የጣመ የላመ ምግብ የማይለየውና እንደልቡ እየበላ እየጠጣ ሳይጾም የሚኖር ከሆነ ለኃጢአት ይጋለጣል፡፡ ይህም በፍትሐ ነገሥት ተጽፏል፡፡ “ከመ ያድክም ኃይለ ፍትወት” (ኃይለ ፍትወትን፣ ሥጋዊ ፍትወትን ያደክም ዘንድ ጾም ታዘዘ) /ፍትሐ ነገሥት አንቀጽ 15/ እንዲሁም በምንጾምበት ጊዜ ረሀብን፣ ችግርን እናውቃለን፡፡ “ከመ ያእምር ጸዋሚ ሕማመ ረኀብ ወይምሐሮሙ ለርኁባን” (ጿሚ ሰው የረኀብን ችግር ያውቅ ዘንድና ለተራቡ ይራራ ዘንድ ጾም ታዘዘ) /ፍትሐ ነገሥት አንቀጽ 15/ እንዲሁም “ችግርን የቀመሰ ችግርን ያውቃል” እንዲሉ አባቶቻችን፡፡
    3ኛ/ የጾም ጥቅሞች
    የጾም ጥቅሞች እንደሚከተለው ተዘርዝረዋል፡፡
    1.በጾም መንግሥተ ሰማያትን እንወርሳለን፡፡
    ይህንንም የሰላም አምላክ ኢየሱስ ክርስቶስ “ስለጽድቅ ብለው የሚራቡና የሚጠሙ ንዑዳን ክቡራን ናቸው እነርሱ ይጠግባሉና” /ማቴ. 5፡6/ ሲል ተናግሯል፡፡
    2.በጾም በአገር ላይ የታዘዘው መቅሠፍት ይርቃል፡፡
    የነነዌ ሰዎች የዮናስን ትምህርት መሠረት በማድረግ ሦስት ቀን ጾሙ፡፡ ለእነርሱ የታዘዘው እሳት የዛፉን ጫፍ ጫፍ አቃጥሎ ተመልሷል፡፡ /ትን ዮናስ ም. 3 በሙሉ/
    3.በጾም ሰይጣን ድል ይሆናል፡፡
    “እንዲህ ዓይነት አብሮ አደግ ጋኔን ያለ ጾምና ጸሎት አይወጣም” /ማቴ. 17፡21/ ሲል ጌታችን አምላካችን መድኃኒታችን ኢየሱስ ክርስቶስ በቅዱስ ወንጌል የተናገረው ቃል ሰይጣን በጾም ድል እንደሚሆን የሚገልጽ ነው፡፡
    4.ጾም ከፈተና፣ ከመከራ ያድናል፡፡
    ነቢዩ ዳንኤል በጾም ከአፈ አናብስት (ከአንበሶች አፍ) ድኗል፡፡ /ትን. ዳን. ም. 6 በሙሉ/ ሶስና በጾም ከሐሰት ምስክሮች ድናለች፡፡ /መጽ. ሶስና ም. 1 ሙሉ/ ሌሎችም ቅዱሳን በጾም ከፈተና፣ ከመከራ ድነዋል፡፡
    5.ጾም ዕድሜን ያረዝማል፡፡
    ጾም የመልካም ሥራ ሁሉ መሠረት በመሆኑ ዕድሜን ያረዝማል፡፡
    ታላቁ ጻድቅ አቡነ ገብረ መንፈስ ቅዱስ በገድላቸው እንደተጻፈው ዕድሜልካቸውን በጾም ነው የኖሩት የእናታቸውን ጡት እንኳን አልጠቡም፡፡ በዚህ ዓለም የኖሩት አምስት መቶ ስልሳ ሁለት ዓመት ነው፡፡ ሌሎችም ቅዱሳን በጾም የዕድሜ ባለጸጎች ሆነዋል፡፡
    6.በጾም ምስጢር ይገለጻል፡፡
    አይሁድ አርባ ስድስቱን መጻሕፍተ ብሉያት ቆነጻጽለው ባጠፏቸው ጊዜ ዕዝራ ሱቱኤል አዝኖ አርባ ቀን ጾመ ከዚህ በኋላ ታላቁ መልአክ ቅዱስ ዑራኤል ሰማያዊ መጠጥ በብርሃን ጽዋ (ጽዋዓ እሳት) ለዕዝራ አጠጣው ዕዝራም ምስጢር ተገልጾለት አርባ ስድስቱን መጻሕፍተ ብሉያት ጽፏል፡፡ /መጽ. ዕዝ. ሱቱ. 13፡36-41/ ሌሎችም ደጋግ ሰዎች በጾም ምስጢር ተገልጾላቸዋል፡፡
    7.በጾም ኃጢአት ይሠረያል፡፡
    የነነዌ ሰዎች የዮናስን ትምህርት መሠረት በማድረግ ሦስት ቀን ጾመው ኃጢአታቸው ተሠርዮላቸዋል፡፡ /ትን. ዮናስ ም. 3 በሙሉ/ ሌሎችም ሰዎች በጾም ኃጢአታቸው ተሠርዮላቸዋል፡፡ ይህንንም ታላቁ ሊቅ መሠረተ ቤተ ክርስቲያን ቅዱስ ያሬድ በዜማ ድርሰቱ እንዲህ ሲል ተናግሯል፡፡ “በጾም ወበጸሎት ይሠረይ ኃጢአት” (በጾምና በጸሎት ኃጢአት ይሠረያል)
    8.በጾም ከእግዚአብሔር ጋር መነጋገር ይቻላል፡፡
    ሊቀ ነቢያት ሙሴ አርባ ቀንና አርባ ሌሊት ጾሞ ከእግዚአብሔር ጋር ቃል በቃል ተነጋግሯል፡፡ /ዘዳግም. 9፡9-14/
    ነቢዩ ኤልያስም በጾም ከእግዚአብሔር ጋር ተነጋግሯል፡፡ /1ኛ. መጽ. ነገ. 17፡2/
    9.በጾም ልመናችን ይፈጸማል፡፡
    እስራኤል በጾም የለመኑትን አግኝተዋል፡፡ /1ኛ ሳሙ. 7፡6-14/ ሌሎችም ቅዱሳን በጾም ልመናቸው ተፈጽሞላቸዋል፡፡
    የጾም ጥቅሞች ከላይ ከ1-9 ተራ ቊጥር የተገለጹ ሲሆን ከላይ በርእሱ እንደተገለጸው ጾም የመልካም ሥራ ሁሉ መሠረት ሲሆን በአንጻሩ አለመጾም ደግሞ የኃጢአት ሁሉ መሠረት ነው፡፡ ምክንያቱም ሰው ካልጾመ ለብዙ ኃጢአት ይጋለጣል፡፡
    ለመጀመሪያ ጊዜ ለሰዎች የተሰጠው የጾም ትእዛዝ ነው፡፡ አምላካችን ልዑል እግዚአብሔር አዳምና ሔዋንን፡- ይህን ዕፀ በለስ አትብሉ ሲል ከዕፀ በለሱ ተከልከሉ ጹሙ ማለቱ ነው፡፡ እነርሱ ግን አትብሉ የተባሉትን በሉ ከገነት ወጡ ተጎዱ አለመጾም ያስጎዳል፡፡ በዚህ መሠረት ኃጢአት በመብል ምክንያት ወደዓለም ገባ፡፡
    4ኛ/ በምን ዓይነት መንገድ መጾም እንዳለብን እንደሚከተለው ተገልጿል፡፡
    ጾም፡- ከትርጉሙ እንደተረዳነው ከእህል ከውኃ ከመከልከሉ ጋር ከክፉ ነገር ከኃጢአት መራቅ ስለሆነ ጾማችን ከክፉ ነገር በመራቅ፣ በቅን ልቡና፣ በንጹሕ ልብ መሆን አለበት፡፡ እንዲሁም ነቢዩ ኢሳይያስ “በምትጾምበት ጊዜ እንጀራህን ለተራበ ብትቆርስ ብርሃንህ እንደንጋት ይበራል የዚያን ጊዜ ትጠራለህ እግዚአብሔርም ይሰማሃል ትጮሀለህ እርሱም እነሆ ይልሃል” /ኢሳ. 58፡6-9/ ባለው መሠረት በጾም ጊዜ የጧት ቁርሳችን ለድሆች ከተሰጠ ሰማያዊ ዋጋ እናገኛለን፡፡
    ስለዚህ ጾማችን ከምጽዋት ጋር መሆን አለበት፣ ጾም፣ ጸሎት፣ ምጽዋት አይለያዩምና እነዚህን ገንዘብ እናድርግ፡፡
    በረከተ ሥጋ፣ በረከተ ነፍስ እንድናገኝ ጾማችን በቅንነትና በንጹሕ ልብ ይሁን ጾማችን ከምጽዋት ጋር ይሁን፡፡ ለዚህም እመቤታችን ቅድስት ድንግል ማርያም እንዲሁም ቅዱሳን በአማላጅነታቸው ይርዱን፡፡ ወስብሐት ለእግዚአብሔር
    ከላእከ ወንጌል በእደማርያም ይትባረክ (ቀሲስ) የአዲስ አበባ ሀገረ ስብከት ትምህርት ሥርጭት ኃላፊ